Тулыспал
|
|||||||||||||||||||||||||||||||||||||||||||
| 2025-тӥ ар | |||||||||||||||||||||||||||||||||||||||||||
Тулыспал — ӟуч кылэ берыктыса, «к весне; близко к весне» шуэмез возьматэ; Удмурт нимыз кионсюан /тулыспал /куакатолэзь — ӟуч кылэ берыктыса ― «месяц волчьих свадеб/месяц кануна весны/месяц прилета грачей». Камсьӧр удмуртъёслэн верамзыя, «буран толэзь» ― «буранный месяц»[1]. Риф Насибуллинлэн эскеронъёсызъя, удмурт гожтосъёсын «февраль» кыл 1874 арысен пумиське.
Инкуазь воштӥськонъёс
Тулыспал — арлэн тужгес вакчи толэзез: 28 нунал огшоры аре но 29 нунал касьян аръёсы. Уйпал полушариын толлэн куинетӥ толэзез, Лымшор полушариын — гужемлэн куинетӥ толэзез. Юлиан но Григориан дырпусъёсын кыкетӥез толэзь, Вашкала Римын Цезарьлэн реформаез дорозь дас кыкетӥез лыдъяське вал. 16 тулыспалозь шунды Козероглэн кизилисузьетаз сылэ, 16 тулыспалысен — Водолейлэн кизилисузьетаз выже[2][3].
Тулыспал — нунал ялан будэ. Шунды пумен вылэгес но вылэгес тубе. Нуназе, чыс-чыс дыръёсы, ӧжытак шунтылэ. Толэзь пумын липет вылъёсысь шапыкъёс усьылыны кутско, йӧ ӟузыриос ошисько. Кизилиё, толэзё уйёсы ӟырт кезьыт луэ.
Тулыспал толэзе Сьӧд куака кар лэсьтыны кутске. Та вакытэ ӟиллёлэн но пежалэн тулыс кырӟамзы кылӥське. Шуныт палъёсысь сялберъёс вуо, толэзь пумын — шушыос уйпала лобӟо. Мумы гондырлэн караз пиосыз вордӥсько. Мур лымы вылтӥ асьсэлэсь улон интыоссэс вошто, оскымонгес азьёсы воштӥсько бадӟым тылобурдоос но пӧйшуръёс. Коньылэн гырказ дасям сиёнэз быре. Карысьтыз васькыса, со лымы вылтӥ бызьылэ, дасям сиёнъёссэ утча. Койыкъёс трос кузя люкаськыса, чалмыт тэльёсын, пипу сикъёсын уллёен уло.
Нимыз сярысь
Февра́ль ― (лат. Februārius mēnsis — «Фебрууслэн толэзез», «чылкытатскон толэзь»; этрус кылысь Фебруус музъемул кылчинлэн нимыз бордысь кылдэмын но чылкытатскон сямъёсын герӟаськемын (februa, februare, februum).
Истори ласянь «февраль» толэзьлэн европейской нимъёсыз вашкала англи нимъёс вылэ пыкисько. Кылсярысь: Solmonath («нӧд толэзь»), Kale-monath («кубиста толэзь») но Карл Великийлэн сётэм нимызъя — Hornung — hjarn — «кынмем лымы люк» шуэмез возьматэ[4]). Вашкала ӟуч дырпусын (христианствое выжытозь) тулыспаллэн нимыз «сечень» шуыса гожтэмын вал, калыкын озьы ик — вьюговей, бокогрей, снежень, межень, лютый, кривые дороги вӧлмемын.
Ӟуч кылэ церковнославянской кылысь февруарь нимын вуиз. Отчы латынь (februārius) кылысь среднегреческой кыл улсын (φεβρουάρι(ο)ς) пыриз. Озьы ик «феврарь, феуларь» нимаськиз[5].
Ирландиын февраль ― тулыслэн нырысетӥ толэзез. Вашкала сямъёсъя, татын 1 феврале ыжпи вордсконлы но тулыс вуонлы сӥзем Имболк юмшан ортчытъязы[6].
Мукет кылъёсын
Европаысь тросаз кылъёсы февраль латин кылысь вуэмын. Озьы ик вань мукет сямен пӧрмемъёсыз.
Финн кылын толсур толэзьлэн helmikuu нимыз, «марӟан толэзь» шуэмез возьматэ, малы ке шуоно, та толэзе писпуос вылысь нуназе шунам лымы шапыкъёс, уйин кынмыса, марӟанлы туслало. Чех кылын — únor , nořiti se кыл бордысь — «выйыны» (шуръёсын йӧ шунаса, ву улэ вые). Украин кылын — лек, белорус кылын — озьы ик лек, поляк кылын — luty, «жалясьтэм». хорват кылын — veljača — «быдӟым»: Veljak, Сретение- быдӟым праздниклы луыса, лэся, со ӵапак 2 февральлы тупа, яке языческой славян кылчинъёсын герӟаськемын. Турок кылын — Şubat — сирийской «суббота» кыл бордысь. литва кылын ― vasaris (vasara — «гужем»[7]).
Туала китай но япон кылъёсын февраль «кыкетӥ толэзь» шуэмез возьматэ. Вашкала япон календарьын февраль толэзьлы матын луись толэзь Кисараги нимаське вал (如月, 絹更月 яке 衣更月 «дӥсь воштон толэзь» шуэмез возьматэ). Мукует вашкала япон кылъёс ик Мумэцуки (梅見月, «сливалэсь сяськазэ адӟон толэзь») но Кономэцуки (木目月 — «писпу выльдӥськон толэзь»).
Кылбурет
- Кион сюан толэзь. ― Ф.Васильев
Визькылъёс но калык чакланъёс
- Тулыспал тулысэ потон ӧсэз ӵоге.
- Тол шунды пиштэ ке но, уг шунты.
- Тулыспал кужмо луэ лымыё тӧлъёсыныз, южтолэзь ― шапыкъёсыныз.
Валэктонъёс
- ↑ Т. И. Зеленина . ИНОЯЗЫЧНАЯ И ИСКОННАЯ ЛЕКСИКА В УДМУРТСКОМ ЯЗЫКЕ. Опосредованные заимствования в отдельных лексических подсистемах .Учебное пособие с.89
- ↑ За год Солнце проходит не через 12, а через 13 созвездий. Новый знак зодиака — «Змееносец»
- ↑ Климишин И. А.часть=. Календарь и хронология. — Изд. 3. — М.: Наука. Гл. ред. физ.-мат. лит., 1990. — С. 41. — 478 с. — 105 000 экз. — ISBN 5-02-014354-5.
- ↑ Фасмер Макс «Этимологический словарь русского языка» (онлайн версия), серен
- ↑ Фасмер Макс «Этимологический словарь русского языка» (онлайн версия), Февраль
- ↑ Праздники кельтов
- ↑ Фасмер Макс «Этимологический словарь русского языка» (онлайн версия), Весна