Урок

Википедиысь материал
Урок
Москваысь школаын (2023-тӥ ар)
Школьный урок 2.jpg
Кутӥськон ӧрыз Дышетон
Кылдэмын XVII даур
Авторез Ян Амос Коменский

Уро́к — со школаын нылпиосты дышетон форма. Юнматэм дыр куспын тодон-валан басьтон удысэн кивалтэ дышетӥсь. Ваньмаз сямен дышетон юртъёсын (школаосын, лицейёсын, гимназиосын, колледжъёсын) тодон-валан басьтон таӵе формая радъяське[1].

Терминлэн историез

1374-тӥ арын Цволле карысь начальной школалэн ректорез Джон Сил нылпиосты дышетон понна классно-урочной система кылдытӥз. Со нылпигосты классъёсъя люкиз но классысь классэ выжон радлыкез тупатӥз. Нырысьсэ дышетонэз анай кылын радъяз, со вакытэ, XIV даурын дышетон понна латин кылэз кутылӥзы.

1537—1582-тӥ аръёсы Иоганнес Штурм  [ӟуч] (удм., протестант гимназилэн ректорез Страсбургын со системаез азинтӥз. 1567—1581-тӥ аръёсы гимназия академилы пӧрмытэмын вал. Отын 600 пала гимназистъёс дышетскизы. Штурм классъёсты дышетскон аръёслы люкиз (нырысь 7 ар, берло 8 арозь будэтӥз). Классын дышетскисез трос ке, соку со пичигес подгруппаослы люкиськылӥз, быдэн 10 мурт, классэн кивалтӥз арлыдызъя тужгес бадӟымез дышетскись (со белл-ланкастерской системалэн прообразэз луиз, кудӥз кылдӥз XVIII даурлэн пумаз — XIX даурлэн кутсконаз). Штурм дышетон предметъёсты но висъяз, одӥг урок одӥг предметлы сӥземын вал. Со нырысьсэ огъя дышетон план кылдытӥз но дышетонэз соя радъяз[2].

XVII даурын Ян Амос Коменский  [ӟуч] (удм. — чех педагог-гуманист, туала классно-урочной системаез кылдытӥз. Со дырозь нылпиос мӧйыосын ӵош дышетскылӥзы, дышетон процесслэн радлыкез ӧй вал. Коменский системаез радъяз: урокъёс расписания луизы, нош дышетӥсьёс нырысь ик асьсэос нимысьтыз дышетонэз ортчылӥзы[3]. Валтӥсь принципъёс:

  • Олдӥг классын одӥг арлыдъем нылпиосты дышетон. Озьы дышетӥсь нылпиослэсь будон но азинскон пӧртэмлыксэс чакласа, дышетон процессэз радъяны быгатэ.
  • Дышетон процесслэн радлыкез. Урокъёс расписания нуисько, озьы дырез пайдалыко кутыса, нылпиос понна огкадь лунлыкъёс кылдо.
  • Дышетӥсьёсты дасян. Соос дышетскыса диплом басьто, озьы дышетонлэн ӟечлыкез будэ.

Озьы Россиын школа немец дышетон сямъёс улсын кылдӥз. «Урок» кыл интые школаосын «экзерсис» (упражнение) кунсьӧр кыл кутӥськылӥз, ӟуч кылэ «урок» термин XIX даурын гинэ вуиз[4].

Уроклэн радлыкез

Котькуд урок нимаз ёзъёслэсь кылдэ. Соосты пӧртэм сямен огазеяса, уроклэн радлыкез — структураез кылдытӥське. Нылпиослэсь арлыдзэс но дышетон материалэз чакласа, структура простой но сложной луыны быгатэ.

