Енот-парк

Енот-парк
Енот-парк
	; Парклэн логотипез
Огъя тодэтъёс
Тип	Сэзь шутэтсконъя парк
Интыяськемез
	56°50′22″ с. ш. 53°15′10″ в. д.GЯO
Кун	Россия;
РФ субъектъёс	Удмурт Элькун
Улон инты	Ижкар
Ёрос	Первомай ёрос

Енот-парк — Удмурт Элькунысь Ижысь семьяен сэзь шутэтсконъя центр^[1]. Кар шорын Ижысь ипподромен артэ интыяськемын.

Историез

2017-тӥ арын ипподром котырысь интыез умоятон вылысь ужъёслэсь куинетӥ этапсэс быдэстон пумысен кенешонын Удмуртилэн но Ижкарлэн кивалтэтэз огкылэ вуизы. Проектэз улонэ пыӵатон борды «УР-ысь инвестиционной технологиосъя центр» АНО-ен валче Colliers International компания басьтӥськиз. Карлутка сиклэсь нимысьтыз утёно инкуазь инлыксэ лыдэ басьтыса, компаниысь ыстэм муртъёс оскытӥзы, вань лэсьтӥськон объектъёс нюлэслэн кыралъёсаз интыямын луозы, реликт пужымъёс но мукет писпуос утемын луозы шуыса. Карын пуктӥськонъя кенешын адӟытӥзы «Енот-парк» рекреацияя интыен ӵектосэз^[2] но отчы пырись спорт инфраструктураен, калыкез сюдон но мыло-кыдо шутэтскон объектъёсты.

Проектэз радъясь луиз Андрей Азябин. Бӧрсьысь куинь ар ӵоже Карлутка шур кузя инты умоятэмын вал, татчы гозыосын трассаос, тюбинген но сноубордэн нискылан гурезьёс, велосипедэн ворттылон трассаос но кафе лэсьтэмын вал.

Парк дышетон ужъюртъёсын мыло-кыдо кусып возе (классъёсын пумиськонъёс, гужем лагерь но мукет), сӧсыръёсын ужа (инструктор быдэсак чакла), корпоратив клиентъёсты но Россиысь пӧртэм сэрегъёсысь туристъёсты пумита^[3].

Тодметъёсыз

Семьяен сэзь шутэтсконъя центр Ижкарлэн шораз ипподром сьӧрысь тэльын интыяськемын, гурезь йылысь пужым сиклэсь оглюкетсэ басьтэ. Россиысь одӥгез бадӟымез сэзь но экстремал шутэтсконъя парк луэ^[4].

Паркын ужало 16 метр ӝуждалаозь ошылэм но 440 метрозь кыстӥськись гозыосын дас трассаос, ньыль zip-line, РФ-ын огназ гинэ 600 м² площадь тыр писпуосы пуктэм net-park. Пиналъёслы 2 метр ӝуждалаозь гозыосын трассаос 4 аресысен нылпиослы чакламын. Парк пӧртэм арлыдо группаослы 20 пумо шутэтскон амал ӵектэ.

Паркын спорт тӥрлыкез, ватсаса утись аксессуаръёсты но амунициез арендае кутыны, озьы ик кышкыттэмлыкъя техникая вакчи дышетон курс но инструктаж ортчыны луэ. Котькуд этапын ужа опытэн инструктор.

Семьяен но корпоративен шутэтскон вылысь верандаосын мангал зонаос радъямын. Озьы ик арендаен сётӥсько пукон коркаос (шунытэз но панорамаен лэсьтэмез), шатёр, пергола но пикникъёслы глэмпинг. Валтӥсь площадкаын пичи кафе вань.

Аттракционъёс

В 2023-тӥ арын «Семьяен экстрим» трасса усьтӥськиз^[5], со писпуосы 8 метр ӝуждалае интыямын, огъя кузьдалаез 150 метр. Со тужгес секытэз трасса луэ, таин валче отчы мугорын юн сӥльвиро но дасям нылпиосты но бадӟымъёсты гинэ лэзё. Мылкыд карисьёс понна 8 метр ӝуждалаысен тэтчанъёс радъямын.

«Котыр учкон трасса» 7 этажъем корка ӝужда интые пуктэмын, Удмуртиын со огез кузез но ӝужытэз трасса.

Паркын вань писпуосы интыям вотэс кадь парк. Та «батут трасса» музъем валлин 600 м² площаде кыскемын, уно коридоръёсыз, висъетъёсыз но выжонъёсыз. Аттракционын сӧсырмыны кышкытлык вань, соин валче отчы сюрон понна трос чурыт куронъёс юнматэмын.

Паркын 210, 170 но 140 метрлы троллейёс [ӟуч] (удм. (zip-line) радъямын. Со страховочной системаен корт трос кузя ӝоглыко экстремал васькон, мур нюк вискы кыскемын. Одӥг пала 210 метр кузьдалаё но 10 метр ӝуждалаё троллей элькунысь тужгес кузез но ӝужытэз луэ (2025-тӥ ар понна паркын ужа одӥг пала 210 метръем но мукет пала 170 метръем кык троллей но 140 метръем одӥг пала но 170 метръем мукет пала кык троллей).

«Экстрим-трасса» 14 аресысен юн мугоро но дасяськем нылпиослы но бадӟымъёслы ӵектэмын. 160 метръем трасса 15 метрозь ӝуждалае кыскемын, гозыен огшоры трассаен ӵошатыса, татысь могӟетъёслэн элементъёссы ог-огенызы герӟаськемын ӧвӧл, эркын бергало. Трасса вылэ султыны яра улӥгес уровенен трассаез ортчыны быгатэм но инструкторен лэзем мылкыд карисьёс.

Со сяна, паркын роуп-джампинг [ӟуч] (удм., квестъёс, тим-билдинг [ӟуч] (удм. но полосаен тур курыны луэ.

Тол вакытэ пӧртэм арлыдо шутэтскисьёс понна ужало тюбинген нискыланъя 4 гурезьёс. Подъёмник пуктэмын.

Пеймыт вакытэ парк фонарьёсын югдытӥське.

Ужан вакытыз

Парк ужа быдэс ар ӵоже нуналлы быдэ 12:00 часысен 21:00 часозь, удмуртарняе но шутэтскон нуналъёсы 10:00 часысен 21:00 часозь^[6]. Пыронэз дунын.

Транспортэн вуон

Паркозь калык транспортэн вуыны луэ (автобусэн, троллейбусэн яке трамваен) ипподромозь чаклам матысь дугдылонниозь, отӥяз пыдын ортчоно. Трамвай сюресъёс ласянь Карлутка шурез выжоно но гурезе тубоно.

Ленин нимо ульча ласянь машинаен пыроно, ипподром дорысен бур пала кожоно но «Енот-Парк» гожтэмен пул дорозь вуоно. Куноослы парковка радъямын. Парковкаысен кассаозь коляскаосын ветлыны чаклам пулэсь но кутӥськонъёсын выж нуэ.