Обухов, Павел Матвеевич

РУВИКИ энциклопедиын таӵе фамилиен муртъёс сярысь мукет гожтосъёс вань.Учке Обухов.

Павел Матвеевич Обухов
Вордӥськем нуналыз	11‑тӥ (23-тӥ) шуркынмонэ 1820
Вордӥськем интыез	Вотка, Сарапул утем, Ватка губерния, Росси империя[d]
Кулон нуналыз	13‑тӥ (25-тӥ) толшоре 1869 (48 лет)
Кулэм интыез	Пятра[d], Орхей ёрос[d], Орхей уезд[d], Бессараб губерния[d], Росси империя[d]
Кун	Росси империя[d]
Ужудысэз	металлург, инженер, тодосчи
Данъетъёсыз
Медиафайлъёс РувикиМедиа пушкын

Па́вел Матве́евич Обу́хов (11‑тӥ (23-тӥ) шуркынмонэ 1820, Вотка, Ватка губерния — 13‑тӥ (25-тӥ) толшоре 1869, Пятра^[d], Бессараб губерния^[d]) — горной инженер, металлург, ӟуч дворян выжыысь действительной статской советник. Россиысь андан ӵыжатон удысэз но корт пыӵал гумыосты кылдытӥсь.

Улон сюресэз

Вордӥськиз Вотка завод каргуртын, заводысь шихтмейстерлэн Матвей Фёдорович Обуховлэн семьяяз. Павеллэн атаез ужан удыссэ кутскиз 1801-тӥ арын Камско-Воткинской заводъёсын канцелярист луыса. Аслаз быгатонлыкъёсыныз старшой мастере потӥз. 1822-тӥ арысен Гороблагодатской горной округысь Серебрянской чугунолитейной заводын ужаз, ас дышетскемезъя ӟеч механик луиз. Татын завод ӵыпетлэсь выжы конструкцизэ но вуэн ужась двигательёссэ тупатӥз. Та ужез азинлыко быдэстэмез понна, технической образованитэм луэмзэ лыдэ басьтытэк, Матвей Фёдоровичез горной инженер ужудысэ выжтӥзы. 1835-тӥ арын со майор чинын Кушвинской заводэн кивалтыны юнматӥзы (али Свердловск улос. Отставкае капитан чинэн потӥз, Воткалась чугунолитейной заводэн кивалтыны кутскиз.

Павел пинал дыръяз ик быгатонлыкъёссэ шӧдӥз но инженер уж борды кыстӥськиз: куать арескысен ӵыпетъёслы, вуэн ужась двигательёслы, дуриськон чекычъёслы, гуръёслы чертежъёс лэсьтылӥз. 12 аресаз (1832-тӥ арын) со Петербургысь горной инженеръёслэн корпусссылэн инеститутаз дышетскыны пыриз. 1843-тӥ арын сое бадӟым зарни медален йылпумъяз. Отын «дышетскисьёс пӧлысь тужгес устоез» шуыса пусъемын; огвакытэ ик поручик чин басьтӥз.

Инженер луыса, Санкт-Петербургысь Гороблагодатской заводъёсы кошкиз. 1844—1846-тӥ аръёсы Серебрянской заводын смотритель луиз; та интыуж егит ӧнерчилы кельшымтэен, со Горной инженеръёслэн корпуссылэн штабеныз кык арлы кунсьӧрын Германиын но Бельгиын горнозаводской ужъёсъя выль ужан амалъёсты дышетыны, уката ик механикаез кутыса корт но ыргон поттонэз радъянлы, тупанкыл гожтӥз. Со понна Обуховлы ведомствоын одно ик куать ар служить карыны кулэ вал. Кык арзэ кун сьӧрын ортчытыса, 1848-тӥ арлэн кутсконаз со Россие берытскиз. Ньыль толэзьзэ Петербургын улӥз, аслаз ветлэмез сярысь отчёт дасяз но куарусён толэзе Серебрянской заводэ вуиз. Со ар пумын ик Кувшинской заводэн кивалтыны юнматӥзы но штабс-капитан чин сётӥзы. Татын куинь ар ӵоже служить кариз.

