Вавожысь шаертодонъя ёрос музей

РФ Лулчеберетъя министерство

Министерство культуры Российской Федерации

Вавожысь шаертодонъя ёрос музей
Кылдытэмын	1991
Адресэз	427310, Удмуртия, Вавож черкогурт, Советской ульча, 27-тӥ юрт
Кивалтӥсез	Ложкина Ирина Геннадьевна
Сайтэз	vavoj-museum.udm.muzkult.ru

Вавожысь шаертодонъя ёрос музей (вакч. — «Вавожысь шаертодонъя ёрос музей» МБУК; ӟуч: Вавожский районный краеведческий музей) — Удмурт Элькунысь лулчеберетъя муниципал бюджет ужъюрт. Удмурт Элькунысь Вавож ёросысь Вавож черкогуртысь Советской ульчаысь 27-тӥ юртын интыяськемын.

Музей 1991-тӥ арын кылдэмын.

Историез

Вавожысь шаертодонъя ёрос музей 1991-тӥ арын кылдытэмын. 1994-тӥ арын, Лулчеберетъя министерстволэн приказэз вылэ пыкиськыса, Вавожысь шаертодонъя ёрос музей Вавож ёрос администрация кие сётэмын вал. Вить ар ӵоже музейлы дуно луись арбериосты утчан но бичан, экспозициосты кылдытон но радъян уж нуиськиз.

1995-тӥ арын, Вормонлы 50 арлы, музейын нырысетӥ экспозициос возьматэмын вал.

2008-тӥ арысен музей Вавож черкогуртлэн шораз XIX даур пумысь кык этажъем вашкала юртын интыяське.

2011-тӥ арын толсурысен музей лулчеберетъя бюджет ужъюрт луэ. Ужъюртлэн быдӟалаез: экспозициосъя но адӟытонъёсъя интыос — 69 м².

Вавожысь шаертодонъя ёрос музее таӵе ёзъёс пыро: 2000-тӥ арысен — Кузебай Гердлэн музей-юртэз но 2015-тӥ арысен — Художествоя галерея.

Музеез кылдытӥсь «Вавож ёрос» муниципал кылдытэтлэн администрациысь лулчеберетъя ёз луэ.

Музейлэн директорез — Ложкина Ирина Геннадьевна.

«Кузебай Гердлэн музей-юртэз» ёз

1893-тӥ арын та юртэз пуктӥзы удмурт тодосчилэн, этнографлэн, кылбурчилэн, удмурт лулчеберетэз кылдытӥсьлэн Кузебай Гердлэн атаез но агайёсыз. 1895-тӥ арын Бадӟым Докъяысь покчиослы школаез усьтон понна ӵыжы-выжыосыз юртэз земстволы сётӥзы. 1895-тӥ арысен юртын покчиослы школа интыяськылӥз. Бадӟым Докъяын корка 1967-тӥ арозь сылӥз, отӥяз сое Партчие (Гурезь-Пудга) нуизы, татын со 1960-тӥ—1980-тӥ аръёсы Партчи школалэн дышетон корпусэз вал.

1998-тӥ арын 13-тӥ инвожое Кузебай Гердлэн музей-юртэз кылдытэмын вал. Музей-юртэз усьтыны кичӧлтонэн потӥсь но сое кылдытӥсь школалэн директорез, УАССР-ысь дано дышетӥсь, К. Герд нимо премилэн лауреатэз Егоров Анатолий Максимович вал.

1998-тӥ арын, Герд вордскем дырысен 100 аръем юбилей ужрадъёсты пусъён нуналэ, музей-юртэз сиё-дано усьтӥзы.

2000-тӥ арын музей Вавожысь шаертодонъя ёрос музейлэн ёзэз луиз. Музейлэн аспӧртэмлыкез со бордын: та юртын дышетскиз, улӥз но 1920-тӥ—1921-тӥ аръёсы дышетӥсьын ужаз Кузебай Герд. Музейын XIX даур пумысь—XX даур кутсконысь Докъя воршудысь потэм удмуртъёслэсь улон-вылонзэс адӟытӥсь этнографияя залъёс ужало.

