Михаил Федотовез буре ваён нунал
| Михаил Федотовез буре ваён нунал | |
|---|---|
 | |
| Дырыз | 7-тӥ коньывуонэ |
Михаил Федотовез буре ваён нунал(ӟуч: День памяти Михаила Ивановича Федотова) — Михаил Федотовлэн, бесерман кылбурчилэн, журналистлэн вордӥськем нуналыз. Пусйиське 7-тӥ коньывуонэ. 2024-тӥ арын Удмурт Элькунысь праздникъёс но буре ваён нуналъёс пӧлы пыртэмын.
Катӵектос
2024-тӥ арын 3-тӥ куарусёнэ Удмурт Элькунысь Кун Кенешлэн тӧроезлэн воштӥсез Татьяна Ишматова кивалтэм улсын, наукая, образования но граждан мерлыко институтъёсты азинтонъя ялан ужась ӧрилэн кенешонэз ортчиз. Отын «Удмуртиысь праздникъёс но буре ваён нуналъёс сярысь» Катэ воштэт пыртыны чаклам катӵектос эскеремын вал. Со катӵектосын ньыль буре ваён нунал юнматыны дэмламын. Со нуналъёс пӧлын ик Михаил Федотовез буре ваён нунал[1]. Удмурт Элькунын выль дэмлам нуналъёсты юнматонэз Удмуртиысь гожъяськисьёслэн огазеяськонзы, Чеберетъя министерство, Печатья агентсво но сӥё-дано муртъёслэн ӵыжы-выжыоссы умоен лыдъязы. Ялан ужась ӧри дэмлам катӵектосэз Кун Кенешлэн сессияз эскерон сярысь решение кутӥз. 2024-тӥ арын 7-тӥ коньывуон — Михаил Федотовлэн вордӥськем нуналыз Удмурт Элькунлэн буре ваён нуналъёсыз пӧлы пыртэмын но 2024-тӥ арын 23-тӥ куарусёнэ кутэм «Удмурт Элькунысь праздникъёс но буре ваён нуналъёс сярысь» катлэн 4-тӥ статьяяз воштонъёс пыртон сярысь 46-РЗ номеро катэн юнматэмын[2].
Вакчияк улон сюресэз
Михаил Иванович Федотов, нырысетӥез бесермян кылбурчи, вордскиз 1958-тӥ арын 7-тӥ коньывуонэ Яр ёросысь Ворча гуртын бадӟым бесермян семьяын. Ужаз «Советской Удмуртия» газетын корреспондент луыса. «Молот» журналын М.Федотов кивалтӥз поэзия но критика отделэн. 1983-тӥ арысен «Удмуртия» книгапоттоннилэн чеберлыко но нылпи литературая ёзэтаз, солэн кивалтӥсез луиз, ужаз редактор чотын. Издательствоын ужакуз ик поттӥз «Тӧдьы юсьёс берто», «Берекет», «Вӧсь» книгаоссэ. 1991-тӥ арын Москваын сое СССР-ыcь гожъяськисьёслэн огазеяськоназы куто. Нош 1988-тӥ арын М. Федотов Удмуртиысь комсомоллэн Флор Васильев нимо литературной премиезлэн нырысетӥ лауреатэз луэ[3] — «Берекет» книгаез понна (1988). 1990-тӥ арын «Отличник печати» знакен пусъемын. «Удмуртия» книгапоттонниысь кошкыса, М. Федотов «Кенеш» журналэ выжиз. (Отын ньыль толэзь гинэ ужаса вуттӥз) 1995-тӥ арын 6-тӥ куартолэзе Ижкарысь одӥгаз эмъяськонниысен малпамтэ шорысь солэн сюлэмыз ужамысь дугдӥз.
Пусъён ужрадъёс
2018-тӥ арын 7-тӥ коньвуонэ Михаил Федотовлы 60 арес тырмысал. Соин валче, трос сӥё-дано ужрадъёс ортчытэмын[4].
• Ижысь Йӧскалык лыдӟиськонниын «Мон сюлэмме кельто на кузьмаса» («Оставлю свое сердце вам в подарок») авторлэн книгаосыныз адӟытон радъямын вал.
• Ярысь ёрос культура юртын бесерман культуралы сӥзем «Шундыен шунтэм сэрег» («Согретый солнцем уголок») II кун фестиваль ортчиз.
• Удмурт кун филармониын Михаил Федотовлэн творчествоезлы сӥзем творческой ӝыт ортчиз. Сое радъян бордын тыршизы Удмурт Элькунысь культурая но туризмъя министерство, Йӧскалык политикая министерство, «Удмурт Кенеш» Огъяудмурт ассоциация, Калык творчествоя кун юрт, удмурт кун филармония но кун университет.
• 2022-тӥ арысен арлы быдэ ортчылэ Михаил Федотовлы сӥзем «Чеброс» музыкально-литературной фестиваль. Чеброс кыллэсь валатонзэ удмурт но ӟуч кылын вераны шуг. Бесерман калык, сюрес вылэ потыкузы «Я, вай Чеброс» шуыса келялляло. Озьы сюресчилы капчи сюрес но ӝог берытскон сӥзё[5].
• Кылбурчилэн ворӥськем нуналыз азьын, котьку счямен, мерлыко вотэсъёсын мылкыд карисьёс Михаил Федотовлэсь кылбуръёссэ лыдӟыло.
Валэктонъёс
- ↑ В Удмуртии предлагают установить четыре новые памятные даты
- ↑ Календарь. Федотов Михаил Иванович [ӟуч] Национальная библиотека УР. Эскеремын 19-11-2025 арын
- ↑ Михаил Федотов
- ↑ 03 октября 2018 Новости. К 60-летию Михаила Федотова
- ↑ Чеброс