Иж (мотоцикл)

Википедиысь материал
Та кыллэн мукет валатонъёсыз вань, учке Иж.
Иж-1 но Иж Планета-5 мотоциклъёс 1999-тӥ арысь маркаос вылын

Иж (ӟуч: Иж (мотоцикл)) — Ижысь «ИЖМАШ» заводын кылдытэм но 1929-тӥ— 2008-тӥ аръёсы поттэм совето но росси мотоциклъёслэн марказы.

1928-тӥ арын Ижсталь заводын П. В. Можаров инженер кивалтэм улсын чертёжъёс лэсьтэмын вал, нош 1929-тӥ арын «Ижъёслэн» нырысетӥ образецъёссы бичамын вал. 1914-тӥ—1918-тӥ аръёсы ик Мускоысь «Дукс» заводын нырысетӥ ӟуч мотоослэсь образецъёссэс эскерон вылысь лэсьтыны выризы, но соос ӧз удалтэ. Мотоцикл бичан историысь куинь вакытэз чакланы луэ: опытной образецъёс лэсьтон, сериен производствое поттон, массовой производствое лэзён.

ИЖ-8 мотоцикл «Атыкай мотоцикллэн историез» сериысь лэсьтэм Россиысь 2019-тӥ арысь почта марка вылын [ЦФА [АО «Марка» АО] № 2503].

Эскерон вылысь образецъёсты поттон

1928-тӥ—1929-тӥ аръёсы Ижысь ожтӥрлык лэсьтон заводлэн «Мотосекциос» нимо мастерскойёсаз мотоциклъёслэсь опытной образецъёссэс (Иж-1, Иж-2, Иж-3, Иж-4, Иж-5) поттон

Кӧня ке толэзь куспын Россиын ортчоно мотопробеглы  [ӟуч] (удм. вить мотоциклъёслэсь вить пумо модельёссэс малпазы, бичазы но ужрадэ пыриськыны дасязы. Пӧрмем мотоциклъёс пӧлысь тужгес устоосыз кык цилиндръем V буква выллем двигательёсын, 1200 см³ ужась быдӟалаем но бадӟымзэ 24 вал кужымен «Иж-1» но «Иж-2» колоссъёс луизы. Со вакытлы та тужгес аспӧртэм но азьмынӥсь конструкциос вал. Двигательлэн коленчатой валэз кузяз интыяськылӥз, мышкысьтыз питранзэ кардан валэн но двигателен блокын лэсьтэм куинь ступеньлэсь передачаосын коробка бергатъяз. Бадӟым штампен лэсьтэм рамаез но азьпалысьтыз вилкаез параллелограммлэсь но рычаглэсь ужзэ быдэсъязы — ваньмыз та Эрнст Нойманн-Неандер конструкторлэн малпанъёсыз вылэ пыкиськыса лэсьтэмын вал, соин Можаров Германиын стажировка дыръя тодматскиз. Улӥ рама озьы ик глушительлэн корпусэз луыса но ужаз — та аспӧртэмлык нырысетӥ сериысь вань вить мотоциклъёслы тупалляз. «Иж-2» мото двигателез сӥятӥсь вентиляторен но коляска питранэз кысконэн висъяськиз. «Иж-3»-лэн кык цилиндръем V буква выллем лэсьтэм 750 кубъем «Вандерер» двигателез вал, коленчатой валэз вамен-вамен интыяськылӥз, мышкысьтыз питранзэ жильы бергатъяз, со вӧен тырмытэм но лач-лач пытсам кожух пушкын ужалляз.

«Иж-4» — вить мотоос пӧлысь тужгес капчиез вал, со одӥг цилиндръем кык тактъем «Шток» двигателен но мышкысьтыз питыранзэ валэн ужатӥсь приводэн висъяськылӥз.

«Композиция» нимам «Иж-5» 500 кубъем «Неандер» мотоциклъёслэн инъетсы вылын кылдытэмын, но азьысьтыз вилкаез но воштэм рамаез аслаз вал.

Вань та мотоциклъёс 1929-тӥ арын куарусёнэ—коньывуонэ ортчем Россиысь кыкетӥ мотопробеге пыриськизы, 3300 иськемез умой ортчизы — пробегысь трассаез гинэ ӧвӧл, Ижысен Мускоозь сюресэз но. Пробег йылпумъяськем бере эксперимент модельёс пӧлысь тужгес пичиез — «Иж-4» — сериен поттон вылысь производствое пыӵатыны ӵектэмын вал. Но «Ижсталь завод» мукет кулэгес заказ борды басьтӥськиз, нырысетӥез мото поттон азинскытэк кылиз. Но Можаров таин ӧз буйгатскы: аслаз группаеныз ӵош Ленинградэ выжиз, татын DKW немец фирмаысь ваем документъёсъя капчи «Л-300» мотоцикл бичан борды басьтӥськиз.

