Росси Конституцилэн нуналыз

Википедиысь материал
Кункатлэн нуналыз
Росси Федерацилэн Президентэныз присяга сётон понна Кункатлэн экземплярез
Росси Федерацилэн Президентэныз присяга сётон понна Кункатлэн экземплярез
Пусъё арлы быдэ
Герӟаськемын Росси Конституция огъякалык куара сётон
Логотип Викисклада Медиафайлъёс РувикиМедиа пушкын

Кункатлэн нуналыз ӟуч День Конституции — кун праздник, пусйиське арлы быдэ 12-тӥ толсуре. Ӵапак 1993-тӥ арын  та нуналэ кунлэсь валтӥсь катсэ кутонъя огъякалык куара сётон ужрад ортчиз[1].

Историез

[Тупатыны | вики-текстэз тупатыны]

СССР-ын Конституцилэн нуналыз кӧня ке пол вошъяськылӥз, малы ке шуоно, валтӥсь кат огпол гинэ ӧз кутӥськылы. Нырысетӥез Конституци нунал юнматэмын вал СССР-ысь ЦИК-лэн Президиумезлэн 1923-тӥ арын 3-тӥ гудырикошконэ кутэм декретэныз (ачиз Конституция быдэсак кутэмын вал 1924-тӥ арын 31-тӥ толшоре СССР-лэн Советэзлэн II съездаз). Со Пуктэтъя, валтӥсь катлэн нуналыз вошъяськись луыны кулэ вал — сое пӧсьтолэзьлэн нырысетӥ арнянуналаз пусйылӥзы. Нош 1930-тӥ арын, совето ужъюртъёс вистэм ужан арняе выжем бере, Конституцилэсь нуналзэ 6-тӥ пӧсьтолэзе юнматӥзы. Ужан нуналэн лыдъяськылӥз[2].

1936-тӥ арын 5-тӥ толсуре Советъёслэн VIII чрезвычайной съездазы кутэмын вал вылез Конституция, сое кутон нунал огъякалык праздникен, шутэтскон нуналэн ялэмын. Сталин вакытэ СССР-лэн Конституци нуналыз, озьы ик СССР-лэн сталинской Конституциезлэн нуналыз шуыса нимаськиз. Сталин Конституциез толсуре пусъён 1976-тӥ арозь кыстӥськиз[2].

Кункатлэн выль кабез 1977-тӥ арын кутэмын. Неофициально сое «развитой социализмлэн конституциез» шуыса нимазы. Со кутэмын СССР-ысь Вылӥ Кенешлэн внеочередной сессияз 7-тӥ коньывуонэ, собере СССР-лэн «Конституци кутон нуналэз огъякалык праздникен ялон сярысь» Кат кутэмын вал. 7-тӥ коньывуон СССР-лэн куашкатозяз ик 1990-тӥ арозь шутэтскон нуналэн лыдъяськылӥз[2].

1993-тӥ арысь Кункатэз дасян[Тупатыны | вики-текстэз тупатыны]

1990-тӥ арын 12-тӥ инвожое РСФСР-ысь калык депутатъёслэн I съездзы РСФСР-лэн кун асэриклыкез сярысь Деклараци кутӥз. Ужкагазын валтӥсь катлы выль текст кылдытоно шуыса гожтэмын вал. Сое кылдытытозь РСФСР-лэн 1978-тӥ арын кутэм Конституциез ик кельтэмын вал (воштэтъёс пыртыса)[2].

1990-тӥ арын выль Конституци бордын ужанъя Калык депутатъёслэн съездзылэн ӧриез кылдытэмын вал. Соин кивалтӥз РСФСР-лэн Вылӥ Кенешезлэн Тӧроез Борис Ельцин. 1990-тӥ арысен каутскыса 1993-тӥ арозь пӧртэм политика но мер движениосын катлэн 20-лэсь трос пӧртэм кабъёсыз кылдытэмын вал , но соос пӧлысь кыкез гинэ официально эскериськиз. Нырысетӥзэ кылдытӥсьёс пӧлысь валтӥсьёсыз луо РФ президентэз улсын ужась Частной правоя исследовательской центрлэн кенешезлэн тӧроез Сергей Алексеев но кивалтэтлэн тӧроезлэн воштӥсез Сергей Шахрай. Кыкетӥ вариантсэ кылдытон бордын Олег Румянцев кивалтэм улсын тыршизы Конституционной ӧрилэн ёзчиосыз[2].