«Объём прямоугольного параллелепипеда» выль темаез валэктон вылын уроклы план дасян:

Уроклы план
Уроклэн люкетэз Дыр Ужпум Дышетӥсьлэн ужез Дышетскисьлэн ужез
Oргмомент 3 мин Перекличка, вводной люкет Кин вань, кин ӧвӧл шуыса, классной журналэ нылпиосты пусъе Нылпиос иворто
Гуртысь ужез эскерон 2 мин Гуртысь ужез (площадь поверхности цилиндра) тетрадьёсысь яке дистанционно эскерон гуртысь ужез юаса, отметкаос пуктылэ ас ужзы сярысь верало
Тодон-валанэз актуализировать карон[5] 5 мин Выль темаен тодматскыны юрттӥсь тодон-валанэз муромытон Понятиос сярысь юанъёс сётъя Юанъёслы валэктон сёто
Темаез но уроклэсь ужпумъёссэ шараян 10 мин Параллелипипедлэсь объёмзэ шедьтон Объём понятиез кутэ но кыӵе геометрической фигураослэн объёмзы луэ шуыса юан сётэ Юанъёслы валэктон сёто, (многогранникъёс, цилиндр, конус, шар)
Выль материалэн тодматскон 10 мин Учебникысь конспектировать карон Объём сярысь маде, валантэм кылъёсты валэктэ Текстэз конспектировать каро, дышетӥсез кылзо, объёмлэсь валтӥсь свойствооссэ тетраде гожто
Нырысь юнматон[6] 5 мин Капчи задачосты лэсьтон (куинь измерениослэн произведенизы) 3, 4, 5 измерениосын шонер сэрего параллелерипедлэсь объёмзэ шедьтыны дэмла. Одӥгезлэсь решенизэ юа Шонер сэрего параллелипипедлэсь объёмзэ шедьто. V=abc=3*4*5. Задачаез лэсьтэмзы бере, кизэс ӝутыса иворто
Задачаосты лэсьтон 5 мин Доска дорын ужан (кылсярысь, параллелипипедлэсь объёмзэ диагональёсъя шедьтоно) Учебникысь задачаос сётэ, задачаос секытэсьгес луыны кулэ Одӥгез нылпи доска дорын ужа, мукетъёсыз — тетрадьёсазы
Урокез йылпумъян 2 мин Отметка пуктон Тетраде (задачаез лэсьтэм яке конспект понна) яке классной журналэ отметка пуктон Тетрадьёссэс эскерыны сёто
Гуртысь уж 2 мин Учебникысь кӧня ке задача сётӥське
Рефлексия[7] 1 мин Уроклы анализ лэсьтон Урок сярысь юа Маиз яраз, маиз ӧз яра, выль темаез валазы-а, ӧз-а шуыса, ас мылкыдзэс верало

Уроклэн типологиез

1. Дидактической ужпумъёсъя урокъёслэн классификацизы:

  • комбинированной урок;
  • выль материалэн тодматон;
  • материалэз юнматон;
  • ас кже ужан урок;
  • урок-конференция но урок-семинар[8];
  • ортчем материалэз тодэ ваён, огъян но систематизировать карон;
  • тодон-валанэз эскерон; контрольной но самостоятельной ужъёс ортчытон;
  • интегрированной урок;
  • интерактивной урок. Таӵе урокын кутӥсько — нылпиослэн электрон учебникъёссы, дышетӥсьлэн электрон учебникез но интерактивной доска  [ӟуч] (удм.. Огазеяса кутон принцип — электрон учебник нылпилэн планшетаз инъямын. Котькуд нылпилэн планшетэз дышетӥсьлэн планшетэныз но интерактивной доскаен герӟамын. Электрон учебникъёсын пӧртэм энциклопедиосы чӧлсконъёс сётэмын, паськытатэм суредъёс, учебниклэн кулэ луись разделъёсаз вуттӥсь кросс-ссылкаос. Сыӵе учебникъёсын озьы ик луэ кутыны аудио- но видеоматериалъёсты, графикъёсты, кудъёсыз сётэм материалэз нылпилы ӟечгес валаны юртто[9].

2. Быгатонлыкъёсты кылдытонъя урокъёслэн классификацизы:

  • вводной урок;
  • тренировочной урок;
  • итоговой урок.

3. Познавательной интересэз но познавательной ужез кутонъя урокъёслэн классификацизы:

  • урок-практикум;
  • урок-семинар;
  • урок-лекция;
  • урок-зачёт;
  • урок-шудон;
  • урок-конференция;
  • урок-экскурсия.

