Корепанов, Александр Германович
| Корепанов, Александр Германович | |
|---|---|
 | |
| Вордӥськем нуналыз | 23-тӥ оштолэзе 1951 (75 арес) |
| Вордӥськем интыез | Ижкар, Удмурт АССР, СССР |
| Кунмуртлыкез |
 Россия  Удмуртия |
| Ужудысэз | крезьгурчи, инструменталист |
| Данъетъёсыз |
Удмурт Элькунысь Кун премилэн лауреатэз. |
Алекса́ндр Ге́рманович Коре́панов (ворд. 1951-тӥ арын 23-тӥ оштолэзе Ижкарын, УАССР, СССР) — совето но росси композитор, крезьгуръя дышетӥсь. Удмурт Элькунысь искусство удысысь дано ужась (1994). Удмурт Элькунысь Кун премилэн лауреатэз (1994). Композиторъёслэн калыккуспо ӵошатсконысьтызы лауреат (2002). СССР-ысь но Россиысь крезьгурчиослэн огазеяськонысьтызы ёзчиез (1978). Удмуртиысь крезьгурчиослэн огазеяськонзылэн тӧроез (1999—2014). Удмурт Элькунлэн кункрезезлы гур гожтӥсьёс пӧлысь огез[1].
Улон сюресэз
Александр Германович Корепанов удмурт композиторлэн Герман Афанасьевич Корепановлэн семьяяз 1951-тӥ арын 23-тӥ оштолэзе вордӥськиз. Тазалыкез лябен, пияш шор ёзо но крезьгуръя школаосын огдыре дышетскыны ӧз вормы, таин валче крезьгурез валаны нырысь-валысь дораз выриз. Герман Афанасьевичлэсь Нырысетӥ удмурт симфониезлэсь оркестрен шудон партизэ нотаысь нотае семьяеныз ӵош гожъякуз ик, нотаосты но валаны-радъяны дышиз. Ижысь 40 номеро шор ёзо школаез[2] йылпумъяса, крезьгуръя училищее пыриз (али — Удмуртиысь крезьгуръя колледж). Татын со дирижёръёсты дасян но хорен кырӟаны дышетон ёзын тодон-валан люказ, 2-тӥ курс бере теорияя ёзаз дышетскиз, соку ик аслэсьтыз крезьгуръёссэ малпаны-кылдытыны ӧдъяз[3].
1971-тӥ арын А. Корепанов Кузонысь консерваторие крезьгурчиосты дасян факультетэ пыриз, Алмаз Закирович Монасыповлэн композициосъя классаз сюриз. 1972-тӥ арын, дышетӥсез консерваториысь кошкемен, профессор Анатолий Борисович Лупповлэн композиция классаз выжтэмын вал. Со дорын ик 1976-тӥ арын консерваториез йылпумъяз. Егит крезьгурчилэн диплом ужаз фортепианолы 8 багатель (пьеса), фортепианоен шудонъя крезьгуро квинтет (ансамбль) но Симфонияя скерцо (ӝог шудонъя крезьгуро пьеса) пыризы[4].
Консерваториез йылпумъямез бере Иже берытскиз. Татын крезьгуръя училищеын 25 ар ӵоже теорилы, сольфеджиолы, гармониялы, крезьгуро литературалы, крезьгуро формалы, инструментоведенилы но инструментовкалы, полифонилы но композицилы пиналъёсты дышетӥз[4].
1978-тӥ арын Александр Корепановез СССР-ысь крезьгурчиослэн огазеяськоназы кутӥзы. Со дыре ик композитор аслэсьтыз творчествозэ азинтон, крезьгуро произведениос гожтон борды гижысь-пиньысь басьтӥськиз, атаеныз ӵош но ужазы. Удмуртиысь композиторъёслэсь творчествозэс калык пӧлын вӧлмытын ӧдъяз, концертъёс, фестивальёс ортчытъяз[3].
1992-тӥ арын Удмурт Элькунлы кункрезь гожтонъя ӵошатсконэ пыриськиз. Крезьгуро темалы атаеныз 1952-тӥ арын гожтэм «Родной Кам шурмы» кырӟанлэсь гурзэ бырйиз. Та композиция 1993-тӥ арын 4-тӥ шуркынмонэ Удмурт Элькунлэн кун крезеныз юнматэмын, нош ассэ Александр Германовичез Кун премиен пусйизы[5][6].
1999-тӥ—2014-тӥ аръёсы Удмуртиысь крезьгурчиослэн огазеяськонэнызы кивалтӥз[4].
