Кедра Митрей

Кедра Митрей
Кедра Митрей
Вордскем нимыз	Дмитрий Иванович Корепанов
Вордӥськем нуналыз	28-тӥ куарусёнэ 1892
Вордӥськем интыез	Эгра, Глазов уезд, Ватка губерния, Россия империя
Кулон нуналыз	11-тӥ шуркынмонэ 1949 (57 лет)
Кулэм интыез	СССР
Кун	Росси империя[d]; СССР;
Ужудысэз	гожъяськись, кылбурчи, имиджмейкер, критик, берыктӥсь

Кедра Митрей (зэмос нитулыз Дмитрий Иванович Корепанов) — тодмо удмурт гожъясьчи, журналист, калыкез югдытӥсь.

Улон-вылонэз

Вордӥськемын Ватка губерниысь Эгра черкогуртын 1892-тӥ арын 28-тӥ куарусёнэ. 1904-тӥ арын йылпумъяз Эгра черкогуртысь церковно-приходской школаез, бӧрысь — 1907-тӥ арын — Зураысь кык классъем школаез. 1907-тӥ-1911-тӥ аръёсы тодон-валан люказ Кузонысь дышетӥсьёсты дасянъя семинариын. Сое йылпумъяны ӧз кылды: атеист мылкыдъёсыз понна семинариысь уллязы. Уж утчаса вуылэмын Иже, улэмын Кузонын но Пермьын, Сарапулын но Глазкарын. Дышетӥсь луон понна экзаменъёссэ сётэмез бере, сое ужаны басьто Сарапул уездысь Кулаки гуртысь школае. 1914-тӥ арын Дмитрий Ивановичез басьто армие, келяло Благовещенск городэ.

Революциез но граждан ожез пумита Чита городын. Отын со Тасеево ёросысь партизанъёслэн ужазы пыриськыны кутске.

1920-тӥ арын вордскем палъёсаз бертэ, ужаны интыяське Зура но Эгра ёросъёслэн калыкез дышетонъя ёзазы. 1922-тӥ арын РКП (б) огазеяськонлэн радаз пыре.

1923-тӥ арысен — «Гудыри» газетлэн корреспондентэз луыса тырше. 1928-тӥ — 1930-тӥ аръёсы Глазкарын РОНО-ын ужа. Со вие ик Москваысь педагогикая университетэ дышетскыны пыре. 1933-тӥ арысен кивалтэ Педагогикая Удмурт кун институтысь литературая но кылъя кафедраен, озьы ик УдНИИ-ысь кылъя но литературая ёзэн. 1934-1937-тӥ аръёсы УАССР-ысь писательёслэн огазеяськонэнызы кивалтэ. 1937-тӥ арын сое репрессия улэ кыско, 1946-тӥ арын пытсэтлэсь мозмыто. 1948-тӥ арын нош ик кечат-вамат корт сьӧры пытсало но Сибире келяло. Ссылкаын дыръяз ик улонысь кошкиз. Кытын ватэмын Кедра Митрейлэн мугорыз — али ке но тодмо ӧвӧл.

Творчествоез

Кедра Митрей толэзьёсын уж утчаса ветлоно луиз, дипломез ӧвӧлэн сэрен дышетӥсе кутэмзы ӧз потылы. Удмуртиез котыръяса ветлонъяз трос фольклор материал люказ. 1910—1911 аръёсын Кедра Митрей ӟуч кылын «Дитя больного века» автобиографической повесть гожтэ. Та гожтэмаз маде школаын но Зураысь училищеын дышетскемез сярысь, трос саклык висъя Кузонысь семинариын дышетскемзэ возьматонлы. Гожтэ ас гуртэзлэсь но семьяезлэсь историзэ, ватса чебер инкуазь суредъёсты но трос пӧртэм адямиослэсь тусъёс. Повестез цензура печатланы ярантэмен лыдъяз. Калыке со 1993 арын гинэ потӥз.

Нырысетӥ чеберлыко произведениез поттэмын «Сандал» рукописной журналын. 1914 арын Кедра Митрей кошке эксэй армие. 1915 арын военной службазэ нуыкуз Благовещенскын «Эш-Тэрек» ӟуч кылын гожтэм трагедизэ поттэ. Та трагедиын автор возьматэ 14 даурын удмуртъёслэн поръёсын ожмаськемзэс. Трагедилэн валтӥсь героез Эш-Тэрек, огшоры родоначальник луыса вань удмуртъёслэн тӧрозы дорозь будэ. Тушмонъёсты вормыса, удмуртъёс ас вормонзэс пусъйыны быгато вылэм, но Эш-Тэрек пор тӧролэн нылызлы Лӧдалы синмаське, солы луыса, умуртъёсты предать каре. Дыр ортчыса удмуртъёс оскытӥзы Эш-Тэрекез Лӧда сое пӧяса возе шуыса. Ас калык азьын янгыш луэмзэ валаса, Эш-Тэрек Лӧдаез но, ассэ но вие.

1926 арын потэ «Идна батыр» пьесаез. Татын озьы ик возьматӥське 14 даур, но татысь учыръёс «Эш-Тэрек» трагедиын возьматэм учыръёслэсь вазьгес ортчо. Татын Кедра Митрей ӝутэ таӵе ужпумез: одно ик-а кулэ ожмаськыны, яке тушмонъёсын одӥг кыл шедьтыны луэ.

1928 арын потэ поэма «Юбер батыр». Поэмаын Кедра Митрей вера 15 даурын ӟучьёслэн удмурт музъемъёсты асэстэмзы сярысь. Та поэма удмурт батыръёс сярысь трилогиез йылпумъян луэ.

1920-тӥ — 1930-тӥ аръёсы гожтэ «Вужгурт» повестьсэ но «Секыт зӥбет» романзэ. Отын со возьматэ удмурт гуртлэсь курадӟемзэ: возьматэ удмуртъёсты христианствое кужмысь пыртэмзэс, куанер гурт калыклэсь улон понна нюръяськемзэс. «Вужгурт» повестьстэ автор выльысь тупатъяз но поттӥз выль нимын: «Вужгурт зурка».

1929 −1930-тӥ арозь Кедра Митрей Глазовысь педагогической техникумлэн директорез луыса ужа. Та дыре 1929-тӥ арын потэ «Секыт зӥбет» романэз. Романлэн сюжетэз азинтӥське 19-тӥ даурлэн кутсконаз. Романлэн валтӥсь героез — Дангыр. Со пумит султэ вордскем гуртысь удмурт калыкез кужмысь христианствое пыртэмлы. Солэн яратоно нылыз — Дыдык, пегӟе Дангыр доры ас картэзлэсь, кудӥз кужмысь сое кышно басьтэ. Но ӵош улыны соослы уг кылды: Дангырез куто но Сибире келяло.

Кедра Митрейлэн трос веросъёсыз. Соос пӧлын: «Сурсву», «Калгись», «Нюръяськон». Кылем арлэн 20-30-тӥ аръёсаз Гердлы пумит султэмъёс пӧлын вал. 1928-тӥ арын пыриськиз Союзысь пролетар писательёслэн огазеяськонзылэн (ВААП) съездаз. Максим Горький доры куное вуылӥз. Удмурт кылэ берыктӥз фин писательлэсь П. Пайвяринтлэсь «Матвей с Голодной горки» повестьсэ.

Валэктонъёс

↑ КЕДРА // Большая российская энциклопедия (ӟуч) — М.: Большая российская энциклопедия, 2004.

[_e6cebd2481162b72-1] КЕДРА // Большая российская энциклопедия (ӟуч) — М.: Большая российская энциклопедия, 2004.

[1]