Формально ӧрие ог сю пала депутатъёс пыртэмын вал. Но Кункатлэн ӵектосэз бордын 12–15 мурт гинэ ужаз, соос ик ужан огинэз кылдытӥзы. Ӧрилэн валтӥсь «моторез» вал солэн ответственной секретарез, 30 аресъем Олег Румянцев. Соин валче ӵектос бордын урыз-урыз ужазы эшшо кӧня кедепутатъёс: Виктор Шейнис, Юрий Рыжов, Борис Золотухин, Фёдор Шелов-Коведяев, Евгений Амбарцумов, Сергей Шахрай. Экспертъёс пӧлысь пусйыны кулэ Борис Страшунэз, Леонид Мамутэз, Владимир Лафитскийез. Комисси азе таӵе ужпум пуктэмын вал: дунне опыт вылэ инъяськыса росси кункат модель кылдытоно.

— Андрей Гольцблат[3]

1993-тӥ арын 5-тӥ инвожое РФ президентэзлэн Б. Ельцинлэн кичӧлтэмезъя Конституционной совещание ортчытэмын. Отчы пыриськизы кун тӧрлык ёзэтъёсысь, интыосысь аскивалтон ёзэтъёсысь но мерлыко огазеяськонъёсысь огмуртъёс. Со кенешонын Конституцилэн берпум воштэтъёсыз юнматэмын вал. Со вакытэ ик Съезд но РФ Вылӥ Кенешез озьы ик валтӥсь катлэсь выль кабзэ кылдытон бордын тыршизы. Соослэн малпамзыя, сое калык депутатъёслэн Х съездазы 1993-тӥ арын 17-тӥ шуркынмонэ юнматыны кулэ вал. Но президент Калык депутатъёслэсь Кенешсэс но РФ Вылӥ Кенешез быдтыса, со интые Федерал собрание кылдытыны малпаз. Соку РФ Конституционной суд солэсь решенизэ валтӥсь катлы тупасьтэм луэ шуыса лыдъяз. РФ Вылӥ Кенешез Борис Ельцинэз президент ужоскетэзлэсь палэнтыса, РФ вице-президентэз Александр Руцкой вылэ выжтӥз. Соку ик Калык депутатъёслэн Х чрезвычайной съездзы люкаськиз. Москваысь Вылӥ Кенешлэсь юртсэ, кытчы люкаськизы калык депутатъёс, Борис Ельцинлэн косэмезъя кунпуш войскоос но милиция котыртӥз. 1993-тӥ арын 3-тӥ коньывуонэ шоркаре ожгарчиосты пыртыса, танкъёсысь ыбылыса, штурмен парламент юртэз киултӥзы. Оппозициен кивалтӥсьёс, парламентлэн тӧроез но вице-президентэз пытсэт улэ басьтӥзы[2].

1993-тӥ арын коньывуон-шуркынмон толэзьёсы Ельцинэн шонерен лыдъям Конституцилэсь ӵектоссэ Конституционной совещанилэн ёзэтэз: Мерлыко но Кун инэгъёс но конституционной арбитражлэн ӧриез тупатъяз. Собере 1993-тӥ арын 12-тӥ толсуре президент Конституцилэн ӵектосэзъя огъякалык куара сётон радъян сярысь Косэт гожтӥз[2].

Выль конституционной радлыклэн мур пуштросэз понна огъякалык куара сётон ужпумез сэрттыны-пертчыны кулэ вал. Референдум мед пӧрмоз шуыса, вань политической кужымъёслы, кивалтӥсьёслы но улосъёслы выль Конституцилэн огъя валамон инъетъёсыз котыре огазеяськыны кулэ вал. Со Россилэн кун огазеяськонэзлы кужмо инъет луысал. Со понна политика процессэ вань пыриськисьёслы сьзол тыршыны кулэ вал. Референдум азьын та вакытэз кызьы ке но чиданыы кулэ вал — тӧрлыклэсь баланссэ тӥятэк, кунэн умойгес кивалтыны но азьланьын вуись воштӥськонъёслы тырмыт политической юрттэт кылдытыны.