Сериен поттон производствоез радъян

1933-тӥ—1941-тӥ аръёсы мотозаводын сериен производство радъян (Иж-7, Иж-8, Иж-9, Иж-12)

Сюрес вылын ворттылон совето Иж-8 мотоцикл, Политехникая кун музей (Москва)
ИЖ-8 Владивостокысь вуж машинаослы но мотоослы сӥзем музейын

1930-тӥ аръёслэн кутсконазы мотоциклъёс уг пото вал. Котьма ке но, атыкай мотоциклъёсты кылдытон бордын энтузиастъёслэн нимысьтыз группаоссы Мускоын, Ленинградын, Харьковын ужазы, соос пӧлын П. В. Можаров — Ижын. СССР-ысь ВСНХ-лэн Президиумысьтыз экспертъёслэн комиссизы мотоцикл поттонъя бадӟым завод пуктон сярысь ужпумез эскериз но огкылэ вуиз: сое интыяны тужгес тупась инты Ижкар луоз. Городын машина лэсьтонъя быдэс комплекс ужа — андан ӵыжатон бордысен кутскыса секыт тӥрлык но станокъёс бичан дорозь, ужасьёслэн квалификацизы тырмыт, сырьё вайыны но шуг-секытъёс уг кылдо. Татын, Базарной урамын интыяськем Березин фабрикантлэн пӧйшуран пыӵал фабрикаезлэн инъетэз вылын, Опытной мотоциклетной завод лэсьтыны кутскизы.

Нырысь та заводын П. В. Можаров кивалтэм улсын кылдытэм секыт «НАТИ-А-750» мотоциклъёсты поттыны малпало вал. Мотоцикллэн 747 см³ ужась быдӟалаем кык цилиндръем V буква выллем двигателез вал, Можаровлэн мотоциклъёсызлы тупась штампен рамаез но 15 вал кужымез пусъемын. 1933-тӥ арын 1-тӥ куартолэзьлы 4 нырысетӥ мотоциклъёс бичамын вал. Со дыре ик Ленинградысь басьтэм ужкагазъёсъя «Иж-7» капчи мотоциклъёслэсь эскерон экземпляръёссэс но ӵыжатӥзы. Со «Л-300» модельлэн кыктоосыз вал (ӵапак соосты «ДКВ-Люксус-300» моделья Можаров лэсьтӥз) — кык ёзо одӥг цилиндрен вамен пеллян двигателен, куинь полэс передачаосын коробкаен, мышкысьтыз питранзэ жильыен ужатӥсь, штампъёслэсь ёзъёслэсь бичам но болтъёс вылэ юнматэм рамаен, параллелограмм кадь азь вилкаен, зӥбымтэ мышкысьтыз питранэн. Но «Иж-7» ваньмылы тодмо ужзэ капчиятон «операция» пыр потӥз: багажниксэ но азь щитокъёссэ куштӥзы, ӵошкыт пыдул лёгетъёсты котыресъёсызлы воштӥзы, газ сётыны юрттӥсь бергась кутонъёссэ кожон манеткалы выльдӥзы, декомпрессорлэсь дистанционной приводзэ цилиндрлэн йырысьтыз краникен воштӥзы.

Озьы сериен поттон вылысь «Иж-7» быръемын вал. Зэм, 1933-тӥ арын бичам 12 мотоциклъёс пӧлысь ваньмыз сямен заводэ берытскизы — зажиганиея сӧзнэтэз урод вал. Но ӝоген «пинал висёнъёсты» бурмытӥзы но, 1934-тӥ арын завод 111 мотоцикл поттӥз ни.

