Калыкъёслэн огъя луон нуналзы

Материалъёс басьтэмын Б.Н. Ельцин нимо библиотекаысь

Та гожтосын Б.Н. Ельцин нимо Президент библиотекалэн фондысьтыз материалъёс кутэмын

Рос-прос учке

Калыкъёслэн огъя луон нуналзы
Типез	Россилэн ожгар данлыко но буре ваён нуналъёсыз
Мукет сямен	Инмар Анайлэсь Казанской оброссэ пусъён (Мускоез мозмытэмен валче но 1612-тӥ арын Россиез Речь Посполитаялэсь мозмытон), Сӥзьыл Казанской
Валатонэз	Сӥзьыл 1612-тӥ арын Кыкетӥ калык ополчение Муско Кремльысь польско-литовской захватчикъёсты улляз
Юнматэмын	Бугырес вакытлэн йылпумъяськонэзлы сӥзьыса, 2005-тӥ арын 4-тӥ шуркынмонэ 22 коньывуонэ (1 шуркынмонэ) 1612
Кылдытӥсез	29.12.2004-тӥ арын кутэм 201—ФЗ номеро Федерал кат
Пусъё	Россия Россия Лымшор Осетия Лымшор Осетия ПМР ПМР
Дырыз	4-тӥ шуркынмонэ
Сям-йылолъёс	парад, молебен, крестный ход, кар ярмарка, патриотической но просветительской акциос
Медиафайлъёс РувикиМедиа пушкын

Калыкъёслэн огъя луон нуналзы (ӟуч: Де́нь наро́дного еди́нства) — кун праздник, 2005-тӥ арысен кутскыса, пусйиське арлы быдэ 4-тӥ шуркынмонэ. Россиысь ожгар данлыклэн нуналыз.

Историез

Праздник нунал юнматэмын 2004-тӥ арын 29-тӥ толсуре кутэм «Федерал катлэн „Россилэн ожгар данлыко нуналъёсыз (вормон нуналъёсыз) сярысь“ 1-тӥ статьяяз воштонъёс пыртон сярысь» 200-ФЗ номеро Федерал катэн. 2005-тӥ арын 21-тӥ пӧсьтолэзе, катэ воштонъёс пыртэм бере, со «Россилэн ожгар но буре ваён нуналъёсыз сярысь» шуыса нимаськыны кутскиз.

Калыкъёслэн огъя луон нуналзы нырысьсэ пусъемын вал 2005-тӥ арын 4-тӥ шуркынмонэ. Со арын ик праздник шутэтскон нуналэн ялэмын, со дырысен 4-тӥ шуркынмон официальной шутэтскон нунал луэ.

4-тӥ шуркынмон кӧснуналэ яке арнянуналэ вадьсаське ке, шутэтскон нунал выжтӥське. Озьы ик куд-ог мукет учыръёсы но выжтӥське. Кылсярысь, 2025-тӥ арын со пуксёнлы тупаз, озьыен, 1-тӥ шуркынмон (кӧснунал) вакчиятэм ужан нунал луэ, нош 3-тӥ шуркынмон (вордӥськон) — шутэтскон нунал. Куать нуналъем ужан арня бере Россиысь калык куинь нунал шутэтске — 2-тӥ, 3-тӥ но 4-тӥ шуркынмонэ (арнянунал, вордӥськон, пуксён).

Праздниклэн историез

Калыкъёслэн огъя луон нуналзы герӟаськемын 22 коньывуонэ (1 шуркынмонэ) 1612 арын луэм учыръёсын. Ӵапак соку земской староста Кузьма Минин но князь Дмитрий Пожарский кивалтэм улсын Калык ополчение польско-литовской ожгарчиосты Китай-городысь улляз но Кремль пала чигнатӥз. Озьы йылпумъяськиз Бугырес вакыт.Князь Пожарский Китай-городэ Инмар Анайлэн Казанской обросэныз пыриз.

