Федотов, Михаил Иванович

Википедиысь материал
Эскерем гожтос
Михаил Иванович Федотов
Михаил Федотов.jpg
Вордӥськем дырыз 7-тӥ коньывуонэ 1958(1958-10-07)
Вордӥськем интыез
Кулон дырыз 6-тӥ куартолэзе 1995(1995-05-06) (36 арес)
Кулэмын
Кунмуртлыкез СССРFlag of the Soviet Union.svg СССР → РоссияFlag of Russia.svg Россия
Ужудысэз кылбурчи, журналист, корреспондент, редактор
Жанр поэзия
Гожъяськон кылыз удмурт
Нырысетӥ ужез «Тодьы юсьёс берто» (Белые лебеди возвращаются) (1986).
Премиосыз Ф. И. Васильев нимо Удмуртиысь Комсомоллэн премиез (1988)

Михаи́л Ива́нович Федо́тов (7-тӥ коньывуонэ 1958, Ворца[d], Удмурт Автономной Советской Социалистической Республика — 6-тӥ куартолэзе 1995, Иж) — удмурт кылбурчи, журналист но редактор, нырысетӥез бесерман гожъяськись. СССР-ысь гожъяськисьёслэн огазеяськонзылэн ёзчиез (1988).

Улон сюресэз

Михаил Иванович Федотов вордӥськиз 1958-тӥ арын 7-тӥ коньывуонэ Яр ёросысь Ворца гуртын бесерман семьяын. Школаын дышетскон аръёсаз ик гожъяськыны кутскиз. Флор Васильев солы «Гужем дыр» книгазэ кузьмамез бере, пияшлэн кылбур гожъян мылкыдыз ӧз бырылы ни. Ас дораз, бадӟым семьяязы нокин медаз люкеты шуыса, гур вылэ ватскыса гожъяське вылэм. Школазэ йылпумъямез бере Удмурт кун университетын кылосбуръя факультетын дышетскиз. 1980-тӥ арын гужем атаез улонысь кошкиз (Быдӟым Атыкай ожез ортчем мурт). Солы сӥзьыса, «Сьӧд куакаоc тодэ вайытӥзы. Сьӧд гу доры котыр султэм вужеръёсыз. Со вужеръёс выльысь улӟытӥзы атай понна бӧрдэм куараосыз» шуыса чуръёс гожтэ.

Университет бере Мишаез одӥг арлы армие басьтӥзы. Казаньын йыраз операция лэсьтоно луэ, собере висьыны кутскеменыз валче комиссовать каро. 1982-тӥ арын 6-тӥ толсуре Ворча гуртаз берытскиз. 1983-тӥ арын толшоре Анна Ефимоваен, нырысетӥ курсын дышетскыкуз тодматскем нылашен кузпалъяське[1].

Армия бере Федотов «Советской Удмуртия» газетын корреспондент луыса ужаз. УдНИИ-ын тодосчи луыса тыршыны малпа вал, ас бесермян калыкез сярысь тодослыко ужъёс, кыллюкамъёс лэсьтыны кутскиз ни вал (диплом уженыз). Но УдНИИ-е сое ужан интыос ӧвӧлэн уг куто. Наукаен тунсыкъяськем сяна, кылбуран удысэз азьпал радэ потӥз. 1983-тӥ арысен кутскыса «Удмуртия» книгапоттоннилэн чеберлыко но нылпи литературая ёзэтаз выже, солэн кивалтӥсез луэ, ужа редактор чотын. Издательствоын ужакуз ик «Тӧдьы юсьёс берто», «Берекет», «Вӧсь» книгаоссэ поттӥз.«Удмуртия» книгапоттонниын ужатозяз Михаил Федотов тросэзлэсь удмурт гожъясьёслэслэсь книгаоссэс тупатъяз, авторъёслы юрттэм сяна, ачиз но соослэсь дышетскиз. Пӧртэм аръёсы «Кенеш» журналын, «Советской Удмуртия» газетын тыршиз. Флор Васильев нимо премилэн лауреатэз луиз.

Кылбурчилы кема улыны ӧз кылды. Куамын куать аресказ улонысь кошкиз.

Творчествоез

Михаил Иванович улытозяз 3 кылбур бичет поттӥз: 1986 арын «Тӧдьы юсьёс берто», 1988 арын «Берекет» но 1991 арын «Вӧсь». Кулэмез бере кузпалыз но эшъёсыз 2 кылбур бичет люказы на: 1998 арын «Вирсэр — Пульс» но 2008 арын «Ӝуждала».