1938 арлэн кутсконаз «Иж-7» модельёсты выль «Иж-8» воштӥз. 300 кубъем двигатель герд выллем кык каналысь пельтӥськиз, таин валче мотолэн вал кужымез 5,5-сен 8-озь йылӥз. Электро тӥрлыкез но выльдӥськиз — маховичной магнето интые машинае генератор но аккумулятор пуксизы. Нош 1940-тӥ арын «Иж-9» модельёсты бичаны кутскизы, таизлэн вал кужымез 9-озь йылӥз. Со аре ик Ленинградысь «Л-8» мотоцикл бичаны ужкагазъёс вуизы, 348 см³ ужась объёмен 4 тактъем вылӥ клапанъёсын двигателен но тужгес бадӟым 13,5 вал кужымен ужалляз. Выль моделез поттон ӝоггес мед радъяськоз шуыса, «Иж-9» мотоцикллэсь ходовойзэ кутӥзы. «Иж-12» нимо выль мотоциклэз сериен поттон вылысь 1941-тӥ арын гужем кутскыны кулэ вал. Но заводын мотоциклъёсты лэсьтонлэсь азинсконзэ тылож уретӥз.

Лачак мотоцикл поттон

1946-тӥ—2008-тӥ аръёсы Ижысь машиностроительной заводын (али — «Ижмаш» ОАО но «Ижмаш-Мото» ДОАО) калыклы лачак мото поттон радъяськиз, та вакытэ пӧртэм пумо ог 11 миллион мотоцикл бичамын. 2008-тӥ арын завод банкрот кылиз.

Иж-56
Иж Планета-3
Иж Юпитер-4
Иж Планета-5

1946-тӥ арын завод Германиысь репарация  [ӟуч] (удм. чотын вуттэм тӥрлык, чертёжъёс но технологиос басьтӥз но «Иж-350» мотоцикл поттыны дышиз — немец «DKW NZ-350»- лэсь копизэ лэсьтӥз. Со пӧртэм немец мотоциклъёсты огазеям маке вал. Озьы картерез азьло модельёслэн кадь ӵыжатэм алюминьлэсь вал, но дэрилэсь утись щитокъёсыз — война вакытэ поттэм берло модельёслэн кадь. Мотоциклэз атыкай музъем вылын лэсьтэм электро тӥрлыкъёслы но приборъёслы тупатӥзы. Нош огъя тусыз но конструкциез Германиысь оригинал выллем вал. Пусйыны кулэ, ас вакытаз со туала, огшоры но оскымон мотоцикл вал. Соин ик ожтӥрлык поттон заводэ мотоцикл бичанэз пуктыны малпазы.

1940-тӥ—1960-тӥ аръёсы совето мотопромышленностьлэн тодметэз спорт модификациен сюрес вылын ворттылыны ярась мотоциклъёс поттон вал. Мотоспортэз калыке пыӵатон но азинтон вылысь соос кутэм решениосты сериен поттоно арбериосын «эскерон стендъёс» выллем луизы. 1948-тӥ арын Ижын архаичной параллелограммез воштэм азьысьтыз телескопической вилкаен «Иж-350С» мотоцикл бичамын вал. Мышкысьтыз питранзэ пружинаосын но гидравлика амортизаторъёсын сюсьтыл ошет вылэ пуктӥзы. Двигателез чугун гильзаен алюминь цилиндрен вал. Солэн вал кужымез 14-озь будӥз. 1950-тӥ арын «Иж-50» спорт мотоцикллэсь выльдэм вариантсэ сериен поттыны кутскизы.

1951-тӥ арын вакчи дыр куспын конструкторъёс ӟечомытэм воксё выль «Иж-49» модель поттӥзы. Телескопической типъем азьпал вилказэ умоятыса, гидравлика амортизаторъёсын мышкысьтыз подвесказэ юнматыса но мукет выльдӥськонъёсты пыӵатыса, ворттылыны трослы капчигес но оскымонгес луиз, мотоцикл урод сюресъёс вылтӥ капчиен ширтыны ӧдъяз. Производствоез дугдытытэк, «Иж-49» мотоциклъёсты трос поттонэ выжизы, кунын улӥсьёслы со туж яраз, кунгож сьӧрысь рынокъёсы но сюрес усьтӥз. Со урдэсазы прицепен иж мотоослэн нырысетӥ модельзы вал, сое лэсьтонэз Вятские Поляныын радъязы. Отӥяз коляскаосын машинаосты эскерон вылысь партиен поттӥзы.

1955-тӥ арын гумы кадь ӵыжатэм рамаен но маятник кадь ужась мышкысьтыз подвескаен спортъя выль мотоциклъёс поттыны ӧдъязы. Шоссеын но кульчо кадь сюресъёс вылын ӵошатсконъёслы «Иж-54» мотолэн двигателезлэн вал кужымез 18 луиз, нош кросс но трос нуналъем ӵошатсконъёслы «Иж-55» мотолэн вал кужымез 16 луиз.

