Россилэн нуналыз

Россилэн нуналыз
Нижегородской кремль вадьсын Россилэн нуналызлы сӥзем салют. . Нижний Новгород, 2015-тӥ ар 12-инвожое.
Валатонэз	1990-тӥ арын та нуналэ кутэмын вал РСФСР-лэн кун суверенитетэз сярысь Декларация
Пусъё	Россия Россия
Пусъён ужрадъёс	концертъёс, патриотической акциос, фейерверкъёс
Сям-йылолъёс	Кремльын Кунпремиосын но данъетъёсын пусъён
Медиафайлъёс РувикиМедиа пушкын

Россилэн нуналыз, ӟуч Де́нь Росси́и (азьвыл нимыз — Асэриклык басьтон нунал, Кун суверенитетэз сярысь Декларация кутон нунал) — Росси Федерациысь кун праздник, пусйиське арлы быдэ 12-тӥ инвожое. Юнматэмын 1992-тӥ арын 11-тӥ инвожое РФ-лэн Вылӥ Кенешеныз , РСФСР-лэн кун суверенитетэз сярысь Декларациез кутонлы сӥзьыса.

Та нуналэ Кремльын сӥё-дано ужрад ортче, РФ-лэн азьмуртэз тужгес устооссэ кун премиосын но данъетъёсыын пусъе. Быдэс кунын та нуналлы сӥзем концертъёс, спортивной но патриотической акциос ортчытӥсько. 12 инвожо шутэтскон нуналэн ялэмын. Праздник нунал кӧснуналэ яке арня нуналэ тупа ке, шутэтскон нунал вуоно ужан нуналэ выже.

Нимыз сярысь

1990-тӥ арын 12-тӥ инвожое РСФСР-ысь калык депутатъёслэн I съездазы РСФСР-лэн кун суверенитетэз сярысь Декларация кутэмын вал, со вуоно реформаослы инъет луиз но СССР-ез куашкатон калэ вуттӥсь мугъёс пӧлысь одӥгез луиз. Декларация ялэмын вал "Парад суверенитетов» нимо вакытэ, куке кунъёс огез бӧрсьы мукетыз Союзлэн пушпӧлысьтыз потӥзы. Ваньзэ тае лыдэ басьтыса ик, Борис Ельцин нырысь-валысь Асэриклык басьтон нунал шуыса нимаз вал.. 1993-тӥ арын калыклы вазиськоназ кунлэн тӧроез пусйиз:

Россия встречает свой государственный праздник День независимости. Этот праздник молод, он вошёл в нашу жизнь три года назад, с принятием декларации о государственном суверенитете России.

1994-тӥ арын Борис Ельцин аслаз Косэтэныз 12 инвожоез РСФСР-лэн кун суверенитетэз сярысь Декларация кутон нуналэн ялӥз. Россилэн нуналыз нимын 2002-тӥ арын гинэ кутӥськыны кутскиз.

Историез

Праздник нуналлэн пуштросэз историен валче вошъяськиз. Нырысь-валысь 12-тӥ инвожо герӟаськемын вал суверенитет сярысь Декларациен, кудӥз РСФСР-лы «СССР-лэн пушпӧлысьтыз потыны эрик» сётӥз. Соин сэрен, та нунал истори герӟетъёсты тӥясь пусэн, кунлэн азинсконысьтыз быдэс вакытсэ куштон нуналэн лыдъяськиз. 1991-тӥ арын ортчем ужрадъёсты умой-умой эскерыса но солы «XX даурысь тужгес бадӟымез геополитической катастрофа» йылпум лэсьтыса, воштӥськиз праздниклэн пуштросэз но. 2001-тӥ арын 12-тӥ инвожое Россилэн нуналызлы сӥзем сӥё-дано ужрадын Владимир Путин пусйиз:

Всё, что пережито за эти годы, весь наш опыт — и успехов и ошибок — говорит об одном. Любые реформы имеют смысл только тогда, когда они служат людям. Если реформы не в пользу граждан — они проваливаются. В этом и состоит основной урок российской демократии. О нём мы обязаны говорить и сегодня, в День России.

