Атыкай музъемез утисьлэн нуналыз

Википедиысь материал
Атыкай музъемез утисьлэн нуналыз
Орден Красной Звезды.jpg
Юнматэмын 1922-тӥ арын
Пусъё арлы быдэ
Дырыз 23-тӥ тулыспалэ
Герӟаськемын Горд армилэн герман войскоослы пумит 1918-тӥ арын тулыспалэ ортчем ожъёсын
Логотип РУВИКИ.Медиа Медиафайлъёс РувикиМедиа пушкын

Атыкай музъемез утисьлэн нуналыз — Россилэн ожгар данлыко нуналыз. Пусйиське Россиын но СССР-лэн азьвыл кунъёсаз арлы быдэ 23-тӥ тулыспалэ. 1922-тӥ арысен Горд Армилэн нуналыз шуыса нимаське вал, 1946-тӥ арысен — Совето Армилэн нуналыз, 1949-тӥ арысен 1992-тӥ арозь — Совето Армилэн но Ожгар-зарезь флотлэн нуналыз. 23- тӥ тулыспал — вань совето калык понна огшоры ужан нунал луэ вал, ожгаружез быдэсъясьёсты лыдэ басьтытэк[1].

СССР куашкам бере Россиын та нуналэз Атыкай музъемез утисьлэн нуналыз шуыса нимазы — утён удысын ужась воргоронъёслэн но нылкышноослэн праздниксы[2]. Россиын шутэтскон нуналэн ялэмын.

Историез

Росси империын революцилэсь азьпал 26-тӥ шуркынмонэ Георгиевской кавалеръёслэсь нуналзэс пусйылӥзы. Со нунал 1769-тӥ арын орденэз кылдытонлы сӥземын вал. Атыкай музъемез утисьёслэн огъя нуналзы со вакытэ вылымтэ[3].

15-тӥ (28-тӥ) толшоре 1918-тӥ арын Совето Россиысь Калык комиссаръёслэн кенешсы Рабоче-крестьянской Горд арми кылдытон сярысь декрет кутӥз (печатламын 20-тӥ толшоре (2-тӥ тулыспалэ) 1918-тӥ арын большевикъёслэн кивалтэтсылэн официальной печатлан ёзэтаз[4]). Фронтысь солдат-доброволецъёс выль армие гожтӥськыны кутскизы, соос пӧлысь красноармейской ротаос но полкъёс кылдытӥзы[5].

18-тӥ тулыспалэ герман но австро-венгер войскоос быдэс Шундыӝужан фронт кузя наступление потӥзы. 21-тӥ тулыспалэ кылдытэмын вал Петроградлэн Революционной обороная комитетэз, сое йыръяз Яков Свердлов. 22-тӥ тулыспалэ ӝыт Владимир Ленинлэн ӧтемезъя Могилёвысь Петроградэ вуиз Вылӥ армийырлэн штабеныз кивалтӥсь, азьвыл генерал Михаил Бонч-Бруевич, со ик Совето Россиез палэнысь тушмонлэсь утёнэн кивалтӥз. Ленинэн но мукет огмуртъёсын кенешемез бере, Бонч-Бруевич Смольнойын, Ленинэн бускель кабинетэ интыяськыса, уж борды басьтӥськиз[6].

Ревель, Псков но Нарва вылэ куать дивизилэсь но мукет частьёслэсь кылдытэм 8-тӥ герман армия ожалскиз. Псков пала 5 герман полкъёс куштэмын вал[7][8]. Уй-нунал ӵоже тушмон 50 иськеме азьланьскиз[9]. Пинск — Двинск — Рига палась потыса, нырысь арняяз ик Минскез, Полоцкез, Псковез, Ревелез киултӥз.

1918-тӥ арын 23-тӥ тулыспалэ СНК-лэн «Социализмо музъеммы кышкытлыкын!» вазиськонэз[10] но Николай Крыленколэн «Армийырлэн ӧтёнэз» печатламын вал. Ӧтёнлэн берпум чуръёсаз «Ваньмы ожтӥрлык кутом. Революциез утём!» шуыса гожтэмын. Окопъёс гудыны огъя мобилизация ялэмын вал. 23-тӥ тулыспалэ СНК-лэн кивалтӥсез Ленин «Правда» газетын тупанкыл гожтонлэн кулэлыкез сярысь «Мир или война» статьязэ печатлаз. Гожтоссэ Революционной армиез кыл вылын гинэ уд кылдыты, сое уж вылын радъяно, кужмо калык армия кылдытоно шуыса йылпумъяз.

