Тодон-валан басьтон нунал

Материалъёс басьтэмын Б.Н. Ельцин нимо библиотекаысь

Та гожтосын Б.Н. Ельцин нимо Президент библиотекалэн фондысьтыз материалъёс кутэмын

Рос-прос учке

Тодон-валан басьтон нунал
Тодон-валан басьтон нунал Кисловодскысь 17-тӥ номеро школаын (2024)
Юнматэмын	СССР-ысь Вылӥ Президиумлэн 1984-тӥ арын 15-тӥ инвожое гожтэм 373-11-тӥ номеро косэтэныз
Дырыз	1-тӥ куарусёнэ
Сям-йылолъёс	школьной форма сяська керттэт
Герӟаськемын	праздниклы сӥзем линейка
Медиафайлъёс РувикиМедиа пушкын

Тодон-валан басьтон нунал (яке 1-тӥ куарусён) (ӟуч: Де́нь зна́ний ) — арлы быдэ 1-тӥ куарусёнэ пусйиськись кун праздник. Сӥземын выль дышетскон арлэн кутсконэзлы. Пусйиське Россиын но азьвыл СССР-лэн куд-ог кунъёсаз. Юнматэмын СССР-ысь Вылӥ Кенешлэн Президиумезлэн 1984-тӥ арын кутэм «Праздникъёс но буре ваён нуналъёс» сярысь косэтэн.

Историез

1-тӥ куарусёнлэн праздник инлыкез вашкала дырпус сямъёсын герӟаськемын. Византиын асьме вапумысь IV даурын Нырысетӥ Никейской соборлэн решениезъя арлэсь кутсконзэ 1-тӥ куарусёнэ пусйылыны кутскизы. Русьын византи амалъя нырысьсэ Выль арез 1492-тӥ арын пумитазы — 1-тӥ куарусёнэз арлэн кутсконэз чотын юнматӥз быдӟым князь Иван III . Со дыре ик Россиысь гуртъёсын 1-тӥ куарусён бусы ужъёсты йылпумъямен но выт бичанэн герӟаськемын вал. Нош праздник нуналэз Семон нунал шуыса нимазы; со нуналлы улон коркаоссэс но площадьёсты писпуосын, лентаосын но весьёсын чебермаллязы.

Пётр I вакытэ дышетскон арлэсь кутсконзэ 1-тӥ толсурлы выжтӥзы, нош дышетскыны сӥзьыл ик кутскылӥзы: нылпиослы гужем шутэтскыны куазь туж тупамон луэ, нош сӥзьыл шутэтскыны кезьытгес ини. 1804-тӥ арын «университетъёслы улсатэм дышетон ужъюртъёслэн уставзыя» гимназиосын дышетскон 1-тӥ гудырикошконысен кутскыны но 1-тӥ пӧсьтолэзе йылпумъяськыны кулэ вал, «июль есть месяц вакансии или роздыха» шуыса пусъемын вал отын. Озьы ке но, 1930-тӥ арозь Россиын дышетскон арез кутсконлэн огъя юнматэм дырыз ӧй вал: гимназиос но калык училищеос гудырикошконысен кутскылӥзы, нош гуртъёсысь школаос — бусы ужъёсты йылпумъям бере гинэ. 1930-тӥ арын Калык комисаръёслэн советсы 8-10 аресъем нылпиосты школае сӥзьыл басьтыны косӥз. Дышетскон арез кутсконлэн огъя дырыз СССР-ысь Совнаркомлэн но ВКП (б)-лэн Шор комитетэзлэн 1935-тӥ арын 3-тӥ куарусёнэ гожтэм постановлениеныз юнматэмын, со ужкагазын дышетсконэз 1-тӥ куарусёнэ кутсконо шуыса пусъемын вал.

1980-тӥ аръёслэн шорозяз 1-тӥ куарусён огшоры ужан но дышетскон нунал гинэ вал. РСФСР-ысь дано дышетӥсь Фёдор Брюховецкий сое праздник нуналлы пӧрмытыны но школаосын нылпиос понна сӥё-дано ужрадъёс ортчытъяны дэмлаз. Озьы, 1984-тӥ арын 15-тӥ инвожое СССР-ысь Вылӥ Кенешлэн Президиумез «Праздникъёс но буре ваён нуналъёс» сярысь косэт поттӥз, кудаз 1-тӥ куарусён Тодон-валан басьтон нунал шуыса ялэмын вал. Со дырысен та нуналэ СССР-ысь вань школаосын праздниклы сӥзем линейкаос, тематической занятиос но дышетӥсьёсын тодматсконъёс ортчытъяны кутскизы. СССР куашкам бере со сям кылиз: 1-тӥ куарусён Россиын но но тросаз азьвыл Совето союзлэн республикаосаз нырысетӥ дышетскон нуналлы сӥзем праздникен лыдъяське.