Творчествоез
Александр Германовичлэн уноез сочинениосыз фортепианолы чакласа гожтэмын: али гинэ шудыны кутскись пианистъёс но бадӟым концертын шудӥсьёс но сое быдэстыны быгато. Со произведениосын йӧскалык йылолъёс яркыт шӧдӥсько, Сергей Прокофьев но Бела Барток композиторъёслэн творчествоысьтызы амалъёсынызы пунӥськыса, сюлэмез бугырто. 1980-тӥ но 1990-тӥ аръёсы фортепиано ансамбльлы бадӟым саклык висъя, удмурт крезьгурын та амалэн шудонлы кутскон сётӥсь луэ. Домра но фортепианоен шудонъя кӧня ке пьесаос гожтэ, йӧскалык крезьгурез узырмытэ. Творчествозэ азинтонын бадӟымесь театральной жанръёс борды берытскемез валтӥсь ужпум луэ[7].
Александр Германовичлэн творчествояз атаезлэн произведениосызлы вариациос кылдытон нимысьтыз инты басьтэ. Озьы, кылсярысь, Герман Афанасьевичлэсь «Оркестрен скрипкалы концертсэ» Ижын 1999-тӥ арын выль сямен чузъяськытӥз. Куд-огез произведениоссы («Мятеж» опера но) ӵошенназы гожтэмын[8].
Произведениосыз
| Крезьгуро театрлы сочинениос | |
|---|---|
| Ар | Произведение |
| 1980 | «Мятеж» опера ( Г. А. Корепановен ӵош) |
| 1995 | «Соловей и роза» балет (О. Уайльдлэн выжыкылэзъя) |
| Драмая спектакльёслы крезьгуръёс | |
|---|---|
| Ар | Произведение |
| 1978 | Удмурт драмтеатрлэн «Гудыри» спектаклезлы крезьгур |
| 1991 | Ӟуч драмтеатрлэн «Похищение луковиц» спектаклезлы крезьгур (М. К. Машадлэн пьесаезъя]]) |
| 1996 | Удмурт драмтеатрлэн «Италмас» спектаклезлы крезьгур (М. П .Петровалэн поэмаезъя) |
| 1996 | Удмурт драмтеатрлэн «Лебедёвские лебеди» спектаклезлы крезьгур (В. В. Морозовлэн пьесаезъя) |
| Симфонияя произведениос | |
|---|---|
| Ар | Произведение |
| 1976 | Симфонияя скерцо |
| 1990 | Оркестрен фаготлы концерт |
| 1992 | Симфония оркестрлы бадӟым вальс |
| 1993 | Удмурт Элькунлэн кункрезез (Г. А. Корепановлэн кырӟанысьтыз гурезлы вариация) |
| 1996 | Камерной симфония |
| 1997 | Струнной оркестрлы мӧзмыт вальс |
| 1998 | Струнной оркестрлы сӥзьыл вальс |
| 1999 | Оркестрен скрипкалы концерт Г. А. Корепановлэн концертэзлы вариация) |
| 2000 | Трубалы но симфонияя оркестрлы крезьгур (Г. А. Корепановлэн скрипкалы но фортепианолы пьесаезлы эрико транскрипция) |
| 2000 | Симфонияя оркестрлы полька (Г. А. Корепановлэн фортепианолы пьесаезлы эрико транскрипция) |
| 2000 | Симфонияя скерцо (2-тӥзэ тупатъям) |
| 2006 | Стурнной оркестрлы вальс-каприс |
| 2010 | «На сопках Манчжурии» (трубалы, домралы, валторналы, саксофонлы но струнной оркестрлы сюита; Г. А. Корепановез буре вайыса) |
| 2011 | «Удмуртия» (Г. А. Корепановлэн «Гимны родины в наших сердцах» конкурс-фестивальын бадӟым симфонияя оркестрен, солистъёсын но хорен быдэстон вылысь оркестровка) |
| 2012 | «Удмуртские мелодии» (В. М. Блоклэн фортепианоен шудонъя пьесаосызлы струнной оркестрен шудон вылысь инструментовка) |
| 2014 | «Не забудем» (Г. А. Корепановлэн крезьгурысьтыз струнной оркестрен шудонъя сюита) |
| 2014 | Струнной оркестрлы |
| 2016 | «Озорники» (4 киын шудон вылысь фортепианолы но симфонияя оркестрлы сюита) |
| 2016 | Камерной симфония (2-тӥ тупатъям) |
| Духовой оркестрлы произведениос | |
|---|---|
| Ар | Произведение |
| 1993 | Духового оркестрлы скерцо |
| 1994 | Саксофонлы но духовой оркестрлы крезьгур (Г. А. Корепановлэн скрипкалы но фортепианолы пьесаезлы эрико транскрипция) |
| 1994 | Духовой оркестрлы полька (Г. А. Корепановлэн фортепианолы пьесаезлы эрико транскрипция) |
| 1994 | Духовой оркестрлы ньыль люкетлэсь нырысетӥез сюита |
| 1995 | Духовой оркестрлы ньыль люкетлэсь кыкетӥез сюита |
Семьяез
Атаез Герман Афанасьевич — дано удмурт композитор, удмурт крезьгуръя классик, артист, дирижёр, РСФСР-ысь но УАССР-ысь искусство удысысь дано ужась, СССР-ысь крезьгурчиослэн огазеяськонзылэн ёзчиез, Удмурт АССР-ысь Кун премилэн лауреатъёсыз пӧлысь нырысетӥез. Анаез Людмила Николаевна — Ижысь телестудиын ужась, Герман Афанасьевичен но Александр Германовичен гожтэм «Мятеж» опералэсь либреттозэ малпась; УАССР-ысь телевидениея но радиоя Кун комитетлэн, Удмурт облсовпрофлэн, культура удысысь профсоюзын ужасьёслэн Удмурт обкомзылэн данъян грамотаосынызы пусъемын[2].
