Ижкарлэн нуналыз

Ижкарлэн нуналыз
Ижкарлэн нуналыз
	; Ижысь ульчаос, Дун-чылкыт Михаиллэн соборез, тымет вылӥысен
Типез	Арлы быдэ ортчись кар шулдыръяськон
Валатонэз	Ижкарлэсь кылдон нуналзэ пусъён
Пусъё	Ижкарын улӥсьёс но куноос
Дырыз	12-тӥ инвожое
Пусъён ужрадъёс	Фейервекръёс, концертъёс, азбарен, ульчаен, карен шулдыръяськонъёс

Ижкарлэн нуналыз — Ижын арлы быдэ ортчись шулдыръяськон ужрад. Сое 12-тӥ инвожое радъяло. Тупа со Россилэсь нуналзэ сиё-дано пусъёнэн.

Ижкарлэсь нуналзэ городын улӥсьёс но куноос котькуд азбарен, ульчаен, карен пусъё, концертъёс, ӵошатсконъёс, фестивальёс, эктонъёс, мастер-классъёс радъясько. Ижкарлэсь Данъян пулзэ усьто. Данъян пулэз арлы быдэ 2017-тӥ арысен кутскыса выльдо. Татчы карысь мер но экономика удысъёсты азинтонэ шӧдскымон пытьы кельтэм муртъёслэсь 14 туспуктэмъёссэс но ужась коллективъёслэсь 6 стендъёссы пырто ^[1].

2025-тӥ арын Ижкар 265 ар тырмонзэ пусъе.

Ижкарлэн кылдон историез

Ижкар 1760-тӥ арын кылдӥз. Ӵапак соку Пётр Шувалов графлэн кичӧлтэмезъя Иж шур вамен ӵыпет ӝутӥзы, собере корт поттон завод лэсьтыны кутскизы; котыраз бӧрсьысь ужасьёслы улон коркаос пуктӥзы, озьы кылдӥз вуоно Ижкар — Ижевской Завод (али но Дэри ёросысь но улосысь мукет гуртъёсысь пересьёс сое Завод, Заод шуо на)^[2]. Заводэз кылдытӥсь Алексей Степанович Москвин луэ. Та пумысен «Ведомости о казанских партикулярных заводосодержателях» вашкала изданиын но пусъемын. 1760-тӥ арын 10-тӥ оштолэзе гожтосын ивортэмын: «Гороблагодатской чугунлэсь корт ӵыжатон вылысь оной Ижысь корт дурон завод лэсьтон борды ачиз сиятельство сюлмаськемен кутскемын 1760-тӥ арын оштолэзьлэн 10-тӥ нуналаз, со интыяськемын оной Кузон губерниын Арск сюрес кузя Ижу шур дурысь кун музъем вылын»^[3].

Емельян Пугачёв кивалтэм улсын сое бугыръяськисьёс сутэмен, завод тылпу пыр но потӥз. Иж 1807-тӥ арын гинэ «кыкетӥзэ вордскиз». Инженер Андрей Федорович Дерябин кивалтэм улсын Иж тымет дуре пыӵалтӥрлык поттон завод пуктӥзы. Вакчи дыр куспын татын ожтӥрлык бичаны ӧдъязы.

Производство ӝог азинскемен, 20-тӥ даурлэн кутсконаз Ижево черкогурт артысь Пермь, Новгород, Уфа кадь губернской каръёсты трослы азьпалтӥз. Карлэн статусэз катэн юнматэмын ӧй вал ке но, трос аръёс ӵоже со котыр улосысь тужгес бадӟымез промышленной центр вал^[4].

1918-тӥ арын 21-тӥ тулыспалэ Ижысь ужась калыклэн, солдатъёслэн но крестьянъёслэн депутат кенешсы пуктэмъя, Иж заводэз город каризы. 1920-тӥ арын шуркынмонэ татысь выжы калык аслэсьтыз Вотской автономизэ кылдытӥз, административной центр луиз Глазов. Отӥяз улос Удмурт Элькун луиз. Нош ар пала ортчыса, РСФСР-лэн ВЦИК-езлэн Президиумез юнматӥз, 1921-тӥ арын 10-тӥ инвожое Ижкар Удмуртилэн шоркарез луэ шуыса. Постановление улэ ВЦИК-лэн секретарез Авель Енукидзе гожтӥськиз^[4].

1984-тӥ арын 27-тӥ толсуре Ижлэсь нимзэ, Д. Ф. Устиновез сӥлы карыса, Устинов каризы. Карлэсь историысь кылдэм нимзэ 1987-тӥ арын 19-тӥ инвожое берыктӥзы. 1988-тӥ арын Ижын та нуналэ нырысьсэ сӥё-дано шулдыръяськон ортчытӥзы. Со дырысен праздникез арлы быдэ пусйыны кутскизы. 1992-тӥ арозь Ижкарлэн нуналзэ инвожолэн котькуд кыкетӥ арнянуалаз ортчытъязы, валамон ни, со пӧртэм числоосы тупалляз. 1992-тӥ арын сое 12-тӥ инвожоен юнматӥзы. Нош 1994-тӥ арын та ужрадэз Россилэн нуналэныз огазеязы но Ижкарлэсь нуналзэ 12-тӥ инвожое пусйыны ӧдъязы^[5].