Мотоциклъёслы проект лэсьтон бордын ужась конструктор группа нимысьтыз бюрое висъяськиз. 1956-тӥ арын выль модель кылдӥз — «Иж-56», нош матысь дыре завод солэсь опытной партизэ поттӥз ини. Аслаз конструкциезъя мотоцикл азьвыл поттэмъёсызлэсь шӧдскымон висъяськиз. Штампен рама гумыё луиз, водителез тузонлэсь но дэрилэсь утён вылысь колёсаос вылэ муресь щитокъёс чакламын вал, пуконэз губка кадь резиналэсь лэсьтэмын но чехолэн шобыртэмын вал. Карбюраторзэ но омырез сузянзэ шобыртӥзы, тӥрлыкен ящикъёсын ӵош соос машиналы умой вылтус сётӥзы. Шонересь спицаосын питранъёсты вошъяны луонлык кылдӥз. Та мото азьвылэзлэсь 20 процентлы кужмогес луиз, двигательлэн вал кужымез 13-озь ӝутскиз. Паймонэз ӧвӧл, «Иж-56» моделез калык золгес яратӥз. Солэн «тиражез» 680 сюрс луиз, со пӧлысь 130 сюрсэз борды урдэсаз прицеп юнматӥзы. Оглом машина туалагес луиз.

Отӥяз конструкторъёс валтӥсь экспериментальной бюроын ужасьёсын валче мотоциклъёслэсь но нимаз ёзъёслэсь опытной образецъёссэс кылдытон но эскерон борды басьтӥськизы. Проект лэсьтонэн вырись азинлыко группа «Сатурн», «Орион», «Сириус» мотоциклъёсты кылдытӥз. Соос пӧлысь тужгес аспӧртэмлыкоез «Сатурн» вал — 250 см³ классъем машина. Ӵыжатэм рамаен огшоры мотоциклэн ӵошатыса, со воксё но раматэк бичам модель вал. Бензобак, руль колонка но тӥрлык возён ящикъёс одӥг быдэс герӟет выллем луизы, улӥяз двигатель ошизы. Со вакытэ ик спорт машинаослэн кӧня ке модификациоссы кылдӥзы. Сюрес вылын ворттылон «Иж-350» но «Иж-49» нырысетӥ мотоциклъёслэн инъетсы вылын «Иж-350С», «Иж-50», «Иж-50А», «Иж-50Б» спорт машинаос бичаны ӧдъязы, ӵапак соосын асьме спортсменъёс мотоосын ӵошатсконъёсы пыриськыны но «Иж» маркалэсь данзэ утьыны кутскизы.

1954-тӥ—1955-тӥ аръёсы шоссе вылтӥ но кульчо кадь сюрестӥ ӵошатсконъёслы мотоциклъёслэн «Иж-54» но «Иж-54А» модельёссы кылдытэмын. Соослэн двигательёссы 20 вал кужымозь бергаллязы. Та машинаосын ӵошатскыса, асьме спортсменъёс, пӧлазы спортъя мастер В. Медведев но, СССР-лэн чемпионэз ним но вормон интыосты басьтӥзы. Та вакытэгес ик трос нуналъем но кросс ӵошатсконъёслы «Иж-55М» но «Иж-55К» мотоциклъёс кылдытэмын вал. Отӥяз соос «Иж-57М» но «Иж-57К» оскымонгес модельёслы воштэмын вал.

1958-тӥ арын кыкетӥ палараз бюроысь конструкторъёс азе выль ужпум пуктӥзы — «Иж Юпитер» мотоциклэз производствое дасяно. Ижысь машина лэсьтӥсьёс выль модельлэсь образецсэ 1957-тӥ арын Брюссельын ортчем дуннеысь адӟытонын возьматӥзы. Мотоциклэз нырысь-валысь «ИЖ-58» нималлязы, отӥяз нимзэ «Иж Юпитер» каризы. Мотоциклэн адямиосты нуллон люкетэз «Иж-56» модельлэсь асэстэмын вал, но моторез воксё выль кык цилиндръем вал. Нырысетӥ опытной образецъёс асьсэды туж ӟеч возьматӥзы. Двигательлэн вал кужымез 18-19-озь вуттэмын, моторез нимаз цилиндръёслэсь аспӧртэм конструкциен бичамын вал. Ворттылыны но кужымзэ вошъян передачаосын коробкаез каньылгес вал. Подшипникъёсты зыран умоятэмын. Двигатель поттонэз Ижысь механикая заводын радъязы. 1961-тӥ арын сериен бичаны кутскизы. Мотоциклэз кык модификациен поттӥзы — оген ворттылыны но яраз, урдэсаз прицепен юнматыны но быгатылӥзы.

