Динополис (Иж)

Динополис
Динополис
Огъя тодэтъёс
Тип	Семьяен шутэтскон парк
Кылдытэмын	22-тӥ пӧсьтолэзе 2023
Интыяськемез
	56°52′01″ с. ш. 53°10′10″ в. д.GЯO
Кун	Россия;
РФ субъектъёс	Удмурт Элькун
Улон инты	Ижкар
Ёрос	Октябрь ёрос

Динополис (динозавръёсын парк; ӟуч: Динополис (Ижевск)) — Ижысь семьяен шутэтскон тематической парк. Инкуазьын кылдытэм динозавръёсын парк Россиын кыкетӥез луэ, Поволжьеын — огназ^[1]. Усьтэмын 2023-тӥ арын 22-тӥ пӧсьтолэзе. Интыяськемын Ижысь Октябрь ёросын, С. М. Киров нимо лулчеберетъя парк вӧзын.

Историез

Динозавръёслэн парксы кылдӥз карысь интыосты умоятон ӵектон улсын Ижын улӥсьёслэн кичӧлтэмзыя^[2]. Мерлыко вотэсъёсын ортчытэм юалляськонъя, карын улӥсьёс пӧлысь уноез сыӵе инты кылдытон понна дурбасьтӥзы. Со бӧрсьы эскеронъёс ортчытэмын, Россиын та выллем паркъёслэн ужамзы сярысь ивор люкамын вал. «Россиысь паркъёс» федерал проектлэн кивалтӥсез но РФ-ысь Мерлыко палаталэн [ӟуч] (удм. ёзчиез Сергей Буторин [ӟуч] (удм. верамъя, соку кунын тужгес бадӟым динозавр паркез лэзьыны ужпум пуктэмын вал. Проект Китаен валче быдэстэмын, отын заказъя лэсьтӥзы динозавръёслэсь мугоръёссэс.

2023-тӥ арын 22-тӥ пӧсьтолэзе «Динополисэз» усьтон радъяськиз^[3].

Тодметъёсыз

Киров нимо парк вӧзысь сикын интыяськемын («Теремок» кафе ласянь пыронэз). Удмуртиын со нырысетӥез та выллем проект луэ, Россиын кӧня ке гинэ со выллем паркъёс пӧлы пыре^[4].

Парк семьяен шутэтскон, тодон-валанэз муромытон вылысь чакламын, огдыре отчы сюрс вить сю пала учкисьёс тэро. Интылэн огъя быдӟалаез 2,5 га. Нюлэскытӥ котырскон вылысь дускоослэсь сюресъёс вӧлдэмын, соослэн кузьдалазы 1,5 км. Парк условно люкемын 28 зоналы, соос пӧлысь котькудӥз нимысьтыз вакытлы сӥземын: триас [ӟуч] (удм., юра [ӟуч] (удм. но мел [ӟуч] (удм.. Татчы зэмос динозавръёслы укшась 70 фигураос интыямын, уноез соос пӧлысь быдэс быдӟалазыя быдэстэмын^[5]. Паркысь адӟыны луэ тираннозаврез, брахиозаврез, птеродактилез, трицератопсэз, анкилозаврез, диплодокез, стегозаврез, велоцирапторез но мукетъёссэ. Мукет уно динопаркъёсын ӵошатыса, кытын динозавръёслэн фигураоссы вож турыно сузям интыосы пуктылэмын, «Динополисын» соос писпуос но куакъёс пӧлы юнматэмын. Со сяна, сьӧсьёс (ӟуч: хищники) но турын сиисьёс нимаз зонаосы интыямын, инкуазьын улоно условиоссэс адӟытыса.

Динозавръёс животъёслэн кузылы матын материаллэсь лэсьтэмын. Мугоразы котькуд вырӟемез шодӥсь датчикъёс пуктылэмын, куноос экспонатъёс доры матэктыку, «улӟо»: йырзэс берыкъяло-мыкыръяло, кырмышъяло, быжынызы сэзъяло но ыргето, куд-огезлы ву юыны программа пыӵатэмын. Котькуд модель вӧзы ивортонъёсын пул шуккемын. Озьы ик QR-код пыр аудиогид кутыны луэ.

Программаосыз

«Динополисын» калыкез шулдыртон программа куазез чакласа дасямын (зоро дыръя дождевикъёс сётӥсько). Валтӥсь ужрадъёс но нылпиослы представлениос сцена вылын ортчо, отчы аниматоръёс но робот-динозавръёс пырисько. Озьы ик программаын дышетонъя люкетэз вань. Кылсярысь, «Археологлэн школаяз» нылпиос динозавр лысьӧмъёсты утчаны, мастер-классъёсын горд сюйлэсь темая арбериос пӧрмытыны, банданаосты, гадьпусъёсты суреданы но мукетсэ лэсьтыны быгато.

Бадӟымгес арлыдо группаослы уй квестъёс ӵекто.

Инфраструктураез

Сюресъёсты кузяз югдытон понна подсветка юнматэмын^[6].

Пиналъёс понна бадӟым нылпи площадка лэсьтэмын, диноӟечыранъёс, диномашинкаос но мукет шудонъёс пуктэмын. Динозаврлэн пузэныз но тиранозаврлэн усьтэм ымыныз туспуксьыны инты радъямын.

Динозавр паркын фудкорт ӵектэ юонъёс, мороженой, сакыр вата, хот-догъёс но картошка фри. Котыраз сьӧросъёс ужало. Сувениръёсын магазинысь динозавръёслэн тусъёсынызы пӧртэм арбериосты басьтыны луэ: футболкаос, кепкаос, воштос пыдкутчанлы сумкаос, шудонъёс, конструкторъёс, книгаос но мукетсэ.

Корпоратив ужрадъёсты но нылпиослэсь вордскем нуалъёссэс ортчытъян вылысь чакламын корка кадь пукон интыос лэсьтыны.

«Динополисэ» Ижысь но элькунысь гинэ улӥсьёс уг — артысь каръёсысь но улосъёсысь туристъёс но вуыло. Парк экскурсиен группаосты но пумита.

Автомобилистъёс понна 85 интылы чаклам парковка но радъямын.

Кызьы вуоно

«Динополисозь» калык транспортэн вуыны луэ. Чугун сюрес вокзалысен (8,5 иськем) но Шор автовокзалысен (5 иськем) трамваен яке автобусэн мыноно «Киров нимо парк» дугдылонниозь.

Автомобилен Ижысь зоопарк доры мыноно но «Теремок» кафе пала паллянэ кожоно.