Удмурт Элькунысь мировой юстицилэн нуналыз
| Удмурт Элькунысь мировой юстицилэн нуналыз | |
|---|---|
 | |
| Типез | кун праздник |
| Валатонэз | 2000-тӥ арын 20-тӥ инвожое Кун Кенешлэн «Удмурт Элькунысь мировой судьяос сярысь» Кат кутон |
| Пусъё | арлы быдэ |
| Дырыз | 20-тӥ инвожое |
Удмурт Элькунысь мировой юстицилэн нуналыз ӟуч: День мировой юстиции Удмуртской Республики ― Удмурт Элькунысь мировой юстици удысын ужасьёслэн ӧнер нуналзы. Пусйиське 20-тӥ инвожое[1].
Историез
Россиын мировой юстицилэн институтэз нырысьсэ кылдытэмын вал 1864-тӥ арын, Александр II судебной реформаез улсын. Соку кылдытэм мировой судъёс 25 ар ортчыса быдтэмын вал. 1912-тӥ арын мировой суд нош выльдӥськиз но 5 ар ортчыса, быдэсак эксэй судебной сӧзнэтэн валче быдтэмын вал. Удмурт Элькунын мировой судлэн историез 2000-тӥ арын 20-тӥ инвожое Кун Кенешлэн «Удмурт Элькунысь мировой судьяос сярысь» Кат кутэм дырысен лыдъяське[2]. Катэз кутэм бере, ар ортчыса, 2001-тӥ арын 20-тӥ инвожое Удмурт Элькунысь Кун Кенеш нырысетӥ 20 мировой судьяосты юнматӥз[1].
2023-тӥ арын 26-тӥ куарусёнэ Удмурт Элькунысь Кун Кенешлэн укмысэтӥ сессиезлэн кенешоназ, интыысь парламентарийёс кык полэс лыдӟемен «Удмурт Элькунысь праздникъёс но буре ваён нуналъёс сярысь» Катлэн 3-тӥ статьяяз воштонъёс пыртӥзы. Катӵектосэз дасян бордын ужаз кун лэсьтӥськонъя но интыысь аскивалтонъя яланлыко комиссия. Со ик Удмурт Элькунысь Юстицилэн валтӥсь управлениезлэсь элькунын Мировой юстицилэсь нуналзэ юнматон дэмланзэ умоен лыдъяз. Пусъён нуналыз ― 20-тӥ инвожое. Нырысьсэ Удмурт Элькунысь юстицилэн нуналыз пусйиськиз 2023-тӥ арын 20-тӥ инвожое.
Кун Кенешысь кун лэсьтӥськонъя но интыысь аскивалтонъя ялан ужась комиссилэн тӧроез Александр Прозоров пусйиз, Удмуртиысь мировой судьяослэсь ӧнер нуналзэс кылдытон оглом судъясь тӧрлыклыклы калыклэсь осконзэ юнматыны но мировой судьяослэсь уж данзэс ӝутыны юрттоз[1].
Пусъён ужрадъёс
2021-тӥ арын Удмурт Элькунын мировой юстицилэн кылдэмез дырысен 20 ар тырмиз[3]. Солы сӥзем сӥё-дано ужрадъёс инвожо толэзе ортчизы. Озьы ик котькуд ар 20-тӥ инвожое мировой юстици удысын тыршисьёсты сӥлы карыса пӧртэм ужрадъёс ортчо, тужгес устооссэ данъетъёсын пусйыло.