Праздникез пусъён

Россия

Тодон-валан басьтон нуналлэн валтӥсь люкетэз — сӥё-дано линейка. 1-тӥ куарусёнэ ӵукна дышетскисьёс школа азбаръёсазы люкасько; Россилэн гимнэз чузъяськемъя ӝутӥське росси флаг, директор но дышетӥсьёс нылпиосты выль дышетскон арлэн кутскеменыз ӟечкылало. Дас одӥгетӥ классын дышетскись, нырысетӥ классэ мынӥсь нылпиез пельпум вылаз пуктыса, гырлыен нырысетӥ звонок сётэ, со дышетскон арез усьтонлэн тодметэз луэ. Линейкаосын нылпиос кылбур лыдӟо, кырӟанъёс кырӟало, со школаын дышетскем но ожъёсын быремъёслы сӥзем синпелет азе сяськаос поно.

Россилэн Азьмуртэз Владимир Путин Тодон-валан басьтон нуналэ Курган карысь 7-тӥ номеро школае вуылӥз (2013)

Линейка бере пиналъёс классной руководителенызы пумисько, патриотизм, кышкыттэмлык но дунлыкъёс сярысь верасько. 2022-тӥ арысен росси школаосын котькуд вордӥськонэ урокъёс азьын «Кулэез сярысь вераськонъёс» внеклассной урок ортче; нырысетӥез, котьку сямен, Тодон-валан басьтон нуналлы сӥземын луэ.

Университетъёсын торжественной линейкаос шергес ортчыло; со интые нырысетӥ курсэ лыктэмъёс понна студентэ пыртон ужрад ортчытъяло, дышетӥсьёсын но дышетсконниен тодмато.

Мукет кунъёс

Япониын дышетскон ар оштолэзе кутске но мукет араз южтолэзе йылпумъяське; Лымшор Кореяын южтолэзе дышетскыны кутско. Франциын нылпиос куарусёнлэн кутсконаз школае мыно, котькуд ар дырзэ Калыкез дышетонъя министерство тупатэ. Германиысь федерал улосъёсын дышетскон арез пӧртэм дыре кутско: гудырикошконлэн пумысеныз коньывуон толэзьлэн шорозяз. США-ын но огъя юнматэм дырыз ӧвӧл: дышетон округъёсын школаос пӧртэм дыре дышетскыны кутско: пӧсьтолэзьлэн пумысеныз куарусёнлэн пумозяз. Австралиын нылпиос толшор пумын яке тулыспаллэн кутсконаз школае мыно.

Сям-йылолъёс

Тодон-валан басьтон нуналлэн валтӥсь тодметъёсыз — школьной ранец, звонок но торжественной линейка. Нылъёс та нуналэ пуштрес тӧдьы бантъёс но дэремъёс дӥсяло, пиос — йӧно костюмъёс. Ӵемысь 1-тӥ куарусёнэз «тӧдьы бантъёслэн но астраослэн нуналзы» — шуыса нимало. Школьникъёс но соослэн анай-атайёссы дышетӥсьёслы сяськаос кузьмало, выль дышетскон арен ӟечкылало. 2014-тӥ арысен Россиын «Сяськаос интые нылпиос» акция вӧлмытӥське. Со ужрад улсын сяськаослы быдтэм уксё анай-атайтэк кылем но кулэяськись нылпиослы юрттэт сётонлы кошке.

Кун, кар но ёрос кивалтӥсьёс но мукет бадӟым адямиос, дышетсконниосы вуылыса, дышетӥсьёсты но дышетскисьёсты Тодон-валан басьтон нуналэн ӟечкылало

Валэктонъёс

Литература

• 
• Григорьев В. В. Исторический очерк русской школы // М.: Товарищество Типография А. И. Мамонтова. — 1900.
• Пластун Л. День Знаний как эффективный информационный повод для антиабортных акций // Здоровье – основа человеческого потенциала: проблемы и пути их решения. — 2010. — № 1.
• Шемраев С. Н. Всероссийский день знаний // Вестник Белгородского юридического института МВД России. — 2006. — № 2.