Ижысь зоопарк

Ижысь зоопарк
Кылдытэмын	10-тӥ куарусёнэ 2008-тӥ арын
Интыяськемез	Ижысь Киров ульчаысь 8-тӥ юрт, Россия
Координатъёсыз	56°51′57″ с. ш. 53°10′22″ в. д.
Быдӟалаез	17 гектар
Пӧйшуръёсыз	700-лэсь ятыр
Видъёсыз	210-лэсь ятыр
Араз вуылэм адямиос	600 сюрслэсь ятыр
Ёзчи	Зоопаркъёслэн но аквариумъёслэн евроазиатской улоскуспо ассоциацизы
Сайтэз	udm-zoo.ru
Медиафайлъёс РувикиМедиа пушкын

Ижысь зоопарк (Удмуртиысь зоопарк, Удмурт Элькунысь лулчеберет удысысь бюджет чотын возиськись ужъюрт) — кун зоологи парк, Ижысь Киров паркын интыяськем адӟытон комплекс. 2015-тӥ арын со Европаысь 20 устоез зоопаркъёс пӧлы пыртэмын.

Огъя тодметъёс

Зоопарк интыяськемын Ижкарлэн Уйпал но Шундыпуксён палаз, Киров нимо парклэн интывылаз. Солэн быдӟалаез 17 гектар котыр. Та вакытэ отын 800 пала пӧйшуръёс но тылобурдоос уло. Соос пӧлын трос шер пумиськись но бырон калэ вуэм пӧйшуръёс: амур тигр, тӧдьы гондыръёс, япон туриос, гиббон, орангутан, тӧдьы пельпумо ӧрӟиос.

Саваннаосысь ваем животъёс но, пумтэм йӧ но лымы интыосысь вуттэм лулосъёс но одӥг азьын валче уло. Соослэн улонзы инкуазьын улонзылы тупамон мед луоз шуыса, татын ваньмыз лэсьтэмын. Калыклэсь соосты пилиськонтэм юн ӟырдатэм пияла ватэ.

Калык кытчы мыныны, мае адӟыны мед валалоз шуыса, зоопаркысь экспозициос кӧня ке зонаослы люкылэмын, зоологияя, географияя но ландшафтъя куронъёсты санэ басьтыса.

Зоопарклэн историез

2004-тӥ арын гужем Удмуртиысь Элькун Кивалтэт малпаськыны ӧдъяз, Киров парке я Октябрьлы 10 ар ульчае зоопарк лэсьтоно шуыса. Удмуртилэн Президентэз нимысьтыз кенеш но люкалляз. Соиз но, таиз но инты ӟеч, но сиксэ коран азьын Мусколэсь юано шуыса, огкылэ вуизы.

2004-тӥ арын ик зоопарклы проект лэсьтон борды басьтӥськизы. Кема эчешем бере, зоопарк ӝутыны шуыса, Киров паркысь ог люкетсэ сикез коразы, соин валче дауръем пужымъёс но быризы. 2006-тӥ арын, Президентлэн Александр Волковлэн кичӧлтэмезъя, Удмуртилэн шоркараз зоопаркез лэсьтыны кутскизы. Президент пуктӥськон ужъёсты ачиз эскерыса-чакласа возиз.

Пуктӥськон секытэн мынӥз, проект но вошъяськылӥз. Но ваньмыз со льӧль малпанэз быдэстонын ӟечен гинэ берытскиз. Ижын таӵе бадӟым но паймымон пуктӥськон ӧй вал на. Карысь лэсьтӥськисьёслы юрттӥськыны вуизы Мускоысь, Кузонысь ӧнерчиос, Чехиысь гинэ но усточиос лыктӥзы. Пумен пудо эмъян, сиён лэсьтон интыос, гаражъёс, вольеръёс ӝужазы. Ӝегатскыны маза ӧй вал. Лэсьтӥськисьёс азьын бадӟым ужпум сылӥз: зоопаркез 2008-тӥ арын куарусёнлы вуттоно.

2008-тӥ арын 10-тӥ куарусёнэ Удмуртиысь кун зоопаркез сӥё-дано усьтон ужрад ортчиз. Со нуналэ 3 сюрс куноос зоопаркысь 32 пумо 92 улӥсь лулосъёсын тодматскизы. Пӧлазы отчыозь Удмуртиын адӟылымтэ тӧдьы гондыръёс, моржъёс, япон мартышкаос но мукетъёсыз вал.

Зоопаркын али 213 пумо 700-лэсь ятыр пӧйшуръёс но тылобурдоос уло. Арлы быдэ лыдзы йылэ: асьсэос но пи потто, калыкез эшшо золгес паймытон понна палэнысь мукет животъёсты но татчы ялан ваё.

Али Удмуртиысь зоопарк Россиысь ӟеч ужась устоосыз вить зоопаркъёс пӧлы пыре, татчы элькунын улӥсьёс но, туристъёс но ялан вуыло.

2025-тӥ арлы Ижысь зоопарклэн директорез Светлана Анатольевна Малышева луэ.

Улӥсьёсыз но экспозициос

Зоопаркын тросэз улӥсьёсыз Россиын но дуннеын шер пумиськылӥсь лулосъёс пӧлы пыро, уноез бырон калэ вуэмын. Соос пӧлын: япон туриос, гиббон, орангутанг, среднеазиатской черепаха, императорской скорпион, нильской крокодил, тылобурдоез сиись чонари, трубкозуб но мукетъёсыз.

Россиысь мукет зоопаркъёсын ӵошатыса, Удмуртиысь зоопаркын гинэ Горд книгае пыртэм тихоокеанской но атлантической моржъёсты вордыны луымон инты лэсьтэмын. Нимысьтыз вольерын соос нуналлы быдэ асьсэды адӟыто, учкисьёсты паймыто но шумпотто.

Ижысь зоопарке пырон азьысь Акела нимо кионлы сӥзем синпелет

Удмурт зоопарклэн пусэз но тодметэз Акела нимо кион луиз. Со семьяен валче, люкиськытэк, ог-огдэ утьыса, оскымон улонэз тодэ вайытэ. Куинь метръем синпелетэз Дмитрий Постников лэсьтӥз. Синпелет зоопарке пырон азе ик интыямын.

Котькуд кунолы Акелалэн пыд бордаз йӧтскыны ӵекто, льӧль малпанлы быдэсмыны но семьяен валче улыны мед кылдоз шуыса.

Зоопарклэн экспозициосыз

• «Тӧдьы уйпал»;
• «Дальний Восток»;
• «Удмурт гурт»;
• «Тайгаысь дуно макеос»;
• «Тымет»;
• «Экзотика дунне»;
• «Беренэсъёс но беренэспиос»;
• «Маймылъёслэн шаерзы»;
• «Контактной зоопарк» (гужем вакытэ гинэ ужа);
• «Покчи сьӧсьёс»;
• «Тӧдьы арысланъёс»;
• «Арысланъёс»;
• «Кузьыли муӵ».

Галерея

• 

  Зоопарклэн тусыз

• 

  Зоопарклэн тусыз

• 

  Зоопарклэн тусыз

• 

  Тӧдьы гондыр

• 

  Моржъёсын бассейн

• 

  Морж

Валэктонъёс

Чӧлсконъёс

• Удмуртиысь зоопарклэн сайтэз

• Официальная группа Архивная копия от 10 инвожое 2019 на Wayback Machine ВКонтакте ижевского зоопарка