Григориан дырпус

Википедиысь материал

Григориа́н дырпус — дырез лыдъян сӧзнэт, Музъемлэн Шунды котыртӥ бергамезъя инъямын (циклической). Шорлыдын басьтыса, ар 365,2425 уй-нунал ӵоже кыстӥське; 400 ар куспын касьян ар 97 пол луэ [1].

1584-тӥ арын Римын армян кылын поттэм Григориан дырпус.

Нырысьсэ юлиан дырпус интые григориан дырпус кутэмын вал католик кунъёсын. Со воштонэз 1582-тӥ арын 15-тӥ коньывуонэ юнматӥз Григорий XIII (папа римский). Озьы покчиарня 4-тӥ коньывуон бере ӵуказеяз вуиз удмуртарня 15-тӥ коньывуон.

Григориан дырпус быдэс дуннеысь тросаз кунъёсын кутӥське[2]. Куд-ог дыръя литератураын «выль стиль» шуыса гожтӥське.

Россиын григориан дырпусэз кутон сярысь 1918-тӥ арын 26 толшоре юнматэм Декрет

Григориан дырпуслэн ёзрадэз

Григориан дырпусъя, шорлыдын вераса, ар 365,2425 уй-нунал ӵоже кыстӥське. Огшорыез ар — 365 уй-нунал, касьян ар — 366.

Касьян аръёслы люкон тазьы лыдъяське:

  • арлэн лыдпусэз 400-лы люкиське ке — касьян;
  • арлэн лыдпусэз 100-лы люкиське ке — огшоры;
  • арлэн лыдпусэз 4-лы люкиське ке — касьян;
  • кылемез — огшоры.

Озьыен, 1600-тӥ но 2000-тӥ аръёс касьян аръёс вал, нош 1700-тӥ, 1800-тӥ но 1900-тӥ аръёс — огшорыесь. Озьы ик огшоры ар луоз 2100-тӥез но.

Толэзьёс

Григориан дырпусъя ар 12 толэзьлы люкиське. Котькудӥз соос пӧлысь 28 нуналысен 31 нуналозь кыстӥське:

№ Толэзь Нунал
1 Толшор 31
2 Тулыспал 28 (29 — касьян аре)
3 Южтолэзь 31
4 Оштолэзь 30
5 Куартолэзь 31
6 Инвожо 30
7 Пӧсьтолэзь 31
8 Гудырикошкон 31
9 Куарусён 30
10 Коньывуон 31
11 Шуркынмон 30
12 Толсур 31
Кивыл лыосъя лыдъян. «Лёг» — 31 нунал, «гоп» — 30 нунал (тулыспалэ 28 яке 29 нунал)

Нунал лыдэз тодон амалъёс

Толэзьын кӧня нунал шуыса тодон понна, туж капчи правило вань — ӟуч сямен вераса, "правило костяшек".

Мыжыкъёсты юн кырмыса, лыдъяськом «кивыл лыосты» (чиньы ёзвиосты). Яке шонергес вераса, лы лёгъёсты но соос вискысь гопъёты лыдэ басьтыса учкиськом, кудӥз толэзь кузь, кудӥз вакчи. Лыдъяны кутскиськом толшор толэзьысен ― солы тупа нырысетӥез лёг (кузь толэзь ― 31 нунал), тулыспаллы тупа гоп (кык лыос вискын) ― вакчи толэзь, южтолэзьлы ― нош ик лёг шеде, озьыен, со кузь толэзь, оштолэзьлы ― гоп (вакчи толэзь). Бӧрсьысь кык кузь толэзьёслы, пӧсьтолэзьлы но гудырикошконлы тупало лыос (огысьтыз киысь берпуметӥез но мукетысьтыз нырысетӥез, лыдъяны кутскыку. Мыжыкъёс вискысь ум лыдъяське).

Яке вань на мукетыз амал ― мнемонической правило «Ап-юн-сен-но». Та слогъёс 30 нуналъем толэзь нимъёсты возьмато. Тулыспал татчы уг пыры, кылемез 7 толэзь 31 нуналъем луэ.

Нунал лыдэз тодон понна, англи кылын таӵе поговорка вань: Thirty days have September, April, June and November. Яке со выллем ик немец кылын: Dreißig Tage hat September, April, Juni und November.

Григориан дырпусэ выжон мугъёс

Тулыс уй-нунал ӵошанлэн дырыз воштӥськемен, кудӥзъя дырыз тупатӥське, пасхальной полнолуниос астрономическеныз тупамысь дугдӥзы. 325-тӥ арын Нырысетӥ Никейской соборлэн ӧтчамаз Пасха нунал тулыс уй-нунал ӵошан дырлы 21 оштолэзьлы Быдӟым Кӧсутёнлэсь радзэ сура. Та янгыш кыкетӥ сюрсарлэн кутсконаз ик синйылтэмын вал ини. Соин Тридентской собор (1545—1563) воштонъёс пыртыны ӵектӥз но григориан дырпусэ выжоно луиз[4].