РФ котырысь геополитической югдур лэчытомемен сэрен, кунлы пумит нырысь санкционной, собере гибридной войнаос пуромем бере, Россилэн нуналызлэн пуштросэз нош воштӥськиз. Табере та нунал суверенитетэз берентонлы, экономика ласянь кужмоянлы но державаез Утись Кужымъёслэн юнмамзылы сӥзем нуналэн лыдъяське. Та веранэз юнмато калык пӧлын ортчытэм социологической юалляськонъёс: 2022-тӥ арын ВЦИОМ-ен ортчытэм юалляськон возьматӥз, 58 % респондентъёс СССР-лэн куашкамез сярысь жаляло.

Владимир Путин но Борис Ельцин Россилэн нуналызлы сӥзем сӥё-дано ужрадын (2001)

Сям-йылолъёс

Россислэн нуналаз Кремльын арлы быдэ наука но технологиос, лулчеберет но устолык РФ-лэн кун премиосыныз но «РФ-лэн Ужысь Героез» медальёсын пусъён сӥё-дано ужрад ортче. Праздниклэн пусэз росси триколор, нош пусъёнлэн валтӥсь интыез — Горд площадь. Быдэс кунын улон интыосын урамъёсты флагъёсын но плакатъёсын чебермало. Ортчыло фестивальёс, концертъёс, адӟытонъёс, спорт ужрадъёс но патриотической акциос. Кылсярысь, 2023-тӥ арын Волгоградысь Лулчеберето шутэтскон Шор паркын РФ-лэн сю метръем флагез вӧлъямын вал. Сое кар ульчаостӥ нуон понна, 80 мурт пыриськиз.

Тросэз семьякылдытон нуналлы 12-тӥ инвожоез быръё. Шоркарын юромо та нуналлы кузпалъяськыны ватсам интыос усьяло. Кылсярысь: Москва шур кузя уясь трамвайёсын, метрополитен станциосын, карысь историен герӟаськем интыосын но вашкала усадьбаосын. Тужгес трос та нуналэ Москваын кузпалъяськон учыръёс пусъемын вал 2010-тӥ арын — 250-лэсь ятыр. 2022-тӥ арын куинь пар «Маяковская» метро станциын кузпалъяськем. Ужрад кык часысен ньыль час уйинозь кыстӥськем, платформаез сюан букоен чебермаллям, туспуктонъёс лэсьтон понна нимысьтыз кык состав висъяллям — «Москва-2020» но «Номерной». Быдэсак сюан ужрад понна кунвытлэн дуныз — 350 манет, нош онлайн амалэн заявлени гожтыса, эшшо ӧжытгес — 245 рублей.

Юалляськонъёс

ВЦИОМ-лэн 2023-тӥ арын ортчытэм эскеронъёсызъя, Россилэн нуналыз ― РФ-лэн тужгес егитэз праздникез сярысь калыклэн тодон-валанъёсыз арысь аре йыло: 2006-тӥ арын со сярысь пыр-поч 63 % гинэ тодэ ке вал, 2021-тӥ арын ― 73 %. Озьы ик тодмо луиз, кунлэн берло дыр ӵоже валтӥсь вормонъёсыз пӧлы пыртэмын:

• Крымен но выль улосъёсын огазеяськон (11 %);
• инфраструктуралэн азинскемез, сюрес лэсьтон (9 %);
• промышленностьлэн, гуртвозёслэн но инсьӧр удыслэн азинскемез (8 %);
• экономикалэн азинскемез, импортозамещениын вормонъёс (8 %);
• кунлэн мер политикаез, анайлыклы но нылпиослы юрттон (8 %);
• Крым выжез лэсьтон (5 %).

Туала вакытысь данъяськымон муртъёс сярысь юанлы, ваньмыз сямен, Владимир Путинэз но СВО-е пыриськемъёсты пусйизы.

Зэмослыкъёс

• 12-тӥ инвожое Ӟуч Православи Черк вӧсьлыко благовернойлэсь Александр Невскийлэсь, Владимирский, Новгородский но Киевский быдӟым князьлэсь вордӥськем нуналзэ пусъе;
• 12-тӥ и нвожое 1991-тӥ арын РСФСР-ын президентэ быръёнъёс ортчизы, вормиз Борис Ельцин;
• 2014-тӥ арын Россилэсь нуналзэ нырысьсэ пусйизы Крымын но Севастопольын.

Озьы ик учке

• Россиысь производственной календарь

Валэктонъёс

Чӧлсконъёс

• Указ Президента Российской Федерации от 2 июня 1994 года № 1113 «О государственном празднике Российской Федерации»
• Ст.112 Трудового кодекса Российской Федерации от 30 декабря 2001 года № 197-ФЗ
• День России // ТАСС