Ижысь ипподром

Ижысь ипподром
	Юрт
Ижысь ипподром
	56°50′29″ с. ш. 53°15′59″ в. д.GЯO
Кун	Россия
Интыяськемез	Удмурт Элькун
Кылдытэмын	31-тӥ южтолэзе 1949
Сайтэз	ippodrom18.ru/o-ippodrom…

Ижысь ипподром (Удмуртиысь вал вордонъя ипподромен завод; ӟуч: Ижевский ипподром) — Удмурт Элькунысь ипподром, интыяськемын Ижкарысь Индустри ёросын, вӧзысьтыз сикын — Енот-парк. Усьтэмын 1949-тӥ арын 31-тӥ южтолэзе^[1]. Удмурт Элькунысь Гурт удысъя министерстволэн ведомствоя компаниез луэ^[2].

Историез

Вал вордон завод

1926-тӥ арын Вотской автономной областьын вал вордонъя завод кылдӥз, со республикаысь колхозъёсысь но совхозъёсысь вал уллёлэсь ӟечлыксэ умоятон вылысь селекциен но племенной ужен выриз. 1939-тӥ арын ӵошатскыны вань мылкыд карисьёс понна бызьылон сюрес лэсьтэмын вал. Сӥзьыл вал гидлэн интывылаз гурт удысъя ярмарка ортчиз.

Быдӟым Атыкай ож вакытэ вал гидын нылкышноос но нылпиос ужазы^[3].

Война бере валэн бызьылонъёс выльысь улӟытэмын вал, соос арнялы быдэ ортчылӥзы^[3].

Ипподром

1949-тӥ арын 31-тӥ южтолэзе УАССР-ысь Министръёслэн Кенешсы ипподромез официально усьтонъя пуктэт юнматӥзы^[4]. Солэн балансаз Удмуртиысь племенной фермаосысь но РСФСР-ысь вал заводъёсысь валъёс пырылӥзы. Кык пу коргидэз но кебитэз вал. 1949-тӥ арын 1-тӥ пӧсьтолэзьлы ипподромлэсь котырзэ кенеразы, отын верста кузьда круг лэсьтэмын вал. Трибунаос интые пул ӟусъёс пуктылӥзы. Бызьылонъёс ялан ортчылӥзы. Ипподромын тотализатор ужаз, коньдонлэсь оглюкетсэ гидъёсты но бызьылон сюресъёсты возьыны но лэсьтыны висъяллязы, кылемзэ ӵошатсконъёсы пыриськисьёс куспын люкылӥзы^[1].

1950-тӥ—1990-тӥ аръёс

1954-тӥ арын Иже выжтӥзы Мускоысь вал вордон зоотехникая институтэз [ӟуч] (удм., 1-тӥ куарусёнэ со реорганизациен валче Ижысь гурт удысъя институтлы пӧрмиз. Учебно-опытной конюшняен кивалтӥсе юнматӥзы Яков Бабинцевез, кавалерийской школаез йылпумъям муртэ. Со кивалтон вакытэ, Ижкарын валэн ворттылонъя спорт азинскыны кутскиз, ӵошатсконъёслэн программаязы валэн ворттылӥсь валъёс понна тэтчанъёс но могӟетъёсты пыр потон радъямын вал^[5].

1958-тӥ арысен 1965-тӥ арозь ипподромен Иса Караев кивалтӥз. Со дыръя ипподромын лэсьтэмын вал европа уровенен мартен шлакен шобыртэм искусственной бызьылон круг. Учкисьёс понна пулэсь трибунаос ӝутӥзы, ипподромысь ужасьёс понна — выль улон интыос. Ижкаре эскеронъёсы вайылӥзы Удмуртиысь, Башкортостанысь, Курган, Пермь, Оренбург, Свердловск но Урал зонаысь мукет улосъёсысь валъёсты^[1].

1972-тӥ арысен иж ипподромын арлы быдэ йӧ вылын ӵошатсконъёсты радъяны ӧдъязы^[1].

1973-тӥ арын ипподром бордын усьтӥськиз Олимп резервъя валэн ворттылон но спорт школа. Соин кивалтӥсь луиз РСФСР-ысь валэн споръя дано тренер Игорь Лившиц^[5]. Татын асьсэлэсь спортъя карьеразэс мытӥзы калыккуспо классъем спортъя мастеръёс Аркадий Гурфинкель, Георгий Седельников но Михаил Эшмаков^[1].