23-тӥ тулыспалэ бадӟым каръёсын митингъёс ортчизы, калык тросэн Горд Армие гожтӥськыны кутскиз. 25-тӥ тулыспалэ фронтэ нырысетӥ отрядъёс келямын вал[11].

Горд отрядъёс тушмонлы пумит султӥзы. Валка карын немец частьёсын ог 300 пала латыш стрелокъёс ожмаськыны кутскизы. Псков, Ревель, Гдов котырын ожъёс пуромизы[7][11].

  • СНК-лэн Рабоче-крестьянской Горд армиез кылдытон сярысь декретэз, В. И. Ленинлэн тупатонъёсыныз

    СНК-лэн Рабоче-крестьянской Горд армиез кылдытон сярысь декретэз, В. И. Ленинлэн тупатонъёсыныз

  • Генерал фон Эйхгорн оккупировать карем Минскын, 1918-тӥ арын тулыспалэ

    Генерал фон Эйхгорн оккупировать карем Минскын, 1918-тӥ арын тулыспалэ

  • Герман империлэн войскоез. Киев, 1918-тӥ арын южтолэзе

    Герман империлэн войскоез. Киев, 1918-тӥ арын южтолэзе

  • Немец: «Россия милемыз киоссэ вӧлъяса пумита» (суред Одессаын потӥсь журналысь басьтэмын, 1918-тӥ арын южтолэзь яке оштолэзь)

    Немец: «Россия милемыз киоссэ вӧлъяса пумита» (суред Одессаын потӥсь журналысь басьтэмын, 1918-тӥ арын южтолэзь яке оштолэзь)

23-тӥ тулыспалэ ӵукна немец курьер Совнаркоме ультиматум вуттӥз; отын малпаськыны 48 час дыр сётэмын вал[12]. ЦК РСДРП(б)-лэн кенешаз Ленин, юн пумитъяськонэз санэ басьтытэк, ЦК-лэсь ёзчиоссэ ультиматумен соглаш кариськытӥз но тупанкылэз герман куронъёсъя гожтыны косӥз, пролетар тӧрлыкез котькыӵе амалэн но возьыны кулэ[13][14].[15], шуиз. 24-тӥ тулыспалэ выжон уе решение кутэмын вал. Но ожмаськонъёс тупанкылэз гожтытозь, 3-тӥ оштолэзёзь кыстӥськизы[7].

26-тӥ тулыспалэ РСФСР-ысь Калык комиссаръёслэн кенешсы кивалтэтэз Москвае выжтон сярысь решение кутӥз.

1918-тӥ арын 3-тӥ южтолэзе Брест тупанкыл герман куронъёсъя гожтэмын.

Патриарх Московский но всея России Тихон аслаз вазиськоназ 1918-тӥ арын 5-тӥ (18-тӥ) южтолэзе Брест тупанкылэз юн курлаз[16].

Праздниклэн кылдэмез

1919-тӥ арын 10-тӥ толшоре Рабоче-крестьянской Горд Армилэн Вылӥ военной инспекциезлэн тӧроез Николай Подвойский, Горд Армиез кылдытон сярысь декрет поттэм дырысен ар тырмонэз 28-тӥ толшоре пусйыны дэмласа, ВЦИК-е вазиськиз.

Солэн куронэз беромыса вуэмен, вазиськонэз 23-тӥ толшоре гинэ эскеризы. Соин праздникез радъяны ВЦИК пумит луиз. Озьы ке но, 24-тӥ толшоре Моссоветлэн Президиумез «Горд Армилэн кылдонэзлы сӥзем праздник нуналэз радъян сярысь» ужпумез эскерыса, сое Горд кузьымлэн нуналыныз, (ӟуч: День красного подарка) огазеяса, 17-тӥ тулыспалэ пусйыны дэмлаз. Горд кузьымлэсь нуналзэ благотворительной акция выллем ортчытыны чакламын вал. Но 17-тӥ тулыспал вордӥськонлы тупамен, Горд кузьымлэсь но Горд Армилэсь нуналзэ пусъёнэз матысь арнянуналэ выжтӥзы — 23-тӥ тулыспалэ.

