Наталь (опера)
| Опера | |
| Наталь | |
|---|---|
 Ижын опералэн премьераез. Е. С. Пахомова Натальлэсь, П. Т. Романов Максимлэсь рольёсты быдэсто. | |
| Композиторез | Г. А. Корепанов |
| Либреттист | А. Н. Симонов |
| Сюжетлэн источникез | Ф. Г. Кедровлэн «Катя» повестезъя |
| Действиосыз | 3 |
| Кылдон арез | 1960 |
| Нырысетӥ постановка | 1961 |
| Нырысетӥ постановкаез пуктон инты | Удмурт_Элькунысь_йӧскалык_кун_театр |
Наталь (ӟуч: Наталь (опера)) — Г. А. Корепанов композиторлэн А. Н. Симоновлэн либреттоезлы Ф. Г. Кедровлэн «Катя» повестезъя гожтэм 3 действиен опера.
«Наталь» нырысетӥ йӧскалык удмурт опера луэ. Премьера 1961-тӥ арын 21-тӥ толшоре Ижысь Удмурт кун театрын ортчиз. Нырысетӥ куинь спектакльёс 21-тӥ—22-тӥ толшоре удмурт кылын пуктэмын вал, мукет куинез 27-тӥ—28-тӥ толшоре — ӟуч кылын. Со вакытэ ик ӟуч кылын опералы аудиозапись лэсьтэмын вал[1][2][3][4].
Кылдэм историез
Опералы либретто Удмуртиысь драмая ӟуч театрысь артист Александр Симонов гожтӥз. Текст гожтонэ Г. А. Корепанов композиторлэн Людмила кузпалыз пыриськиз. 1960-тӥ арын ӟуч кылын опера быдэстэмын вал, со аре ик шуркынмонэ премьера чакламын вал. КПСС-лэн обкомез дэмламъя, опералэн текстэз удмурт кылэ берыктэмын вал, нырысетӥ удмурт опералэн премьераез йӧскалык кылын мед ортчоз шуыса[1]. Дирижёрез — Г. Н. Бехтерев, режиссёрез — А. А. Асанин, художникез — Г. Е. Векшин, хормейстерез — А. В. Мамонтов[1][3].
Либреттолы инъет чот 1940-тӥ арын гожтэм Ф. Г. Кедровлэн «Катя» повестез кутэмын вал. Нырысетӥ дунневыл ож но Октябрь революция вакытэ улэм удмурт нылмуртлэн секыт адӟонэз сярысь автор гожтӥз. «Наталь» опералэн либреттоез повестьлэсь шӧдскымон висъяське[1][5]. А. Н. Симонов но Г. А. Корепанов понна опера бордын ужан — бадӟым театр произведение кылдытонъя нырысетӥ опыт вал. Кыкез ик авторъёс социалистической идеологиез лыдэ басьтыса тыршоно луизы, та сюжетэ воштӥськонъёс пыртӥз но валтӥсь героинялэсь образзэ сэрттон-пертчон вылын шӧдӥськиз. Ф. Кедровлэн «Катя» книгаез шудо йылпумъяське, валтӥсь геройёс, пӧртэм шуг-секытъёс пыр ортчыса, семьялэсь огазеяськемзэ пусъё, нош опералэн финалаз геройлыко вамышез но Натальлэн быремез хорлэн патетической апофеозэныз валче «югыт вуоноысь» идеологияя канонлы но нырысетӥ удмурт опералэн статусэзлы тупазы[1].
Операын йӧскалык удмурт колорит ӟуч классикая опералэн но образъёслэн мур психологизменызы герӟаськиз[3]. Премьерае ӧтем Т. Н. Хренников, А. И. Хачатурян но В. М. Блок произведениез вылӥ дунъязы[2].
2011-тӥ арын, 59 ар ортчыса, Удмурт Элькунысь операя но балетъя кун театрлэн сцена вылаз опера выльысь пуктэмын вал. Ыштэм партитураез куать ар ӵоже композитор Александр Корепанов выльысь берыктыны турттӥз. Опера ӟуч кылын чузъяськиз, удмурт кылын партитураез выльысь ӝутыны тыршон уж азинтэмын вал[6].
Вакчияк пуштросэз
Опера 3 действилэсь кылдытэмын. Действие 1910-тӥ аръёсы удмурт гуртын мынэ[1].
- 1-тӥ действие
Максим пичиысен сирота кылем Натальлы яратэмез сярысь вера. Уждун тырымтэез понна Миквор кулак вылэ кизэ ӝутэм Сандыр батрак, Натальлэн Оки эшезлы синмаськемзэ шарая но гуртысь пегӟыны ӵектэ. Гурт шулдыръяськонъёс дыръя кулак пи Педор эшъёсыныз ӵош Наталез лушкало но Максимез жуго.
