Курченко, Надежда Владимировна

Надежда Курченко
Надежда Курченко
Вордскем нимыз	Надежда Владимировна Курченко
Вордӥськем нуналыз	29-тӥ толсуре 1950
Вордӥськем интыез	Алтай улосысь Ключевской ёросысь Новополтаваын, РСФСР, СССР
Кулон нуналыз	15-тӥ коньывуонэ 1970 (19 лет)
Кун	СССР;
Ужудысэз	«Аэрофлотысь» бортпроводница, граждан авиациысь огазеям Сухум авиаотрядлэн Грузиысь управлениез.
Данъетъёсыз
	Медиафайлъёс РувикиМедиа пушкын

Наде́жда Влади́мировна Ку́рченко (1950-тӥ арын 29-тӥ толсуре Алтай улосысь Ключевской ёросысь Новополтаваын — 1970-тӥ арын 15-тӥ коньывуонэ Батумиысь Сухуме лобӟись Ан-24 самолётын) — «Аэрофлотлэн» бортпроводницаез, Сухум авиацияя отряд. Самолётэз асьсэ ки улэ кутыны турттӥсь террористъёсты дугдытонъяз бырыны шедиз. СССР-ысь Президиумлэн Вылӥ Советэзлэн^[ru] Указэзъя дӥсьтӥсь луэмез но адямиосты утемен понна Горд Знамялэн^[ru] орденэныз пусъемын (кулэмез бӧрсьы).

Улон сюресэз

1950-тӥ арын 29-тӥ толсуре Алтай улосысь Ключевской ёросысь Новополтава черкогуртын вордӥськиз. Удмурт АССР-ысь Глазов ёросысь Пониноысь школа-интернатэз йылпумъяз (татысь нылпи юртын кулэмез бере солы синпелет пуктэмын). 1968-тӥ арын толсурысен «Аэрофлотлэн^[ru]» Сухум авиаотрядаз бортпроводница^[ru] луыса ужаз.

Подвигез но быронэз

1970-тӥ арын 15-тӥ коньывуонэ Батумиысь Сухуме лобо вал 46 пассажир но экипажысь 5 мурт. Соос вылэ террористъёс омырскизы. Бортпроводница Надежда Курченко террористъёс пумитэ султӥз, таослы самолётэз киултыны люкетыса. Пранас Бразинскас^[ru] террорист но солэн 15 аресъем Альгирдас пиез 244 номеро Батуми — Сухуми — Краснодар рейсъя лобись Ан-24^[ru] самолётэ (СССР-46256 борт) пистолетъёсын но гранатаосын пыремын вал. Соослы пилотъёслэн кабинаязы сюресэз 19 аресъем Надежда Курченко асэныз пытсаз, пилотъёслы кеськыса вуттӥз. Террористъёс ыбылыны кутскизы но нылашез виизы (мукет ивортонъёсъя, югдурез утисьлэн ыбылэмысьтыз нылмурт кулӥз ^[1]). Экипажлэсь командирзэ но йыртэмасьёс тыбыраз йӧттӥзы, соиз йырсазьзэ ыштӥз. Террористъёс самолётэз пуштытонэн кышкатыны ӧдъязы, кыкетӥ пилотэз самолётэз Турцие нуыны косӥзы ^[2].

1970-тӥ арлэн пумаз Надежда Курченколэн сюанэз луыны кулэ.

ТАСС-лэн нырысетӥ ивортонэз

15-тӥ коньывуонэ граждан авиацилэн «Ан-24» самолётэз Батумиысь Сухумие лобӟе вал. Кык кузя пыӵалтӥрлыкен бандитъёс, самолётлэн командаез вылэ ожалскизы, самолётэз мукет маршрутъя лобӟыны но Турциысь Трабзон городэ пуксьыны кужмысь косӥзы. Пуромем кышкыт югдур дыръя пилотъёслэн кабинаязы дыртӥсь бандитъёслэн сюрес вылазы султэм бортпроводница быдтэмын вал. Кык пилотъёс сӧсыртэмын. Самолётысь пассажиръёслы номыр луэмын ӧвӧл. Совето Правительство Турциысь кивалтӥсьёслы вазиськиз, адями виись убиръёсты совето судлы сётыны, озьы ик самолётэз но «Ан-24» бортысь совето калыкез берыктыны курыса.

Берытскон

Мукет нуналаз, 17-тӥ коньывуонэ, Совето Союзлэн Телеграф агентствоез^[ru] (ТАСС) ивортӥз, самолётлэн экипажез но пассажиръёсыз Атыкай музъем вылазы берыктэмын шуыса. Зэм, Трабзонысь госпитале гадяз секыт сӧсыртэм самолётлэн штурманэз кылиз, сое вандылӥзы. Самолётэз киултӥсьёслэсь нимтулъёссэ ӧз шараялэ: «Самолёт вылэ пыӵалтӥрлыкен ожалскем но Н. В. Курченко бортпроводницаез вием, экипажлэсь кык ёзчиоссэ но одӥг пассажирез сӧсыртэм кык убиръёс сярысь верано ке, Турциысь правительство ивортӥз, соос кырмемын, прокуратура азе югдурез матысь дыр ӵоже эскерыны ужпум пуктэмын шуыса».

