Надежда Курченколы сӥзем калык музей
| Надежда Курченколы сӥзем калык музей | |
|---|---|
 | |
| Кылдытэмын | 1972-тӥ арын |
| Интыяськемын | |
| Адресэз | ул. Карла Либкнехта, 53, Ижевск |
 |
|
Надежда Курченколы сӥзем калык музей (ӟуч: Народный музей Надежды Курченко) — Ижысь «Егит лётчикъёслэн школазы» военно-патриотической центрысь музей, карысь дышетскисьёслы Атыкай музъемез гажан мылкыд пыӵатон центр. 1972-тӥ арын усьтэмын.
Историез
1972-тӥ арын Ижысь Егит лётчикъёслэн школазы бордын Надежда Курченколы — 1970-тӥ арын коньывуонэ террористъёс самолётэз киултыны турттыкузы бырем совето бортпроводницалы — сӥзем калык музей усьтӥськиз[1][2].
Музеез 15-тӥ коньывуонэ Курченко бырем дырысен кык ар тырмонлы усьтӥзы. Кивалтӥсе Тамара Тороховаез юнматӥзы. Музей бордын кенеш кылдытӥзы, со улосчилэсь ӵыжы-выжыоссэ утчаз-шедьтӥз но соосын гожтэтъёс пыр мыло-кыдо кусып тупатӥз, озьы ик быдэс кунысь Н. Курченко нимо отрядъёсын кусып возиз. Музейлэн валтӥсь ужез экспонатъёсты люкан но утён вал, соос 800-лэсь трос лыдъяськизы.
Музейын экскурсиос но урокъёс радъяськылӥзы, араз соослэн лыдзы 60-озь вуылӥз. Егит лётчикъёслэн школаязы занятиос Ижысь мукет дышетонниосысь но пиналъёс пыриськизы, нош егит лётчикъёс котькуд выль дышетскон арез музейын экскурсия бордысен кутскылӥзы[3].
1972-тӥ арысен 2015-тӥ арозь музей дугдылытэк ужаз — Егит лётчикъёслэсь школазэс тупатъяны пытсамзы дырозь. Экспонатъёс утемын но мукет азе поттэмын вал. Тупатъян улсын музейлэн но юртэз выльдӥськиз, со понна устозэ дизайнэз быръёнъя конкурс но радъяськиз.
2018-тӥ арын 15-тӥ коньывуонэ выльдэм музеез усьтон ортчиз, ужрадэ Россиысь Кун Думаысь депутат Алексей Загребин, Ижкар Думалэн тӧроез Олег Гарин калык огазеяськонъёслэн кивалтӥсьёссы, Егит лётчикъёслэн школаысьтызы ветеранъёс но дышетскисьёс пыриськизы[1].
Экспозициосыз
Надежда Курченколэн улонэзлы но подвигезлы сӥзем валтӥсь экспозициос сяна, музейын эшшо куинь ялан ужась адӟытонъёс радъямын, соос ожгар лётчикъёслы, 76-тӥ гвардейской воздушно-десантной дивизиысь (Псковысь) 6-тӥ ротаысь десантникъёслэн подвигзылы но Совето Союзысь Геройлы, подводниклы Валентин Стариковлы сӥземын[4].
Музее вань мылкыд карисьёс Егит лётчикъёслэн школазы ужан вакытэ дунтэк сюрыны быгато[4].
Данъетъёсыз
1941-тӥ—1945-тӥ аръёсысь Быдӟым Атыкай ожын Вормонлы 55 ар тырмонлы сӥзем музейёс куспын элькунысь адӟытон-конкурсын музей лауреат луиз но «патриотизм мылкыдэз но Атыкай музъемез утисьёслы гажан мылкыд пыӵатэмез понна» данъямын вал[3].
Валэктонъёс
- ↑ 1 2 Народный музей имени Надежды Курченко возобновил свою работу Официальный сайт Администрации города Ижевска.
- ↑ Подвиг, ценою в жизнь, или печальная история Надежды Курченко - udmurt.media ИА "Удмуртия".
- ↑ 1 2 Фонд № 34. Муниципальное образовательное учреждение дополнительного образования детей Центр дополнительного образования для детей "Школа юных летчиков" Школа юных летчиков отдела народного образования Первомайского района города Ижевска Архивный отдел Управления по делам архивов Администрации города Ижевска.
- ↑ 1 2 Народный музей Надежды Курченко Министерство культуры Удмуртской Республики.
Чӧлсконъёс
- Открытие народного музея им. Надежды Курченко [рус.], yandex.ru. Эскеремын: 27 пӧсьтолэзе 2025 арын.
- Народный музей имени Надежды Курченко открыли в Ижевске после реконструкции [рус.], susanin.news. Эскеремын: 27 пӧсьтолэзе 2025 арын.
- Подвиг, ценою в жизнь, или печальная история Надежды Курченко [рус.], udmurt.media. Эскеремын: 27 пӧсьтолэзе 2025 арын.