Прокопьев, Максим Прокопьевич

Максим Прокопьевич Прокопьев
Вордскем дырыз	19-тӥ толшоре 1884(1884-01-19)
Вордскем интыез	Нырья, Ядыгерской волость, Мамадыш уезд, Казанской губерниын, Росси империя
Кулэм дырыз	30-тӥ инвожое 1919(1919-06-30) (35 арес)
Кулэм интыез	Кунгурын
Кунмуртлыкез	Росси империя Росси империя РСФСР РСФСР
Ужудысэз	революционер, кылбурчи, кылысь кылэ берыктӥсь
Дышетскемез	Казанская учительская семинария[d]
Партия	РСДРП (1917-тӥ арысен)
Валтӥсь малпанъёсыз	большевизм
Атаез	Прокопий Петрович
Анаез	Аграфена Васильевна
Супруга	Прокопьева, Евгения Васильевна
Нылпиез	Геннадий, Людмила

Максим Прокопьевич Прокопьев (19-тӥ толшоре 1884 Нырья черкогурт Ядыгерской волость, Мамадыш уезд, Казань губерния — 30-тӥ инвожое 1919, Кунгур) — удмурт гожъяськись, революционер, большевик, Граждан оже пыриськем мурт, удмурт кунлыкез кылдытӥсьёс пӧлысь одӥгез. Кылбурчи, дышетӥсь но югдытӥсь, «Интернационалэз» нырысьсэ удмурт кылэ берыктӥз.

Биографиез

Вордӥськиз трос нылпиё крестьян семьяын Кузон губерниысь Мамадыш уездысь Ядыгерской волостьысь Нырья черкогуртын 19-тӥ толшоре 1884-тӥ арын.

Пинал дырысен ӟуч, удмурт, башкир но бигер кылъёсты тодылӥз. Нырысь земской школаын дышетскиз, собере Карлыганысь удмурт школаын но Кузонысь инородческой учительской семинариын.

Удмурт гуртъёсысь земской школаосын дышетӥсь луыса ужаз — Каймашабашын, Каплыын (али Башкириын) но Верхний Гондыр (али Перм шаерын).

Семинариын дышетскыкуз ик политика удысэн герӟаськиз. 1914-тӥ арын армие басьтэмын. 1917-тӥ арын тулыс фронтысь Перм губерние берытскыса, РСДРП(б) партие пыриз. Мыло-кыдо пыриськиз Совето власть кылдытонэ, Перм губерниысь Осинской уездысь Депутат Кенеше быръемын вал.

1918-тӥ арын инвожо толэзе Елабугаын Прокопьев кивалтэм улсын удмуртъёслэн нырысетӥ Огъяросси съездзы ортчиз, 1919-тӥ арын южтолэзе — Сарапулын удмуртъёслэн кыкетӥез Огъяросси съездзы.

1919-тӥ арын 3-тӥ инвожоысен Москваысь РСФСРН-ысь наркомнацлэн Вотской ёзэтэныз кивалтыны кутскиз. Вотской автономной областез кылдытон сяна, удмурт кылын книга но газет поттон уж нуиз. Автономи улослэсь Конституциезлэсь катӵектоссэ дасяз но автономилэсь вадесгожъёссэ пусйиз.

Колчак арми Удмуртиысь уйпал ёросъёсты басьтэм бере доброволец чотын Шундыӝужанпал фронтэ кошкиз но 1919-тӥ арын 30-тӥ инвожое Кунгур котырын Ирень шур дурын ожмаськонын бырыны шедиз.

Литератураын но публицистикаын интыез

Прокопьев революци малпанъёсты ӟуч кылэз тодӥсьтэм удмурт крестьянъёс пӧлын вӧлмытыны тыршиз, литератураен тодматон уж нуиз. Нырысетӥ Дунне ож вакытэ «Интернационалэз» удмурт кылэ берыктӥз. Собере Пушкинлэсь «Сказка о попе и о работнике его Балде» выжыкылзэ берыктӥз.

Улон дыръяз М. Прокопьевлэн удмурт кыллэн камсьӧр вераськетэныз гожтэм кылбуръёсын но публицистической гожтосъёсын одӥг книгаез потӥз — «Максимлэн гожтэмез» («Написанное Максимом»), поттэмын Оса карын 1919-тӥ арын. Отчы пыртэм кылбуръёс Библия но христиан литература вылэ пыкиськыса гожтэмын.

Буре ваён

2020-тӥ арын Удмурт Элькунлэн Кун Кенешез М. П. Прокопьевлэсь вордӥськон нуналзэ элькунлэн буре ваён нуналъёсыз пӧлы пыртӥз. Максим Прокопьевлэн нимыныз Нырья черкогуртысь школа нимамын, озьы ик Кукмор карын солэсь нимзэ нуллӥсь ульча но пролка вань

Источникъёс

• Павлов Н. П. Максим Прокопьев : документальный очерк. — Ижевск : Удмуртия, 1993. — 159 с. : портр., фото. — (Навечно в памяти народной). — ISBN 5-7659-0438-6
• Никитин А. И. Максим: страницы из жизни трибуна, революционера. — Ижевск, 1973. — 288 с.
• Забытые имена: Максим Прокопьев. (1884—1919)
• Прокопьев Максим Прокопьевич (1884—1919)
• Поэт-большевик Прокопьев Максим Прокопьев (1884—1919)

Валэктонъёс