Нырысь книгаосызъя ик («Тӧдьы юсьёс берто», «Берекет») М. Федотов дано улосвылчиезлэсь Флор Васильевлэсь йылолъёссэ азинтыны тырше шуыса шӧдиськиз. Пумен солэн кылбуран дуннеез аспӧртэмлыко луиз. «Вӧсь» книгаын азьпал радэ потӥз удмурт литератураын та дырозь вылымтэ лирической герой. Со адями — трагической шӧмо; котырысь улон «сэрего» но «сьӧлыко» луиз бере, герой ассэ но"сэрего", «сьӧлыко» шуэ, сыӵе синмын ик дунне шоры учке («Шедьтӥ, лэся, аслым берпум сэрег…»). Озьы пӧрмытэ яркыт психологической суредъёс. Кылсярысь, «Мон пырисько кезьыт вуэ…» кылбурын меӵак гожтэмын: «Лушкем кужым кыске кужмо, / Маке лекез вырӟе пушкам», герой ас лул-сюлмысьтыз пеймыт-кезьыт кужымъёсты вормыны но шунтыны ӝутске. «Укмысэтӥ этажысен» кылбурын сопал но тапал дуннеослэн интыенызы воштӥськемзы озьы ик вапуммылы аспӧртэм дунъет луэ.

Оглом учконо ке, М. Федотовлэн кылбур книгаосаз куинь пӧртэм дунне возьматэмын. Одӥгез — уйпал Удмуртиысь вордӥськем палъёсыз, бесерман дуннелы матын, со «Берекет» книгаын возьматэмын. Кыкетӥез — туала город, кытын герой аслыз пырон инты уг шедьты, отысь пегӟыны тырше. Куинетӥез — асэныз кылдытэм дунне, «берпуметӥ сэрег», пуштросэзъя со миф дуннелы матын. Вашкала мифъёсты, осконъёсты выль сямен валэктэменыз ик Михаил Федотов тужгес аспӧртэмлыко луиз.

Кылбурчилэн тросэз малпанъёсыз быдэсмытэк кылизы. Соос пӧлысь одӥгез — бесерманъёслэн улонзы сярысь роман гожтон. Котьма ке но, туала лыдӟись, В. Л. Шибанов «Вапумъёс чигиськыку…» статьяяз, кылбур книгаосын тодматскыса но со романэз «шӧдыны» луэ шуыса вера. Сакгес гинэ учкыны, мургес малпаськыны кулэ.

Библиография

  • Кылбуръёс // Йыр вадьсын инбам: Егитъёслэн творчествозы. — Ижевск, 1984. — с. 56-57. (на удм. яз)
  • Тэдьы юсьёс берто. — Устинов, 1985. — 60 с.
  • Тӧдьы юсьёс берто: кылбуръёс. — Устинов: «Удмуртия», 1986. — 59 с. (на удм. яз)
  • Ымныртэм // «Молотлы» — 60. — Устинов, 1986. — С. 379.
  • Берекет: выль книга. — Ижевск: «Удмуртия», 1988. — 110 с.; ил. (на удм. яз)
  • Вӧсь. — Ижевск: «Удмуртия», 1991. — 144 с. (на удм. яз)
  • Вирсэр = Пульс: кылбуръёс = стихи. — [пер. с удмурт. Вл. Емельянова]. — Ижевск: «Удмуртия», 1998. — 216 с. — ISBN 5-7659-0725-3 (удмурт., рус. яз.)
  • Ӝуждала: кылбуръёс. — [вступ. ст. В. Л. Шибанова]. — Ижевск: «Удмуртия», 2008. — 175 с. — ISBN 978-5-7659-0522-7 (на удм. яз)
  • Дунне кутске дор палъёсын = Мир начинается от родного порога: кылбуръёс / Михаил Федотов; пер. В. И. Емельянова; худож. В. Е. Владыкина; [сост. И. В. Леонтьева; послесл. В. Трефилова]. — Ижевск: «Анигма», 2013. — 190 c.
  • Я жизнь свою не стану выпрямлять… : стихи / Михаил Федотов; [вступ. ст. Вячеслав Ар-Серги]. — Ижевск: «Известия Удмуртской Республики», 2013. — 36 с.
  • Берытскыны вуоз дыры: Кылбуръёс. [вступ. ст. В. Шибанов] — Ижевск: «Удмуртия», 2018. — 240 с. ISBN 978-5-7659-1004-7 (на удм. яз)

