Нылпиосты утён калыккуспо нунал

Википедиысь материал
Та кыллэн мукет валатонъёсыз вань, учке Нылпиослэн дунневыл нуналзы.
Нылпиосты утён нунал
Нылпиосты утён калыккуспо нуналэ нылпиос суредасько.
Нылпиосты утён калыккуспо нуналэ нылпиос суредасько.
Типез Нылпиосты утён калыккуспо нунал
Официально Нылпиосты утён калыккуспо нунал
Юнматэмын 1949 арын шуркынмонэ Парижын Нылкышноослэн калыккуспо демократической федерацизылэн конгрессэзлэн решениезъя
Дырыз 1 инвожое
Логотип РУВИКИ.Медиа Медиафайлъёс РувикиМедиа пушкын
Нылпиосты утён калыккуспо нуналлы сӥзьыса, 1958-тӥ арын поттэм почта марка года,СССР [ЦФА [АО «Марка» АО] № 2161]

Нылпиосты утён калыккуспо нунал (ӟуч: Международный день защиты детей, англ. International Day for Protection of Children) — 1949-тӥ арысен кутскыса, арлы быдэ 1-тӥ инвожое дуннеысь тросаз кунъёсын пусйиське[1][2] (куд-ог кунъёсын — 20 шуркынмонэ)[3].

Солэн валтӥсь ужпумез — нылпиослэсь эрикрадъёссэс утёнлы саклык висъян. Нырысь ик, улыны, эрико малпаськыны, кыжмысь каронлэсь, мултэс секыт ужатонлэсь но ултӥямлэсь утьыны[4]. 1950-тӥ арысен ООН нылпиослэсь эрикрадъёссэс утён ужпумез тужгес лэчытъёсыз пӧлы пыртӥз[5].

Нылпиосты утёнлы сӥзем калыккуспо нуналэ тросаз кунъёсын, дышем сямъя, возьматъяло пӧртэм концертъёс, радъяло крезьгуро-спорт ужрадъёс[6], пӧртэм благотворительной акциос[7], кудъёсыз нылпиослы юрттонэн герӟаськемын: секыт висисьёслы[8], анай-атайтэк кылемъёслы но, детдомъёсын будӥсь быдэ вуымтэослы но кулэяськись семьосын улӥсь нылпиослы[2].

Пӧртэм калыккуспо фондъёсысь волонтёръёс та нуналэ экономика ласянь лябытгес кунъёсы гуманитарной юрттэт келяло, отын улӥсь нылпиослэн шуг-секытъёссылы саклык висъяло[9]. Нылпиослэн сютэм улэменызы, соосты секыт ужатэмен но ултӥянъёсын герӟаськем шуг-секытъёс ХХI  даурын но пумиськыло на[10].

Та нунал сяна, нылпиослэн кылдэм шуг-секытъёссылы саклык висъясь эшшо куинь нуналъёс вань на — Нылпилэн дунневыл нуналыз (20-тӥ шуркынмонэ пусйиське)[11], Юнме ултӥямлэсь шуге-леке вуэм нылпиослэн калыккуспо нуналзы[ru] (4-тӥ инвожое)[12] но Африкаысь нылпиосты утён нунал, (16-тӥ инвожое)[13].

Кылдэмез

1925-тӥ арын Женеваын ортчем Нылкышноослэн дунневыл конференциязы нылпиослы юрттон нуналэз арлы быдэ радъян сярысь решение кутэмын[1]. Озьы, 1926-тӥ арын сое Мексикаын, Турциын, Венгриын но дуннеысь мукет кунъёсын пусйизы[3][6].

Меӵак Нылпиосты утён нунал, кудӥз пусйиське 1 инвожое, Нылкышноослэн калыккуспо демократической федерациенызы (франц. Fédération démocratique internationale des femmes)[14] 1949-тӥ арын 20-тӥ шуркынмонэ юнматэмын. ООН та малпанэз шонерен лыдъяз (Нылпилэн эрикрадъёсыныз Декларация кутӥз) но нылпи эрикрадъёсты, улонэз но тазалыкез утёнэз дуннеысь тужгес лэчытъёсыз ужпумъёс пӧлы пыртӥз[1].