Атаез ласянь песятаез Афанасий Фёдорович — партийной ужась, Гурт удысъя удмурт вылӥ коммунистической школаысь проректор. Атаез ласянь песянаез Варвара Матвеевна — Ижысь нылпи садын ужась; УАССР-ысь Вылӥ Советлэн Президиумезлэн грамотаеныз пусъемын[2]. Анаез ласянь песятаезлэн атаез Капитон Леонтьевич Исаков — оружейник, пыӵалтӥрлык поттонын быгатыса ужамез понна нимысьтыз данъян кафтанэн пусъемын[9].
Кузпалыз Тамара Ювенальевна — крезьгурчи, Удмуртиысь крезьгуръя колледжысь дышетӥсь, Россиысь шоро-куспо профессиональной тодон-валан сётон удысысь дано ужась, Удмуртиысь калыкез дышетон удысысь дано ужась. Людмила но Мария нылъёссы озьы ик крезьгурало[10].
Валэктонъёс
- ↑ Туганаев, 2008.
- ↑ 1 2 3 Александрова, 2014.
- ↑ 1 2 Нуриева, 2016.
- ↑ 1 2 3 Корепанов Александр Германович [ӟуч] Союз композиторов России. Эскеремын 2021-04-13 арын
- ↑ Как создавался гимн Удмуртии ИА «Удмуртия». Эскеремын 2021-04-13 арын
- ↑ Цветухина, 2016.
- ↑ Загребин, 2012.
- ↑ Голубкова, 2011.
- ↑ Корепанов, 2019.
- ↑ Малинина, 2011.
Литература
- Корепанов Александр Германович // Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — С. 411. — 768 с. — 2200 экз. — ISBN 978-5-7659-0486-2.
- Корепанов Александр Германович / Ю. Л. Толкач // Удмуртская Республика : Культура и искусство : Энциклопедия / гл. ред. А. Е. Загребин. — Ижевск : Удмуртский институт истории, языка и литературы УрО РАН, 2012. — С. 242. — 540 с. — 300 экз. — ISBN 978-5-901304-62-4.
- Центральный государственный архив Удмуртской Республики: Путеводитель по фондам и коллекциям документов личного происхождения / Комитет по делам архивов при Правительстве УР. — Ижевск: Институт компьютерных исследований, 2014. — С. 208. — 280 с. — ISBN 978-5-4344-02.
- Голубкова Ариадна Николаевна, Седельникова Вера Григорьевна. Его музыка приносит радость: страницы жизни и творчества композитора Александра Корепанова // Ежегодник финно-угорских исследований. — 2011. — № 2. — С. 150—154. — ISSN 2224-9443.
- Нуриева Ирина Муртазовна. Путь в мир музыки. Александру Германовичу Корепанову - 65 лет! // Ежегодник финно-угорских исследований. — 2016. — № 2. — С. 165—170. — ISSN 2224-9443.
- Алина Малинина. Ученик, учитель, мастер // Известия Удмуртской Республики. — 2011. — 19 апреля (№ 42 (3730)). — С. 15.
- Марина Цветухина. Родная Кама-река… // Известия Удмуртской Республики. — 2016. — 27 октября (№ 123 (4548)). — С. 2.
- Корепанов Александр Германович. Музыкальное училище в судьбе целой династии // Профессиональное образование в Удмуртской Республике. — 2019. — № 3. — С. 42—44.