4. Учебно-воспитательной процессэ пыриськемъёслэн куспазы герӟаськон амалъёсты кутонъя урокъёслэн классификацизы:

  • динамической параосын яке вошъяськыса параосын ужан урок;
  • статистической параосын яке вошъяськисьтэм параосын ужан урок;
  • пичи группаосын ужан урок;
  • коллективной дышетон урок;
  • дистанционной дышетон урок. Россиын дистанционной дышетон амалэз кутыны кутскемын 1997-тӥ арын 30-тӥ куартолэзе, соку Россиысь Калыкез дышетонъя министерство 1050-тӥ номеро приказ поттӥз, кудӥзъя кутыны лэземын вал дистанционной дышетон амалэз. 2020-тӥ арын COVID-19  [ӟуч] (удм. пандемия вӧлмемен, огдырлы тросэз дышетон юртъёс ворсамын вал. Соку тросэз школаос Zoom, Cisco Webex, Google Classroom, Microsoft Teams, D2L и Edgenuity, Skype платформаосты кутыса, дистанционной онлайн-дышетонэ выжизы[10][11].

5. Приоритетной амалэз кутонъя урокъёслэн классификацизы:

  • ивор сётӥсь урок;
  • поблемной урок;
  • исследовательской урок;
  • эвристической урок.

6. Предметъёслэн герӟаськемзыя урокъёслэн классификацизы:

  • интегрированной урок;
  • библиотечной урок;
  • клубной урок;
  • медиаурок[12].

7. Озьы ик луыло открытой урокъёс но внеклассной занятиос. Кылсярысь, 2022-тӥ арысен Россиысь школаосын котькуд вордӥськонэ нырысетӥ урок «Кулэез сярысь вераськонъёслы» сӥземын луэ. Валтӥсь темаос Туала Россиын ортчись ужрадъёсын герӟаськемын.

Владимир Путин «Кулэез сярысь вераськон» урокын (Тыва, Кызыл, 2024-тӥ ар)

Уроклэн кыстӥськемез

Ян Амос Коменскийлэн системаезъя классэн кӧня ке дыр ӵоже ужалляз одӥг дышетӥсь (4 час котыр). Собере бадӟымъёсызлэн дышетскисьёслэн эскеремзы улсын нылпиос 4 ӵас ӵоже ас кожазы материалэз юнматылӥзы.

Академической но московской университетской гимназилэн регламентэзъя урок 2 час кыстӥськылӥз, кутӥськылӥз арлы дасям расписание. Урокъёс домашней но школьной формаослы люкиськылӥзы, нош соосыз — приватной (дышетӥсен) но огъя (ваньмыныз ӵош, пӧртэм арлыдо нылпиосын, дышетӥсьёсын но администрациен). Озьы ик вал на ранней (приготовительной урокъёс). Со урокъёсын мукет бадӟым классысь дышетскись (аудитор) пичиосызлэсьгес дасяськемзэс эскеръялляз. 1828-тӥ арын гимназической урок 90 минут ӵоже кыстӥськылӥз[13], 1865-тӥ арысен — 60 минут[14].

Катя Лычёва школаысь урок мыныку

XX даурлэн шоразгес «урок» термин солэсь кыстӥськемзэ возьматӥсь кыл чотын кутӥськыны кутскиз. XXI даурын пӧртэм кунъёсын уроклэн кыстӥськемез пӧртэм луэ:

  • США — 45 минутысен 90 минутозь (уроклэсь кыстӥськемзэ котькуд школа ачиз тупатэ).
  • Франция — 55 минутысен 2 часозь (предметъя чаклало).
  • Канада — 75 минут.
  • Израиль — 90 минут (2×45).
  • Индия — 35 минут.
  • Китай — 40 минут.
  • Германия — 90 минут (дышетӥсь, 45 минут ортчыса, урокез йылпумъяны быгатэ).
  • Япония — 45—50 минут.
  • Финляндия — дышетӥсьлэн кулэ каремезъя.
  • Россия — 40—45 минут, покчи классъёсын 30—35 минут[4]. Праздникъёс азьын дышетон заведенилэн администрациезлэн решениезъя урокъёс вакчиятэмын луыны быгато. Котькуд нунал урокъёс одӥг дыре кутско[3].