Туннэ Ижкар тодмо луэ пыӵалтӥрлык но машина поттон удысъёсын. Росси Федерацилэн «оружейной столицаез» но «ужан данлыкен кар» нимъёсын пусъемын^[6]. Росси Федерацилэн Азьмуртэзлэн 2020-тӥ арын 2-тӥ пӧсьтолэзе гожтэм Указэзъя Ижкарлы «Ужан данлыкен кар» ним сётэмын^[7].

Сям-йылолъёс

Ижкарлэсь нуналзэ Шор площадьын совето вакытлэн пумаз, 1988-тӥ арын гинэ, вӧл-вӧл сӥё-дано пусйыны ӧдъязы. Карлэсь нуналзэ но Россилэсь нуналзэ огазеямзы бере гинэ Ижкарлэсь кылдон нуналзэ арлы быдэ пусйыны кутскизы. Пӧртэм аръёсы шулдыръяськон пӧртэм сямен ортчылӥз.

1988-тӥ арозь Ижкарлэн нуналыз но луыны уг быгаты вал. Устинов нимзэ выльысь Ижлы 1887-тӥ арын гинэ воштӥзы. Озьы ке но калык понна литературая но искусствоя ужрадъёс скверъёсын но паркъёсын ортчытъязы. Карын улӥсьёс куддыр азбаръёсазы но концертъёс пуктылӥзы, 1970-тӥ аръёсы инвожое Егитъёслэн нуналэнызы но сое огазеяллязы. Та ик Шор площадьын калыкез бадӟым шулдыръяськонэ люканы кутскон сётӥз^[8].

1980-тӥ аръёслэн пумазы — 1990-тӥ аръёслэн кутсконазы Шор площадьын чорыг, книгаос, сяськаос вузан ярмаркаос но радъяллязы. Со сяна, пӧртэм адӟытонъёс дасяллязы, кылсярысь, тылпу кысон техникаез калык азе поттылӥзы. Пӧртэм спорт ӵошатсконъёс малпаллязы. Иж тымет ярдурын усточиос мотоосын олокыӵе но трюкъёс возьматъязы. Зэмос спортсменъёс но акробатъёс батут вылын тэтчаменызы паймытъязы^[8].

Калыкез шулдыртон вылысь Мускоысь дано артистъёсты ӧтчаны ӧдъязы. Та али но сяме пыремын.

2008-тӥ арын 12-тӥ инвожое Ижысь Шор площадьын крезьгуро но пӧртэм тылъёсын пиштӥсь фонтан усьтӥськиз. Со аре ик выль кенъёслэн но эмеспиослэн парадзы ортчиз^[8].

Берло аръёссэ Ижкарлэсь нуналзэ 12 нунал ӵоже пусъё: 1-тӥ инвожоысен 12-тӥ инвожоозь. Азбарысен кутскыса, Шор площадёзь, Иж тыметозь, Киров нимо паркозь вӧлъясько пӧртэм шулдыръяськонъёс. Ижкарлэсь нуналзэ городын улӥсьёс но куноос котькуд азбарен, ульчаен, карен пусъё, концертъёс, ӵошатсконъёс, фестивальёс, эктонъёс, мастер-классъёс радъясько. Ижкарлэсь Данъян пулзэ усьто. Та нуналэ ик Ижысь кудаз ке паркын удмуртъёс гырон-быдтон ужъёслэн йылпумъяськемзылы сӥзем Гербер праздник радъяло, ӝук вӧсяло, ог-огенызы пумисько-верасько, шулдыръясько. Герберлэн бадӟым возьвылаз сяме пырем ярмарка ортче: улосысь усто кибашлыос куэм, пунэм, вӧлэм, лэсьтэм, ӵыжатэм арбериоссэс калыклы потто. Гербер — йӧскалык дэремез но уксётӥрлыкез дӥсяны устоез муг, удмурт кылын кырӟанъёсты но крезен яке кубызэн шудэмез кылыны чебер луонлык^[9].

Ижкарлэн нуналызлы сӥзем сиё-дано ужрад фейерверкен йылпумъяське.

Ижкарлэсь 265 ар тырмонзэ пусъён

2025-тӥ арын Ижкар 265 ар тырмонзэ пусъе. Та быдӟа нуналэз сӥлы карыса, юбилей арлэсь пуссэ но кылдытӥзы. Озьы пусэз пыӵалтӥрлык поттон заводлэн валтӥсь корпусэзлэн башняез луиз. Арлэн буёлэз но карлэн буёлэз — палэзь. Ижкаръёс понна палэзь — со вордскем карзылэн валтӥсь тодметэз, та емыш Ижкарлэн кунпусаз но возьматэмын^[10].

