Поздеев, Пётр Кириллович

Рувикиын таӵе фамилиен мукет муртъёс сярысь гожтосъёс вань. Учке: Поздеев.

Пётр Кириллович Поздеев
Вордӥськем дырыз	10-тӥ оштолэзе 1931({{padleft:1931|4|0}}-{{padleft:4|2|0}}-{{padleft:10|2|0}})
Вордӥськем интыез	Гереево гурт, Эгра ёрос, Вотской АО, РСФСР, СССР
Кулон дырыз	7-тӥ инвожое 2007({{padleft:2007|4|0}}-{{padleft:6|2|0}}-{{padleft:7|2|0}}) (76 лет)
Кулэмын	Иж, Россия
Кунмуртлыкез	СССР СССР → Россия Россия
Ужудысэз	гожъяськись, прозаик, фольклорист, литературовед, журналист, кылысь кылэ берыктӥсь
Жанр	поэзия, проза
Гожъяськон кылыз	удмурт, ӟуч
Премиосыз	Удмурт Элькунлэн Кун премиез (1988)
Данъетъёсыз

Пётр Кириллович Поздеев (10-тӥ оштолэзе 1931, Эгра ёрос, Удмурт Автономной Советской Социалистической Республика — 7-тӥ инвожое 2007, Иж) — удмурт гожъяськись, прозаик но кылбурчи, фольклорист, кылысь кылэ берыктӥсь, литературовед, журналист. СССР-ысь гожъяськисьёслэн огазеяськонзылэн ёзчиез (1980). УАССР-ысь Кун премилэн лауреатэз. РСФСР-ысь лулчеберет удысысь дано ужась (1990).

Улон сюресэз

Пинал но егит дырыз

Пётр Поздеев вордӥськиз 1931-тӥ арын Удмуртиысь Эгра ёросысь Гереево гуртысь трос нылпиё крестьян семьяын. Дышетскиз Гереевоысь покчиослы, Шор Шадбегысь сизьым аръем но Эгралась шор ёзо школаосын. Нырысетӥ литературая ужез луиз «Лоза тымемын» кылбурез (К. Шишло берыктэмъя ӟуч: Покорённая река), сое 1950-тӥ арын «Советской Удмуртия» газетын печатлазы. Отын автор вераз аспалчиосыныз вордскем Лозо шур вылаз ӝутэм гидроэлектростанция сярысь.

Дышетскемез

Шор ёзо школаез йылпумъямез бере П. Поздеев Педагогикая удмурт институтысь кылъя но литературая факультетэ пыриз. Татын со удмурт литературалэн кутсконаз сылӥсь Кедра Митреен 1930-тӥ аръёсы кылдытэм литературая но творчествоя кружоке ветлӥз. 1954-тӥ арын институтэз ӟуч луисьтэм школаосын ӟуч кылъя но литературая дышетӥсь но удмурт кылъя но литературая дышетӥсь луыса йылпумъяз, собере направлениея Эгра РОНО-ын инспекторын ужаз, озьы ик Эгра шор ёзо школаын удмурт кылъя но литературая дышетӥсь но ёросысь «Светлый путь» газетлэн редакцияз кылкутӥсь секретарь луыса тыршиз.

Литературая но мерлыко ужез

1957-тӥ арын толшоре Пётр Поздеев Удмурт НИИ-ысь литературая но фольклоръя секторе пичиез наукая ужась сямен кутэмын вал, нош 1963-тӥ—1977-тӥ аръёсы соин кивалтӥз. 1964-тӥ арын, УдНИИ-ысь бадӟымез наукая ужась луыса тыршыкуз, УдГУ-ысь аспирантураез «Фольклористика» ӧнеръя заочно амалэн йылпумъяз. Надежда Кралина кивалтэм улсын гожтэм удмурт калык кырӟанъя репертуарез узырмытон сярысь диссертацизэ йылпумъяны ӧз кылды — Удмурт Элькунысь гожъяськисьёслэн огазеяськонзылэн тӧроез Флор Васильева косэмъя, 1977-тӥ арын Пётр Поздеев «Молот» журналлэн редакцияз ужаны выжтэмын вал.

1965-тӥ арын потӥз Пётр Поздеевлэн кылбуръёсын нырысетӥ «Зоринча» книгаез (ӟуч: Утренняя звезда). 1980-тӥ арын югыт дунне вылэ кылдӥз иллюстрациосын пиналъёслы кылбуръёсын но мадиськонъёсын «Пичи пӧйшурась» книгаез (ӟуч: Маленький охотник). 1990-тӥ арын быръем кылбуръёсыныз «Ньыльдон шур йылысь» нимо бичетэз печатласькиз (ӟуч: С сорока речных истоков»). Поздеевлэн кылбуръёсыз ӟуч, белорус, бигер, коми но мадьяр кылъёсы берыктэмын.