1962-тӥ арысен «Иж-56» машиналэн инъетэз вылын «Иж Планета» мотоцикл поттыны ӧдъязы. Экипаж люкетэз быдэсак сямен «Иж-Юпитер» модельлэсь асэстэмын вал. «Иж-Планеталэн» гарантияя пробегез, «Иж-56» моделен ӵошатыса, 2000 иськемозь йылӥз, омырез чылкытатӥсь ёзъёссэ вӧяны но сузяны луонлык кылдэмен, цилиндрлэн но поршневой группаысь ёзъёслэн ужан дырзы одӥг но ӝыны пол будӥз.

1966-тӥ—1970-тӥ аръёс мотоцикл лэсьтӥсьёс понна сюрес вылын ворттылыны ярась выль «Иж Планета-2» но «Иж Юпитер-2» мотоосты поттыны кутсконэн герӟаськиз.

1971-тӥ—1975-тӥ аръёс сюрес вылын ворттылыны ярась «Иж Планета-3», «Иж Юпитер-3», «Иж-Юпитер-3К», «Иж Планета Спорт» мотоциклъёсты поттонлы сӥземын вал. Верам маркаосын мотоциклъёс оскымонэсь но утялтыны-тупатыны капчиесь луизы. Конструкциос кылдытонъя опыт люкаськемен, производствоез выль азьмынӥсь тӥрлыкен узырмытэмен, выль материалъёс кылдэмен, выль модельёсты дасян дыр кулэсмиз но соосты поттон йылӥз, эксплуатация ласянь ӟечлыксы умояз. «Иж Юпитер-3» адӟем карымон луиз, солэн кужымез, азьвылэныз ӵошатыса, ог 40 процентлы йылӥз. «Иж Планета-3» но «Иж Юпитер-3» модельёслы ӟечлыкъя кун пус сётӥзы. Соосты поттон 1975-тӥ арын араз 250 сюрсозь вуттэмын вал.

1973-тӥ арын бичам «Иж Планета Спорт» мотоцикл нимаз висъяськиз. Немецен ӵошатыса, та чылкак выль модель. Нырысетӥ аръёсаз мотоциклэз кунгож сьӧрысь вуттэм тӥрлыкъёслэсь лэсьтылӥзы. Микуни япон карбюраторен ӵош двигательлэн вал кужымез 32-озь вуылӥз, вылаз ик, татын нырысьсэ нимаз вӧян сӧзнэтъёс кутэмын вал. Та модель егитъёслы тужгес кельшиз. Отӥяз завод импортлэсь куштӥськиз но комплектующийёссэ атыкай тӥрлыклэсь лэсьтыны кутскиз, таин валче мотоцикллэн тусыз урод пала воштӥськиз, двигателезлэн вал кужымез 28-озь усиз, оскымон луэмысь но дугдӥз. Куд-ог герӟетъёссэ сюрес модельёсын огазеяса, ИЖ-ПС 01 моделез поттыны ӧдъяло вал, но легендарной луэм моделез производствоысь воксё куштоно кариськизы.

1980-тӥ аръёслэн кутсконазы мотоциклъёс поттонъя выль комплекс пуктон йылпумъяськиз. Вылӥ автоматизированной, ошылэм бичанъя конвейеръёсын узырмытэм комплексын араз 450 сюрс техника поттыны чакламын вал. 1981-тӥ арын выль комплексын «Иж Юпитер-4» мотоциклъёсты поттыны кутскизы. Нош 1982-тӥ арын выль 12 вольтъем электро тӥрлыкен «Иж Планета-4» кылдӥз.

1985-тӥ арысен «Иж Юпитер-5» мотоцикл поттыны кутскизы, двигателезлэсь кужымзэ 28-ысен 24-озь кулэстӥзы. «Аварийной лэзён» кнопкаез кылдӥз, пуксем аккумуляторен мотоез лэзьыку, зажиганиез сяна, со вань приборъёсты кысылӥз. 1987-тӥ арын поттэм «Иж Планета-5» модельлэн 22 вал кужымъем двигателез выльдэмын вал но выль вылтус басьтӥзы бензобак, облицовка но тӥрлыкез ворсась щиток. Тазьы ик «Юпитер» ӝоген воштӥськиз. Со дыре ик япон ХТ-550 двигательлэн инъетэз вылын «Орион», «Марафон» но «Спринтер» азинлыко но туннэ нуналлы тупамон мотоциклъёслэсь опытной образецъёссэс дасязы но лэсьтӥзы. Асьсэ туссыя но сямъёссыя со туж туала но сэзь модельёс.

