Геноцид дыръя быдтэм совето калыкез буре ваён нунал

Геноцид дыръя быдтэм совето калыкез буре ваён нунал
Быдӟым Атыкай ож вакытысь фашист ляльчие нуэм совето гражданъёсты утён вылысь совето ожгарчиосты шундыпуксён пала ӝоггес мыныны ӧтись плакат
Типез	Россиысь буре ваён нунал
Официально	Быдӟым Атыкай ож вакытэ нацистъёсын но соослэн юрттӥсьёсынызы совето калыкез геноцидын быдтэмъёсты буре ваён нунал
Озьы ик	Совето калыкез геноцид дыръя быдтонэз буре ваёнъя огъя ужрадъёсын нунал
Валатонэз	Совето калыкез геноцидын быдтон сярысь историысь тодэ ваёнэз утён, историез пӧянлы-пожанлы пумит нюръяськон
Юнматэмын	2025-тӥ арын 29-тӥ толсуре
Пусъё	Россия Россия
Дырыз	19-тӥ оштолэзе
Сям-йылолъёс	Дышетонъя ужрадъёс (буре ваён урокъёс, лекциос), мемориал акциос (сяська понон, митингъёс), лулчеберетъя но югдытонъя ужрадъёс (адӟытонъёс, презентациос)

Геноцид дыръя быдтэм совето калыкез буре ваён нунал (ӟуч: День памяти жертв геноцида советского народа) — Россиысь буре ваён нунал, «1941-тӥ—1945-тӥ аръёсысь Быдӟым Атыкай ож вакытэ совето калыкез геноцидын быдтэмъёсты буре ваён нуналэз юнматон сярысь» федерал законэн кутэмын. Пусйиське арлы быдэ 19-тӥ оштолэзе. Быдэс нимыз: «Быдӟым Атыкай ож вакытэ нацистъёсын но соослэн юрттӥсьёсынызы совето калыкез геноцидын быдтэмъёсты буре ваён нунал».

Историез

2025-тӥ арын шуркынмонэ Кун Думаысь депутатъёслэн группазы выль буре ваён нуналэз юнматон сярысь законлы проектэз эскерон вылысь поттӥз. Кичӧлтӥсьёс луизы «Единая Россия» фракциысь парламентарийёс, вазиськонэн потӥзы Федерация Кенешлэн тӧроезлэн нырысетӥ воштӥсез Владимир Якушев, Кун Думалэн вице-спикерез Ирина Яровая но фракцилэн кивалтӥсез Владимир Васильев кивалтэм улсын.

2025-тӥ арын 16-тӥ толсуре Кун Дума законлы проектэз кутӥз. 2025-тӥ арын 29-тӥ толсуре Россилэн Президентэз Владимир Путин «Ожгар данлыкъя нуналъёс но Россиысь буре ваён нуналъёс сярысь» федерал законэ воштонъёс пыртонэз юнматӥз. Та пумысен нимысьтыз ужкагаз правовой ивортодэтъя официальной луись интернет-порталэ интыямын вал. Закон 2026-тӥ арын 1-тӥ толшорысен кужымаз пыриз.

Закон бордысь валэктонъя гожтэтын пусъемын вал, та катэз кутон историез пӧянлы-пожанлы пумит нюръяськонын но совето калыклэн историысь подвиг пумысен зэмлыкез утёнын валтӥсь инты басьтоз шуыса.

Буре ваён нуналэз быръён

19-тӥ оштолэзь быръем вал та учырен валче: со нуналэ 1943-тӥ арын СССР-ысь Вылӥ Кенешлэн Президиумез юнматӥз «Совето граждан калыкез но пленэ шедем красноармеецъёсты быдтонын но курадӟытонын янгыше уськытэм немец-фашистъёсты, шпионъёсты, совето гражданъёс пӧлысь родинамес вузасьёсты но соослы юрттӥсьёсты вӧсь карон ужрадъёс сярысь» 39 номеро указ. Та ужкагаз нырысетӥез правовой акт луиз, со СССР-лэн оккупировать карем интывылъёсысьтыз нацистъёслэсь но юрттӥсьёссылэсь мирной калыкез быдтон понна юри мытэм бадӟым политикаез официально пусйиз но йыруж лэсьтӥсьёсты кылкутон улэ кыскон пумысен правовой инъетъёсты тупатӥз.