Шулдыръяськонъёс кӧня ке нуналъёс ӵоже ортчизы. 1-тӥ инвожоысен ик садъёсын но паркъёсын семьяослы пӧртэм мастер-классъёс радъяськизы, нылпи фестивальёс ортчизы, усточи нылпиос асьсэды сцена вылын возьматӥзы, кырӟаменызы, суредаськеменызы, эктэменызы тодматӥзы. Робототехникаен тунсыкъяськисьёс пӧлын роботъёсын ожмаськон радъяськиз. Егитъёс, пиналъёс, семьяос пӧртэм ӵошатсконъёсын кужымзэс мертазы, спортын асьсэды эскеризы. Азбаръёсын будӥсь но зэмос спортсменъёс волейболэн, баскетболэн, футболэн шудӥзы^[11].

Удмуртилэн Тӧроез кичӧлтэмъя кыкетӥ арзэ Шор площаде нылпиослэсь малпанъёссэс быдэстӥсь кызэз юнматӥзы. Выль аре сямен ик, отчы быдэс элькунысь ёрмись семьяосысь нылпиос тужгес но дуно мылкыдъёсынызы шаръёс ошылӥзы, нош Удмурт Элькунысь кивалтӥсьёс соосты быдэн кутӥзы но нылъёслэсь-пиослэсь малпанзэс быдэстыны юрттӥзы^[11]

11-тӥ инвожое Дун-Чылкыт Александр Невскийлэн соборез азьын Удмуртиысь но Ижысь тодмо коллективъёс хорен кырӟазы. Тазьы кырӟан сяме пыриз ни.

Шулдыръяськонлэн валтӥсь нуналаз, 12-тӥ инвожое, уно чаклам ужрадъёс пӧлысь куд-огез:

А. Дерябинлэн синпелетэз азе сяська тугоко валён;
«Пыраклы Россиен» монумент азьын Россилэн нуналызлы сӥзем сӥё-дано ужрад;
П. Шуваловлэн сквераз (город администрация вӧзын) сӥё-дано ужрад;
Иж городлэсь Данъян пулзэ усьтон, Ижлэсь дано кунмуртъёссэ сӥлы карон;
Космонавтъёслэн парказы удмуртъёслэн Гербер шулдыръяськонзы;
Зоопаркын концерт, вожвылъяськонъёс, мастер-классъёс;
М. Горький нимо паркын «Городлэн нуналыз» шулдыръяськон программа;
Шор площадьын Иж мотоциклъёсын адӟытон;
Шор площадьын усточи нылпиосты Ижкарлэн йырызлэн грантъёсыныз пусъён^[11].

Галерея

2017-тӥ арын Ижкарлэн нуналаз концертэ калык лачак люкаськиз
1990-тӥ аръёслэн кутсконазы Иж тымет дурын мотоосын пӧртэм трюкъёс возьматъязы
1980-тӥ аръёслэн пумазы Ижкарлэн нуналаз тылпу кысон техникаен адӟытон радъязы
2011-тӥ арын Ижкарлэн йырыз Александр Ушаков театрализованной шествие пыриськиз
Ижкарлэн нуналаз Иж тымет вадьсын салют лэзьяло

Озьы ик учке

Валэктонъёс

[В_Ижевске_чествовали_ижевчан,_внесших_вклад_в_развитие_города-1] Официальный сайт Информационно-аналитического управления Администрации города Ижевска. В Ижевске чествовали ижевчан, внесших вклад в развитие города

[_c029ce221a9fa860-2] Фертиков, 2009, с. 3.

[10 апреля_2025 года_Ижевск_празднует_свое_265-летие?-3] Сетевое издание Udm-info. 10 апреля 2025 года Ижевск празднует свое 265-летие

[Историческая_справка-4] ¹ ² Официальный сайт Государственного Совета Удмуртской Республики. Историческая справка

[Ижевск._Город_трудовой_доблести-5] Проект Календарь событий. Ижевск. Город трудовой доблести

[6] Призовой фонд конкурса самых благоустроенных пунктов РФ составил 100 млн [ӟуч] Regnum. Эскеремын 2011-11-30 арын

[Город_трудовой_доблести-7] Указ Президента Российской Федерации от 02.07.2020 № 444 «О присвоении почётного звания Российской Федерации „Город трудовой доблести“»

[Как_Ижевск_отмечал_День_города_в_разные_годы-8] ¹ ² ³ Официальный сайт Izhlife. Как Ижевск отмечал День города в разные годы

[Удмуртский_национальный_праздник_Гербер-9] АНО Центр развития туризма Удмуртской Республики. Удмуртский национальный праздник Гербер

[В_Ижевске_представили_фирменный_стиль_265-летия_города-10] Официальный сайт Информационно-аналитического управления Администрации города Ижевска. В Ижевске представили фирменный стиль 265-летия города

[День_города_Ижевск_отметит_масштабной_программой_с_1_по_12_июня-11] ¹ ² ³ Официальный сайт Информационно-аналитического управления Администрации города Ижевска. День города Ижевск отметит масштабной программой с 1 по 12 июня

[1]

[2]

[3]

[4]

[5]

[6]

[7]

[8]

[9]

[10]

[11]