Ложкин, Кузьма Алексеевич

Кузьма Алексеевич Ложкин
Кузьма Алексеевич Ложкин
Вордӥськем нуналыз	17-тӥ коньывуонэ 1909 (116 арес)
Вордӥськем интыез	Зар-Медло, Сарапул утем, Ватка губерния, Росси империя[d];
Кулон нуналыз	1-тӥ толшоре 1981 (71 год)
Кулэм интыез	Иж, РСФСР, СССР;
Кун	Росси империя[d]; СССР;
Ужудысэз	актёр
Данъетъёсыз	;

Кузьма Алексеевич Ложкин — тодмо удмурт режиссёр, артист, кырӟась (куараез лирич. тенор). Вордӥськемын 4-тӥ (17-тӥ) октябре 1909-тӥ арын Дэбес ёросысь Зар-Медла гуртын.

1923-тӥ — 1928-тӥ аръёсы улыны выжиз Ижкаре, мыло-кыдо пыриськиз Ижысь Удмурт клуб бордын кылдытэм драмая кружоке. Отын тодон-валан люкаса, быгатонлыксэ волятыса, 1928-тӥ арын дышетскыны пыриз Москваысь Театр искусствоосъя валтӥсь техникуме (1932-тӥ арысен та дышетсконни ГИТИС нимаськыны кутскиз). Отын со дышетскиз режиссёръёсты дасянъя факультетын. 1932-тӥ арын техникумез йылпумъяса, берытскиз Удмурт шаере. 1932-тӥ арысен 1934-тӥ арозь, 1941-тӥ арысен 1946-тӥ арозь, 1951-тӥ арысен 1953-тӥ арозь — Кузьма Алексеевич кивалтӥз драмая Удмурт театрен. Кузьма Ложкинлэн пуктэм ужъёсыз яркыт луэменызы висъясько но. Со геройёсызлэсь сям-тодметсэс детальёс пыр возьматэ.

Творчествоез

К. А. Ложкинлэн тужгес но яркыт ужез — И. Гавриловлэн ужезъя 1931-тӥ арын пуктэм «Вало ӧр куашетэ» постановкаез. Со бордысен ӧсъёссэ вӧлъяз драмая Удмурт кун театр. 1933-тӥ арын К. Ложкин Н. В. Гогольлэсь «Ревизор» ужзэ сцена вылын пуктон борды басьтӥське. Со бере бӧрсьысь кылдыло таӵе ужъёсыз:

«Тыло вӧсь» (В. Садовниковъя) — 1938-тӥ ар
«Вуж Мултан» (М. Петровъя) — 1945-тӥ ар
«Тулыс нуналъёс» (И. Гавриловъя) — 1949-тӥ ар
«Лыз зарезь тулкымъяське» (В. Садовниковъя но М. Тронинъя) — 1952-тӥ ар
«Яратон ке ӧвӧл» (С. Широбоковъя) — 1961-тӥ ар

Артист Кузьма Ложкин пӧртэм рольёсты шудыны пӧрмытӥз. Солы капчиен сётскизы комедия но драмая рольёс. Валтӥсь рольёсыз — Олёш («Зӥбет зурка» М. Петровъя), Азин (М. Гавриловъя), Юрмег («Сюан» В. Садовниковъя), Роман («Аннок» И. Гавриловъя). Кузьма Ложкин крезьгуро спектакльёсын но шудылӥз. Тужгес но яркыт партиосыз: Дед Ничипор («Свадьба в Малиновке» В. Александрова), Кавалькадос («Поцелуй Чаниты» Ю. Милютинъя), Булда («Наталь» Г. Корепановъя).

Кузьма Алексеевич Ложкин 1952-тӥ арын пусъемын УАССР-ысь искусство удысысь дано ужась нимын, 1958-тӥ арын со луиз РСФСР-лэн Калык артистэз. 1946-тӥ арын пусъемын «Данъян пус» орденэн, нош 1958-тӥ арын — Горд Знамя орденэн.

Удмурт театрлэн борддораз шуккемын Кузьма Алексеевичез данъясь пул.