Таӵе югдурен Совето Союз нырысьсэ пумиськиз. Шуэрес учырен герӟаськем кун но мер ужрадъёс бадӟымесь вал. СССР-ысь Кунгож ужпумъёсъя министерство, кун комиссилэн ёзчиосыз Турциысь кивалтӥсьёсын кӧня ке уй-нунал ӵоже дугдылытэк кусып возизы. Киултэм но талам самолётэз берыктон вылысь инмысь коридорез усьтоно вал. Озьы ик Трабзон больницаысь экипажлэсь сӧсыртэм ёзчиоссэс но пассажиръёсты эмъюрттэт сётон вылысь больницае ӝоггес вуттон понна но инмысь сюресэз возьыны кулэ вал. Вӧсь луымтэ, но мурт шаере мылкыд карытэк сюремъёсты но берыктыны кулэ вал. Трабзонысь Сухумие Надеждалэсь мугорзэ вайись спецрейслы но инмын сюрес усьтоно вал. Удмуртиысь Сухумие солэн анаез Генриетта Ивановна Курченко лобе ни вал.

Шайвылыз

Надежда Курченко Сухумлэн шораз ватэмын вал. 20 ар ортчыса, анаез туж куремъя, лысьӧмъёссэ Глазкарысь шайвылэ вуттӥзы но выльысь ватӥзы.

Буре ваён

Правительстволэн данъетэз

1970-тӥ арын 23-тӥ коньывуонэ СССР-ысь Президиумлэн Вылӥ Советэзлэн Указэзъя инмысь судноын ассэ жалятэк мукет адямиосты утемез, дӥсьтӥсь но геройлыко луэмез понна Надежда Курченкоез кулэмез бӧрсьы Горд Знамялэн боевой орденэныз пусйизы. Указэз улэ СССР-ысь Президиумлэн Вылӥ Советэзлэн тӧроез Н. В. Подгорный^[ru] кинюртэмзэ пуктӥз.

Музейёс но синпелетъёс

Алтай улосысь Новополтава черкогуртын Н. Курченколэсь нимзэ нуллӥсь школа борды геройлыко нылкышнолы сӥзем синпелет юнматэмын. Школаын Надежда Курченколы сӥзем музей но ужа^[3].
Егит лётчикъёслэн школаязы Надежда Курченколы сӥзем музей усьтэмын.
Глазов ёросысь Понино гурт школаын, кытын ас вакытаз Надежда Курченко дышетскиз, геройлыко бортпроводницалы музей усьтэмын. Пониноын ик Н. Курченколы пуктэм синпелет вӧзын буре ваён ужрад ортчытъяло.
Абхазия но Россиысь Краснодар улослэн кунгож дораз гурезьёсын Надежда Курченколы обелиск юнматэмын.

Топонимика

СССР-лэн азьвыл улосъёсаз Надежда Курченколэсь нимзэ ульчаослы сётэмын (кылсярысь, Ижын но Чистополеын).
Абхазилэн шоркараз, Сухумын, геройлыко нылкышнолэн нимыз Дагестанской но Черкасской ульчаос вискысь вашкала парклы сётэмын, татын Надеждалы синпелет пуктэмын^[4].
Надежда Курченколэн нимыныз Гиссарской хребетлэн^[ru] тужгес ӝужыт интыез пусъемын, озьы ик росси флотысь танкерлы сётэмын.
(2349) Курченко — со бортпроводница Надежда Курченколы сӥзьыса нимам астероид^[ru] ^[5]^[6].
2020-тӥ арын 4-тӥ куарусёнэ Ижын «Надеждалэн аллеяез» акция ортчиз: Надежда Курченко стюардессалэсь подвигзэ буре вайыса, 19 пужым мерттӥзы^[7].
2020-тӥ арын 15-тӥ коньывуонэ Ижын 19 аресъем бортпроводницалэн геройлыко подвигезлы сӥзем ужрадъёс ортчизы. Ижысь 91 номеро школалы Надежда Курченколэсь нимзэ сётӥзы^[8].

Искусствоын

«Абитуриентка»^[ru] художественной киноын (А. Довженко нимо киностудия^[ru], 1973-тӥ ар) киултэм самолётысь валтӥсь героиня, стюардесса Галя Гриценко — со Надежда Курченколэн прототипез.
1973-тӥ арын потэм, «Цветы»^[ru] группаен быдэстэм но дано луэм «Звёздочка моя ясная»^[ru] кырӟанэз Надежда Курченкоен герӟало ^[9]^[10], но та кырӟан 1965-тӥ арын ай печатлам кылбуръя гожтэмын.
Калыкын верало, Надежда Курченколы сӥзем «Наде́жда» кырӟанэз 1971-тӥ арын композитор Александра Пахмутова но поэт Николай Добронравов гожтӥзы шуыса.

