Свобода нимо площадь (Глазов)

Свобода нимо площадь
Свобода нимо площадь
	58°08′27″ с. ш. 52°40′27″ в. д.GЯO
	; Площадьысь Преображенской черк но Вормонлы монумент
Огъя ивортон
Кун	Россия;
	Глазкар
Азьвыл нимъёсыз	Валтӥсь, Соборной, Вузкарон, Хлебной, Базарной
	Медиафайлъёс РувикиМедиа пушкын

Свобода нимо площадь (ӟуч: Площадь Свободы (Глазов)) — Глазкарысь шор площадь. Интыяськемын карлэн исторической радиально-кольцевой планировкаезлэн шораз, Чупчи шур дурын.

Шор площадьысь коркаосты Толстой урам дорысен час бергамъя ладъяло.

Историез

1780-тӥ арын Ватка губернияысь Глазово черкогурт Глазов уезд карлэсь инлыксэ басьтӥз. 1784-тӥ арын ини Иван Лем архитектор карлы нырысетӥ план лэсьтӥз. Планлы инъет чот радианэн-кульчоен (веерен) быдэстоно урамъёс луизы. 1816-тӥ—1817-тӥ аръёсы карысь кварталъёслы но ульчаослы берпуметӥ планировка лэсьтэмын вал^[1].

Кутэм проектъёсъя карлэн шорсюлмыз площадь луыны, отчы радианэн лэсьтэм вань урамъёс вуттыны кулэ вал. Со Валтӥсь площадь нимамын^[1].

1786-тӥ арын площадьын Спасо-Преображенской собор пуктыны кутскизы, лэсьтӥськон ужъёс 1793-тӥ арын йылпумъямын вал. Собор Глазовлэн шорсюлмызлэн архитектурая валтӥсь люкетэз но Удмуртиысь нырысетӥез излэсь ӝутэм вӧсяськон юрт луиз. Соборез ӝутэмзы бере площадьлы мукет ним но лякиськиз — Соборной площадь^[2].

Площадьлэн архитектурая ансамблез XIX даурын азинскиз: Соборной площадь котыре бадӟымесь мерлыко юртъёс но улоно коркаос пуксизы. 1840-тӥ арысен площадьын гужем но толалтэ арлы быдэ ярмаркаос ортчыны ӧдъязы^[2]. Таин валче площадез озьы ик Вузкарон, Нянё (ӟуч: Хлебной), Базарной ниманы кутскизы. XX даурлэн нырысетӥ люкетаз Базарной площадьын карлэн садэз интыяськылӥз.

1958-тӥ арын Чупчи шур вамен автомобиль выж пуктонэн валче но кар урамъёсты отын герӟан вылысь площадез выльдыны огкылэ вуизы. Таин валче Преображенской соборез сэрттӥзы но кар садэз быдтӥзы^[3].

1970-тӥ арын 9-тӥ куартолэзе площадьын Быдӟым Атыкай ожын Вормонлы сӥзем монумент усьтэмын вал (скульпторез — Н. А. Селиванов [ӟуч] (удм., архитекторез — Г. П. Карибов)^[4]. 1970-тӥ аръёс пумын писпуос мерттэмын, тротуаръёс лэсьтэмын но сяськаосын клумбаос ӝутэмын вал^[3].

2011-тӥ арын Свободалэсь площадьзэ нош ик выльдӥзы^[1].

Тодметэз

Площадь котырес выллем лэсьтэмын, со Глазовлэн шорсюлмаз, Чупчи шурлэн паллян пал ярдураз интыяськемын. Свободалэн площадьысеныз карлэн пӧртэм пумъёсаз веерен 7 сюресъёс лэсьтэмын, таос пӧлысь 6-ез урамъёс луо (час бергамъя шундыӝужанысен шундыпуксён пала пусъемын): Толстойлэн ульчаез, Сибирской ульча, Революцилы ульча, Молодая Гвардия ульча, Киров ульча, Чупчи ульча^[2].

Площадь шурлэн бур палыныз автомобиль выжен герӟамын, отын Заречной парк но Иднакар гуӵин интыяськемын. Площадь автотранспортэн котыр кульчоен мынон понна лэсьтэмын^[1].

Юртъёс но сооружениос

Вормонлы монумент;
1 номеро юрт — вузкарон «Пассаж» центр^[1];
3 номеро юрт — Глазовысь ликёро-водочной заводлэн фирменной магазинэз;
4 номеро юрт — вузкарон «Вернисаж» комплекс;
6 номеро юрт — «Семья» ресторан;
6а номеро юрт — «Центральный» магазин;
7 номеро юрт — Глазовысь расчётно-кассовой центр;
7а номеро юрт — «Минутка» кафе;
8 номеро юрт — «Star Kinolux» кинотеатр ;
9 номеро юрт — «Магнит» супермаркет;
10а номеро юрт — Преображенской черк^[5];
13 номеро юрт — сяськаен вузкарон магазин.

Калык транспорт

«Свободалэн площадез» остановка: 1, 2, 3, 4, 5, 6, 7, 8, 10 номеро автобусъёс. Карысь транспорт сяна, шор площадь пыр каре вуттӥсь автобус маршрутъёслэн оглюкетсы но ортче.