Корепанов, Герман Афанасьевич

Википедиысь материал
Эскерем гожтос
Корепанов Герман Афанасьевич
Герман Афанасьевич Корепановлэн портретэз
Вордӥськем нуналыз 30-тӥ пӧсьтолэзе 1924(1924-07-30)
Вордӥськем интыез
Кулон нуналыз 13-тӥ оштолэзе 1985(1985-04-13) (60 арес)
Кулэм интыез
Кунмуртлыкез СССРFlag of the Soviet Union.svg СССР
Ужудысэз композитор
Нылпиосыз Александр Германович Корепанов[d]
Данъетъёсыз

Ленин нимо орден Быдӟым Атыкай ожлэн II степенё орденэз Заслуженный деятель искусств РСФСР

Коре́панов[1][2] (Корепа́нов[3]) Ге́рман Афана́сьевич (1924-тӥ арын 30-тӥ пӧсьтолэзе, Сьӧлта черкогуртын — 1985-тӥ арын 13-тӥ оштолэзе, Ижкарын) — удмурт крезьгурчи, артист, дирижер, Удмурт Элькунысь культура удысысь дано ужась (1957) но РСФСР-ысь Культура удысысь дано ужась (1958), СССР-ысь крезьгурчиослэн огазеяськонзылэн ёзчиез (1961)[2].

Улон сюресэз

Атаез репресси улэ шедемен валче, Герман Афанасьевичлэн пичи дырыз курадӟыса ортчиз. Школаын дышетскыкуз, мыло-кыдо ветлӥз Сьӧлта черкогуртысь Чеберлыкъя юртэ, гожъяз кылбуръёс но веросъёс. Быдӟым Атыкай ож аръёсы службаез Дальний Востокын ортчиз. Со вакыт ик шӧдӥськиз солэн крезьгур дуннее кыстӥськон мылкыдыз. Ож йылпумъяськем бере Герман Афанасьевич крезьгурчи луон удысэз бырйиз.

1947-тӥ — 1949-тӥ аръёсы дышетскиз Ижысь крезьгуръя училищеын (хорлэн дирижёрез удысъя). Та вакыт «Мон тодам вайисько», «Зарни нянь» кырӟанъёссэ кылдытӥз. 1950-тӥ арын дышетсконзэ азьланьтӥз Кузонысь консерваториын (Г. И. Литинскийлэн композицияя люкетазГ. И. Литинский)[3]). Мукет крезьгурчиосын но ужалляз, статьяосыныз но рецензиосыныз пӧртэм газет-журналъёсын печатласькиз, тупатъяз крезьгуро изданиосты. Кема аръёс ӵоже Удмурт радиолэн хорезлэн художникез но дирижёрез луыса ужаз.

Г. А. Корепанов — «Наталь» — нырысетӥ удмурт опералэн[3] но нырысетӥ удмурт симфонилэн (1964-тӥ ар) авторез. Симфония сӥземын курадӟытыса вием Кузебай Гердлы, лагерьёсын сюрсэн-сюрсэн быдтэмъёслы. Та симфония капчиен пыриз СССР-лэн крезьгуро фондаз. «Наталь» операез нырысьсэ Удмуртиысь операя но балетъя кун театрлэн сцена вылаз пуктӥзы, солы вылӥ дунъет сётӥзы Совето Союзысь тодмо крезьгурчиос — А. И. Хачатурян но Т. Н. Хренников. Герман Корепанов озьы ик удмурт романсэз кылдытӥсь но нырысетӥ фортепианной сонатаослэн, скрипичной пьесаослэн но нылпи кырӟанъёслэн авторзы. Тужгес паськыт вӧлмем кырӟанъёсыз пӧлын — Ашальчи Окилэн кылъёсызъя гожтэм «Мон тодам ваисько» (ӟуч: «Я вспоминаю тебя»кырӟанэз), «Зарни нянь» (ӟуч: «Золотой хлеб», Афанасий Лужаниндлэн атаезлэн кылъёсыз), «Удмуртия» (кылъёсыз И.Токаревлэн), «Зарни сизьыл» (ӟуч: «Золотая осень», кылъёсыз Степан Широбоковлэн. Та авторлэн кылбуръёсызъя 50 пала кырӟан гожтэмын). Берло дыръёсы гожтэмъёсыз пӧлысь тужгес устоез — «Восстание» опера (пиеныз Александр Корепановен ӵош гожтэмын) но Кыкетӥ симфониез[4].

Г. А. Корепановлэн вормонъёсыз

1957-тӥ арын пусъемын УАССР-ысь искусство удысысь сӥё-дано ужась нимын, 1958-тӥ ― РСФСР-ысь искусство удысысь дано ужась. Удмурт АССР-ысь Кун премилэн лауреатъёсыз пӧлысь нырысетӥез (1967). 1961-тӥ арысен — СССР-ысь крезьгурчиослэн огазеяськонзылэн правлениезлэн ёзчиез. РСФСР-ысь кун премиосын пусъёнъя комиссилэн ёзчиез. Быдӟым Атыкай оже пыриськем мурт. Крезьгуро искусствоын вормонъёс басьтэмез понна 1971-тӥ арын пусъемын Ленин нимо орденэн[4], озьы ик «Знак Почёта» гадьпусэн. Япониен нюръяськонэ пыриськемез понна пусъемын Быдӟым Атыкай ожлэн II степенё орденэныз но «Япониез вормем понна» гадьпусэн.