Мукетыз

1982-тӥ арысен Глазкарын арлы быдэ коньывуонэ Надежда Курченколы сӥзем бызьылонъёс ортчыло. Буре ваён ужрад Россиысь капчи атлетикая ӵошатсконъёслэн календарязы но пыртэмын. 3 но 10 иськеме кыстӥськись дистанциосы Ижысь, Удмуртиысь пӧртэм ёросъёсысь но Россиысь уно каръёсысь пӧртэм арлыдъем муртъёс пото.
Удмурт Элькунысь абхаз калыклэн диаспораез Надежда Курченколы сӥзем проект малпаз. 2020-тӥ арын 15-тӥ коньывуонэ, Надежда Курченко стюардесса бырем дырысен 50 ар тырмонлы сӥзьыса, кӧня ке ужрадъёс ортчытӥзы^[11].

Галерея

Ижысь егит лётчикъёслэн школаязы Надежда Курченколы сӥзем музей ужа
1981-тӥ арын СССР-ын почта конверт
Аэрофлот компанилэн Ан-24 пассажир самолётэз
Надежда Курченколы сӥзем обелиск Россия но Абхазия кунгож вискын юнматэмын (43.542596, 40.604367).

Цитатаос

50 ар талэсь азьвыл асьме кунмы но быдэс дунне «Аэрофлот» авиакомпанилэн Ан-24 самолётысьтыз 19 аресъем бортпроводницалэн подвигез сярысь тодӥз, аслэсьтыз улонзэ жалятэк, бортысь пассажиръёслэсь улонзэс утиз. Со изьвермем кык убиръёслэн сюрес вылазы султӥз.
— Александр Нерадько, Россиысь транспортъя министрлэн нырысетӥ воштӥсез — Инметӥ лобась транспортъя федерал агентстволэн кивалтӥсез^[12]

Асьмелы ваньмылы ялан тодамы возёно котырысьтымы быдӟым зэмлык сярысь — долг, служить карон но адямилэн быдӟым быръёнэз — муртъёс понна улон.
— Ярослав Семёнов, Удмуртиысь Правительстволэн Тӧроез

Инбам котькинлы уг усьтӥськы, со понна трос кужымез сётоно, адямиосты яратоно, соослы умой лэсьтыны тыршоно, соос сярысь сюлмаськоно, соосты утёно. Бортпроводниклэн ужез — со адямиослы служить карон. Ваньзы, кин та профессиез быръе, со подвиглэн кутсконэз луэ.
— Татьяна Виноградова, стюардесса, бортысь югдурез чакланъя департаментлэн кивалтӥсезлэн советникез, Россиысь транспорт удысысь дано ужась

Валэктонъёс

↑ Сахаров А.Д. Воспоминания. — М.,: Время, 2006. — Т. 1. — С. 703. — 896 с. — ISBN 5-94117-163-3.
↑ Централизованная библиотечная система города Глазова. Надежда Владимировна Курченко
↑ Памяти Надежды Курченко
↑ Сухум. Памятник Надежде Курченко
↑ Астероид 2349 Курченко
↑ 2349 Kurchenko (1970 OG)
↑ В честь подвига стюардессы Надежды Курченко 19 сосен посадят в Ижевске
↑ Делегация Росавиации приняла участие в открытии мемориальной доски в память о Надежде Курченко Эскеремын 2020-10-15 арын
↑ «Звездочка моя ясная» – песня о стюардессе, убитой террористами в 1970 году
↑ Звездочка моя ясная. В этом году исполняется 45 лет со дня гибели бортпроводницы Нади Курченко
↑ Памяти Надежды Курченко 14 сентября 2017 г.
↑ Удмуртия. Имя Надежды Курченко присвоили ижевской школе 91.

Чӧлсконъёс

[:0-1] Сахаров А.Д. Воспоминания. — М.,: Время, 2006. — Т. 1. — С. 703. — 896 с. — ISBN 5-94117-163-3.

[Надежда_Владимировна_Курченко-2] Централизованная библиотечная система города Глазова. Надежда Владимировна Курченко

[3] Памяти Надежды Курченко

[4] Сухум. Памятник Надежде Курченко

[5] Астероид 2349 Курченко

[6] 2349 Kurchenko (1970 OG)

[7] В честь подвига стюардессы Надежды Курченко 19 сосен посадят в Ижевске

[8] Делегация Росавиации приняла участие в открытии мемориальной доски в память о Надежде Курченко Эскеремын 2020-10-15 арын

[9] «Звездочка моя ясная» – песня о стюардессе, убитой террористами в 1970 году

[10] Звездочка моя ясная. В этом году исполняется 45 лет со дня гибели бортпроводницы Нади Курченко

[11] Памяти Надежды Курченко 14 сентября 2017 г.

[12] Удмуртия. Имя Надежды Курченко присвоили ижевской школе 91.

[1]

[2]

[3]

[4]

[5]

[6]

[7]

[8]

[9]

[10]

[11]

[12]