— О. Г. Румянцев[4]

РФ Конституцизэ кутон[Тупатыны | вики-текстэз тупатыны]

РФ Конституциезлэн выль кабез кутэмын вал огъякалык куара сётонэн 1993-тӥ арын 12-тӥ толсуре. Со арын ик 25-тӥ толсуре «Российская газета» изданиын печатлам бере кужымлыко луиз[5]. 1994-тӥ арын РФ президентэз «Росси Федерацилэн Конституциезлэн нуналыз сярысь» но «12 толсуре ужантэм нунал сярысь» Косэтъёс гожтӥз. 12-тӥ толсур кун праздникен ялэмын вал[6].

Озьы ке но, 2005-тӥ арын Конституцилэн нуналыз ужан нунал луиз но Россилэн данлыко но буре ваён нуналызлы пӧрмиз[7], малы ке шуоно, 2004-тӥ арын 24-тӥ толсуре Кундума Росси Федерацилэн Ужъя кодексаз пыртэм воштэтъёсты юнматӥз, со воштэтъёсъя Россилэн праздник дырпусэз ӧжытак воштӥськиз[8].

Сям-йылолъёс

[Тупатыны | вики-текстэз тупатыны]

Конституцилэн нуналыз ужан нунал луэ ке но, 12-тӥ толсуре быдэс кунын патриотикалы сӥзем пӧртэм ужрадъёс, сӥё-дано митингъёс но концертъёс ортчыло. Та нуналэ сӥлы каро дано юристъёсты но судьяосты[9].

Озьы ик сяме пыӵаз Конституцилэн нуналаз 14 арес тырмем егитъёслы паспорт сётъян ужрад. Школаосын но дышетсконниосын та нуналэ тематической ужрадъёс радъяськыло[9].

Литература

[Тупатыны | вики-текстэз тупатыны]
  • Шахрай С. М. О Конституции: Основной закон как инструмент правовых и социально-политических преобразований. Отделение общественных наук РАН. М.: Наука, 2013. С. 58-59.
  • Бабурин С. Н. Русская государственность и Российское государство в системе ценностей и интересов современной политики, международного и конституционного права: морфология. М: ЮНИТИ-ДАНА, 2018. С. 161.

Валэктонъёс

[Тупатыны | вики-текстэз тупатыны]
  1. ↑ Указ Президента Российской Федерации от 19.09.1994 г. № 1926
  2. ↑ 1 2 3 4 5 6 7 Антон Новодережкин День Конституции РФ. Что известно об основном законе страны и празднике в его честь
  3. ↑ Андрей Гольцблат Историческая правка: как принимали российскую Конституцию
  4. ↑ О.Г. Румянцев. К истории создания Конституции Российской Федерации. О работе Конституционной комиссии (1990-1993 гг.) // Из истории создания Конституции Российской Федерации. Конституционная комиссия: стенограммы, материалы, документы (1990–1993 гг.) : в 6 т. / О. Г. Румянцев. — М.: Волтерс Клувер, 1992. — Т. 3. — С. 40. — ISSN 978-5-466-00354-3.
  5. ↑ Конституция Российской Федерации от 25 декабря 1993 года, с изменениями от 30 декабря 2008 года
  6. ↑ В России отмечают День Конституции Российский союз молодёжи.
  7. ↑ Федеральный закон от 13 марта 1995 г. № 32-ФЗ «О днях воинской славы и памятных датах России»(ӟуч) Президент России.
  8. ↑ Дума изменила праздничный календарь, Вести (24 толсуре 2004). Архивировано 14 толсуре 2014 года. Дата обращения: 10 толсуре 2023.
  9. ↑ 1 2 День Конституции России: история и традиции праздника

Чӧлсконъёс

[Тупатыны | вики-текстэз тупатыны]
«https://udm.ruwiki.ru/w/index.php?title=Росси_Конституцилэн_нуналыз&oldid=275690»-ысь басьтэмын