Татын ужакуз ик Обуховлэн, П. П. Аносовлэсь тодос кельтоссэ берентыса но та ӧрез эскоронэз азьланьтыса, пыӵал лэсьтонын ӵыжатэм анданэз кутон сярысь малпанэз вордӥськиз. Соку егит изобретатель котыраз быгатӥсь муртъёсты люкаса, уж борды басьтӥськиз. Но материально-технической инъетлэн ляб луэменыз, малпам ужзы шуген сётӥськиз.

1851-тӥ арысен, Юговской металлургической заводэн кивалтон вакытаз (али Пермь шаер), Обухов эскеронъёс ортчытъян борды мыло-кыдо басьтӥськиз. Соку ик егит но быгатӥсь шонерлыко инженер сярысь вераськонъёс шоркарозь вуизы.

Одӥг цементной яке сырцовой кортэз ӵыжатыса, пӧртэм чурытлыко корт пӧрме шуыса валатскемез бере, ӵыжатэм анданэз, кыӵе кулэ, сыӵе мед луоз шуыса (чурыт, юн, чидась но мукет), Обухов сплав пушказ магнитной железняк ватсаны малпаз. 1853-тӥ арын, трос эскеронъёс ортчытъямез бере, со ¾ пасьталаем корт пластина кылдытыны быгатӥз, сое пыӵалэн ыбылыса но пасяны уг луы, нош со вакытэ Златоуст заводын (али Челябинск улос) поттэм кирасъёс кык поллы зӧкесьгес вал ке но, со пӧлысь 30 % ярантэм луэ вал.

1854—1855-тӥ аръёсы Крым ожын Севастополь понна геройлыко ожмаськон возьматӥз, макем вужмизы азьвыл дыре ӟуч артиллерилэн данъяськымон вольыт гумыё узвесь пушкаосыз.

Кортлэсь лэсьтэм ӟуч пушка

1854-тӥ арын Обуховез Златоуст каре Златоустовской оружейной фабрикаен кивалтыны выжтӥзы. Со вие татын кортэз ӟырдатытэк ожтӥрлык потто вал, Обухов азе тылын ыбылӥськись пыӵалтӥрлык поттонэз радъян ужпум пуктӥзы. Выль производствоез радъян понна юн андан кулэ вал. Татчыозь сое кунгож сьӧрысь басьяса вайылӥзы. Обухов тигельной амалэн андан ӵыжатон эскеронъёссэ йылпумъяса, кортэз выль технологиосъя ӵыжатыны дэмлаз.

1857-тӥ арын Павел Матвеевич аслаз амалызъя кылдытэм вылӥ ӟечлыко тигельной корт поттонлы патент басьтӥз. Та амаллэн аспӧртэмлыкез «тигельной процессын корт рудаез кутонэн герӟаськемын вал, кутӥськись материалъёсын углеродлэсь кӧня луэмзэ чакласа, яланлыко составен ӵыжатэм корт поттыны луоно». Та этапез йылпумъяса, гумы поттон борды басьтӥськыны луонлык кылдӥз.

Нырысетӥ эскеронэз пыӵал гумыос вылын ортчытӥзы. Котькуд ыбемен дары зарядэз йылэтылӥзы. Златоуст пыӵалъёс тушмонлэсь трослы кужмолыко луэмзэс возьматӥзы: тямысэтӥ зарядэн крупповской пыӵалъёс юдэсъёслы пазьгиськылӥзы, нош златоуст пыӵалъёс дас ньыль зарядэз чидазы. Обуховской гумыез быдэсак пазьгон понна йылэтэм зарядэн зарядить каризы, гумызэ пумозяз пуляосын тырмытӥзы. Куроксэ зӥбысэ, пыӵал ӧз ыбы, казённой люкетэз гинэ тӥяськиз, нош гумыез быдэсак кылиз. Азинлыко эскерон корт пушка гумыосты ӵыжатон борды басьтӥськыны луонлык сётӥз.

