Дышетскон ар
| Дышетскон ар | |
|---|---|
 «Протон» нимо школаын 1-тӥ куарусёнлы сӥзем линейка, 2017-тӥ ар | |
| Кутӥськон ӧрыз | Дышетон |
Дышетскон ар (ӟуч: Уче́бный год) — дышетонниосын дышетон ужлэсь кыстӥськемзэ возьматӥсь огдырлыко вадес[1].
Валатон
«Дышетскон ар» — со ар ӵоже кыстӥськись дышетон процесс.
Дышетскон арез бӧрсьысь ортчись календарной аръёсын пусъё. Кылсярысь, «2025/2026-тӥ дышетскон ар»[2].
Дышетскон арлэн кыстӥськемез
Дышетскон ар дуннеысь кунъёсын пӧртэм дыре кутске но йылпумъяське. Со вакыт кунлэн катрадлыкеныз юнматэмын. Дышетскон арлэсь кутскон но йылпумъяськон дырзэ дышетон юрт ӵемысь ачиз тупатэ[3].
Европа кунъёсын гудырикошконэ — куарусёнэ дышетскыны кутско но куартолэзе — инвожое йылпумъяло. Кылсярысь, Даниын, Финляндиын, Швециын школаос гудырикошкон толэзьлэн шорысеныз ужаны кутско, Австриын, Франциын, Испаниын, Италиын — куарусёнлэн нырысетӥ ӝыныяз. Германилэн но Швейцарилэн пӧртэм улосъёсаз дышетскон ар гудырикошконлэн шораз — куарусёнлэн пумаз кутске[3][4].
США-ын но Канадаын огъя стандарт юнматэмын ӧвӧл. Дырзэ штатлэн/провинцилэн катрадлыкез тупатэ. Дышетскон ар озьы ик сӥзьыл кутске но гужемлэн кутсконаз йылпумъяське[3].
Латин Америкаысь куд-ог кунъёсын тулыспалэ дышетскыны кутско (Аргентина, Бразилия, Коста-Рика). Чили-ын — 1-тӥ южтолэзе, Кубаын но Мексикаын — куарусёнлэн шорысеныз.
Австралиын но Новой Зеландиын нылпиос школае мыно толшорлэн пумаз — тулыспалэ[3].
Африка-ысь кунъёсын дышетскон дыр пӧртэм луэ. Кылсярысь, ЮАР-ын но Танзаниын толшоре дышетскыны кутско, Суданын — южтолэзе, Алжирын, Тунисын, Египетын, Мароккоын, Эфиопиын, Сомали-ын, Нигериын — куарусёнэ.
Азиын но огъя дырыз ӧвӧл тупатэмын. Кылсярысь, 1-тӥ куарусёнэ дышетскыны кутско Китайын, Монголиын, Казахстанын, Киргизиын, Таджикистанын, Туркмениын, 2-тӥ толшоре — Сингапурын, южтолэзьлэн кутсконаз — Лымшор Кореяын, 1-тӥ оштолэзе — Корейской Народно-Демократической Республикаын, куартолэзе — Таиландын, инвожоее —Филиппинъёсын, пӧсьтолэзе — Индиын, Непалын но мукетъёсаз[3].
Россиын
Одӥг дышетскон ар ӵоже школаосын дышетскон одӥг классын радъяське но одӥг курсын вылӥ яке шор образование сётӥсь дышетон заведениосын.
Россиын очной дышетскон амалъя дышетскон ар 1-тӥ куарусёнысен — «Тодон-валан басьтон нуналысен» кутске. Озьы ке но, дышетон заведенилэн решениезъя, дышетскон арлэн кутскон дырыз кык толэзёзь воштэмын луыны быгатэ[5].
Очно-заочной но заочной дышетон амалъёсъя дышетскон арлэсь кутскон дырзэ тупатэ дышетон юрт.
Дышетскон ар дышетон планъя йылпумъяське. Планэз озьы ик дышетон юрт юнматэ[1]. Выпускной классъёсын дышетскон итоговой аттестациен йылпумъяське[6].
Дышетон циклъёс
Школаосын
«Росси Федерациын дышетон сярысь» законъя[7] школаос асьсэос быгато люкыны дышетонэз — четвертьёслы, триместръёслы яке биместръёслы[8]. Дуннеысь мукет кунъёсын но дышетон со выллемгес висъяське[9].