Бугырес вакыт но поляк интервенция

XVI даурысен кутскыса, XVII даурлэн кутсконозяз кыстӥськись вакыт Росси империын Бугырес вакыт яке Смута шуыса нимаське. Ӵапак соку кунын социально-экономической, политической, династической но духовной кризис кутскиз. 1598-тӥ арын Рюрик выжыысь берпуметӥез — Фёдор Иоаннович (наследникъёсыз ӧй вал) кулэм бере — Ӟуч царствоын эксэй выжы быремен, асьсэды эксэй выжые пыртӥсьёс шарае потӥзы. Соку ик пуромиз граждан ож, кивалтэтэ кунсьӧр муртъёс мерскизы, ю-нянь удалтымтэен сютэм улон вуиз.

Тужгес секыт йӧтӥз 1609-тӥ арын сӥзьыл, куке Россилэсь лябӟемзэ шӧдыса, Лжедмитрий II юрттон вылысь, Речь Посполитая кунысь шляхтичъёс вуизы, поляк эксэй Сигизмунд III Ӟуч царстволы пумит ож ӝутӥз. Нош Мускоын 1610-тӥ арын, Василий IV Шуйскиез палэнтыса, Семибоярщина кивалтэтэ вуиз, сое йыръяз Фёдор Мстиславский. Бояръёс, ӟуч престолэз Сигизмунд III пиезлы — Владислав Вазулы сётон вылысь, Кремле поляк войскоез пыртӥзы.

1611-тӥ арын толшорлэн кутсконаз Патриарх Московский но всея Руси Гермоген ӟуч каръёсы, православиез но кунэз утён но поляк захватчикъёсты Мускоысь уллян понна, калыкез ӝуткась грамотаос ысъяны кутскиз. «Пресвятой Богородицалэн Юртэз понна лулмес сётыны дыр вуиз!» — гожъяз Гермоген.

«Минин и Пожарский» суред (1850) Михаил Скотти

Калык ополчение

Патриархлэсь вазиськонзэ басьтэмез бере Рязаньысь воевода Прокопий Ляпунов нырысетӥ калык ополчение люказ. Отчы ик зарайской воеводалэн но Дмитрий Пожарскийлэн отрядзы пыриз. 1611-тӥ арын южтолэзе ополченилэн валтӥсь люкетэз Москва доры вуиз. Но, полякъёсты Кремле но Китай-городэ котыртэм бере, ожмаськем интые, асьсэ куспын тӧрлыкез люкыны кутскизы. Дворянъёс но казакъёс куспын тупамтэос кылдыса, янгышен виемын вал Ляпунов. Озьы кӧняез ке отрядъёс Мускоысь берен кошкизы но ополчение куашказ.

1611-тӥ арын куарусёнэ Нижний Новгородын Гермогенлэн грамотаез пумысь кар кенеше люкаськемъёс пӧлысь одӥгез, земской староста Кузьма Минин кыкетӥ ополчение люканы ӵектӥз:

Православные люди, похотим помочь Московскому государству, не пожалеем животов наших, да не токмо животов — дворы свои продадим, жен, детей заложим и будем бить челом, чтобы кто-нибудь стал у нас начальником. И какая хвала будет всем нам от Русской земли, что от такого малого города, как наш, произойдет такое великое дело.

Озьы Мининлэн ӧтёнэзлы дурбасьтӥсьёс ополченилы «куинетӥ деньга» люканы кутскизы. Ас мылкыдзыя сётэм уксё тырмыт луымтэен, кужмысь «витетӥ деньга» бичан ялэмын вал (котькуд адями ополчение уждунэзлэсь витетӥ люкетсэ сётыны кулэ вал).

Валтӥсь воеводае ӧтемын вал князь Дмитрий Пожарский. Войсколэн ваньбуретэз понна кылкутӥсе быръемын Кузьма Минин. Соос кыкназы ополчениын огдырлы кылдытэм «Совет всея Земли» земской кивалтэтэз йыръязы.

1612-тӥ арын пӧсьтолэзьлэн шорозяз кыкетӥ ополченилэн войскояз пӧртэм музъемъёсысь (Тверь но Кузон палан службазэс нуись костромской (романовской), сибирской, касимовской бигеръёс но казакъёс) дас вить сюрс пала пӧртэм калык люкаськиз.

1612-тӥ арын гудырикошконэ Муско понна ожмаськон кутскиз. Кузьма Мининлэн отрядэз Муско шур вамен потыса, Крымской двор паласен полякъёслы юрттыны мынӥсь литовской гетманлэн Ян Ходкевичлэн войскоез вылэ ожалскиз. Соку Ходкевич 500 пала адямизэ но сиён-юонэн обоззэ ыштӥз но берлань чигнано луиз.

