Удмурт Элькунлэн кунлык басьтон нуналыз
| Удмурт Элькунлэн кунлык басьтон нуналыз | |
|---|---|
 | |
| Типез | Удмуртиысь йӧскалык праздник |
| Валатонэз | Вотской автономиез кылдытон сярысь Декрет |
| Пусъё | Удмуртиын улӥсь калыкен |
| Дырыз | 4-тӥ шуркынмонэ |
| Пусъён ужрадъёс | сӥё-дано ужрадъёс, калык юмшанъёс |
| Сям-йылолъёс | Калык лулчеберетэн но сиён-юонъёсын тодматон |
| Герӟаськемын | Калыкъёслэн огъя луон нуналэнызы |
Удмурт Элькунлэн кунлык басьтон нуналыз(ӟуч: День Госуда́рственности Удму́ртской Респу́блики) — Удмуртиысь йӧскалык праздник, пусйиське 4-тӥ шуркынмонэ, Калыкъёслэн огъя луон нуналэнызы одӥг нуналэ. Та нунал элькунлэсь кун, йӧскалык, экономика но лулчеберет ласянь кылдон сюрессэ возьматэ но татын улӥсь вань калыкъёслэсь огкылысь луон мылкыдзэс юнматэ[1].
Историез
1920-тӥ арын 4-тӥ шуркынмонэ быдэс Россиысь шор быдэсъясь комитет но Калык комиссаръёслэн кенешсы Вотской автономной область кылдытон сярысь Декрет кутӥзы но Удмуртилэсь кунлыксэ кылдытонлы кутскон сётӥзы[2][1].
Вотской автономной область пичигес интывылын кылдытэмын вал. Сарапул, Воткинск, Елабуга каръёс но Бондюжской но Кизнер ёросъёс отчы пырытэк куылизы. Озьы Удмуртия Кам, Ватка но Кильмезь шуръёстэк но пристаньёстэк кылиз, кудъёсыз кузя азьвыл пур келяллязы вал. Озьы ик быдтэмын вал куд-ог возёс герӟетъёс, солы луыса ворсаськиз Вотка завод. 100 палаез ваче улӥсь удмурт калык автономилэн сьӧраз кылизы. Автономилы шоркар Глазов быръемын вал. Озьы ке но, Ижысь кивалтэт Глазэз шоркарен ӧз лыдъялля.
Выль кун ёзэтлэсь ёзрадзэ кылдытон 1921-тӥ арын ар пала кыстӥськиз — ревкомъёс киысь тӧрлык Советъёслэн исполкомъёссы кие выжиз. Со арын ик шоркарез Ижкарлы сётон сярысь решение кутэмын вал. Нош интыысь коньдэтэз кылдытонын улослэсь эрикрадъёссэ сюбегатэмен, шуг-секытъёс эшшо золгес шӧдскыны кутскизы. 1924-тӥ арын толсур толэзьысен кутскыса, Вотской автономной областьлэн исполкомез шор тӧрлык ёзэсъёсы автономной областез Удмуртиысь калыкъёслэн социалистической республиказылы пӧрмытон сярысь дэмланэн трос пол вазиськылӥз ке но, солы пумит луылӥзы.
1928-тӥ арын 28-тӥ инвожое, инлыксэ ӝутэм интые, автономия Нижний Новгород шаерлэн пушпӧлаз пыртэмын вал. Соин валче Вотской автономной областьлэн аслэсьтыз промышленностьсэ но мер удысъёссэ азинтыны луонлыкез ӧй вал . Татысь калык нюлэс дасян ужъёсы мурт шаере ветлоно луылӥз.
1934-тӥ арын 28-тӥ толсуре, Удмурт Автономной Советской Социалистической Республика кылдытэм бере, Удмуртииез, Нижний Новгород шаерлэн пушпӧлысьтыз поттыса, Киров шаерен огазеязы.
1937-тӥ арын УАССР-лэн нырысетӥ Конституциез кутэмын. Со арын ик Сарапул но Вотка каръёс но соослэн ёросъёссы Удмуртилэн пушпӧлаз пыртэмын вал. 1939-тӥ аръёсы кылдытэмын Камбарка но Кизнер ёросъёс.
1991-тӥ арын 11-тӥ коньывуонэ УАССР-ысь Вылӥ Кенешлэн сессияз, кун суверенитет сярысь Деклараци вылэ пыкъяськыса, Удмурт Автономной Советской Социалистической Республикалэн нимыз Удмурт Республика нимын воштэмын.