Удмурт НИИ-ысь секторлэн кивалтӥсез луыса Пётр Поздеев бадӟым саклык висъяз вордскем фольклорез но литератураез дышетонлы. Солэн авторствоез улсын удмурт кырӟанъёсын «Жингырты, удмурт кырӟан!» бичет потӥз (ӟуч: Звени, удмуртская песня!; 1960-тӥ арын, выльысь печатламын 1987-тӥ арын), со сяна, шор ёзо школаысь бадӟым классъёслы удмурт литературалэн историезъя учебник (А. Ермолаевен ӵош дасязы; 1975-тӥ арысен ньыль изданиос), покчи но шор ёзо крезьгуро дышетсконниослы удмурт крезьгуро фольклоръя «Сокровище народное» дышетон пособие (со бордын А. Голубковаен тыршизы; 1987-тӥ ар). СССР-ысь Наукая академилэн Президиумез бордын ужась Совето финн-угроведениея комитетлэн ёзчиез вал но Таллиннын (1970) но Будапештын (1975) ортчем финн-угроведъёслэн калыккуспо конгрессазы делегат сямен пыриськиз.

П. К. Поздеев мыло-кыдо пыриськиз М. Н. Тимашев удмурт драматурглэсь нимзэ выльысь чылкытэ поттон (ӟуч: реабилитация) уже, литературае пыртӥз Эрик Наговицын удмурт кылбурчилэсь произведениоссэ, выльысь берыктӥз Степан Загребин удмурт прозаиклэсь нимзэ, Виталий Леконцев кылбурчилэсь книгаоссэ редактировать кариз. Со дышетӥсьёс но дышетскисьёс понна Кедра Митрейлэн (1968), А. Клабуковлэн (1972) улонзы но творчествозы сярысь наглядной пособиосты дасям автор луэ.

Кырӟанъёсызъя гожтэм дасо кырӟанъёсыз «Удмуртия» ГТРК-лэн крезьгуро фондаз пыризы.

П. К. Поздеев улонысь кошкиз 2007-тӥ арын 7-тӥ инвожое.

Библиография

• П. К. Поздеев. Удмурт кырӟанъёс сярысь веросъёс. — Ижевск: Удмуртия, 1975. — 51 с.
• П. К. Поздеев. Заповеданная песня. — Ижевск: Удмуртия, 2001. — 174 с. — 1000 экз. — ISBN 5-7659-0064-X.
• П. К. Поздеев. Пичи пӧйшурась. — Ижевск: Удмуртия, 1980. — 22 с. — 4000 экз.
• П. К. Поздеев, А. Д. Вотяков, Г. А. Ходырев. Ӵӧж вераз адямилы.... — Ижевск: Удмуртия, 1974. — 32 с.
• П. К. Поздеев. Зоринча. — Ижевск: Удмуртия, 1965. — 32 с.
• П. К. Поздеев. Тылси. — Ижевск: Удмуртия, 1972. — 40 с.
• П. К. Поздеев. Визыл. — Ижевск: Удмуртия, 1979. — 70 с. — 2000 экз.
• П. К. Поздеев. Нодья. — Устинов: Удмуртия, 1985. — 79 с. — 2000 экз.
• П. К. Поздеев, А. И. Вахрушева, Г. А. Ходырев. Кин со? Ма со?. — Ижевск: Удмуртия, 1992. — 59 с.
• П. К. Поздеев. Мылкыдэз лӧпкыто, сюлэмез вырӟыто. — Ижевск: Удмуртия, 1967. — 71 с.
• П. К. Поздеев. Ньыльдон шур йылысь. — Ижевск: Удмуртия, 1990. — 175 с. — 3000 экз.

Данъетъёсыз но буре ваён

• Удмурт АССР-ысь Вылӥ Кенешлэн Президиумезлэн ньыль медаленыз пусъемын (1970, 1985, 1995, 2002);
• Удмурт АССР-ысь Вылӥ Кенешлэн Президиумезлэн кык Данъян грамотаеныз пусъемын;
• Удмурт АССР-ысь Кун премиен пусъемын (1988) — удмурт калык но литературая кырӟанъёсты нотаен «Жингырты, удмурт кырӟан!» нимо антологиен поттэмез понна;
• «РСФСР-ысь лулчеберет удысысь дано ужась» нимын сӥлы каремын (1990);
• Данъян орденэн пусъемын (1998).

Эгра ёросысь депутатъёслэн кенешсы пуктэмъя, Кабачигуртысь библиотекалы Пётр Поздеевлэн нимыз сётэмын.

Валэктонъёс

Литература

• Пагирев В. Г. От берега до берега: Переводы с удмуртского. — Ижевск: Удмуртия, 1984. — 152 с.
• Поздеев Пётр Кириллович: биобиблиографический указатель / Е. В. Корепанова. — Кабачигурт, 2012. — 78 с.