Дудин, Семён Емельянович
| Семён Емельянович Дудин | |
|---|---|
 | |
| Огъя тодэтъёс | |
| Кунмуртлыкез | |
| Вордӥськем дырыз | 1779 |
| Вордӥськем интыез | |
| Кулэм дырыз | 31-тӥ гудырикошконэ 1825 |
| Кулэм интыез | |
| Ужъёсыз но вормонъёсыз | |
| Дышетскемез | Художествоя академилэн визьнодан училищеез |
| Ужан интыез | Ижкарын (Иж заводын), Ватка губерния |
| Архитектурной стилез | Классицизм[d] |
| Валтӥсь лэсьтосъёс | Ижысь заводлэн валтӥсь корпусэз, Троицкий собор[d], Александр Невский нимо собор но Ижысь пыӵал тӥрлык поттон заводлэн Арсеналэз |
| Градостроительной проектъёс | Ижкарлэн генпланэз |
| Данъетъёсыз |
  |
Семён Емелья́нович Ду́дин (1779-тӥ арын Санкт-Петербургын — 1825-тӥ арын 31-тӥ гудырикошконэ Ижын, Ватка губерния) — Ижысь нырысетӥез зэмос архитектор. Уралысь горнозаводской зодчестволы сюрес усьтӥсь лыдъяське[1][2].
Улон сюресэз
Семён Дудин Н. Ф. Голицын крепостной князьлэн семьяяз 1779-тӥ арын вордӥськиз[2]. 1785-тӥ арын атаез куать аресъем пизэ Художествоя академилэн визьнодан училищеяз сётӥз. Семён учкыса ӟеч суредаськемез понна уно пол нырысетӥ интыосты басьтылӥз, архитектурая проектъёсыз понна кык пол азьвесь медаль утылӥз. Академиын солэн нодъясез но валтӥсь дышетӥсез А. Д. Захаров вал. 1798-тӥ арын Дудин Академиез йылпумъяз, нырысетӥ степенё аттестат басьтӥз, шпага утӥз, ӵапак та дворянъёслэсь куд-ог правооссэс асэстыны луонлык сётӥз[1][3][2].
Эгыр поттонъя дирекциын ужалляз, Н. А. Львов архитектор но поэт дорын тодон-валанзэ муромытӥз, А. Д. Захаров дӥньын Гатчинаын юрттӥсез луыса тыршиз. 1803-тӥ арын программазэ ӟеч быдэстэмез понна Бадӟым зарни медаль утӥз, таин валче сое Италие стажировкае ыстӥзы. 1806-тӥ арын шуркынмонозь со Римын Кампорези но Аспруччи профессоръёс дорын дышетскиз[1][4][2].
Италиысь Санкт-Петербурге берытскемез бере 1807-тӥ арын Казанской соборез лэсьтонэ пыриськиз. Петербургысь художествоя академилэн президентэз но Уралысь кӧня ке заводъёслэн командирзы А. С. Строганов Дудинэз Италиын пыӵалтӥрлык лэсьтон заводлы проект бордын ужамез сярысь тодылӥз. Соин ик А. Ф. Дерябин инженер вазиськем бере, со Дудинэз дэмлаз Ижысь ожтӥрлык поттон заводэз лэсьтыны. Озьы 1807-тӥ арын Семён Емельяновичез Иже командировкае ыстӥзы[1][5][2].
1807-тӥ арын 9-тӥ южтолэзе Семён но Яков Дудинъёс Ижысь заводлэн штатаз кутэмын вал[6]. Татчы вуэмез бере, егит архитектор заводлэсь валтӥсь юртъёсызлы проект лэсьтон борды басьтӥськиз, озьы ик вуоно Иж городлэсь генеральной планзэ суреданы ӧдъяз. С. Е. Дудин Иж заводлэн гинэ архитекторез ӧй вал, со 1808-тӥ арысен артысь Вотка заводэз азинтон сярысь но сюлмаськиз. 1809-тӥ арын 20-тӥ толшоре проект быдэстэмын но иж ожтӥрлыкъёслэн нырысетӥ образецъёсынызы валче Санкт-Петербурге Александр I императорлы ыстэмын вал. Городлэсь генплан лэсьтыкуз, архитектор кварталэн-кварталэн пуктӥськонэз санэ басьтӥз, ульчаосыз кечат-вамат мед ортчозы шуыса чаклаз. Озьы Дудинлэн вордскем Васильевской шормуӵаз урамъёс лэсьтэмын вал[7]. Дудинлэн Ижысь лэсьтэм кибервылъёсаз К. Леду француз архитекторлэсь адӟем каремез шӧдске, кунгож сьӧрын дыръяз ӵапак солэсь дышетскиз[8].
Ижын Дудин нырысь ик Дерябинлы улоно корка пуктӥз. Озьы ик Ижысь пыӵалтӥрлык поттон заводлэсь Валтӥсь корпуссэ ӝутӥз, Уралысь со нырысетӥез трос этажъем промышленной ужъюрт луэ. Со сяна, Ижысь ожтӥрлык поттон заводлэсь арсенал юртсэ (берпуметӥ ужез), горной школа, Троицкой черк, Дун-чылкыт Александр Невскийлэсь соборзэ но мукет объектъёсты лэсьтӥз[9][10].