1985-тӥ арын ипподромлэн директорез луиз Анатолий Ажмяков. Со кивалтэм улсын 1980-тӥ аръёс кутсконысен мытэм выльдӥськон йылпумъяськиз. 1987-тӥ арлы трибунаос йылаз-пумаз вуттэмын, сюресъёс выльысь шлакен шобыртэмын, интыез котырак ӟечомытэмын вал. 1988-тӥ—1989-тӥ аръёсы липето манеж ӝутэмын, кык общежитие, котыр возён склад, кебит пуктэмын. 40 йырлы чаклам гид но арка выллем склад лэсьтэмын, ву гумыос кыскемын. Выльдӥськонлы пум вуэм бере иж ипподроме испытаниосы кунысь 18 улосысь, озьы ик Казахстанысь валъёсты вайылыны ӧдъязы. 1991-тӥ арын Ажмяковлэн кичӧлтэмезъя бусыостӥ-сикъёстӥ 80 иськеме валэн бызьылонъёсты радъялляны кутскизы^[1].

Туала вакыт

2002-тӥ арын 9-тӥ толсурысен ипподром Удмурт Элькунысь «Вал вордонъя „Удмуртская“ ипподромен кун завод» бюджет ужъюрт сямен пусъемын. Валтӥсь ужпӧрез суро-пожо гурт удыс луэ.

2007-тӥ арын ипподромын усьтӥськиз Удмуртиын валлы но котырезлы арбериос вузанъя нырысетӥез магазин.

2019-тӥ арын толшорысен ипподромез валтыны ӧдъяз Иж кар думаысь депутат Дмитрий Кулишов. Со вакытэ элькунысь гурт удысъя министерство бакель сётэмъя 16 валъёс вузамын вал.

2022-тӥ арын ипподромлы директоре юнматэмын вал Виктория Ушакова. Со вакытэ вал гидъёс, манеж, трибунаос выльдӥськизы^[6].

2025-тӥ арын толшоре иж ипподромын ортчиз толалтэ трек ӵошатсконъёсъя Удмуртиысь чемпионатлэн нырысетӥ этапез. Йӧ трассаос вылын ӵошатскизы Россиысь пӧртэм улосъёсысь 30-лэсь ятыр спортсменъёс^[7]. 2025-тӥ арын 5-тӥ коньывуонэ иж ипподромын но Киров нимо паркын радъяськиз 22-тӥез тазалыкез юнматон туризмъя «Удмуртиысь кругосветка» нимо фестиваль^[8].

Тодметъёсыз

Ипподромлэн кузьдалаез 1067 метр, пасьталаез — 16 метр.

Солэн интывылаз валэн ворттылонъя но спортъя школа ужа, отын вал вылын ворттылыны пӧртэм арлыдо вань мылкыд карисьёс дышетско, соос пӧлын 5 аресысен пиналъёс но. Удмуртиысь Вал вылын ворттылон сямен эмъяськонъя но сӧсыръёслы чаклам вал спортъя центрын иппотерапияя занятиос ортчо. Улӟе вал вылын ворттылонъя сям. Школаын дышетскисьёс понна радъямын тодон-валанэз муромытонъя экскурсиос. Вал вордӥсьёс понна ӧнерчиос визь-кенеш но юрттэт сёто^[9]. Вал вордонъя кун завод рысак выжыысь валъёслы испытаниос ортчытэ, Удмуртиысь хозяйствоослы ӟеч выжыысь ужпиосты висъялля.

Ипподромын Удмуртиысь но Россиысь трек автогонкаосъя чемпионатъёс но гурт удысысь элькун адӟытон арлы быдэ радъясько^[4].

Ужан вакытыз

Ипподром нуналлы быдэ ужа вордӥськонысен покчиарняозь 8:00 часысен 17:00 часозь. Удмуртарняе — 8:00 часысен 16:00 часозь. Нуназеян вакыт 12:00 часысен 12:48 часозь. Кӧснуналэ но арнянуналэ — шутэтскон дыр.

Транспортэн вуыны луонлык

Ипподромозь вуыны луэ трамваен «Больница» дугдылонниозь яке автобусэн «Ижмашлэн» поликлиникаез" дугдылонниозь.

Галерея

Нырысетӥосыз «Валэн бызьылонъёс», соос Ижысь ипподромез кылдытонлы инъет луизы. 1925-тӥ ар.
Ижысь ипподром. 1959-тӥ—1960-тӥ аръёс.
Иж ипподромысь нырысетӥосыз пу трибунаос. 1968-тӥ ар.
Ипподромын ортчем толалтэ трек ӵошатсконъёсъя Удмуртиысь чемпионат. 1973-тӥ ар.
Ипподромысь машинаен вузкарон рынок, 1990-тӥ ар.
Ипподромлэн вылӥысен тусыз. 2017-тӥ ар.
Фермер сиён-юонлы сӥзем фестивальысен вал вылын ворттылонъя адӟытонъёс. 2025-тӥ ар.