Васильев, Флор Иванович
| Флор Иванович Васильев | |
|---|---|
| Вордӥськем нуналыз | 19-тӥ тулыспалэ 1934[1] |
| Вордӥськем интыез | |
| Кулон нуналыз | 5-тӥ инвожое 1978 (44 года) |
| Кулэм интыез | |
| Кун | |
| Ужудысэз | кылбурчи |
| Данъетъёсыз |
  |
Флор Иванович Васильев — удмурт совето кылбурчи-лирик, Удмуртиысь кылбурчиос пӧлысь одӥгез тужгес тодмоез. Вордӥськиз 19-тӥ феврале 1934-тӥ арын Яр ёросысь Мой шур ярдурын сылӥсь Бердыш гуртын. Укан черкогуртысь школаез йылпумъяса, Ф. Васильев Глазысь педучилищее дышетскыны пыриз, нош 1953-тӥ арын — отысь ик пединститутэ. Тодон-валанзэ муромытэм сяна, дыр шедьтылӥз «Красное знамя» ёрос газетын ужаны. 1959-тӥ арын валтӥсь редакторлэн воштӥсез луиз. 1962-тӥ арысен кутскыса, куать ар ӵоже кивалтӥз «Комсомолец Удмуртии» газетэн, нош 1967-тӥ-1968-тӥ аръёсы «Советской Удмуртия» газетлэн редакторезлэн воштӥсез луиз. Бӧрысь «Молот» журналлэн редакторез но со дыре ик Удмуртиысь Писательёслэн союззылэн тӧроез луиз. 6-тӥ июле 1978-тӥ арын, сюрес вылын шуэрес учыре шедьыса, больницаын инфарктлэсь кулӥз.
Флор Васильев кылбуръёс гожъяны кутскиз, педучилищеын дышетскыкуз. Таосыз ужъёсыз ылесьгес вал, шуыны луоз. Пединститутын ини чуръёсыз пур пуштросъемесь, вольытэсь пӧрмыны шӧтазы. 1957-тӥ арын куд-ог кылбуръёсыз шедизы «Стихи удмуртских поэтов», «Ворекъяло кизилиос» бичетъёсы. 1967-тӥ арын потэм «Лирика» книгаяз удмурт кылбуръёссэ ӟуч кылэ берыктыса сётэ. 1971-тӥ арын Мускоын югыт дуннеез адӟе солэн «Черёмуха» книгаез. Васильев поттыса вуттӥз удмурт кылбуръёсын 7 книгазэ, ӟуч кылбуръёсын — 5-сэ.
1967-тӥ арын «Лирика» но «Тон сярысь» книгаосыз понна Флор Васильевлы сёто Удмуртиысь комсомоллэсь премизэ, нош 1978-тӥ арын «Времена жизни», «Куар усён толэзе» книгаосыз понна шумпотто Удмуртилэн кун премиеныз. Гожъяськон удысын гижысь-пиньысь тыршемез понна кылбурчи пусъемын «Знак почёта» орденэн.
Флор Васильевлэн кылбуръёсыз печатласькизы Венгриын но. Кылсярысь, 1975-тӥ арын потэм «Medveének» («Гондыр кырӟан») антологиын (бичасез — Петер Домокош) мукет финн-угор гожъяськисьёсын ӵош вань солэн но чуръёсыз.
Кылбуръёсаз автор возьматэ вордӥськем палдэ, анайдэ, ӵыжы-выжыдэ яратон мылкыдэз. Лирической героез котьку дурбасьтэ улонын умоез понна. Валаське: кылбурлэсь шокамзэ — ритмзэ, рифмазэ — гожъяськись туж ӟеч шӧдылӥз. Оло, соин но тросэз ужъёсыз пӧрмемын ини кырӟанъёслы. Инкуазь суредъёс Флор Васильевлэн кылбуръёсаз выжыкылын выллем улӟо кадь. Яратонлы, синмаськонлы сӥзем ужъёсыз но сюлэмез бугырто.
- ↑ Bibliothèque nationale de France Flor Vasilʹev // Autorités BnF (фр.): Усьтэм даннойёслэн платформазы — 2011.