Ведомство быдэстэм ужез вылӥ дунъяз но Обуховлы выль кылдытосэзлы патент сётӥз. Со сяна, сое кунсьӧр командировкае келязы но уждунэз борды арлы быдэ 600 манет ватсаса тыризы. Подполковник чин сётӥзы но Вӧсьлыко Станиславлэн 3-тӥ степенё орденэныз пусйизы. Со арын ик Обухов ӝыны арлы Германие кошкиз, берытскемез бере, эскеронъёсыз вылэ инъяськыса, Россиын корт пыӵалтӥрлык поттонлы пыр-поч проект дасяз (Эссен, Германия), со понна Обухов Вӧсьлыко Анналэн 3-тӥ степенё орденэныз пусъемын вал.

Та уж кун понна туж кулэлыко луиз, соин вылӥ ӟечлыко андан ӵыжатонлэн азинскемез сярысь ялан Александр II ивортылдӥзы. Пыӵалтӥрлыкез эскеронъёсты ортчытон пумысь император ачиз косэтъёс сётъялляз. Со эскеронъёс Санкт-Петербургын Волково полигонын ортчытъяськылӥзы, вылӥ кивалтэтлэн чакламез улсын. Со арын сӥзьыл полигонэ куинь пыӵалтӥрлык вайыса, огзэ гинэ эскеризы. Полигонын крупповской, английской н обуховской кортлэсь лэсьтэм ожтӥрлыкъёсты ӵошатӥзы. Эксперимент шонерлыкогес мед луоз шуыса, златоустовской пыӵалтӥрлыкез кунсьӧрысь ваемъёсызлы тупась мурдалаё пасязы. Собере лыдъязы — кӧня пол ыбемез чидалоз эскероно пушка. Эскеронъёс пумын тодмо луиз, кунгож сьӧрысь ваемъёсыз кык сюрслэсь трос ыбемез ӧз чидалэ, нош обуховской кортлэсь лэсьтэмъёсыз кык поллы юнгес луэмзэс возматӥзы — 1860-тӥ арын 26-тӥ шуркынмонысен 1861-тӥ арын 8-тӥ оштолэзёзь ортчем дыр куспын со пушкаысь 4017 пол ыбемын вал.

Ньыль сюрсэтӥзэ ыбон нуналэ полигонэ ачиз Александр II вуиз, императорлэн пушка пумысен чидалоз-а шуыса юанэзлы, П. М. Обухов, со вылэ пуксьыса, юбилейной ыбонэз возьманы дэмлаз.

Златоустын поттэм пушка ӟечлыкезъя но юнлыкезъя Крупплэн Вестфалиын поттэмъёсызлэсь трослы устогес луиз. Со сяна, Обуховлэн ӵыжатэм кортэзлэсь лэсьтэмъёсыз трослы дунтэмгес усизы: обуховской кортлэн пудэз понна казнаысь 16 манет сётоно вал, нош, крупповскоез понна — 45 манет (сюрес дунэз лыдэ басьтытэк); англи пушкаос эшшо но дуноесьгес вал.

Обуховлэн мытэм ужез ӵыжатэм кортэз пушка гумы лэсьтонын кутӥськемезлы кутскон сётӥз но та чылкак выль технология асьме артиллерилэн истрияз выль вамыш луиз.

1861-тӥ арын Обухов Валтӥсь артиллери управлениысь Учёной Артиллерийской комитетэ член-корреспондентэ быръемын. 1861—1863-тӥ аръёсы Златоустовской заводъёслэн горной кивалтӥсьсы луиз. Полковник чин сётэмын но Вӧсьлыко Владимирлэн 4-тӥ степенё орденэныз пусъемын. Со сяна, Обуховлы сортовой кортлэн котькуд пудэз понна 35 копейка тырылӥзы, солы луыса ик узырмиз. Эскеронъёс ортчытэм бере, Санкт-Петербургын Обухов Н. К. Краббе адмиралэн Уралын зарезь пыӵалтӥрлык поттонэз радъян сярысь кенешиз.