Четверть
Четвертной система дышетон арез 4 люкетлы висъя[10]:
- нырысетӥ четверть — куарусёнысен коньывуон пумозь;
- кыкетӥ четверть — шуркынмонысен толсур пумозь;
- куинетӥ четверть — толшорысен южтолэзь пумозь;
- ньылетӥ четверть — оштолэзьысен куартолэзь пумозь.
Четвертной дышетон системая школьникъёс араз ньыль пол каникул возё[8].
Триместр
Триместровой (модульной) системая дышетскон ар «5 + 1» принципъя модульёслы люкиське: вить дышетскон арня бере одӥг арняез шутэтскыны сётӥське[10].
Биместр
Дышетскон ар вить дышетскон вадеслы (биместр) люкиське, котькудӥз сизьым арня кыстӥське, соос вискын — вить пол кык арняем каникул сётӥське. Куатетӥез биместр — гужем каникул, кыстӥське кык толэзь[8].
Колледжъёсын но вузъёсын
Шор ӧнерлыко но вылӥ тодон-валан басьтон заведениосын дышетон процесс семестръёслы люкиське (фр. semestre кыллэсь пӧрмемын, лат. sēmestris (*secsmestris) «куать толэзьем» шуэмез возьматэ). Огъя вариантъя одӥг семестр — со одӥг ӝыны ар луэ. Семестр пумын экзаменационной сессия кутске[11].
Каникул
Дышетскон аре каникулъёс но пыртэмын — со дышетон процесслэн люкетэз, кудӥз шутэтскон понна сётӥське[2].
Каникуллэн кыстӥськемез дышетон стандартэн юнматӥське.
Валэктонъёс
- ↑ 1 2 Вопрос: Что такое календарный год, что такое учебный год? Корректно ли говорить о "полугодиях" учебного года применительно к временным периодам с сентября по декабрь и с января по август и издавать приказы о выплате стипендий учащимся в соответствии с указанными временными рамками? (ответ службы Правового консалтинга ГАРАНТ, декабрь 2013 г.) [ӟуч] base.garant.ru. Эскеремын 21 куарусёнэ 2025 арын
- ↑ 1 2 Сфера образования — документация [ӟуч] docs.istina.msu.ru. Эскеремын 21 куарусёнэ 2025 арын
- ↑ 1 2 3 4 5 По школьному календарю: когда начинается учебный год в разных странах [ӟуч] Forbes.ru (2024-09-03). Эскеремын 21 куарусёнэ 2025 арын
- ↑ Как устроен учебный год в разных странах мира: где-то начинается в январе, а где-то летние каникулы – всего месяц, gol.ru (31 гудырикошконэ 2022). Эскеремын: 21 куарусёнэ 2025 арын.
- ↑ Учебный год начинается 1 сентября \ 2025-2024-2023 год \ Акты, образцы, формы, договоры [ӟуч] КонсультантПлюс. Эскеремын 21 куарусёнэ 2025 арын
- ↑ Статья 59. Итоговая аттестация \ КонсультантПлюс [ӟуч] www.consultant.ru. Эскеремын 21 куарусёнэ 2025 арын
- ↑ Статья 28. Компетенция, права, обязанности и ответственность образовательной организации \ КонсультантПлюс [ӟуч] www.consultant.ru. Эскеремын 21 куарусёнэ 2025 арын
- ↑ 1 2 3 Ирина Кочковая. Триместры, четверти, модули, биместры в школе. В чем различие?, roditeli.maximumtest.ru (5 гудырикошконэ 2022). Эскеремын: 21 куарусёнэ 2025 арын.
- ↑ Как устроены школы в разных странах мира, Известия (1 куарусёнэ 2017). Эскеремын: 21 куарусёнэ 2025 арын.
- ↑ 1 2 Школьные каникулы 2025/2026. Расписание по четвертям и триместрам, РБК Life (18 гудырикошконэ 2025). Эскеремын: 21 куарусёнэ 2025 арын.
- ↑ Семестр: что это такое, сколько месяцев длится в учебном году в колледже, ВУЗе [ӟуч] Университет Синергия. Эскеремын 21 куарусёнэ 2025 арын
 |
|
|---|
Дышетон процесс | |
|---|---|
| Дышетскон | |
| Школа праздникъёс | |