Собере кӧня ке ар ӵоже праздник сярысь вунэтӥзы. Выльысь со выльдӥськиз 1922-тӥ арын . Со арын ик 27-тӥ толшоре ВЦИК-лэн Президиумезлэн Горд Армилэн кылдэмез дырысен 4 ар тырмонэзлы сӥзем декрет потӥз[17].

Горд армилэн кылдэм дырысеныз ар тырмонэзлы сӥзем ужрадъёсын афиша, Псков, 23-тӥ тулыспалэ 1919-тӥ арын[18].

Дырзэ 23-тӥ тулыспалэ юнматон

1923-тӥ арын паськыт пусъемын вал РККА-лэн вить ар тырмонэз. Праздник огъясоюз инлыкен ортчиз. Реввоенсоветлэн 1923-тӥ арын 5-тӥ тулыспалэ Л. Д. Троцкийен гожтэм косэтаз тазьы пусъемын: «1918-тӥ арын 23-тӥ тулыспалэ, тушмон зӥбетэз вормон понна, ужасьёслэн но крестьянъёслэн кивалтэтсы ожтӥрлыко кужымъёсты кылдытонлэн кулэлыкез сярысь ивортӥз»[9]. Со арын ик «Военная мысль и революция» журналын, 23-тӥ тулыспалэ кылдытэмын нырысетӥез горд арми часть, кудӥз уйпал но шундыпуксён палан ожмаськиз, шуыса гожтэмын вал.

1933-тӥ арын К. Е. Ворошилов (Троцкийлэн политика ласянь пумит луисез) РККА-лэн 15 ар тырмонэзлы сӥзем заседанияз, 23-тӥ тулыспал истори датаосын уг герӟаськы шуыса вераз[19].

Постсталинской вакытэ генерал-майор профессор С. Ф. Найда пусйиз, Совето Армилэн кылдонэзлы сӥзем праздник23-тӥ тулыспалэн герӟаськемын. Ӵапак со нуналэ Петроградын горд арми отрядъёс кылдытыны кутскизы[20].

Атыкай музъемез утисьлэн нуналыз Россиын

Росси Федерациысь Вылӥ Кенешлэн Обороная но кышкыттэмлыкъя комитетэзлэн кичӧлтэмезъя, праздниклэн выль нимыз РФ Вылӥ Кенешлэн Президиумезлэн «Росси Федерацилэсь данлыко нуналзэ — Атыкай музъемез утисьёслэсь нуналзэс юнматон сярысь» 08.02.1993 N 4423-1-тӥ номеро Пуктэтэзъя юнматэмын вал .

2002-тӥ арысен, РФ Кун думалэн решениезъя, 23-тӥ тулыспал Россиын шутэтскон нуналэн ялэмын. 1995-тӥ арын 13-тӥ южтолэзе гожтэм «Россилэн ожгар данлыко но буре ваён нуналъёсыз сярысь» РФ № 32-ФЗ-тӥ номеро Федерал катэзъя «Атыкай музъемез утисьлэн нуналыз» шуыса пусйиське[21]. Со катъя «Атыкай музъемез утисьлэн нуналыз» Росси Федерацилэн ожгар данлыко нуналыныз лыдъяське.

2006-тӥ арын 24-тӥ южтолэзе Кун дума катысь «Горд Армилэн Германилэсь кайзер войскооссэ вормон нуналыз (1918-тӥ ар)» кылъёсты утялтыны но праздниклэн йыръяназ «защитник» кылэз одӥг лыдын кутыны дэмлаз.

Постсоветской Россиын 23-тӥ тулыспал —быдэс калыкен ужан коллективъёсын, школаосын но семьяосын пусйиськись праздник. Кинэ та нуналэ данъяно шуыса юанлы валэктон пумысен та дырозь эчешонъёс мыно. Кылсярысь, вань куинь пумо малпанъёс: данъяны кулэ профессиональной ожгаруж быдэсъясьёсты гинэ (воргоронъёсты но нылкышноосты); данъяны кулэ ваньзэс, кин армиен герӟаськемын, тужгес но Быдӟым Атыкай ожысь ветеранъёсты (воргоронъёсты но нылкышноосты); та нунал вань росси воргоронъёслэн но пяшъёслэн праздниксы луэ, озьы ик армие ветлымтэосызлэн[22].

