Сидорова, Анэтта Петровна

Рувикиын таӵе фамилиен мукет муртъёс сярысь гожтосъёс вань. Учке: Пономарёв.

Рувикиын таӵе фамилиен мукет муртъёс сярысь гожтосъёс вань. Учке: Сидоров.

Анэтта Петровна Сидорова
Вордӥськем нуналыз	20-тӥ шуркынмонэ 1939({{padleft:1939|4|0}}-{{padleft:11|2|0}}-{{padleft:20|2|0}})
Вордӥськем интыез	Тыловай, Дэбес ёрос, Удмурт Автономной Советской Социалистической Республика, РСФСР, СССР
Кулон нуналыз	10-тӥ инвожое 2024({{padleft:2024|4|0}}-{{padleft:6|2|0}}-{{padleft:10|2|0}}) (84 года)
Кулэм интыез	Россия
Кунмуртлыкез	СССР СССР→Россия Россия
Ужудысэз	журналист, мерлыко ужась
Данъетъёсыз

Анэтта (Анетта) Петровна Сидорова (ныл фамилиез — Пономарёва; 20-тӥ шуркынмонэ 1939, Тыловай, Удмурт Автономной Советской Социалистической Республика — 10-тӥ инвожое 2024, Россия) — совето но росси журналистка, мерлыко ужась. СССР-ысь журналистъёслэн огазеяськонзылэн но Россиысь журналистъёслэн огазеяськонзылэн ёзчиез (1967), УАССР-ысь (1982) но Росси Федерациысь (1998) лулчеберет удысысь дано ужась. 1984-тӥ—1995-тӥ аръёсы — Удмурт Элькунысь лулчеберетъя министр (УАССР). Удмуртиысь Дэбес ёрослэн дано муртэз (2014).

Улон сюресэз

Анэтта Сидорова вордӥськиз пичи удмурт Тыловай черкогуртын (али — Дэбес ёросэ пыре). Бубиз Быдӟым Атыкай оже пыриськемын, Берлинозь вуиз, но Быдӟым Вормон бере куинь ар ортчыса шимес учырын быриз. Мумиз фельдшер луыса тыршиз, кузпалзэ ватэмез бере огназ кык нылъёссэ будэтӥз. Пичи дыръяз Анэтта дышетӥсь луон сярысь малпалляз, но Дэбес черкогуртысь шор ёзо школаысь укмыс классэз йылпумъямез бере анаезлы юрттон вылысь ужано кариськиз.

18 аресказ нылмурт бызиз. Туж потэ вал дышетсконзэ азьланьтэмез, но выль кенлэн кузпалыз но мемейзы талы мыр-мыр но пумит вал. Ужаз Улӥ Пыкты гуртысь связья ёзэтын телефонистка луыса, бератаз — интыысь машина-трактор станциын кадръёсъя инспекторын, 1958-тӥ арысен — Дэбес ёросысь гурт хозяйствоя управлениын секретарь-машинистка, КПСС-лэн Дэбес ёрос комитетэзлэн библиотекаяз кадръёсъя статист вал. Ӵыжы-выжыосызлэн пумитъяськемъёссы шоры учкытэк, документъёссэ сётӥз Пермьысь кун университетэ, 1965-тӥ арын татысь географияя факультетэз йылпумъяз.

1962-тӥ—1968-тӥ аръёсы Сидорова Кез ёросысь «Звезда» газетлэн редакцияз корректор, литературая ӧнерчи, гожтэтъёсъя отделэн кивалтӥсь луыса ужаз. Ӝоген партиялэн обкомез сое Свердловскысь Вылӥ партшколае дышетскыны ыстӥз. Кык ар ортчыса, Кез ёросэ берытскиз, сое КПСС-лэн ёрос комитетэзлэн пропагандая но агитацияя ёзэтэзлы кивалтӥсе юнматӥзы.

70-тӥ аръёслэн кутсконазы Анэтта Сидороваез Ижкаре ӧтизы, телевидениын меӵак эфирын гуртын пудо вордӥсьёс сярысь мед вералоз шуыса. Ӵапак соку сое партиысь куд-ог азьмынӥсьёс синйылтӥзы но элькунысь лулчеберетъя министрлэн воштӥсезлэн интыез бушам бере ваче син кенешыны ӧтизы. Сидорова та ужинтыяз 12 ар ӵоже тыршиз, со паркъёс, музейёс, лулчеберетъя юртъёс но библиотекаос понна кылкутӥз. Быгатыса но пайдаё ужамез понна 1984-тӥ арын солы Удмурт АССР-ысь лулчеберетъя министр луыны ӵектӥзы. Анэтта Сидоровалэн кивалтон вакытаз Удмуртиысь трос валтӥсь архитектурая синпелетъёс выльдэмын вал: Воткаысь П. И. Чайковскийлэн музей-усадьбаез, Сарапулысь Башенин купечлэн юртъерез, Ижкарысь Удмурт Элькунысь Кузебай Герд нимо йӧскалык музейлэн но Александр Невский нимо соборлэн юртъёссы; усьтэмын вал Удмуртиысь усточи нылпиослы школа-интернат, кылдытэмын Удмурт Элькунысь духовой инструментъёсъя кун оркестр, Мускоысь Щепкинской училищеын Удмурт Элькунысь йӧскалык кун театрысь егит актёръёслы студия. 1993-тӥ арын А. Сидорова лулчеберетъя юртъёсын кивалтон ужпумъёсъя Германиын стажировка ортчиз.