Цитатаос

Владимир Высоцкий, Олег Даль, Николай Ерёменко… Нош Владислав Галкинлэн малпамтэ шорысь быронэз сярысь ивор кылӥськем бере, пыд вылысьтым пограно кадь луи: мырдэмен пукон вылэ пуксьыса, пушкысьтым кытысь ке пыдлось чузъяськиз: «Ах! Миша…» Сыӵе огвыллемесь вылэм Соскваысь артистлэн но мынам бесерман эшелэн, Инмарен пусъем кылбурчилэн -Михаил Федотовлэн улон сюресъёссы… Быронэзлэсь азьпал (ар котыр) Михаил Федотов монэ вордӥськем Ворца гуртаз куное ӧтиз. Со котырынгес ик, кӧня ке иськемлы палэнын Кировен кунгож палан Бердыши гурт сылэ — Флор Васильевлэн вордӥськем гуртэз. Ас вакытаз со огшоры школьниклэсь Миша Федотовлэсь быгатонлыкъёссэ синйылтӥз но солэсь нырысь публикациоссэ бакель кариз. «Милям лымшор гожъяськись улосчиосмы лыдӟисез трос луэменызы паймыто, нош ми — Яр палась уйпалъёс, Флор но мон — ӟечлыкен, шуыса серем пыр вералляз Михаил Федотов, — тӥни Лёша Ельцов дыртэ ни юрттӥськыны. Озьыен, ми ӧжыт ке но — ми вань!»

— «Известия Удмуртской Республики». №33(3573) — 2010. — Ближние родники Михаил Федотов (1958-1995)[2].

…Мишалэн туж лэчыт визьмыз вал, ачиз ӟеч сямо дышетскем адями вал. Со сямыз семьяысь потэмын, анаез бордысь. Мон сое огпол кузь вераськонамы шӧдӥ. Со поэзиез туж юн валалляз, со сярысь нод-нод вераськылӥз, котькуд гожъяськисьлэн кулэлыксэ шӧдылӥз! Табере ваньзэс, корос дуриз сылӥсьёсты одӥг гинэ юан портэ: малы, малы ӧз быгатэ утьыны? Татын вераськон эмчиос сярысь ӧвӧл, соос ваньзэ лэсьтӥзы, мар быгатӥзы. Татын солэн матысь адямиосыз, эш-юлтошъёсыз сярысь. Ас вылысьтым но янгышме палэнтыны уг быгатӥськы. Мон но номыр ӧй лэсьты, солы юрттон вылысь, уго. Панихида мыныку одӥгезлэн эшезлэн, кылбурчилэн огназ луэмез сярысь, кылбурчиосты ум утиське, ум яратӥське шуыса кыл поттылӥз ке но, со быдэскыз зэмлык ӧй вал. Со понна мерлык, коллектив, вань чеберлыко интеллигенция нюръяськыны кулэ. Ог-огмы сярысь сюлмаськыса, юрттыны, ог-огмес урод сямъёслэсь но огнын кылёнлэсь утьыны кулэ. Медаз кошкылэ дырызлэсь вась быгатӥсь адямиос. Нош Миша Федотов ӵапак сыӵе адями вал, мукетъёс пӧлын ӧз шедьты аслыз пыкъет. Со Инмарен пусъем кылбурчи вал…

— Удмуртия. Выпуск «Удмурт дунне». — 1995. — № 77. — 20 мая.

Буре ваён

  • 2013-тӥ арын 15-тӥ коньывуонэ «Яр ёрос» администрацилэн кенешон бӧлетаз Михаил Федотовлы 55 ар тырмонэн валче «Михаил Федотов но бесерманъёс» нимо шаертодон конференци ортчытэмын вал[3][4].
  • 2018-тӥ арын 1-тӥ коньывуонэ Удмурт Элькунысь Йӧскалык лыдӟиськоннилэн шаертодонъя но йӧскалык литературая ёзэтаз «Мон сюлэмме кельто на кузьмаса» («Оставлю свое сердце вам в подарок»), М. И. Федотовлэн вордскем дырысеныз 60 ар тырмонлы сӥзьыса, книгаосын адӟытон усьтэмын вал[5].
  • 2018-тӥ арын 7 коньывуонэ Яр каргуртысь «Юбилейный» культура юртын бесермян культуралы но Михаил Федотовлы 60 ар тырмемен валче «Шундыен шунтэм сэрег» («Согретый солнцем уголок») II элькун фестиваль ортчиз.
  • 2018-тӥ арын 8-тӥ коньывуонэ Удмурт кун филармониын Михаил Федотовлы сӥзем чеберлыко ӝыт ортчиз.
  • 2022-тӥ арын 7 коньывуонэ Яр ёросысь Ворца гуртын нырысьсэ ортчытэмын бесермян кылбурчилы сӥзем литературно-музыкальной фестиваль «Чеброс»[6].
  • 2024-тӥ арын 3-тӥ куарусёнэ Удмурт Элькунысь Кун Кенешлэн тӧроезлэн воштӥсез Татьяна Ишматова кивалтэм улсын, наукая, образования но граждан мерлыко институтъёсты азинтонъя ялан ужась ӧрилэн кенешонэз ортчиз. Отын «Удмуртиысь праздникъёс но буре ваён нуналъёс сярысь» Катэ воштэт пыртыны чаклам катӵектос эскеремын вал. Со катӵектосын ньыль буре ваён нунал юнматыны дэмламын. Со нуналъёс пӧлы ик пыртэмын Михаил Федотовез буре ваён нунал[7]. Озьы 7-тӥ коньывуон — Михаил Федотовлэн вордӥськем нуналыз, Удмурт Элькунлэн буре ваён нуналъёсыз пӧлы пыртэмын но 2024-тӥ арын 23-тӥ куарусёнэ кутэм «Удмурт Элькунысь праздникъёс но буре ваён нуналъёс сярысь» катлэн 4-тӥ статьяяз воштонъёс пыртон сярысь 46-РЗ номеро катэн юнматэмын[8].