Валтӥсь ужкагаз, кудаз пусъемын нылпиослэн калыккуспо эрикрадъёссы ― со Нылпилэн эрикрадъёсыз сярысь Конвенция, кутэмын ООН-эн 1989-тӥ арын 20-тӥ шуркынмонэ[5], СССР-ын юнматэмын 1990-тӥ арын 13-тӥ пӧсьтолэзе[3].

Росси Федерациын нылпиослэсь эрикрадъёссэ уте 1998-тӥ арын 24-тӥ пӧсьтолэзе кутэм «РФ нылпиослэн эрикрадъёссы но валтӥсь гарантиос сярысь» Федерал кат. Со нылпиослэсь Конституциен чаклам эрикрадъёссэ но тунсыкъёссэ тупатэ[1]. 2022-тӥ арлы Россиысь 85 улосъёсын Нылпилэн эрикрадъёсызъя Уполномоченнойёслэн институтъёссы[ru] кылдытэмын.

Нылпиослэсь эрикрадъёссэс чакланын кылдӥсь шуг-секытъёс

ООН 1950-тӥ арын нылпиосты утён ужпумез дуннеысь тужгес лэчытъёсыз пӧлы пыртӥз ке но, соослэсь эрикрадъёссэс утёнэз Нылпи эрикрадъёс сярысь Конвенция чакла ке но[5], нылпи сютэм улон, секыт ужатон, кужмысь карон но эриктэман учыръёс дуннеысь пӧртэм кунъёсын пумиськыло[1][15].

Кылсярысь, 2020-тӥ арлэн кутсконаз 160 млн нылпи уж дурын пусъемын (соос пӧлысь 79 млн — тазалыклы кышкытлык ваись ужъёсын)[10][16].

Арскын 1 млрд палаез физической, сексуальной яке психологической кужмысь каронъёсты чидаса улэ. 2020-тӥ арын, ВОЗ кивалтэм улсын, дас калыккуспо организациос «INSPIRE: семь стратегий по ликвидации насилия в отношении детей» проект кылдытӥзы[17].

ООН-лэн чакланъёсызъя (толшор 2023-тӥ ар) дуннеысь 15 кунъёсын 30 млн палаез сютэм улэ (8 млн сютэм улэмлэсь жуммемын)[18].

Россиын но дуннеын та нуналэз пусъён

Нылпиосты утён калыккуспо нуналэ тросаз кунъёсын нимысьтыз нылпиос понна концертъёс, спортивной но шутэтскон ужрадъёс, пӧртэм благотворительной акциос радъяло[7]. Ваньмыз сямен, соос сӥземын нылпиослы юрттонлы: секыт висисьёслы[8], анай-атайтэк кылемъёслы но нылпи юртъёсын улӥсь быдэвуымтэослы, куанер но кулэяськись семьяосын будӥсь нылпиослы[2].

Та нуналлы сӥзьыса, Россиын но мукет кунъёсын анайлыкез но пинал дырез утёнэн герӟаськем акциос ортчытъяло. Кылсярысь, пиналкуштонлы пумит[ru] луисьёс вордскымтэ нылпиослэсь эрикрадъёссэс утёнъя акциос радъяло. Чехиын[19], Литваын[20], Белоруссиын, Россиын[21][22] но мукет кунъёсын 1-тӥ инвожое (яке со котырын), дунне мерлыклэсь саклыксэ пиналкуштонлэн йылэмезлы висъятон понна нимысьтыз акциос ортчыто.

Россиысь куд-ог кунъёсын та нуналэ лекпыктосэн курадӟись нылпиослы сӥзем благотворительной акциос радъяло. Кылсярысь, 2012-тӥ арысен Санкт-Петербургын котькуд ар ортче «Белый цветок» акция[8].