Мото поттон вакытэ ижъёс пӧртэм буёлъёсын туж ик ӧз висъяське: рамазэ сьӧдэн буязы, нош мукет люкетъёсыз чагыр-лыз, горд, югыт-курень вал.

Тужгес удалтэм совето вакытъёсы мото лэсьтонысь валтӥсь конструкторъёс вал: А. А. Модзелевский, С. Я. Фишер, Г. Л. Писарев, Н. И. Слесаренко, В. А. Абрамян, В. А. Умняшкин.

1992-тӥ—1996-тӥ аръёсы секыт арбериосты нуллон вылысь мотолы урдэсаз юнматӥськись «Иж 9.204» прицеп но секыт арбериос нуллыны «Иж 9.604 ГР» модуль кылдытӥзы. Модульлэн конструкциез озьы кылдытэмын вал, сое «Планета» яке «Юпитер» модель мотоциклъёсы пуктыны мед луоз шуыса. Мышкысьтыз питранэз но мотоцикллэн маятник вилкаез интые со модулез пуктыса, огкадь интыяськем куинь питрано грузовой мотоцикл пӧрмылӥз. Раздаточной коробка, блокировка дифференциалэз но мышлань мынонзэ дугдытон — ваньмыз та мотоциклэз уже кутон амалъёсты паськытатӥз.

1995-тӥ арысен 1998-тӥ арозь пӧртэм стационар двигательёс кылдытъязы: СД 101 — «Иж-ПС» двигательёслэн инъетсы вылын, СД 1012 — «Иж-П-5» двигательёслэн инъетсы вылын. Ачиз кыскись центробежной Иж НЦС насосэн ӵош СД 1012 двигателен «Иж МП-1» мотопомпа кылдытэмын вал.

1997-тӥ арын — тылпу кысонын кутӥськись тӥрлыкез (мотопомпаос, тылпу кысон рукавъёслы тӥрлык, огнетушительёс но мукет) нуллыны юрттӥсь «Иж 6.92001» мотоцикл кылдытӥзы, озьы ик 1990-тӥ—1992-тӥ арын Ижысь механикая заводын бичам кизер эстӥськонэн ужась «Иж-Ю-5» Сб.1-08.10 двигателен «Иж 6.920ГР» грузового мотоцикл поттӥзы.

1996-тӥ—2000-тӥ аръёсы воксё выль модельёс кылдӥзы — чоппер  [ӟуч] (удм. амалъя лэсьтэм «Иж 6.113-05» мотоциклъёс (со ик — «Юнкер»).

Мускоысь ГИБДД-лэн мотовзводэз атыкай производствоез ӝутон вылысь эскерон понна кӧня ке ар ӵоже «Иж-Юнкер» модельёсты уже кутылӥз[1]. Отӥяз пӧртэм мугъёсъя Мускоысь ГИБДД-лэн кивалтӥсьёсыз «Иж» маркаысь мотоциклъёсты басьтэмысь дугдӥзы.

Пунэмъёсын трос люкаськемен, ИЖмото завод 2008-тӥ арын валантэм дырлы консервация улэ шедиз, уноез тӥрлык вузамын вал.

2018-тӥ арын 17-тӥ куартолэзе «Ростех» кун корпорацилэн кивалтӥсез Сергей Чемезов В. В. Путинлы вераз, президентлэсь кортежзэ келяны чаклам «Кортеж» мотоциклэз малпан-кылыдтон уж йылпумъяськиз шуыса[2]. Со сяна, ивортэмын вал, та тӥрлык рыноке «Иж» марка улсын потоз но быдэсак электро амалэн ужалоз, нош вылтусын «Aurus» дуно машинаослэн модель радазы пыроз шуыса[3].

