Сарапулысь Историяя но архитектурая чеберлыко музей-заповедник
РФ Лулчеберетъя министерство
| Сарапулысь Историяя но архитектурая чеберлыко музей-заповедник | |
|---|---|
 | |
| Интыяськемын |
 Россия |
| Адресэз | Удмурт Элькун, Сарапул, Первомайской урам, 68-тӥ номеро юрт |
| Кивалтӥсез | Креклина Сабина Валерьевна |
| Сайтэз | museumsarapul.ru |
 |
|
Историяя но архитектурая чеберлыко музей-заповедник (ӟуч: Сарапульский историко-архитектурный и художественный музей-заповедник) — Сарапулысь музей комплекс. Солэн пушпӧлаз: Историяя но шаертодонъя музей, «Башенинлэн юртъерез» чеберлыко адӟытон комплекс, Н. В. Мельниковлэн музей-юртэз но «Мощевитинлэн юртъерез» нылпи музей центр[1].
Историез
Музей кылдытэмын 1909-тӥ арын. Нырысь-валысь нылкышно гимназилэн кык висъетъёсаз интыяськиз. Сое кылдытон бордын тыршизы земской управалэн тӧроез Михаил Семёнович Тюнин но со вакытысь мукет тодмо тодосчиос но культура удысын ужасьёс. Соослэн асьсэлэн бичам коллекциосысьтызы материалъёс вылын нырысетӥ экспозициез радъязы, кылсярысь: Леонид Круликовский аслэсьтыз экзотической бубылиосын аспӧртэмлыко коллекцизэ сётӥз, Фёдор Стрельцов — нумизматической коллекцизэ, этнограф но фольклорист Николай Ончуков начал этнографилы сӥзем материалъёс люканы кутскиз, Лев Беркутов — археологиен герӟаськем материалъёс, дышетӥсь но шаерчи Николай Блинов аслэсьтыз библиотеказэ кузьмаз. Со арын ик усьтӥськиз нырысетӥез адӟытон.
.jpg)
1911-тӥ арысен музей аслэсьтыз «Известия Сарапульского музея» нимо газетсэ поттыны кутскиз[2].
1921-тӥ арысен музей кык этажъем кирпич юртэ выжтэмын. Со юрт 1914-тӥ арын пуктыны кутскемын вал, Николаевской училищелы шуыса[3].
1923-тӥ арын Прикамье шаерысь Окружной тодос музей шуыса нимамын[4].
1924—1926-тӥ аръёсы музее тодмо ӟуч художникъёслэн ог ньыльдоно пала ужъёссы вуттэмын, соос пӧлын: «Шунды пуксён» И. К. Айвазовскийлэн, «Пияшлэн йырыз» М. В. Нестеровлэн, «Француз карлэн тусыз» А. П. Боголюбовлэн, «Итальян пейзаж» Ф. А. Бронниковлэн, «Возьвыл сяськаос» С. П. Кувшинниковалэн но мукет авторъёслэн.
1939—1946-тӥ аръёсы Сарапулын интыямын вал Кузебай Гердэн кылдытэм Удмурт Элькунысь Йӧскалык музей, соин со вакытэ Сарапулысь музей кун музей шуыса лыдъяськиз[4].
Быдӟым Атыкай ож вакытэ музейын Ленинград котырысь музей-дворецъёслэн котырзы утиськиз (отчы 90 000 пала арбери ваемын вал)[5]. Тылож йылпумъяськем бере музей Сарапулысь шаертодонъя музей луиз[2].
1984-тӥ арын Шор Прикамьелэн историезлы но культураезлы сӥзем музей шуыса нимамын[6].
1987-тӥ арын музейлэн нырысетӥ филиалэз усьтӥськиз — Н. В. Мельниковлэн музей-юртэз[2].
1995-тӥ арын П. А. Башенинлэн карсьӧр юртъераз музейлэн чеберлыко адӟытон комплексэз усьтӥськиз[7].
2019-тӥ арын ужъюртлы музей-заповедник инлык сётэмын[4]. Со арын ик 7-тӥ инвожое музей улсын кылдытэмын «Купецлэн чай юонниез» — вашкала чай юонлы сӥзем пичияк музей.
Солэн 21 коллекцияз 250 сюрслэсь трос музей арбери утиське. Тужгес вашкалаосыз пӧлысь — Вашкала Египетысь культовой (ушебти) фигуркаос, Наполеоновской гвардилэн знамяез (ХIХ даурлэн пумыз — ХХ даурдлэн кутсконаз), нырысьсэ типографиын печатлам вашкала книгаос пӧлысь одӥгез — 1595-тӥ арысь учебной Евангелие, 1850-тӥ аръёсысь дагерротипъёс, Сарапуллэн 1912-тӥ арын гожтэм кинохроникаез.
2020-тӥ арын музей-заповедниклэн кӧня ке турист проектъёсыз «Маршрут года −2020» VII огъяросси турист премилэн вормисьёсыз радэ потӥзы[8].
Валэктонъёс
- ↑ Муниципальное бюджетное учреждение культуры "Сарапульский историко-архитектурный и художественный музей-заповедник"
- ↑ 1 2 3 Сарапульский историко-архитектурный и художественный музей-заповедник [ӟуч] museumsarapul.ru.
- ↑ Сарапульский историко-архитектурный и художественный музей-заповедник [ӟуч] Культура.РФ.
- ↑ 1 2 3 История Сарапульского историко-архитектурного и художественного музея-заповедника Муниципальное образование "Город Сарапул".
- ↑ Петергоф поздравляет Сарапульский историко-архитектурный и художественный музей-заповедник с 110-летием Петергоф.
- ↑ Удмурт АССР-ысь Министръёслэн Кенешсылэн 1984-тӥ арын 16-тӥ толшоре кутэм 8-тӥ номеро Постановлениез
- ↑ Жемчужина Прикамья отмечает юбилей
- ↑ Всероссийская премия туристических маршрутов. Russian Travel Tour Awards. Объявлены итоги VII Всероссийской туристской премии «Маршрут года»
Литература
- Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — С. 490. — 768 с. — 2200 экз. — ISBN 978-5-7659-0486-2.