Галерея

  • Суредаськонъя урок

    Суредаськонъя урок

  • Англи кылъя урок

    Англи кылъя урок

  • Биология урок

    Биология урок

  • География урок

    География урок

  • Астрономия урок

    Астрономия урок

  • Математикая урок

    Математикая урок

  • Химия урок

    Химия урок

  • 1-тӥ классын урок, Саратов, 1955—56-тӥ дышетскон ар

    1-тӥ классын урок, Саратов, 1955—56-тӥ дышетскон ар

  • Блокадной Ленинградын 7-тӥ классын урок, 1942-тӥ ар

    Блокадной Ленинградын 7-тӥ классын урок, 1942-тӥ ар

Валэктонъёс

  1. ↑ Сластенин В.А. Педагогика: Учеб. пособие для студ. высш. пед. учеб. заведений / В. А. Сластенин, И. Ф. Исаев, Е. Н. Шиянов; Под ред. В.А. Сластенина. — Издательский центр «Академия», 2000. — 576 с.
  2. ↑ Классно-урочное обучение: предшественники Я.А. Коменского - История педагогики и образования - Сидоров С.В. Сайт педагога-исследователя [ӟуч] si-sv.com. Эскеремын 15 куарусёнэ 2025 арын
  3. ↑ 1 2 Кто придумал учить уроки. Ян Амос Коменский: Человек, который подарил нам уроки 📚, Telegraph (22 гудырикошконэ 2024). Эскеремын: 15 куарусёнэ 2025 арын.
  4. ↑ 1 2 Владимирович, Могилев Александр. Очевидное-невероятное: что такое школьный урок (20 коньывуонэ 2017). Эскеремын: 15 куарусёнэ 2025 арын.
  5. ↑ Актуализация знаний, как этап современного урока [ӟуч] school-master. Эскеремын 15 куарусёнэ 2025 арын
  6. ↑ Этап - первичное закрепление [ӟуч] megaobuchalka.ru. Эскеремын 15 куарусёнэ 2025 арын
  7. ↑ Рефлексия как этап урока: виды, приемы, примеры [ӟуч] pedsovet.su. Эскеремын 15 куарусёнэ 2025 арын
  8. ↑ Со уроклэн формаез. Семинарез но конференциез ортчытыны луэ юнматон, тодон-валанэз эскерон урокъёсын.
  9. ↑ Об электронном учебнике / Департамент образования Москвы. — 2015. Архивная копия от 28 куарусёнэ 2018 на Wayback Machine
  10. ↑ Hood, Micaela. Virtual learning gets mixed reviews from Pocono parents, poconorecord.com. Эскеремын: 15 куарусёнэ 2025 арын.
  11. ↑ Как в других странах школы перешли на онлайн-обучение [ӟуч] Российская газета (2021-01-12). Эскеремын 15 куарусёнэ 2025 арын
  12. ↑ Методическое пособие по созданию современного урока по ФГОС [ӟуч] leontevkashkola.ucoz.ru. Эскеремын 15 куарусёнэ 2025 арын
  13. ↑ Сыӵе занятиос вузъёсын кутӥсько но «пара» шуыса нимасько
  14. ↑ Саввина О.А., Марушкина И.А. Урок математики в дореволюционной средней школе.. — М.: Инфра-М, 2013. — С. 18. — 80 с. — ISBN ISBN 978-5-16-006909-8.

Литература

  • Жеребило Т. В. Словарь лингвистических терминов. — Назрань: Пилигрим, 2010. — 485 с.
  • Саввина О. А., Марушкина И. А. Урок математики в дореволюционной средней школе. — М.: Инфра-М, 2013. — 80 с. — ISBN 978-5-16-006909-8.

Чӧлсконъёс

«https://udm.ruwiki.ru/w/index.php?title=Урок&oldid=498199»-ысь басьтэмын