Москваын поляк интервентъёсты пазьгемлэн картаез.

22 коньывуонэ (1 шуркынмонэ) 1612 арын сётӥськиз Китай-город, 24 коньывуонэ (3 шуркынмонэ) 1612 арын полякъёс Неглинной ураме потӥсь ӟезьыез усьтӥзы но кылемзэ котретын возем калыкез лэзизы.

25 коньывуонэ (4 шуркынмонэ) 1612 арын Кремльысь вань ӟезьыос усьтэмын вал. Ӟуч войско Кремле Казанской обросэн крестной ходэн сӥё-дано пыриз. Соослэн пумитазы кияз Богородицалэн Владимирской обросэныз потӥз пытсэтын возем архиепископ Элассонский Арсений. Калык Казанской обрслэн юрттэмез улсын польско-литовской интервентъёсты вормыны быгатӥзы шуыса оскиз. Ӝоген Горд Площаде князь Пожарскийлэн уксёеныз Казанской черк ӝутэмын вал, отчы ик интыямын оброс но.

1649-тӥ арын эксэй Алексей Михайлович Инмар Анайлэн Казанской обросэзлэсь нуналзэ гужем сяна, 22-тӥ коньывуонэ (юлиан дырпусъя) но пусйылыны косӥз, нырысетӥ пиез, Дмитрий Алексеевич вордӥськем бере. Та нунал Россиын православной кун праздник луиз но 1917-тӥ арозь пусйиськылӥз.

Праздник нуналэз быдтон но выльысь берентон

1917-тӥ арын Октябрь революци бере Инмар Анайлэн Казанской обросэзлы сӥзем нуналэз кун праздникъёс пӧлысь куштӥзы. СССР-ын 7-тӥ шуркынмонэ Быдӟым Октябрь революцилэсь нуналзэ пусйылӥзы. Озьы ке но, черк дырпусын со нунал кылиз.

СССР куашкам бере 7-тӥ шуркынмонэ шутэтскон нунал кельтэмын вал, сокем паськыт ӧз ке но пусйиськылы. 1995-тӥ арын со нунал Мускоез поляк интервентъёслэсь мозмытон нуналэн воштэмын но Россилэн данлыко нуналъёсыз пӧлы пыртэмын. 1996-тӥ арын 7-тӥ шуркынмон Тупан нуналэн ялэмын, сыӵе нимын 2004-тӥ арозь возиськиз.

Туала Россиын праздник нуналэз берентон пумысь 2004-тӥ арын куарусён толэзе вазиськиз Россиысь Межрелигиозной совет. Патриарх Московский но всея Руси Алексий II сое умоен лыдъяз но пусйиз: «та нунал асьмелэн тодамы вайытэ, кызьы 1612-тӥ арын пӧртэм вӧсьбуро но пӧртэм йӧскалык луись россиянъёс огазе кариськыса, тушмонэз вормыны быгатӥзы но кунын тупаса улонэз радъязы».

2004-тӥ арын 23-тӥ шуркынмонэ Кун Думае Росси Федерацилэн Ужан кодексаз воштонъёс пыртон сярысь катӵектос пыртэмын вал. Отын 7-тӥ шуркынмонэз, Быдӟым Октябрь социалистической революцилэсь нуналзэ быдтыса, выльзэ — 4-тӥ шуркынмонэз пыртыны дэмламын. Со нуналэ ик Россиысь Межрелигиозной совет Госдумалэн Тӧроезлы Борис Грызловлы выль праздниклэсь пусъён дырзэ 4-тӥ шуркынмонэ бырйыны курыса вазиськиз.

2004-тӥ арын 27-тӥ толсуре Кун дума воштонъёсты пыртӥз, 29-тӥ толсуре Россилэн азьмуртэз закон поттӥз, кудӥзъя 4-тӥ шуркынмон Калыкъёслэн огъя луон нуналынызы ялэмын (2005-тӥ арысен — шутэтскон нунал луэ).