Атыкай музъемез утисьлэн нуналыз , Москва, Александровской сад, 2008-тӥ арын 23-тӥ тулыспалэ. Россилэн Президентэз Владимир Путин Тодмотэм Солдатлэн Шайгу вылаз венок понэ

Москваын Кремль азьын ортчись сӥё-дано ужрад — Тодмотэм Солдатлэн Шайгуэз вылэ венок понон. Соку Александровской садэ вуэ Россилэн Президентэз, со борды итӥсько Федерал собранилэн кыкезлэн инэгъёсызлэн тӧроосыз, ожгар кивалтэт, черк кивалтэт но мукет кивалтӥсьёс[23]. Шып улон минут бере чузъяське кунлэн гимнэз, собере сӥё-дано маршен ортче почётной карауллэн ротаез . Политической партиос та нуналэ нимысьтыз трос калыко ужрадъёс радъяло[24]. Ӝытазе праздниклы сӥзем концерт ортче. Москваын но тросаз бадӟым каръёс салют лэзьяло[25][26]. Псковын сӥё-дано концерт сяна, Горд Армилэн нырысь ожъёсызлы сӥзем синпелет дорын парад ортче[27][28][29]. Парадъёс та нуналэ мукет каръёсын но ортчыло[30][31]. 1918-тӥ арын тулыспалэ луэм ужрадъёслы реконструкциос дасяло[32][33][34]. Севастопольын Атыкай музъемез утисьлэн нуналызлы но, 2014-тӥ арын ортчем ужрадъёсты буре вайыса, Калык эриклэн нуналызлы сӥзем митинг орте. Соку 23-тӥ тулыспалэ Севастопольлэн шораз ог сюрс мында люкаськем калык Россиен огазеяськыны мылкыд кариз[35][36][37].

Псков котырын 1918-тӥ арын 23-тӥ тулыспалэ ортчем ожмаськонъёслы реконструкцие пыриськемъёс. Псков, 23-тӥ тулыспалэ 2018-тӥ арын

Россиын улӥсь калык понна Атыкай музъемез утисьлэн нуналыз — тужгес кулэлыкоез нунал. «Общественное мнение» фондлэн 2013-тӥ арын ортчытэм эскеронъёсызъя, юаськемъёс пӧлысь 77%-эз озьы лыдъяз[38].

23-тӥ тулыспал — Атыкай музъемез утисьлэн нуналыз — ДНР-ын но ЛНР-ын шутэтскон нуналэн ялэмын[39][40][41][42][43].

