Башенинлэн юртъерез
| «Башенинлэн юртъерез» чеберлыко адӟытон комплекс | ||
|---|---|---|
 | ||
| Кылдытэмын | 1909-тӥ арын | |
| Адресэз | Удмурт Элькун, Сарапул кар, Достоевский нимо урам, 60-тӥ номеро юрт | |
| Сайтэз | museumsarapul.ru/ru/ | |
|
|
||
 |
||
Башенинлэн юртъерез — Сарапулысь история но архитектурая чеберлыко музей-заповедник (Удмурт Элькун). Федерал инлыкен архитектурая синпелет.
Историез
Юртъер пуктэмын 1909-тӥ арын Сарапулысь кар тӧролы Павел Андреевич Башенинлы. Интыяськемын сарапуллэн нюлэсо интыяз[1].
1910-тӥ арын южтолэзе, Павел Башенин дырызлэсь вазь улонысь кошкем бере, солэн юртъерез Пётр нимо вынызлы кылиз. 1917-тӥ арын юрт национализировать каремын вал[2].
Пӧртэм аръёсы татын пӧртэм ужъюртъёс интыяськылӥзы: куштэм нылпиослы санаторий, Вотскй комиссариат, кар эмъяськоннилэн хирурги ёзэтэз но туберкулёзэз эмъян диспансер, берлогес юртъерез 1-тӥ номеро нылпи кун санаторийлы сётэмын вал. 1980-тӥ аръёслэн пумаз санаториез мукет юртэ выжтӥзы, собере кӧня ке дыр ӵожелы Башенинлэн юртэз кузётэк кылиз[1].
Архитектураез
Юртлы проект лэсьтӥз Павел Трубников — Мускоысь ужудыссэ кутскись егит архитектор. Лэсьтослэн вань ёзлюкетъёсыз модерн стилья быдэстэмын[1].
Асимметричной кабъем юртэз излэсь но кирпичлэсь ӝутӥзы, педласянь пулэсь лэсьтэм выллем адӟиське. Отын кӧня ке балконэз, верандаосыз, эркеръёсыз, смотровой площадкаен башняез вань. Ваньмыз готика амалэн чебермамын. Лэсьтӥськонын корт бетон конструкциос кутэмын, тыл но ву пыртэмын, эстӥськон сӧзнэт радъямын. Ас вакытаз со ваньмыз выль амалэн лыдъяськиз но карысь лэсьтӥськонын нырысьсэ кутӥськиз[1][3].
Туала тусыз
1991-тӥ арын Башенинлэн юртъерез Шор Камкотырлэн История но лулчеберетъя музеезлы сётэмын вал (али дыре Сарапулысь История но архитектурая чеберлыко музей-заповедник). Со юртэз чеберлыко адӟытон комплекслы пӧрмытон понна, отын ньыль ар ӵоже тупатъян-выльдон ужъёс нуиськизы. Усьтӥськиз 1995-тӥ арын[1]. Соку ик юртъер федерал инлыкен архитектурая синпелетъёс пӧлы пыртэмын вал[4][2].
Со интыын, Башенинлэн улон юртэз сяна, гуртпӧр пуктӥськемъёсыз, гидэз, гаражез, изъёслэсь лэсьтэм сюресэз, лысо писпуосын паркез но азьвыл мерттэм будосъёсыз кылемын[1][5].
Чеберлыко адӟытон комплексын озьы ик кылемын Иван Айвазовскийлэн, Федот Сычковлэн но Сведомский вынъёслэн зэмос луись азьвыл аръёсы гожтэм суредъёссы[3]. Шедьтыса берентэмын Гарднерлэн кофе юон сервизэз, Сарапулысь купецлэн Зылевлэн 12 пуконлэсь чеканить карем гарнитурез, карлэн тӧроез Пётр Башенин но солэн семьяез сярысь люкам материал[3].
Музее лыктэмъёс понна нимысьтыз экскурсиос ортчытӥсько. Озьы ик юртъер котырын огъя кар шулдыръяськонъёс, театрализованной представлениос, конференциос но семья кылдытон ужрадъёс ортчыло[1].
2019-тӥ арын 7-тӥ инвожое Комплекслэн азбараз, Башенинлэн азьвыл флигеляз «Купецлэн чай юонниез» — вашкала чай юонлы сӥзем пичияк музей усьтэмын.
2022-тӥ арын 24-тӥ куартолэзьысен, реставраци ужъёс кутскемен[6][7], музеын ортчись ужрадъёслэн лыдзы кулэсмытэмын[5].
Валэктонъёс
- ↑ 1 2 3 4 5 6 7 Сарапульский историко-архитектурный и художественный музей-заповедник [ӟуч] Сарапульский историко-архитектурный и художественный музей-заповедник.
- ↑ 1 2 Обухова А., Ерастов В. Дача Башенина - ярчайшее российское провинциальное здание в стиле модерн [ӟуч] Живое наследие.
- ↑ 1 2 3 Сабина Креклина Дача Башенина Ижлайф.
- ↑ Дача Башенина [ӟуч] pro-sarapul.ru.
- ↑ 1 2 Художественно-выставочный комплекс «Дача Башенина» [ӟуч] Культура.РФ.
- ↑ Дана Солнцева В Сарапуле завершают реставрацию Дачи Башенина [ӟуч] Комсомольская правда-Ижевск.
- ↑ Жители Сарапула: «После реставрации дача Башенина станет новоделом» (08.09.2022). Эскеремын: 31 пӧсьтолэзе 2024 арын.
Литература
- Конюхова В. С. Павел Андреевич Башенин: семья, дела, город: [сборник] / [автор предисл. С. В. Креклина; худож. редактор Ю. Г. Двоеглазова; фото Е. Г. Караванова и др.]. — Сарапул, 2018. — 239 с.