1995-тӥ—2000-тӥ аръёсы Анэтта Сидорова Удмурт Элькунысь Кун Кенешысь наукая, дышетонъя, лулчеберетъя но егитъёсын ужан политикая ялан ужась комиссилэн референтэз луыса тыршиз, «Лулчеберет сярысь закон» но «Творчествоя огазеяськонъёслы кун юрттэт сётон сярысь» постановление дасянэ пыриськиз. 2000-тӥ—2003-тӥ аръёсы Удмурт Элькунысь операя но балетъя кун театрлэн директорез вал. 2003-тӥ арысен Россиысь наукаосъя академилэн Урал ёзысьтыз Историяя, кылъя но литературая Удмурт институтысь наукая ужась, междисциплинарной но прикладной эскеронъёсъя ёзэтысь энциклопедистикая центрысь ӧнерчи вал.

2007-тӥ арысен — Удмурт Элькунысь Мерлыко палаталэн ёзчиез: лулчеберетэз азинтонъя но историяя синпелетъёсты утёнъя юанъёсты ӝутъяз.

2024-тӥ арын 10-тӥ инвожое 85 аресказ улонысь кошкиз.

Наукая но энциклопедикая ужез

Анэтта Сидорова сюлмаськемен-тыршемен дасямын справочно-энциклопедической изданиос:

• «Удмуртская Республика» энциклопедилэн кыкетӥ изданиез (2008) — редколлегилэн ёзчиез;
• «Удмуртская Республика» энциклопедической справочник (2011) — огез авторез;
• «Удмуртская Республика. Культура и искусство» энциклопедия (2012, 2014) — радъясь, наукая но редакцияя кенешлэн ёзчиез;
• «Многонациональная сценическая культура Удмуртии» энциклопедической справочник (2014) — радъясь, наукая но редакцияя кенешлэн ёзчиез;
• «Удмуртская Республика. Декоративно-прикладное искусство и художественные ремёсла» энциклопедия (2022) — наукая но редакцияя кенешлэн ёзчиез но валтӥсь редактор.

Лулчеберет удысысь ужась энциклопедистикая уно наукая статьяос гожъяз.

Библиографиез

• Многонациональная сценическая культура Удмуртии / гл. ред. А. Е. Загребин; сост. А. П. Сидорова. — Ижевск: Удмуртский институт истории, языка и литературы УрО РАН, 2014. — 398 с.
• Удмуртская Республика. Декоративно-прикладное искусство и художественные ремёсла / гл. ред. А. П. Сидорова. — Ижевск: Удмуртский институт истории, языка и литературы УрО РАН, 2022. — 656 с. — ISBN 9785604733950.
• А. П. Сидорова, С. Д. Смирнова. Энциклопедический справочник как основа сохранения и развития театрального искусства региона [ӟуч] // Вести экономики, права и социологии. — 2015. — № 4. — С. 360—363.
• С. Д. Смирнова, Л. В. Барханова, Т. А. Васина, А. П. Сидорова. Развитие отраслевой энциклопедистики: из опыта работы Удмуртского института истории, языка и литературы УрО РАН [ӟуч] // Вести экономики, права и социологии. — 2014.
• А. П. Сидорова, С. Д. Смирнова, Л. В. Барханова, Ю. П. Селиванов. «Штыком и пером»: творческая интеллигенция Удмуртии в Великой Отечественной войне [ӟуч] // Патриотизм — духовный потенциал Великой Победы. — 2015. — С. 177—182.
• А. П. Сидорова. Народное творчество как ресурс взаимодействия этносов и культур Урало-Поволжского региона (на примере Удмуртской Республики) [ӟуч] // Полиэтничный мир Евразии: проблемы взаимовосприятия. — 2016. — С. 178—185.

Данъетъёсыз

• Удмурт АССР-ысь лулчеберет удысысь дано ужась (1982);
• Росси Федерациысь лулчеберет удысысь дано ужась (1998);
• СССР-ысь лулчеберет удысысь отличник (1989);
• УАССР-ысь Вылӥ Кенешлэн Президиумезлэн данъян грамотаез;
• Удмурт Элькунысь Кун Кенешлэн данъян грамотаез (2009);
• Удмуртиысь Дэбес ёрослэн дано муртэз (2014);
• Удмурт Элькунысь Кун премилэн лауреатэз.

Валэктонъёс

Литература

• Удмуртская Республика: Энциклопедия / гл. ред. В. В. Туганаев. — Ижевск: Удмуртия, 2008. — С. 613. — 768 с. — 2200 экз. — ISBN 978-5-7659-0486-2.