Улонысь кошкиз 1985-тӥ арын 13-тӥ оштолэзе. Кулэмез бере, 30 ар ортчыса, 2015-тӥ арын, крезьгурчилэн улэм но ужам юртаз (Ижкарысь Советской урам 15 номеро юрт) буре ваён пул шуккемын. Нош Ижкарысь Устолыкъя 1№ номеро нылпи школалы Герман Афанасьевич Корепановлэн нимыз сётэмын[5]. Дано крезьгурчилэн вордӥськем нуналыз ― 30-тӥ пӧсьтолэзь «Удмурт Элькунысь праздникъёс но буре ваён нуналъёс сярысь» Катъя 2020-тӥ арын Удмуртиысь официально юнматэм буре ваён нуналъёс пӧлы пыртэмын[6].

Произведениосыз

Операос

  • «Наталь» ― Ф. Кедровлэн «Катя» повестезъя (1961). Либреттоез А. Симоновлэн
  • «Мятеж» (А. Корепановен ӵош) Либреттоез Л. Корепановалэн, кылъёсыз О. Поскрёбышевлэн (1980)

Вокально―симфонической но хоровой произведениос

Кантатаос

  • «Вордскем лудъёс» (Родные поля) (1951)
  • «Асьмелэн егит дырмы» (Наша молодость) (1952)
  • «Октябрьлэн шундыез» (Солнце Октября) (1957)
  • «Дано егит дыр» (Славная молодость) (1958)
  • «Здравица» (1980).

Сопровожденитэк хоръёс

  • «Осенняя песня»
  • «Слава тебе, солдат!»

Симфонической произведениос

  • Симфония № 1 (1964)
  • Симфония № 2 (1983)
  • Увертюра (1958)
  • Балетная сюита (1972)
  • Оркестрен скрипкалы концерт (1953)
  • Оркестрен скрипкалы анданте (1955)

Камерно―инструментальной произведениос

Фортепианолы

  • Соната (1968)
  • Маленькая соната (1981)
  • Весенняя сюита (1953)
  • Два скерцо
  • Юмореска
  • Майский день
  • Полька

Скрипкалы но фортепианолы

  • Сюита в 5 частях.
  • Танец
  • Скерцо

Валторналы но фортепианолы

  • Ария.

Флейталы но фортепианолы

  • Скерцо

Кларнетлы но фортепианолы

  • Мелодия

Ксилофонлы но фортепианолы

  • Ручеёк

Романсъёс

  • «На холмах Грузии», кылъёсыз. А. С. Пушкинлэн
  • «Лысву» (Роса), кылъёсыз М. Покчи-Петровлэн
  • «Мынэсьтым эшъёсы юало» (Если спросят подружки), кылъёсыз В. Садовниковлэн
  • «Ӝыт садын» (В вечернем саду), кылъёсыз Г. Сабитовлэн
  • «Апрель», кылъёсыз В. Семакинлэн

Кырӟанъёс

200-лэсь трос, соос пӧлын:

  • «Мон тодам вайисько» (Я вспоминаю тебя), кылъёсыз Ашальчи Окилэн
  • «Зарни нянь» (Золотой хлеб), кылъёсыз А. Лужанинлэн
  • «Паймод, эке» (Удивишься, брат), кылъёсыз Г. Сабитовлэн
  • «Удмуртия», кылъёсыз И. Токаревлэн
  • «Зарни сӥзьыл» (Золотая осень), кылъёсыз С. Широбоковлэн
  • «Ӧй быгаты вунэтыны» (Не смог забыть), кылъёсыз С. Широбоковлэн
  • «Мы — железный народ», кылъёсыз О. Поскрёбышевлэн
  • Удмурт калык кырӟанъёслы обработкаос, нылпиослы кырӟанъёс но хоръёс

Драматической спектакльёслы крезьгур

  • «Пӧртмаськись туш» (Волшебная борода), В. Садовниковлэн пьесаезъя (1948).
  • «Тулкымъяське лыз зарезь» (Волнуется синее море), В. Садовниковлэн, И. М. Тронинлэн пьесазыя (1950)
  • «Вормон сюрес» (Дорога Победы) Л. Перевощиковлэн пьесаезъя (1951)
  • «Меӵ яр дурын» (На крутом берегу) В. Садовниковлэн пьесаезъя (1954)
  • «Кионлэн аслаз сюресэз» (У волка своя тропа), С. Широбоковлэн пьесаезъя (1960)
  • «Тулыс зор» (Весенний дождь), Е. Загребинлэн пьесаезъя (1961)
  • «Интервенция», Л. Славинлэн пьесаезъя (1963)
  • «Мамаша Кураж и её дети», Б. Брехтлэн пьесаезъя (1966)

Озьы ик учке

Валэктонъёс

  1. ↑ Музыкальная энциклопедия / гл. ред. Ю. В. Келдыш. М.: Советская энциклопедия: Советский композитор, 1974. Т. 2. Гондольера — Корсов. Стб. 952.
  2. ↑ 1 2 Туганаев, 2008, с. 411.
  3. ↑ 1 2 3 Корепанов, Герман Афанасьевич // Театральная энциклопедия / гл. ред. П. А. Марков. — М. : Советская энциклопедия, 1964. — Т. 3. Кетчер — Нежданова. — Стб. 198. — 1086 стб. — 41 300 экз.
  4. ↑ 1 2 Туганаев, 2008, с. 412.
  5. ↑ Корепанов, Герман Афанасьевич
  6. ↑ 30 июля отмечается памятная дата Удмуртской Республики - День рождения композитора Германа Афанасьевича Корепанова
«https://udm.ruwiki.ru/w/index.php?title=Корепанов,_Герман_Афанасьевич&oldid=427189»-ысь басьтэмын