ИЖ-К11 кросс мотоцикл

Модельёс

Сюрес вылын ворттылон мотоциклъёс

«Ижмаш» огазеяськонлэн 1986-тӥ арын 1-тӥ толшорлы поттэм модельёсъя ивортонэз[4]:

  • Иж-350 (1946—1951) 127 090 экз. поттэмын;
  • Иж-49 (1951—1956) 507 603 экз. поттэмын;
  • Иж-56 (1956—1962) 677 428 экз. поттэмын;
  • Иж Юпитер (1961—1966) 447 747 экз. поттэмын;
  • Иж Планета (1962—1966) 405 303 экз. поттэмын;
  • Иж Планета-2 (1965—1971) 246 486 экз. поттэмын;
  • Иж Юпитер-2 (1965—1971) 766 487 экз. поттэмын;
  • Иж Планета Спорт (1973—1984) 215 210 экз. поттэмын;
  • Иж Планета-3 (1970—1977) 478 496 экз. поттэмын;
  • Иж Планета-3-01 (1977—1981) 400 842 экз. поттэмын;
  • Иж Планета-3-02 (1981—1985) 216 101 экз. поттэмын;
  • Иж Юпитер-3 (1971—1977) 296 711 экз. поттэмын;
  • Иж Юпитер-3-01 (1977—1980) 471 246 экз. поттэмын;
  • Иж Юпитер-3-02 (1979—1981) 254 316 экз. поттэмын;
  • Иж Юпитер-4 (1982—1985) 1 068 678 экз. поттэмын;
  • Иж Планета-4 (1983—1987) 167 092 экз. поттэмын;
  • Иж Планета-5 но модификациосыз (1987—2008);
  • Иж Юпитер-5 но модификациосыз (1985—2008);
  • Иж Планета-6;
  • Иж Планета-7;
  • Иж Юнкер (1999—2005);
  • Иж Корнет;
  • Иж Орион.

Спорт мотоциклъёс

Пӧртэм спорт ӵошатсконъёсы пыриськыны чакламын. Сюрес вылын ворттылыны лэсьтэм мотоослэн инъетсы вылэ пыкиськыса быдэстэмын. Озьы, кылсярысь, Иж-50 молоцикллы Иж-49 инъет луиз[5].

  • Иж-350С (1948)[6];
  • Иж-50 универсал (1950)[7];
  • Иж-50А трос нуналъем ӵошатсконъёслы [8];
  • Иж-50Б кросс амалэн ӵошатсконъёслы [8];
  • Иж-51 (1951)[7];
  • Иж-54 шоссетӥ но кульчоетӥ ӵошатсконъёслы;
  • Иж-54А шоссетӥ но кульчоетӥ ӵошатсконъёслы[9];
  • Иж-55 кросс амалэн но трос нуналъем ӵошатсконъёслы;
  • Иж-57К мотокросслы[8];
  • Иж-57М трос нуналъем ӵошатсконъёслы[8];
  • Иж-60М трос нуналъем ӵошатсконъёслы[9];
  • Иж-60МС трос нуналъем ӵошатсконъёслы[9];
  • Иж-61К мотокросслы[10][11] (1961);
  • Иж-62Ш кульчоын ӵошатсконъёслы[12][9];
  • Иж-64К мотокросслы[13];
  • Иж-64М трос нуналъем ӵошатсконъёслы[13][14][15];
  • Иж-65М трос нуналъем ӵошатсконъёслы (СССР-ысь командалы Швециын 1966-тӥ арын ортчем 41-тӥ калыккуспо трос нуналъем ӵошатсконъёсы пыриськыны);
  • Иж-М10 трос нуналъем ӵошатсконъёслы[15] (СССР-ысь огъя командалы 18 нимысьтыз сюрес вылын ворттылон мотоциклъёс 1967-тӥ арын Польской калык республикаын ортчоно 42-тӥ калыккуспо трос нуналъем ӵошатсконъёсы пыриськыны);
  • Иж-К11 мотокросслы[16];
  • Иж-М11 трос нуналъем ӵошатсконъёслы;
  • Иж-Ш11 кульчоын ӵошатсконъёслы[13][16];
  • Иж-М12 трос нуналъем ӵошатсконъёслы [15] (СССР-ысь сборнойлы Европаысь чемпионатэ но 1968-тӥ арын Испаниын ортчем 43-тӥ калыккуспо ӵошатсконъёсы пыриськыны; 1968-тӥ ар кутсконын 250 см³ ужась быдӟалаем лэсьтэмын — 6 штука, 350 см³ быдӟалаем — 8 штука но 500 см³ быдӟалаем — 4 штука; СССР-ысь командалы Европаысь чемпионатэ но 1969-тӥ арын ортчем 44-тӥ калыккуспо ӵошатсконъёсы пыриськыны);
  • Иж-К12А (СССР-ысь командалы Европаысь чемпионатэ но 1969-тӥ арын ортчем 44-тӥ калыккуспо ӵошатсконъёсы пыриськыны);
  • Иж-Ш12 кульчоетӥ ӵошатсконъёслы[13];
  • Иж-К13 мотокросслы;
  • Иж-К14 мотокросслы[13];
  • Иж-М14 трос нуналъем ӵошатсконъёслы[13];
  • Иж-К15 мотокросслы[17];
  • Иж М15 трос нуналъем ӵошатсконъёслы[17];
  • Иж-К16 мотокросслы;
  • Иж М16 трос нуналъем ӵошатсконъёслы.