Музей Партчи гуртысь Школьной ульчаысь 10-тӥ юртын интыяське.

«Кузебай Гердлэн музей-юртэз» ёзын «Кузебай Агайлэн урокъёсыз» музей-дышетон программа ужа. Толэзяз кык пол «Докъя пукон ӝытъёс» клуб люкаськылэ, отысь занятиос киужен выронлы сӥземын.

«Художествоя галерея» ёз

2015-тӥ арын «Художествоя галерея» ёз кылдытэмын вал. Галерея черкогуртлэн шораз, волостьысь правленилэн азьвыл юртаз интыяське.

Галереялэн нырысетӥ экспозициез Сергей Марковлэн «Вавожлэн буёлъёсыз» нимысьтыз адӟытонэз луиз. Кыкетӥ адӟытон Удмурт Элькунысь искусство удысысь дано ужасьлэн, Россиысь Художествоя Академилэн корреспондент ёзчиезлэн Григорий Чайниковлэн «Суредасьлэн лулыз бӧзъёсын улэп» картинаосызлэн копиосынызы экспозиция вал.

«Художествоя галерея» ёз «Палитра» дышетон программаез но «Искусстволэн дуннеез» лекториез нуэ. 2016-тӥ арын галереялэсь фасадзэ ёзысь ӧнерчи Сергей Марков нылпиосын ӵош public-art стилья буяз-чеберъяз.

Художествоя галерея Вавож черкогуртысь Советской ульчаысь 26-тӥ юртын интыяськемын.

Экспозициосыз

Музейын «Вавож черкогуртлэн историысьтыз бамъёс» экспозиция ялан ужа, отын таӵе люкетъёсыз вань:

• «Православной Вавож»;
• «Дышетонлэн но тазалыкез утёнлэн историез»;
• «Вавож — волостьлэн вузкарон шорыз»;
• «ХХ даур кутсконысь черкогуртлэн лулчеберетъя улонэз».

Ужъюрт огдырлы чаклам пӧртэм пумо адӟытонъёс радъя, соос куноосты вордскем палъёслэн историеныз, калык киужен но суредасьёслэн творчествоенызы тодмато.

Музейын куноосты адӟытонъёсы кыскись возьматонъёс но радъясько: мадиськонъёсты но кроссвордъёсты тодыны выро, вашкала шудонъёсты дышето, вашкала йылолъёсын тодматско.

Коллекциосыз

Музейын ваньмыз-ӧвӧлэз 3 870 арбериос утисько, таос пӧлысь 1355-эз — валтӥсь фондысь.

Ужез

2018-тӥ арын экскурсиосъя но туризмъя ёз кылдытэмын вал. Ёзлэн валтӥсь ужпумъёсыз луо: Вавож ёрослэсь брендъёссэ экскурсиосъя но туризмъя услугаосъя рынокын азинтон, Вавож ёрослэн интывылаз пуш но пырон туризмез азинтонъя ужез радъян но ӟеч экскурсиосъя но туризмъя услугаослэсь пуштроссэс-лыдзэс паськытатон.

Музей черкогурт кузя пыдын экскурсиос радъя, валтӥсь синпелетъёсын — XIX даурысь архитекторлэн С. Е. Дудинлэн проектэзъя 1835-тӥ арын пуктэм Свято-Никольской храмен, туннэ нуналозь утиськем вашкала юртъёсын — тодматэ.

Музей адӟытонъёслы презентациос, «Музей уй», «Искусствоосъя уй», «Кадетлэн нуналыз» акциос, крезьгуро но литературая ӝытъёс, графикая, живописья, кибашлы искусствоя пӧртэм мастер-классъёс ортчытъя. Вавожысь шаертодонъя музей «Музей но Школа», «Ӟечбур, музей!» музей но дышетон программаосъя ужа. 2017-тӥ арын сӥзьылысен «Йӧскалык сиён» клуб аслэсьтыз ужзэ нуэ. Клублэн занятиосаз йӧскалык лулчеберетъя кенешонъёс пыр сямъёсын, йылолъёсын тодматско.

Валэктонъёс

Чӧлсконъёс

• Предметы музея [ӟуч]