Округен кивалтӥсь Обухов азе выль фабрика пуктон ужпум пуктӥз. Дась лэсьтэм пушкаосты нуыны-вайыны секыт луоз шуыса, со Златоуст выллем кыдёке интыяськем каръёсын пушка поттонэз радъянлы пумит луиз: Бирскысь пристанёзь вал вылын, отысен Белая шур кузя нуон-ваён иськемлы быдэ пушкалэсь дунзэ будэтоз. Та аргументъёс заказчиклэсь мылкыдзэ ӧз воштэ, соос пӧлын вал генерал-фельдцейхмейстер, императорлэн дядяез, солэн одно ик Златоустын пушка поттон завод ӝутэмез потӥз. 1850-тӥ ар пумын Обухов артиллерилы корт ожтӥрлык поттонъя Князе-Михайловской фабрика ӝутонъя проект лэсьтӥз. 1859-тӥ арын Златоустын сталепушечной фабрика кылдытэмын, 1860-тӥ арын со ужаны кутскиз; отын пушкаослы корт ӵыжатӥзы, солэсь берло гумыослы болванкаос кисьтылӥзы, отӥзэ вань ужъёсты (пасян, вандылон, шӧрон но йылпумъян ужъёс) Санкт-Петербургысь «Арсенал» заводын быдэсъяллязы.

Кортлэсь кисьтэм пушкаос Россиын нырысьсэ кылдытэмын вал (cолэсь азьвыл пушкаосты Германиын гинэ поттылӥзы — Крупплэн заводаз поттэм тодмо луэм пушкаос, быдэс дуннеын тужгес юнъёсыныз лыдъяськылӥзы). Князе-Михайловской фабрикалы Быдӟым князьлэн Михаил Николаевичлэн нимыз сётэмын, со мыло-кыдо пыриськиз Россиын стале-пушечной производствоез азинтонэ. Фабрикаын сырцовой, сталелитейной но сверлильной ёзэтъёсыз ужазы. П. М. Обуховлэн амалэз вылӥ ӟечлыко ӵыжатэм корт поттыны луонлык сётӥз

Со кортлэсь кирасаос, клинокъёс, ужан тӥрлык, пыӵал гумыослы отливкаос лэсьтылӥзы. 1860-тӥ арысен фабрика нырысьсэ Россиын 4 фунтъем корт пушкаос поттыны кутскиз. Обуховлэн корт пушкаез, кудӥз 4000-лэсь трос ыбемез чидаз, 1862-тӥ арын Лондонын дунневыл адӟытонын вылӥ данъетэн — зарни медален пусъемын вал. Тодмо луэм пушка пырак азелы возьыны кельтэмын вал; али со Санкт-Петербургысь Артиллерилэн военно-исторической музеяз сылэ. Пушкалэн гумыяз гравировка лоэсьтэмын: «Отлита в 1860 году на Князе-Михайловской фабрике из стали Обухова. Выдержала более 4000 выстрелов».

XIX даурлэн кыкетӥ ӝыныяз Обуховлэн пушка кылдытэмез кунлэсь ожгар кужмолыксэ ӝутӥз но Россиез ожгар державаос пӧлын нырысетӥ интые поттӥз. Златоустын пушка поттон удыс ляб азинскемен, корт пыӵалтӥрлык поттонэз Пермь заводын (татын со паськытаса валтӥсьёсыз пӧлысь одӥгез луиз) но Санкт-Петербургын азьланьтӥзы. Соберегес ик Обухов аслэсьтыз эскеронъёссэ азьланьтӥз но ӝоген вить пӧртэм ӵыжатэм корт поттыны быгатӥз. Солы луыса, дуно дунын басьтэм англи кортъёсты басьтонэз быдэсак палэнтӥз (обуховской кортлэн дуныз 5—7 поллы дунтэмгес). Эскеронъёс возьматӥзы — обуховской корт, крупповскоеныз но английскоеныз ӵошатыса, трослы ӟечлыкогес луэ. Кылсярысь, обуховской кортлэсь лэсьтэменыз ку посон струген кык сюрслэсь трос куосты волятыны луэ, нош англи кортлэсь лэсьтэмез — тямыстонлэсь троссэ уг воляты.

