Удмурт Элькунысь П. И. Чайковский нимо операя но балетъя кун театр

Удмурт Элькунысь П. И. Чайковский нимо операя но балетъя кун театр
Кылдытэмын	1993
Театрлэн юртэз
Интыяськемез	Ижкар, Пушкинской ульчаысь 221-тӥ юрт
Кивалтэт
Кивалтӥсез	Фомин Алексей Юрьевич
Валтӥсь балетмейстерез	Маркелов Николай Игоревич
Сайт	operaizh.ru
Медиафайлъёс РувикиМедиа пушкын

Удмурт Элькунысь П. И. Чайковский нимо операя но балетъя кун театр (ӟуч: Государственный театр оперы и балета Удмуртской Республики) — крезьгуро театр, Ижкарысь Пушкинской ульчаын интыяськемын, Октябрь ёросысь Шор площадь шоры учке.

Историез

1931-тӥ арын 7-тӥ тулыспалэ Удмурт драмая театр усьтэмын вал, отын 1934-тӥ—1935-тӥ аръёсы операя труппа ужалляз. Татчы Бадӟым академической кун театрысь но Муско улосысь операя театрысь солистъёс пыризы: Г. Ф. Земляков, К. Н. Рушев, А. А. Рыбаков, С. К. Шехов, С. А. Штурбина, С. И. Феофилов но И. И. Якушин. Соку ик 30 адямилэсь кылдытэм театр оркестр ужалляз, солэн дирижёрез Д. С. Васильев-Буглай композитор вал, нош хорын 40 адями тыршиз. Н. А. Горский балетмейстерлэн сюлмаськеменыз егит ужасьёс понна балет студия кылдытэмын вал, со Драмтеатрысь балет труппалы инъет луиз.

Театрлэн вылӥысен тусыз

Кык ар ӵоже операя труппа таӵе операосты пуктӥз: «Русалка», «Князь Игорь», «Евгений Онегин», «Царская невеста», «Чио-Чио-Сан», «Фауст», «Севильский цирюльник».

1935-тӥ арын инвожое Ижкарын Драмая Ӟуч кун театр но Драмая Удмурт кун театр ужаны ӧдъязы. 1958-тӥ арын толсуре крезьгуръя но драмая театр ужзэ мытӥз, сое 1973-тӥ арын куарусёнэ Удмурт театрлы но УАССР-ысь Крезьгуръя театрлы люкизы, одӥг сцена вылын тыршизы. УАССР-ысь Крезьгуръя театрлэн репертуараз классикая оперетта, росси но совето авторъёслэн крезьгуро комедиоссы, озьы ик Удмуртиысь композиторъёслэн постановкаоссы пыризы. Отӥяз театрлэн коллективез репертуарзэ паськытатӥз, отчы классикаысь операя но балетъя постановкаос, озьы ик Удмуртиысь композиторъёслэсь произведениоссы сюризы. Соку ик операя но балетъя театр кылдытон борды басьтӥськемын вал.

1959-тӥ арын театрын Г. М. Корепанова-Камскийлэн «Любушка» нырысетӥ удмурт оперетталэн премьераез ортчиз, 1961-тӥ арын — Г. А. Корепановлэн «Наталь» нырысетӥ удмурт йӧскалык операезлэн премьераез, ужрадэ А. И. Хачатурян но Т. Н. Хренников пыриськизы.

1984-тӥ арын шуркынмонэ туала театрлэн юртэз пуктэмын, залэз 824 учкисьлы чакламын вал. 1993-тӥ арын театр Удмурт Элькунысь операя но балетъя кун театрлэсь статуссэ басьтӥз.

1987-тӥ арысен театрын Россиысь но Удмуртиысь дано артистка Татьяна Силаева ужа. 2022-тӥ арысен театрлэн ӧтем солистэз Константин Федотов луэ.

Театрлэн фойеяз П. И. Чайковскийлы сӥзем бюст

Партер но сцена

Постановкаос

Удмурт Элькунысь операя но балетъя кун театр Удмуртиын академической ӧръя огназ ужа. Театрлэн репертуараз П. И. Чайковскийлэн таӵе произведениосыз пыро: «Лебединое озеро», «Щелкунчик», «Спящая красавица» балетъёс но «Евгений Онегин», «Иоланта», «Пиковая дама» операос. Татын озьы ик В. Беллинилэсь, Ж. Бизелэсь, Д. Вердилэсь, Г. Доницеттилэсь, Р. Леонкаваллолэсь, П. Масканьилэсь, Дж. Пуччинилэсь, С. Рахманиновлэсь, Дж. Россинилэсь классикая операоссэс пукто. Классика луись «Летучая мышь», «Королева чардаша», «Марица», «Весёлая вдова», «Прекрасная Галатея» опереттаосты возьмато, озьы ик «Дамских дел мастер», «Моя жена — лгунья», «Бабий бунт», «Русский секрет», «Проделки Ханумы» атыкай произведениос вылэ пыкиськыса бадӟым ужъёсты быдэсто. Театрлэн сцена вылаз пуктӥськись «На краю любви» мюзикл удмурт калык веранъёс но мадёсъёс вылын кылдытэмын.

Театрлэн балет труппаез озьы ик неклассика амалъя возьматонъёсы пыриське — со таӵе балетъёс: «Унесённые ветром», «Ромео и Джульетта — XX век», «Не ревнуй меня к Бродвею», «Vivat, Дягилев!».

Театр Россиысь тросаз каръёсы трос пол гастрольёсын потаз, отчы мукет театръёсысь ӧтем артистъёс ӵем пырисько, театрысь солистъёс Атыкай музъем вылысь но кунгож сьӧрысь театръёслэн постановкаосазы шудо.

Валэктонъёс

Литература

• Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — 768 с. — 2200 экз. — ISBN 978-5-7659-0486-2.
• Удмуртская Республика : Культура и искусство : Энциклопедия / гл. ред. А. Е. Загребин. — Ижевск : Удмуртский институт истории, языка и литературы УрО РАН, 2012. — 540 с. — 300 экз. — ISBN 978-5-901304-62-4.

Чӧлсконъёс

• Удмурт Элькунысь П. И. Чайковский нимо операя но балетъя кун театр — specialradio.ru порталысь статья / 19.09.2016