1993-тӥ арын 4-тӥ шуркынмонэ Удмурт Элькунлэн кунпусэз но куншетэз сярысь Постановлениос кутэмын. 1994-тӥ арын 7-тӥ толсуре Удмурт Элькунлэн Конституциез кутэмын. 1996-тӥ арын 17-тӥ коньывуонэ Москваын «Росси Федерациысь но Удмурт Элькунысь тӧрлык ёзэсъёс куспын ужоскетъёсты люкон сярысь тупанкыл» гожтэмын. Та ужкагазъя Удмурт Элькунлэн кун ёзэсрадэн, интыысь коньдэтэн, катрадлыкен, суд ужъёсын но педпал экономикаен герӟаськем ужпумъёсты сэрттыны-пертчыны эрикрадэз кылдӥз. 1995-тӥ арысен элькунлэн вылӥ представительной, законодательной но контрольной ёзэсэз Кун Кенеш луиз.
Кун тӧрлыклэн ёзэсрадэз ялан умоятӥське. 2000-тӥ арын Удмуртилэн парламентской кивалтон кабез президентскоеныз воштӥськизз. 15-тӥ коньывуонэ Удмурт Элькунлы нырысетӥ президент быръёнъёс ортчизы[1].
Пусъён ужрадъёс
Праздник нуналэ Удмуртилэн вань ёросъёсаз татын улӥсь калыкъёслэн огъя луонзылы сӥзем ужрадъёс ортчыло. Со ужрадъёс пӧлын валтӥсез луэ — йӧскалык сиён-юонъёсын куно карон но крезьгуро калык коллективъёслэн выступлениоссы[3][4].
- 2025-тӥ арын
2025-тӥ арын 4-тӥ шуркынмонэ Удмуртилэн кунлык басьтэм дырысеныз 105 ар тырме. Соин в алче, 23-тӥ коньывуонэ дано ужрадэз пусъёнлы сӥзем брифинг ортчиз. Отчы пыриськизы Удмурт Элькунлэн тӧроезлэн но кивалтэтлэн администрациенызы кивалтӥсь Александр Журавлёв, йӧскалык политикая министр Эдуард Петров но активной коммуникациосъя центрен кивалтӥсь Евгения Сундукова. Соос тодматӥзы таяз аре ортчытыны чаклам ужрадъёсын[5]:
- Ижкарысь Шор площадьысь выльдэм Данъян пул вылэ 54 мурт но 15 коллектив пыртэмын. Бырйыку трос саклык висъямын вал специальной военной операцие пыриськемъёслы юрттэт сётӥсьёслы.
- 1-тӥ шуркынмонэ Калыкъёслэн эшъяськон юртазы кун данъетъёсын пусъён сӥё-дано ужрад ортчоз.
- Бадӟым этнографической диктант 2025-тӥ арын дасэтӥзэ ортчиз ини, со калыкъёслэн огъя луонзылы сӥземын вал.
- Йылпумъямын удмурт кунлыкез кылдытӥсьёслы синпелетъёсты выльдон ужъёс. Ар пумын этнография но языкознание удысысь ньыль удмурт тодосчиослы данъян пул юнматыны чакламын: Кузьма Куликовлы, Валей Кельмаковлы, Татьяна Владыкиналы но Иван Таракановлы.
- Озьы ик, котьку сямен сӥё-дано ужрадъёс вань муниципал кылдытэтъёсын ортчытыны чакламын, кылсярысь: Эгра ёросын — калыккуспо фестиваль, Глазкарын — нылпи суредъёсын калыккуспо адӟытон, Юкаменск ёросын — волейболэн шудонъя ёрос ӵошатсконъёс, Воткалан — бадӟым концерт.
Валэктонъёс
- ↑ 1 2 3 4 ноября Удмуртия отмечает 95-летие государственности Редакция газеты «Удмуртская правда». Эскеремын 28-10-2025 арын
- ↑ 4 ноября - День народного единства Информационно-аналитическоe управление Администрации города Ижевска.
- ↑ Программа праздничных мероприятий, посвященных Дню народного единства и Дню государственности Удмуртии Информационно-аналитическоe управление Администрации города Ижевска.
- ↑ Как отпраздновали День народного единства в городах и районах Удмуртии ИА «Удмуртия».
- ↑ Как в Удмуртии отметят День народного единства и 105-летие государственности УР [ӟуч] Известия Удмуртской республики (23-10-2025). Эскеремын 28-10-2025 арын