Гоночной мотоциклъёс

Гоночной мотоциклъёс — ӝог ӵошатсконъёслы поттэм я нимысьтыз дасям техника. Соосты мукет ӵошатсконъёсын я сюрес вылын ворттылыны кутыны уг яра[18].

  • Иж-54-С2 шонер сюрес вылтӥ я кульчо кадь шоссетӥ ӵошатсконъёслы.

Нимысьтыз техника

  • Иж (ДПС) Юпитер-5;
  • Иж (ДПС) Юнкер;
  • Иж Самсон (мотовездеход);
  • Иж ГР (грузовой);
  • Иж 6.92001 (тылпуэз кысӥсь мото);
  • Мотопомпа.

Валэктонъёс

  1. ↑ Официальный сайт группы предприятий «ИЖМАШ» Архивная копия от 11 оштолэзе 2008 на Wayback Machine
  2. ↑ Чемезов пообещал Путину вскоре «довести до ума» мотоцикл проекта «Кортеж» [ӟуч], Interfax.ru (17 мая 2018). Архивировано 1 пӧсьтолэзе 2025 года. Эскеремын: 1 пӧсьтолэзе 2025 арын.
  3. ↑ Мотоцикл проекта Aurus будет полностью электрическим, сообщил Мантуров
  4. ↑ статистика, 1986, с. 8.
  5. ↑ Дементьев и др., 1957, с. 28—29.
  6. ↑ Воронцов, 2003, с. 224.
  7. ↑ 1 2 Иваницкий, 1954, с. 10.
  8. ↑ 1 2 3 4 Боришанский и др., 1963, с. 4—5.
  9. ↑ 1 2 3 4 Боришанский и др., 1963, с. 6.
  10. ↑ Воронцов, 2003, с. 225.
  11. ↑ Боришанский и др., 1963, с. 6—9.
  12. ↑ Абрамян, 1963, с. 20.
  13. ↑ 1 2 3 4 5 6 Пилюкевич, 1970.
  14. ↑ Юдин, 1967.
  15. ↑ 1 2 3 Умняшкин и др., 1969, с. 10.
  16. ↑ 1 2 От дорожных до гоночных, 1975.
  17. ↑ 1 2 Мотоциклам ИЖ - полвека, 1979.
  18. ↑ Дементьев и др., 1957, с. 31.

Литература

  • Боришанский Л. А., Слесаренко Н. И., Чермных М. Г. Ижевские спортивные мотоциклы. Устройство и эксплуатация. — Удмуртское книжное издательство, 1963. — С. 213.
  • Дементьев К. И., Юмашев Н. Н. Справочник мотоциклиста. — Физкультура и спорт, 1957. — С. 312.
  • Пилюкевич Г. Мотоциклы для спорта. — За рулём, 1970. — № 7. — С. 16—17.
  • Юдин А. Для массового спорта. — За рулём, 1967. — № 5. — С. 9.
  • Умняшкин В., Панов В. ИЖи для многодневки. — За рулём, 1969. — № 8. — С. 10.
  • Мотоциклам ИЖ - полвека. — За рулём, 1979. — № 11. — С. 11.
  • Кузнецов В. От дорожных до гоночных. — За рулём, 1975. — № 7. — С. 32—33.
  • Абрамян А., Лежнев Б., Пешехонов Н. Из дорожного в спортивный. — За рулём, 1963. — № 7. — С. 20.
  • Воронцов А. Е., Певзнер Е. В., Дольников Д. В., Попов А. Г., Сазонов Р. М. Энциклопедия мотоциклов. Фирмы. Модели. Конструкции. — За рулем, 2003. — С. 576.
  • Иваницкий С. Ю., Позанков М. А., Рогожин В. В. Советские мотоциклы. — Машгиз, 1954. — С. 344.
«https://udm.ruwiki.ru/w/index.php?title=Иж_(мотоцикл)&oldid=507478»-ысь басьтэмын