Кулэез сярысь вераськонъёс
Кулэез сярысь вераськонъёс (ӟуч: Разговоры о важном) — Россиысь школаосын ортчись внеклассной урокъёс. Сӥземын асьме кунмылэн историезлы, отын улӥсь калыклэн сям-йылолъёсызлы но лулчеберет кельтосэзлы. Программае 2022-тӥ арын пыртэмын. Нырысетӥзэ урокез ортчытӥз Владимир Путин 2022-тӥ арын 1-тӥ куарусёнэ Калининградын. 2025-тӥ арысен юнматэмын «Кулэез сярысь вераськон» нимо Огъяросси премия. Со сётӥське тужгес устоезлы дышетӥсьлы, та дисциплинаын тужгес усто практикаез дышетон уже кутэмез понна.
Историез
Та обязательной луись внеклассной урокез Дышетон программае пыртон сярысь 2022-тӥ арын 20-тӥ инвожое «Знание» дэменлыклэн кенешоназ ивортэмын вал. Россиысь Дышетонъя министерство дышетскон ар кутскон азьын дышетӥсьёслы методикая дэмланъёс кылдытӥз[1]. Выль дисциплинаез дышетонлы дасянъя 700 площадкаос ужазы[2].
«Кулэез сярысь вераськонъёс» дисциплиная нырысетӥ урокез ортчытӥз Россилэн Президентэз Владимир Путин 2022-тӥ арын 1-тӥ куарусёнэ, Калининградэ ужан куспаз вуылыкуз. Открытой уроке пыриськыны ӧтемын вал Россиысь мукет каръёсысь пӧртэм тодосъёсъя, культурая, спортъя олимпиадаосын но ӵошатсконъёсын вормисьёс. Урок одӥг темалы гинэ сӥземын ӧй вал; пиналъёс президентлы тунсыко луись ужрадъёс сярысь мадизы но наука, история, экология но мукет темаосъя юанъёс сётъязы. Уроклэн стенограммаез Россилэн Президентэзлэн сайтаз поттэмын вал[3].
Быдэс Россиысь школаосын нырысетӥез «Кулэез сярысь вераськон» урок дышетскон арлэн нырысетӥ вордӥськоназ, 5-тӥ куарусёнэ ортчиз. Со Тодон-валан басьтон нуналлы сӥземын вал. Арнялы одӥг пол ортчись уроклэн темаосыз азьпал ик быдэс арлы чакламын, соос пӧлын историысь учыръёс, тодмо адямиослэн улон сюрессы, Россиысь праздникъёс, мерлык ласянь кулэлыко ӵектосъёс но мукет[4].
Урокъёслы материалъёс дасяз Россиысь Дышетонъя академилэн Тодон-валан сётонэз азинтонъя институтэз[5]. Темаос но урокъёслы планъёс, научной ужъёсты, педагогической литератураез но нормативной документъёсты лыдэ басьтыса быръемын[6]. Ӵектосэз улонэ пыӵатэ Пинал дырез, семьяез но дышетонэз эскеронъя институт.
2024-тӥ арысен «Кулэез сярысь вераськон» урокез нылпи садъёсын 5 ареслэсь бадӟым нылпиосын ортчытъяло. Сыӵе ӵектонэн вазиськизы нылпи садъёсысь подготовительной группаосын ужась воспитательёс, кудъёсыз покчи классъёсын дышетскисьёслы чаклам методикаосъя ужазы но пиналъёслэсь ӵектэм темаосын тунсыкъяськемзэс пусйизы[7]. Россиын нырысьсэ сыӵе урокез ортчытӥзы Вологдаысь нылпи садъёс 2025-тӥ арын толшоре[8].
Уроклэн радлыкез
Урокъёсты арняяз одӥг пол отчытъяны чакламын, вордӥськонъёсы мукет урокъёс азьын. 1-тӥ классысен 11-тӥ классозь вань дышетскисьёс понна та урок обязательной лыдъяське, котькуд урок Россилэн гимнэныз но кун флагез ӝутонэн кутске.