Дырыз пумысен споръяськонъёс

2004-тӥ ар пумын 1995-тӥ арын 13-тӥ южтолэзе кутэм 32-ФЗ номеро «Россилэн ожгар данлыко но буре ваён нуналъёсыз сярысь» катэ воштонъёс пыртэмын вал. Соя Калыкъёслэн огъя луон нуналзы 4-тӥ шуркынмонэ пусйиське. Дырыз тупатэмын нижегородской староста Кузьма Минин но князь Дмитрий Пожарский кивалтэм улсын калык ополченилэн Китай-городэз мозмытэмзылы. Катлэн катӵектосэзлэн пояснительной записказ тазьы пусъемын:

«1612-тӥ арын 4-тӥ шуркынмонэ калык ополченилэн войскоез, Кузьма Минин но Дмитрий Пожарский кивалтэм улсын, Китай-городэз штурмен басьтӥзы но Мускоез поляк интервентъёслэсь мозмытӥзы. Со эшшо огпол возьматэ пӧртэм калыкъёслэсь огазе кариськыса гинэ вормыны быгатэмзэс».

Китай-город мозмытэмын вал 1612-тӥ арын 22-тӥ коньывуонэ (юлиан дырпусъя), со вакытэ григориан дырпусъя со 1-тӥ шуркынмонлы тупа вал.

Куд-ог историкъёслэн малпамзыя, Кремль мозмытэмын вал 26 коньывуонэ (5 шуркынмонэ), куке поляк командование быдэсак сётӥськиз. Гарнизон 27 коньывуонэ (6 шуркынмонэ) сётӥськиз.

Фильмъёс

• «Минин и Пожарский» (фильм, 1939);
• «Минин и Пожарский» (мультфильм, 1998);
• «1612: Хроники смутного времени» (фильм, 2007);
• «Крепость. Щитом и мечом» (мультфильм, 2015);
• «Купно за едино» (мультфильм, 2024).

Валэктонъёс

Литература

• Любомиров П. Г. Очерки истории Нижегородского ополчения 1611—1613 гг. — М.: Соцэкгиз, 1939. — 342 с.
• Селезнёв Ф. А. Нижегородцы и преодоление Смуты. 1606—1618. — Нижний Новгород: Деком, 2015. — 141 с.

• Андреев И. Л. и др. День народного единства: Биография праздника / Авт.: И. Л. Андреев, В. Н. Козляков, П. А. Михайлов, В. А. Токарев, Ю. М. Эскин; Вступ. ст. В. А. Никонова. — М.: Дрофа, 2009. — 352 с. — ISBN 978-5-358-03531-7.
• Головашина О. В., Аникин Д. А. Неожиданные издержки победы: 4 ноября в контексте политики памяти и массового исторического сознания // Вестник Томского государственного университета. — 2018. — № 429. — С. 66—73.
• Гугнина О. В. День 4 ноября 2005 года глазами историков и семиклассников: реализация герменевтического принципа // Историко-педагогические чтения. — 2006. — № 10. — С. 419—424.
• Ефремова В. Н. День народного единства: Изобретение праздника // Символическая политика: Сборник научных трудов. Вып. 1. Конструирование представлений о прошлом как властный ресурс / Отв. ред.: О. Ю. Малинова. — М.: ИНИОН РАН, 2012. — С. 286—300. — 334 с. — (Политология). — ISBN 978-5-248-00639-7.
• Макашова А. С. Традиции ноябрьских праздников в истории России: символическое содержание праздников // Вестник Санкт-Петербургского университета. Серия 6. Политология. Международные отношения. — 2012. — № 3. — С. 128—131.
• Малышева С. Ю. Эволюция исторической мифологии "ноябрьских" праздников в России // Вестник Пермского университета. Серия: История. — 2019. — № 1 (44).
• Назаров В. Д. Что будут праздновать в России 4 ноября 2005 года? // Отечественные записки. — 2004. — № 5.

Чӧлсконъёс

• Федеральный закон от 29 декабря 2004 года № 201-ФЗ «О внесении изменений в статью 112 Трудового кодекса Российской Федерации»
• Известия. Праздничные дни. Как они появляются и кто их устанавливает. Интервью с Андреем Николаевичем Сахаровым, директором Института российской истории РАН.
• Материалы ко Дню народного единства на сайте Президентской библиотеки