Валэктонъёс

  1. ↑ День защитников Отечества [ӟуч]
  2. ↑ Поздравление Владимира Путина по случаю Дня защитника Отечества
  3. ↑ Константин Медведев 23 февраля - День защитника Отечества. Чем важен этот праздник для нас?
  4. ↑ Газета Временного рабочего и крестьянского правительства. — 20 января (2 февраля) 1918. — № 13 (58). — С. 1.
  5. ↑ Черепанов А. И. «Под Псковом и Нарвой». — М. : Воениздат, 1956. — С. 18.
  6. ↑ Ганин А. В. И. Г. Пехливанов — один из первых историографов Первой балканской войны. Архивная копия от 19 южтолэзе 2015 на Wayback Machine // promacedonia.org
  7. ↑ 1 2 3 Николаев П. А. Интервенция Германии // Интервенция на Северо-Западе России 1917—1920 гг. — Российская академия наук, Институт российской истории, Санкт-Петербургский филиал. — СПб.: «Наука», 1995. — С. 93—99.
  8. ↑ Черепанов А. И. Под Псковом и Нарвой. — М. : «Воениздат», 1956. — С. 71.
  9. ↑ 1 2 Гривенко В. Историческое переосмысление 23 февраля Архивная копия от 19 тулыспалэ 2007 на Wayback Machine // Независимое военное обозрение : интернет-газета // nvo.ng.ru (16 февраля 2007 года)
  10. ↑ Газета Временного рабочего и крестьянского правительства, № 31 (76) от 23 февраля 1918 года, с. 1.
  11. ↑ 1 2 Кораблёв Ю. Защита Республики. Как создавалась Рабоче-крестьянская Красная армия. // Переписка на исторические темы: диалог ведёт читатель. — М.: Политиздат, 1989. — С. 160—161.
  12. ↑ Kotkin, 2014, с. 256.
  13. ↑ Барсенков А. С., Вдовин А. И. История России. 1917—2004 гг. : учеб. пос. для вузов. — М., 2005. — С. 62.
  14. ↑ Ленин В. И. Мир или война (напечатано 23 февраля 1918 г.) // Полн. собр. соч. — Т. 35. — С. 368.
  15. ↑ Войтиков С. С. Развитие взглядов высшего руководства Советской России на военное строительство в ноябре 1917 — марте 1918 г. // Вопросы истории : журнал. — № 10. — 2007.
  16. ↑ Послание Патриарха Московского и всея России Тихона по поводу заключения Брестского мира. 5 (18) марта 1918 года.
  17. ↑ Историческая справка о дне 23 февраля. Архивная копия от 25 толшоре 2020 на Wayback Machine // happy-year.narod.ru
  18. ↑ С историей формирования Красной армии можно ознакомиться на выставке в Пскове. Архивная копия от 14 оштолэзе 2021 на Wayback Machine // pln-pskov.ru
  19. ↑ Максим Хрусталёв. «Несокрушимая и легендарная». — Исторические корни Дня защитника Отечества. Архивная копия от 7 гудырикошконэ 2017 на Wayback Machine // km.ru (23 февраля 2010 года)
  20. ↑ Найда С. Ф. Почему день Советской армии и Военно-морского флота празднуется 23 февраля? // Военно-исторический журнал. — 1964. — № 5. — С.115—117.
  21. ↑ Федеральный закон Российской Федерации № 32-ФЗ от 13 марта 1995 года «О днях воинской славы (победных днях) России». Архивная копия от 26 шуркынмонэ 2021 на Wayback Machine Официальный сайт Президента Российской Федерации // kremlin.ru
  22. ↑ Кого нужно поздравлять 23 февраля? Аргументы и факты. Эскеремын 2019-02-21 арын
  23. ↑ В День защитника Отечества Святейший Патриарх Кирилл возложил венок к могиле Неизвестного солдата у Кремлёвской стены
  24. ↑ 23 февраля 2018 года. Москва. Шествие КПРФ.
  25. ↑ Полная программа мероприятий на 23 февраля в Волгограде
  26. ↑ Москва отметила День защитника Отечества красочным салютом [недоступная ссылка]
  27. ↑ В Пскове состоялся торжественный концерт, приуроченный к 100-летию Красной армии и Дню защитника Отечества
  28. ↑ 23 февраля 2016 года на площади у стелы в Крестах состоялся парад войск в честь Дня защитника Отечества
  29. ↑ Парад в Крестах 23 февраля 2017 года
  30. ↑ Парад в День защитника Отечества в Омске
  31. ↑ Парад в Североморске в честь 100-летия РККА
  32. ↑ В воскресенье во Всеволожске восстановили события февраля 1918 года, происходившие под Псковом
  33. ↑ Масштабная историческая реконструкция к столетию образования РККА состоялась в Пскове (ВИДЕО)
  34. ↑ Празднование Дня защитника Отечества в Псковской области
  35. ↑ На митинге в Севастополе без единого украинского флага выбрали нового мэра, гражданина РФ - СМИ [ӟуч] Интерфакс-Украина. Эскеремын 2019-02-21 арын
  36. ↑ Двойной праздник: в Севастополе отметили 23 Февраля и День народной воли
  37. ↑ Выпуск «Севинформбюро» от 23 февраля 2018 года
  38. ↑ О российской армии и 23 февраля
  39. ↑ День защитника Отечества 2018 в Донецке
  40. ↑ Митинг по случаю празднования 100-летия со дня основания Красной армии прошёл в Луганске
  41. ↑ Глава ДНР объявил 23 февраля выходным днём
  42. ↑ В ЛНР подписан указ о праздновании 23 февраля
  43. ↑ ЛНР отметила День защитника Отечества награждением отличившихся, митингами и салютом (ФОТО)
«https://udm.ruwiki.ru/w/index.php?title=Атыкай_музъемез_утисьлэн_нуналыз&oldid=484879»-ысь басьтэмын