39 номеро указ совето правовой система понна аспӧртэм кылкутон луиз: «немец, итальян, румын, венгер, финн фашист злодейёсты», озьы ик шпионъёсты но родинаез вузасьёсты ошыса кужмысь виён, интыысь калык пӧлысь юрттӥсьёссылы 15-сен 20 арозь каторга ужъёсы келян. Та йыружъёсъя ужъёсты чаклан военно-полевой судъёслы оскемын вал.

Пуштросэз но дунлыкез

Буре ваён нуналэз юнматон Быдӟым Атыкай ож сярысь но нимысьтыз мирной калыклэн кайгуэз сярысь историысь тодэ ваёнъёсты утёнъя кун политикалэн оглюкетэз луиз. Кун Думалэн Тӧроез Вячеслав Володин верамъя, немец-фашист оккупациын быремъёс — СССР-ысь 13 миллионлэсь ятыр адямиос.

Россиысь «Геноцид сярысь тодэ ваёнъя огъя ужрадъёсын нунал» акция

2021-тӥ арысен кутскыса, арлы быдэ 19-тӥ оштолэзе быдэс Россиын «Совето калыкез геноцид дыръя нацистъёсын но ужъюлтошъёсынызы быдтонэз буре ваёнъя огъя ужрадъёсын нунал» акция радъяське. Акция ортче «Вакытлэн дырыз ӧвӧл» югдытонъя федерал ӵектос улсын, со оккупировать карем интывылъёсысь нацистъёслэн но ужъюлтошъёссылэн совето гражданъёслы пумит йыружъёссыя историысь зэмлыкез утён вылысь кылдытэмын.

Ужрадъёс быдэс кунын ортчо. 2022-тӥ арын отчы 6,5 миллионлэсь ятыр адями пыриськиз.

• 

  «Вакытлэн дырыз ӧвӧл: совето калыкез быдтон» адӟытон, Ленинград улосысь Зайцево гуртысь мемориал комплекс, 2025-тӥ арын толсуре

• 

  «Вакытлэн дырыз ӧвӧл» адӟытон, «Курск ожмаськон. Белгород пала» музей-диорама, 2025-тӥ арын куартолэзе

• 

  Быдӟым Атыкай ож вакытэ Ленинград улосысь нылпиослэн геройлыко луэмзы сярысь фильм лэсьтон, 2024-тӥ арын толсуре

Валтӥсь ужрадъёслэн пӧртэмлыксы:

• Дышетон ужрадъёс: школаосын, колледжъёсын но вузъёсын радъясько геноцидлы сӥзем огъя урокъёс, классной часъёс но лекциос. Занятиос дыръя темая видеофильмъёсты возьмато, соос пӧлын «Вакытлэн дырыз ӧвӧл» циклъёсы сюремъёсыз но, историысь фактъёс но ужкагазъёс пумысен кенешо;
• Мемориал акциос: валтӥсь йылолъёс пӧлын — нацист йыружъёсын сэрен быремъёслы сӥзем мемориалъёс но синпелетъёс доры сярысь понон. Митинг-реквиемъёс но сӥлы карон ужрадъёс ортчо, отчы ветеранъёс, кивалтӥсьёс но мерлыко огазеяськонъёслэн ёзчиоссы пырисько;
• Лулчеберетъя но югдытонъя ужрадъёс: темая архив ужкагазъёсын адӟытонъёс, эскерем проектъёсъя презентациос, музейёсын но библиотекаосын экспозициос радъясько. Та ужрадъёс возьмато кайгулэсь мурдалазэ но геноцидын быремъёслэсь адӟонзэс.

Акциосы пыриськисьёс школьникъёс, студентъёс, дышетӥсьёс, поисковикъёс, кун ёзэтъёсысь но калык огазеяськонъёсысь ёзчиос луо.

Валэктонъёс