Котькуд уроклы методической материалъёс кылдытэмын. Дышетскисьёслэн арлыдзыя соос 5 категорилы люкисько: 1-тӥысен 2-тӥ классозь, 3-тӥысен 4-тӥ классозь, 5-тӥысен 7-тӥ классозь, 8-тӥысен 9-тӥ классозь, 10-тӥысен 11-тӥ классозь. Озьы ик вань шор ӧнерлыко тодон-валан сётонъя колледжъёслы кылдытэм материалъёс[9]
Котькуд категорие сценарий но дышетон материалъёс пыртэмын, видеороликъёс, презентация но афиша, сое уроклэн заставкаез чотын кутыны луэ. Бадӟым классъёсын дышетскисьёслы ватсаса материалъёс чакламын. Дышетскисьёс урок куспын видеоролик учкыны, интерактивной ужпумез быдэстыны но урокез вераськонэн йылпумъяны чакламын. Дышетӥсь ачиз бырйыны кулэ, кыӵе форматэн ортчытоз урокез яке ӵектэм сценариез но материалъёсты ужаз кутоз[4]
Тросаз темаосъя экспертъёсын, федерал спикеръёсын видеоос гожтэмын. Кылсярысь, «Россилэн легендаосыз» темая вераськиз Кун Думалэн Тӧроезлэн воштӥсез Пётр Толстой, Волонтёръёслэн нуналзыя — «Старость в радости» фондэз кылдытӥсь Елизавета Олескина, «Россия — таза кун» темая Олимпи чемпион Максим Транков. Видео гожтэмын диалог амалэн: вераськись муртъёс пиналъёслэн юанъёссылы валэктонъёс сёто[4].
Урокъёслы материалъёс интыямын «Кулэез сярысь вераськонъёс» нимлыко сайтын. Вань материалъёсты, азьвыл аръёсысь архивын возем материалъёсты но, отысь кыскыны луэ.
Премия
Россиын 2025-тӥ арозь 105 «Кулэез сярысь вераськон» урок ортчиз, отчы 20 миллионлэсь ятыр студентъёс пыриськизы. Федерал спикеръёс пӧлын вал 120 мер ужасьёс но федерал ёзэсъёслэн ыстэм муртъёссы. Дышетскон материалъёс кылдытонэ Россиысь валтӥсь компаниос пыриськизы: «РЖД», «Росатом», «Сбербанк», «Нырысетӥ канал», «Артек», «Россиысь военно-исторской общество» но мукетъёсыз.
Ӵектослэсь мерлык ласянь кулэлыксэ чакласа, арлы быдэ радъяськись «Кулэез сярысь вераськон» огъяросси премия кылдытон сярысь решение кутэмын вал. Премия куать номинациосъя чакламын:
- Арлэн тужгес усто интервьюез;
- Тужгес ӟечез видеоивортонъёсты нуись;
- Партнеръёслэсь тужгес ӟечез ужрад;
- «Первые. Разговоры о важном» сериалысь (серия) тужгес устоез актёр .
Дышетӥсьёс понна кылдытэмын нимысьтыз номинация, «Кулэ вераськон кылдытон». Вожвылъяськонэ пыриськыны быгато авторен кылдытэм урокъёслы разработкаос, методикая материалъёс, урокъёсын кенешонъёслэн видеозаписьёссы.
Жюриын Дышетонлы семьялы но пиналлыклы сӥзем институтын ужасьёс, анай-атайёслэн огъяросси комитетысьтызы огмуртъёс но «Адямиез будэтыны» вожвылъяськонын вормисьёс[10].
Валэктонъёс
- ↑ «Разговоры о важном» в школе: что это и какие темы обсуждаются, Коммерсантъ (11 толшоре 2024). Эскеремын: 22 куартолэзе 2025 арын.
- ↑ Кравцов: «Разговоры о важном» позволят интересно рассказать о ценностях и истории России [ӟуч]
- ↑ Открытый урок «Разговор о важном», Президент России. Эскеремын: 22 куартолэзе 2025 арын.
- ↑ 1 2 3 Разговоры о важном
- ↑ Разговоры о важном. Методические рекомендации
- ↑ Классный час "Разговоры о важном" 2025-2026: что это такое, программа, темы уроков, Комсомольская правда. Эскеремын: 22 куартолэзе 2025 арын.
- ↑ Путин поддержал идею проводить "Разговоры о важном" в детских садах, РИА Новости (3 коньывуонэ 2024). Эскеремын: 22 куартолэзе 2025 арын.
- ↑ Власти Вологды первыми в стране ввели еженедельные «Разговоры о важном» в детсадах, Известия (21 толшоре 2025). Эскеремын: 22 куартолэзе 2025 арын.
- ↑ Разговоры о важном в колледже: как организовать внеурочные занятия для СПО [ӟуч]
- ↑ Старт первой Всероссийской премии «Разговоры о важном»
Дышетон процесс | |
|---|---|
| Дышетскон | |
| Школа праздникъёс | |