Дудин Удмуртиын но Ватка палан нырысетӥез зэмос архитектор луиз, со урал классицизмлы кутскон сётӥз. Зодчийлэн 50 пала проектъёсыз тодмо. Ижкарлы ӟеч проект лэсьтэмез но сое быдэстэмез понна пусъемын Вӧсьлыко Анналэн III степенё но Вӧсьлыко Владимирлэн IV степенё орденъёсынызы[11][12].
Берпуметӥ аръёсыз
1824-тӥ арын С. Е. Дудин Новочеркасскысь Войска Донскоголы архитекторе выжтон пумысен куриськыны ӧдъяз. Дудинлэсь кандидатуразэ соку ик умоен лыдъязы, Новочеркасске выжыны мед быгатоз шуыса, солы Иже коньдон келямын вал. Но Ижысь ожтӥрлык поттон заводлэсь арсеналзэ пуктон дыръя 1825-тӥ арын 31-тӥ гудырикошконэ Семён Емельянович шуак кулӥз[13][10].
Семён Емельянович Ижысь Нагорной шайвылэ ватэмын. Али та интыын «Зенит» стадион интыяськемын.
2018-тӥ арын толшоре Удмурт Элькунысь Кузебай Герд нимо йӧскалык музейын ужасьёс Семён Дудинлэсь гу вылысьтыз плитазэ шараязы но сое музее вуттӥзы[14].
Лэсьтэм объектъёсыз
- Ижысь пыӵалтӥрлык поттон заводлэн Валтӥсь корпусэз;
- Ижысь ожтӥрлык поттон заводлэн арсенал юртэз;
- Горной школа;
- Троицкой черк;
- Александр Невскийлэн соборез;
- А. Ф. Дерябинлэн дворецэз (1808-тӥ ар, ӧз утиськы);
- З. О. Лятушевичлэн улон коркаез (али В. Сивков ульчаын интыяськемын, 1807-тӥ ар);
- С. Жереховлэн улон коркаез (али Советской ульчаын интыяськемын, 1807-тӥ ар);
- Пыӵалтӥрлык лэсьтӥсь мастеръёслы 10 казённой корка ӝутӥз (1808-тӥ—1813-тӥ аръёс, ӧз утиське)[11];
- Воскресенской черк (Сарапул).
Александр Невскийлэн соборез
Троицкой черк
Ожтӥрлык поттон заводлэн арсенал юртэз
Ижысь пыӵалтӥрлык поттон заводлэн Валтӥсь корпусэз
.jpg)
Буре ваён
- 1988-тӥ арын 4-тӥ оштолэзе Ижысь горсовет пуктэмъя, С. Е. Дудинлэн нимыз сётэмын Иж тыметлэн шундыӝужан палась ярдурезлы[15].
Валэктонъёс
- ↑ 1 2 3 4 Туганаев, 2008, с. 308.
- ↑ 1 2 3 4 5 Дудин Семён Емельянович / Раскин А. М. // Уральская историческая энциклопедия : [арх. 20 коньывуонэ 2021] / глав. ред. В. В. Алексеев. — 2-е изд., перераб. и доп. — Екатеринбург : Издательство Академкнига; УрО РАН, 2000. — 640 с. — 2000 экз. — ISBN 5-93472-019-8.
- ↑ Шумилов, 1979, с. 6—8.
- ↑ Шумилов, 1979, с. 15—18.
- ↑ Шумилов, 1979, с. 19—20.
- ↑ Шумилов, 1979, с. 21.
- ↑ Шумилов, 1979, с. 31.
- ↑ Шумилов, 1978, с. 17.
- ↑ Шумилов, 1979, с. 38—45.
- ↑ 1 2 Алфёров Н. С. С. Е. Дудин // Зодчие старого Урала (ӟуч): Первая половина XIX века — Екатеринбург: Свердловское книжное издательство, 1960. — С. 47—48. — 215 с. — 3000 экз.
- ↑ 1 2 Туганаев, 2008, с. 309.
- ↑ Главный корпус Ижевского оружейного завода [ӟуч] Эскеремын 2014-12-02 арын
- ↑ Шумилов, 1979, с. 50—51.
- ↑ Бобров И. Могильную плиту архитектора Семена Дудина нашли в Ижевске
- ↑ Ислентьева, Рублёва, 1992, с. 24.
Литература
- Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — 768 с. — 2200 экз. — ISBN 978-5-7659-0486-2.
- Шумилов Е. Ф. Первый зодчий Удмуртии. — Ижевск: Удмуртия, 1979. — 84 с. — 1000 экз.
- Ижысь ульчаос : Сведения о названиях, переименовании улиц, переулков и площадей города. 1918—1991 : Справочник / Сост. Р. А. Ислентьева, А. Л. Рублёва. Рецензенты А. А. Тронин, Е. Ф. Шумилов. — Ижкар : Удмуртия, 1992. — 96 с. — 10 000 экз. — ISBN 5-7659-0375-4.
- Шумилов Е. Ф. Архитектура Ижевска (ӟуч): история развития и перспективы архитектуры, градостроительства и монументального искусства / под ред. А. С. Терёхин, В. П. Орлов — Ижевск: Удмуртия, 1978. — 116 с. — 3000 экз.