Григория XIII-лэсь азьпал со воштӥськонъёсты пыртыны турттӥзы вал Павел III но Пий IV, но со вакыт ӧзгес пӧрмы. Григорий XIII-лэн косэмезъя реформаез дасянэ пыриськиз Римысь астроном Алоизий Лилиус, со кулэм бере (1576), ужзэ азьланьтӥз Христофор Клавиус. Понтификлэн кинюртэменыз юнматэм ӵектонъёсыз Inter gravissimas («Тужгес кулэосыз пӧлын») шуыса пусъемын вал[5].

Григориан дырпусэ выжемен таӵе воштӥськонъёс кылдӥзы:

  1. выль дырпус, али дырез 10 нуналлы азьлань выжтыса, люкаськем янгышъёсты тупатӥз;
  2. выль дырпусын касьян ар сярысь шонер правило ужаны кутскиз — касьян аре 366 нунал луэ.
  3. тупатӥськиз христиан Пасхаез лыдъян[6].
Дуннеысь кунъёсын кутӥськись дырпусъёс. Вож буёлэн взьматэмын кунъёс, кудъёсаз дырез григориан дырпусъя лыдъяло.

Юлиан но григориан дырпусъёсысь датаослэн пӧртэмлыксы котькуд 400 ар ӵоже куинь уй-нуналлы воштӥське. Нырысь-валысь 1582-тӥ арын ортчытэм дырпус реформалы юн пумитъяськизы Шундыпуксёнпал Европаысь ваньмыз сямен университетъёс. Тужгес зол пыкъяськизы самой вашкалаосыз Парижской но Венской университетъёс.

1582-тӥ арын григориан дырпусэ выжизы Речь Посполитая (Быдӟым Литовской княжество), Польша но Франция.

1583-тӥ ар пумын выжизы Брабант, Фландрия, Льеж, Аугсбург, Трир, Бавария, Зальцбург, Регенсбург, Австрилэн но Тирольлэн ог люкетэз. Нош Бельгиын но Голландиын 1-тӥ толшор 21-тӥ толсур бере ӵуказеяз ик вуэм, соин валче, со арын калык Рождествоез пусйытэк кылем.

Куд-ог кунъёсын григориан дырпусэ выжон шуге-леке вуон учыръёсын йылпумъяськиз. Кылсярысь, Польшалэн королез Стефан Баторий 1584-тӥ арын выль дырпусэз юнматэм бере Ригаысь купецъёс, 10 нуналлы дырез палэнтэмен сэрен трос ыштонъёс адӟоно луизы но ваньмыз сямен пумит ӝутӥськизы. Югдурез тупатыны 1589-тӥ арын гужем гинэ удалтӥз.

Россиын григориан дырпусэ выжон ортчытэмын Совнаркомлэн 1918-тӥ арын 26-тӥ толшоре кутэм декретэзъя. Озьы, выль дырпусъя 1918-тӥ арын 31-тӥ толшор бере соку ик 14-тӥ тулыспал вуиз.

Берпуметӥосыз пӧлын григориан дырпусэ выжизы Саудовской Аравия (2016).

Та дырозь григориан дырпусэ выжытэк кылемын Эфиопия (кунын кутӥське эфиопской календарь), Иран но Афганистан (иран календарь), Непал (непал календарь).

Та кунъёсын кык пӧртэм дырпус кутӥське: григориан но йӧскалык дырпус: Израиль (еврей календарь), Индия (Индилэн огъя йӧскалык календарез), Бангладеш (бенгал календарь).

Китай Элькунын (Тайвань) (календарь Миньго), КНДР-ын (календарь чучхе), Япониын (кивалтон девизъя дырез лыдъян амал).

Валэктонъёс

  1. ↑ Климишин, 1990, с. 97.
  2. ↑ Introduction to Calendars. United States Naval Observatory.(англи) Эскеремын 2016-09-10 аре
  3. ↑ Климишин, 1990, с. 300.
  4. Паннекук А. Реформа календаря // История астрономии. — Наука, 1966. — С. 233, 236—237. — 592 с.
  5. ↑ Inter Gravissimas Архивная копия от 13 тулыспалэ 2006 на Шаблон:La iconШаблон:Fr icon (англи)
  6. Нестеренко Ю. В. Диофантовы приближения, церковные календари и пасхалия // Историко-астрономические исследования, Вып. XXXV. — М.: Физматлит, 2010, C. 215—288.

Чӧлсконъёс

Толшор | Тулыспал | Южтолэзь | Оштолэзь | Куартолэзь | Инвожо | Пӧсьтолэзь | Гудырикошкон | Куарусён | Коньывуон | Шуркынмон | Толсур
«https://udm.ruwiki.ru/w/index.php?title=Григориан_дырпус&oldid=152793»-ысь басьтэмын