Воскресенской черк (Сарапул)
| Православной черк | |
| Воскресенской черк | |
|---|---|
 | |
| 56°29′00″ с. ш. 53°48′13″ в. д.GЯO | |
| Кун | |
| Интыяськемез | Сарапул |
| Епархия | Сарапул |
| Архитектурной стиль | Ӟуч классицизм |
| Архитекторез | С. Е. Дудин |
| Кылдытэмын | 1817 |
| Юртэз пуктэмын | 1817 |
| Инлыкез |
 ОКН № 1810030000 |
| Сайтэз | sarapul.cerkov.ru |
 |
|
 Медиафайлъёс РувикиМедиа пушкын | |
 | Россилэн лулчеберето кылёс лэсьтосъёсыз федерал инлыкен рег. № 181210001530006 (ЕГРОКН) лэсьтос № 1810030000 (БД Викигида) |
Воскресенской черк (Христослэн Улӟемезлы сӥзем черк; ӟуч: Воскресенская церковь (Сарапул)) — Ӟуч православной черклэн Сарапул епархиысь черкез. Удмуртиысь Сарапул карын интыяськемын. Федерал инлыкен утёно архитектурая синпелетъёс пӧлы пыртэмын.
Историез
1817-тӥ арын Сарапулын Андрей Васильевич Дуров городничийлэн кичӧлтэмезъя Христослэн Улӟемезлы сӥзем черк пуктэмын вал. Сое ӝутыны Григорий но Фёдор Ижболдин купечъёс коньдон висъязы. Архитекторез — Семён Емельянович Дудин. Со аре ик черк вӧзы шайвыл усьтӥзы. Воскресенской шайвыл черк Вознесенской собор борды юнматэмын вал, но 1894-тӥ арын 22-тӥ инвожое Вӧсьлыко Синод черкын нимысьтыз приход кылдытон пумысен указ поттӥз. 1917-тӥ арозь Воскресенской черклы попечитель сямен юрттылӥз но сое чакласа возиз Ижболдинъёслэн семьязы. 1909-тӥ—1910-тӥ аръёсы Ольга Ивановна Ижболдина но солэн кузпалыз Дмитрий Григорьевич Ижболдин коньдон висъямен, черклэн уйпалаз придел пуктэмын вал, сое дун-чылкыт апостолъёс радэ ӝутэм Ольга княгинялэн нимыныз вӧсязы[1][2].
1930-тӥ аръёсы Воскресенской шайвыл музъемен ӵошкатэмын, колокольняысь гырлыез куштэмын вал, но черк быдэс кылиз[1]. Быдӟым Атыкай ож пуромемлэсь кӧня ке азьвыл черкез Ӟуч православной черкысь выльдӥськон понна дурбасьтӥсьёс киултӥзы. Ӝоген вӧсяськон юртэз пытсазы. Ож вакытэ Феодор Соколов баӵко черкез выльысь усьтӥз[3].
1942-тӥ арын коньывуонысен 1944-тӥ арын толшорозь Воскресенской черк Обороналэн фондаз 23 550 манет келяз, фронтовикъёслэн семьяоссылы 15 сюрс манет тыр коньдон висъяз. Оскисьёс (ӟуч: прихожане) больницаослы но госпитальёслы, озьы ик сиротаослы юрттылӥзы[2]. 1963-тӥ арысен 1991-тӥ арозь Воскресенской черк Сарапулын огназ ужаз[4].
2019-тӥ арын «Россиысь лулчеберет (2012—2018)» нимысьтыз федерал программа улсын черкез тупатъян-выльдон ужъёс борды кутскизы[2].
Архитектураез
Черк азьвыл классицизм амалъя пуктэмын. Юртэз золтэм кирос выллем лэсьтэмын. Шундыӝужан (алтарь), уйпал (выль придел) но лымшор люкетъёсыз котырес лэсьтэмын. Шундыпуксён ласянь черке пырон (ӟуч: притвор) но сиськон инты (ӟуч: трапезная) ӝутэмын. Черке пырон вадьсы кык ярусэн гырлы ӝугон лэсьтэмын, сое ӝыныё сфера выллем купол йылса, вылаз ик ӝужыт шпилен кирос юнматэмын. Вӧсяськон юртлэн валтӥсь люкетэз ӝыныё сфера выллем лэсьтэм куполэн йылсаське, вылаз главкаен тямыс сэрго люкетэз (ӟуч: восьмерик) интыямын[1].
Валэктонъёс
- ↑ 1 2 3 Екатерина Королёва Воскресенская церковь г. Сарапула [ӟуч] cyberleninka.ru. Эскеремын 03-11-2025 арын
- ↑ 1 2 3 В Сарапуле начали реставрировать Воскресенскую церковь [ӟуч] izvestiaur.ru (19-06-2019). Эскеремын 03-11-2025 арын
- ↑ История [ӟуч] sarapul.cerkov.ru. Эскеремын 03-11-2025 арын
- ↑ Церковь Воскресения Христова [ӟуч] МБУК «Централизованная библиотечная система» города Сарапула. Эскеремын 03-11-2025 арын