Литература

  • Самсонов Е. Сюлэме мур пычало // «Советской Удмуртия». — 1986. 4 апр. (на удм. яз)
  • Лаптев А. Сюресъёс дыртыто азьлане // «Молот». — 1986. — № 5.С.56-57. (на удм. яз)
  • Шкляев А. Араны егит муртъёс лыктозы. — Устинов, 1986. С. 147—149. (на удм. яз)
  • Ромашов В. Первая книга // «[дмуртская правда». — 1987. — 25 апр.
  • Хузангай А. Право на наследство: Молодая фин.-угор. поэзия Поволжья и Приуралья // «Дружба народов». — 1988. — N2 9. С.223-226.
  • Шкляев А. С ориентацией на будущее // «Вопросы литературы». — 1988. N2 12. — С. 79-80.
  • Васильев С. Воринъяло лысву инзыос // «Молот». — 1989. — N2 2. С.54-56.
  • Шибанов В. Кылбурлэн паймымон дуннеез. — Ижевск, 1994. С. 79-80.
  • Макарова Е. Тыныд гинэ усьто мон сюлэмме… // «Кенеш». 1997.-N25.-C.60-61.
  • Ильина Н. Мифологические мотивы в лирике удмуртского поэта М. Федотова // Гуманитарное знание на пороге XXI века. — Ижевск, 1997. — С. 98.
  • Ар-Серги В. «Нош кошкиз со чебер нуналэ» // «Удмурт дунне». 1998. — 8 окт.
  • Ильина Л. «Озьы со висёнэ, васе мынам бардэ» // «Кенеш». 1999. — N2 3. — С. 53-56.
  • Загребин Е. Чеброс // «Инвожо». — 1999. — № 1/2. — С. 30-33.
  • Шибанов В. Уходящее уходит в будущее // Движение эпохи движение литературы: Удм. лит. XX в. — Ижевск, 2002. C.190-196.
  • Клементьев А. Образ бесермянского этноса в поэзии М. Федотова // Язык и общество. — Ижевск, 2004. — Вып. 1. — С. 86-88.
  • Сабиров Р. Всё течёт, но не изменяется // «Луч». — 2004. — N2 9110.с. 9-16; Ащальчи. — 2003. -N2 5. — С. 6-10.
  • Ильина Н. Художественный мифологизм бесермянского поэта М. Федотова в контексте удмуртской литературы 1980—1990-х годов (Диссертация). — Ижевск, 2005.

Тунсыко зэмослыкъёс

  • Михаил Федотов бур киыныз гожъяськем, нош суредны но мар ке лэсьтыны ке ― палляныныз. Ассэ серекъяса «бесермян-еврей» шуылэм[9].

Валэктонъёс

  1. ↑ Михаил Федотов [ӟуч] Институт удмуртской филологии, финно-угроведения и журналистики. Эскеремын 19-11-2025 арын
  2. ↑ Ближние родники Михаил Федотов (1958-1995)
  3. ↑ Краеведческая конференция «Михаил Федотов и бесермяне».
  4. ↑ Конференцию в Удмуртии посвятят культуре бесермян, наследию поэта Михаила Федотова и памяти Владимира Завалина.
  5. ↑ Книжная выставка к 60-летию со дня рождения поэта Михаила Федотова
  6. ↑ Чеброс
  7. ↑ В Удмуртии предлагают установить четыре новые памятные даты
  8. ↑ Календарь. Федотов Михаил Иванович [ӟуч] Национальная библиотека УР. Эскеремын 19-11-2025 арын
  9. ↑ «Сельская правда»: Неземной поэт. 11 октября 2013
«https://udm.ruwiki.ru/w/index.php?title=Федотов,_Михаил_Иванович&oldid=444929»-ысь басьтэмын