- 2-тӥ действие
Наталь Педорлэн юртысьтыз пегӟе но шурлэн ярдураз Максимез пумита. Максимез, Сандырез но Шестериков дышетӥсез кутскем оже нуо, со дыре ик кулак пиос призывлэсь утисько.
- 3-тӥ действие
1917-тӥ арын сӥзьыл ожысь берытскем Шестериков но Максим гурт кенешын власть Советъёслы выжем сярысь иворто. Булда но Миквор жугиськыны кутско. Педор Максим вылэ пуртэн ожалске, Наталь яратоно пиосмуртсэ асэныз ворса но пуртъямлэсь быре. Финалын хорен гимн-апофеоз чузъяське, со югыт но шудо вуоно улонэз сӥлы каре.
Критика
Критикъёс опералэсь финалзэ курлаллязы, угось валтӥсь героинялэн быремез югыт вуоно улонлы ӧтемен уг тупа. Нялтас вераса, опералэсь йылпумъяськемзэ но героинялэсь быремзэ репетициос дыръя гинэ юнматӥзы. Озьы ик либреттолэсь висъяськемзэ пусйылӥзы, отын героиня воксё но ас шудэз понна рос-прос вамышъёс уг лэсьты, ас адӟонэз пумысен гинэ куректэ, нош зэмос повестьын Катя сюжетлэн шорсюлмыз луэ[1].
Рольёсты быдэстӥсьёс
Валэктонъёс
- ↑ 1 2 3 4 5 6 7 Новосёлова Е. Ю.. Проблема финала оперы г. Корепанова «Наталь»: «Тонкая березка» под «Солнцем свободы» [ӟуч], cyberleninka.ru. Эскеремын: 2 гудырикошконэ 2025 арын.
- ↑ 1 2 3 4 Т. Н. Голубкова, Л. И. Фролова, Л. Г. Кондратьева, Н. М. Павлова. Ими гордится удмуртская земля. Вып. 3 : Деятели искусства [ӟуч], elibrary.unatlib.ru. Эскеремын: 2 гудырикошконэ 2025 арын.
- ↑ 1 2 3 4 5 6 7 8 В. В. Туганаев. Удмуртская Республика: Энциклопедия [ӟуч], vivaldi.nlr.ru. Эскеремын: 2 гудырикошконэ 2025 арын.
- ↑ А. Н. Уваров. Писатели Удмуртии: Библиографический справочник [ӟуч], elibrary.unatlib.ru. Эскеремын: 2 гудырикошконэ 2025 арын.
- ↑ 1 2 3 4 5 6 А. Е. Загребин. Удмуртская Республика: Культура и искусство: Энциклопедия [ӟуч], nlr.ru. Эскеремын: 2 гудырикошконэ 2025 арын.
- ↑ Завьяловский музей истории и культуры. 63 года назад на сцене Удмуртского Государственного музыкально-драматического театра шла премьера первой удмуртской оперы «Наталь» [ӟуч], vk.com. Эскеремын: 2 гудырикошконэ 2025 арын.
Литература
- Писатели Удмуртии. Библиографический справочник / сост. А. Н. Уваров. — Ижевск: Удмуртия, 1989. — 464 с. — 5000 экз. — ISBN 5-7659-0131-X.
- Удмуртская Республика: Энциклопедия. 2-е изд., испр. и доп. / гл. ред. В. В. Туганаев. — Ижевск: Удмуртия, 2008. — 768 с. — 2200 экз. — ISBN 978-5-7659-0486-2.
- Удмуртская Республика: Культура и искусство : Энциклопедия / гл. ред. А. Е. Загребин. — Ижевск: Удмуртский институт истории, языка и литературы УрО РАН, 2012. — 540 с. — 300 экз. — ISBN 978-5-901304-62-4.
- Новосёлова Е. Ю. Проблема финала оперы Г. Корепанова «Наталь»: «Тонкая березка» под «Солнцем свободы». Ежегодник финно-угорских исследований. — Удмуртский государственный университет, 2016. — С. 151—164. — ISBN 2224-9443.
- Ими гордится удмуртская земля. Деятели искусства. Библиографический указатель литературы / составители Т. Н. Голубкова, Л. И. Фролова, Л. Г. Кондратьева, Н. М. Павлова. — Ижевск: РИО Госкомиздата УАССР, 1980. — 49 с. — 1000 экз.