Мощевитинлэн юртэз
| Мощевитинлэн юртэз | |
|---|---|
 | |
| Юрт сярысь ивортон | |
| Интыяськемез | Сарапул |
| Кун | |
| Архитекторез | тодмо ӧвӧл |
| Заказчикез | Прокопий Петрович Мощевитин |
| Лэсьтӥськон йылпумъямын | 1904 |
| Этажъёслэн лыдзы | 2 |
 |
|
Мощевитинлэн юртэз (ӟуч: Дом Мощевитина) — Удмуртиысь Сарапулын кирпичлэсь улыно-вылыно юрт. 1904-тӥ арын пуктэмын. Лулчеберет удысысь улосэн утёно синпелетъёс пӧлы пыре[1]. Интыяськем адресэз: Трудлэн ульчаез, 3-тӥ юрт.
Историез
1899-тӥ арын Сарапулын кышкыт тылпу гомаз, карысь быдэс ёросэз быдтӥз. Василий Мощевитинлэн семьяеныз азьвыл улэм коркаез интые, солэн Прокопий Петрович Мощевитин выныз 1904-тӥ арын выль вӧл-вӧл корка ӝутӥз. Выль юрт горд кирпичлэсь пуктэмын, 1-тӥ этажын азбаре нуись арка выллем пырон интыез вал. Корка котыре складъёс, кеносъёс пуктӥзы. Лымшор ласянь Мощевитинлэн коркаез борды Пешехонов купечъёслэн юртсы пуксиз. 1899-тӥ арын тылпу но сое сутӥз, озьы ке но ӝоген коркаез выльдӥзы[2].
1909-тӥ арын Мощевитин юртсэ Императорской ӟуч крезьгуро обществолы сётӥз, отын Ватка губерниын нырысетӥосыз крезьгуро классъёс усьтэмын вал. 1917-тӥ арозь коркан кунокуа номеръёс лэсьтэмын вал[2].
Революция бере Мощевитинлэсь юртсэ асэстӥзы. Нырысь отчы потребительской обществолэн контораосыз интыяськизы. 1960-тӥ аръёсы отчы 1 номеро крезьгуро школа выжиз. Школалэн аслаз выль юртэз кылдэм бере, купечъёслэн юртъеразы суредаськонъя школа интыяськиз. 2024-тӥ арысь ивортонъёсъя, юртын искусствоосъя 3 номеро нылпи школа ужа[2].
Удмурт АССР-ысь Министръёслэн Кенешсылэн 1991-тӥ арын 25-тӥ южтолэзе юнматэм постановлениезъя юртэз лулчеберет удысысь улосэн утёно синпелетъёс пӧлы пыртӥзы[3].
Архитектураез
Сарапулысь Мощевитинлэн коркаез — вальма амалъя лэсьтэм липето кык этажъем юрт. Фасадэз пӧртэм суредъёсын чеберъям ӝужыт аттикен лэсьтэмын. Урдэсъёсаз дурем кенерлэсь тумбаос юнматэмын вал, но соос туннэ нуналозь ӧз утиське. Аркаез шор осезлэсь бур пала интыямын, со юртлэсь композицизэ ассиметричной каре. Нырысетӥ этажез чепыллям сандрикъёслэсь наличникъёсын чеберъямын. Этажъёсты тубато карниз висъя, укно янакез ӝажы выллем огъя гутёосын ӵош паськыт кускерттон выллем адске. Кыкетӥ этажлэн пыронъёсыз лапег янакен, пелё, висъяськись сандрикъёсын наличникъёсын чеберъямын[2].
Юртэз лэсьтэм архитекторлэн нимтулыз ужкагазъёсын пусйымтэ.
Гудӥськон
Пешехоновъёслэсь бускель юртъер котырысьтызы куакъёсты сузякузы, ужасьёс бадӟым кирпичъёслэсь тырем радъёс борды мырӟиськизы. Та учыр бере Шор Прикамьелэн историезъя но лулчеберетэзъя музей кичӧлтэмъя отын археологияя эскеронъёс ортчытэмын вал, озьы коркалэсь быдэсак утиськем нырысетӥ этажзэ шараяны быгатӥзы. XIX даурлэн пумысьтыз Сарапул карлэн планъёсызъя, та интыын Мартьянов купечлэн вузкарон палаткаез интыяськылӥз — городысь нырысетӥез излэсь лэсьтос. Гудӥськон дыръя со вакытысь купечъёслэн но мещанъёслэн улонысьтызы трос арбериос шедьтэмын вал: юртъер котырын кутӥськись пӧртэм тӥрлык, быдэс шыкыс тыр туй котёлокъёс, фарфор но пияла посудаосын корт ящикъёс. Тужгес дуно луо корка гуръёсысь шараям ожгарчиосты возьматӥсь пӧечи изразецъёс[2][4].
Валэктонъёс
- ↑ История детской школы искусств № 3 Сарапула МО "Город Сарапул".
- ↑ 1 2 3 4 5 Объект культурного наследия «Дом Мощевитина, 1904 г.» МО "Город Сарапул".
- ↑ Дом Мощевитина, 1904 г. kartarf.ru.
- ↑ Дом сарапульского купца Мощевитина/здание художественной школы – Аудиогид от МБУК "Сарапульский музей-заповедник" [ӟуч] tmatic.travel.
Литература
- Лигенко Н. П. Предпринимательские династии Камско-Вятского региона XVIII—XX вв. // Монографическое исследование. Научное издание. Отв.ред. и сост. — д.и.н. Лигенко Н. П.; Рец. — д.и.н., профессор Бехтерев С. Л., д.и.н., профессор Тронин А. А. — Ижевск : УИИЯЛ УрО РАН. — Ижевск, 2008. 260 с.
- Решетников Н. Л. Топография старого Сарапула. — Сарапул : Сарапульская тип., 2008. 224 с. — ISBN 978-5-901304-25-9