2013-тӥ арысен росси федерал каръёсын (Москваын, Ярославльын, Краснодарын, Ивановоын, Пензаын, Самараын, Казаньын, Нижний Новгородын, Уфаын, Астраханьын, Тулаын, Ижкарын)[4] арлы быдэ 1-тӥ инвожое Нырысетӥ канал «Стань первым!» благотворительной акция ортчытъя, солэн валтӥсь ужпумез сӧсыр нылпиослы, анай-атайтэк кылем нылпиослы но трос нылпиё семьяослы юрттон[23].

2025-тӥ арын Удмурт Элькунлэн Тӧроез А. В. Бречалов кичӧлтэмъя Нылпиосты утён калыккуспо нуналэ Ижкарын, Сарапулын, Глазовын, Можгаын но Воткаын ортчиз «Малпанъёсты быдэстӥсь кыз» (ӟуч: «Ёлка желаний») акция, озьы нылпиослэсь льӧль мылкыдъёссэс зэматон вылысь ӟеч уж лэсьтонэ республикаысь кивалтӥсьёс пыриськизы[24].

Озьы ик учке

Валэктонъёс

  1. ↑ 1 2 3 4 5 Роженцова О. Когда отмечают День защиты детей РБК.
  2. ↑ 1 2 3 1 июня - Международный день защиты детей Уполномоченный при Президенте РФ по правам ребенка.
  3. ↑ 1 2 3 Международный день защиты детей 1 июня. Досье ТАСС.
  4. ↑ 1 2 Международный день защиты детей: история и традиции праздника РИА Новости.
  5. ↑ 1 2 3 Конвенция о правах ребёнка КонсультантПлюс.
  6. ↑ 1 2 1 июня — День защиты детей: как у малышей и подростков появился свой праздник Известия.
  7. ↑ 1 2 Международный день защиты детей Центр гигиенического образования населения Роспотребнадзора России.
  8. ↑ 1 2 3 Благотворительная акция «Белый цветок» Детский хоспис.
  9. ↑ ЮНИСЕФ «Гуманитарная деятельность в интересах детей» ЮНИСЕФ.
  10. ↑ 1 2 Детский труд Международная организация труда.
  11. ↑ Всемирный День ребенка ООН.
  12. ↑ Миллионы детей во всем мире страдают от дискриминации ООН.
  13. ↑ Сегодня — День защиты детей Африки ООН.
  14. ↑ Воловатов В. Когда основали Международную демократическую федерацию женщин Парламентская газета.
  15. ↑ Яушева Э. новому докладу, половина детей,разработанные стратегии для их защиты. Агентства ООН заявляют о всплеске насилия в отношении детей во время пандемии COVID-19 ЮНИСЕФ.
  16. ↑ Детский труд: глобальные оценки ООН.
  17. ↑ Насилие в отношении детей ВОЗ.
  18. ↑ ООН: 30 миллионов детей в 15 странах страдают от истощения ООН.
  19. ↑ В Праге прошла демонстрация против абортов ТАСС.
  20. ↑ Православные Литвы - против абортов ИА REGNUM. Эскеремын 2023-08-30 арын
  21. ↑ В Москве и других городах России проходит акция против абортов "40 дней за жизнь" Interfax.
  22. ↑ Наложили запрет. Врачи откажутся от проведения абортов 1 июня SmartNews.
  23. ↑ Масштабная благотворительная акция «СТАНЬ ПЕРВЫМ!» в этом году пройдёт в Чебоксарах Первый канал.
  24. ↑ Юрий Абашев (02-06-2025) Глава Удмуртии исполнит желания трёх детей [ӟуч] susanin.news. Эскеремын 09-12-2025 арын

Чӧлсконъёс

«https://udm.ruwiki.ru/w/index.php?title=Нылпиосты_утён_калыккуспо_нунал&oldid=469994»-ысь басьтэмын