1861-тӥ арын 12-тӥ куарусёнэ эскеронъёслэн пумкылъянъёсызлы шумпотэменызы, П. М. Обухов но бадӟым промышленник но ужбергатӥсь Н. И. Путилов куспазы «Артиллери тӥрлык поттонын кутӥськись ӵыжатэм корт поттонэз азинтон но паськытатон сярысь» огкыл юнматӥзы.

Обухов нимо завод кылдытон

Флотлы ожтӥрлык поттон югдурез эскерыса, ужпумез сэрттон-пертчонэ Н. К. Краббе адмиралэз но Кун Кенешлэсь ёзчизэ граф Е. В. Путятинэз кыскиз. Со ик, Высочайшей указъя «особой» но «секретной» нимазъям комитетэз йыръяз.

Коня ке нунал кенешемез бере, 1862-тӥ арын куартолэзь пумын Комитет таӵе пуктэт кутӥз:

«… Считаем насущной необходимостью… закладку под Санкт-Петербургом нового… завода, способного изготовлять большекалиберные орудия литой стали полковника Обухова для вооружения флота и крепостей…».

Н. К. Краббе но Е. В. Путятин адмиралъёслэн тыршеменызы, флотлы пушкаос поттонъя выль корт ӵыжатон завод пуктыны кутскемын. Но со вакытысь имперской законъёсъя, артиллери ожтӥрлык поттон ужпумъёсын (сухопутной но зарезь) Горной департамент вырыны кулэ вал. Департамент улсатӥське Коньдон ужпумъёсъя министерстолы. Со вакытэ министерствоен кивалтӥз М. Х. Рейтерн, со ик проектэз дугдытӥз. 1861-тӥ арын куартолэзе Обухов Валтӥсь артиллери упраленилэн учёной артиллери комитетаз член-корреспондентэ юнматэмын вал.

1861—1863-тӥ аръёсы дано металлург вань Златоуст заводъёслэн горной начальниксы луиз, 1863-тӥ арын Вӧсьлыко Анналэн 2-тӥ степенё орденэныз пусъемын. Собере ик Зарезь министерстволэн висъям уксёеныз выль пуктӥськись сталепушечной заводлэсь ужзэ радъяны Санкт-Петербурге ыстэмын вал. 1863-тӥ арын Обухов «товарищество П. М. Обухова» дэменлык кылдытӥз, отчы пыризы росси ужбергатӥсьёс П. М. Обухов (техника но кадръёсъя ужпумъёсты вылаз басьтӥз), Н. И. Путилов (административной палзэ) но купец С. Г. Кудрявцев (проектэз финансировать каронэз).

Со арын ик товарищество кун заказ басьтӥз:

… 4 мая 1863 года Морское Ведомство решило гарантировать учредителям пушечного завода заказ на сумму 100 000 руб. (42 000 пудов) готовых нарезных орудий из стали Обухова с выдачей им вперед 500 000 руб. под залоги, требуя исполнения сего заказа в четыре года…

Та заказэз быдэстэмзы берегес Путилов принц Ольденбургскиен кенешемез бере, принц товариществолы 72 арлы азьвыл Александровской мануфактуралэсь интывылзэ сётӥз. Со инты кар заставалэсь 12 иськемын Нева шур дурын Николаевской чугун сюреслы матын интыяськемын вал. Татын 1863-тӥ арын 16-тӥ куартолэзе товарищество андан ӵыжатонъя бадӟым завод инъяз — Обухов нимо завод (1917-тӥ арын ортчем Октябрь революции бере заводлы «Большевик» ним сётӥзы), соин кивалтӥз Обухов. 1863-тӥ ар пумозь кык бадӟым из корпусъёс ӝутэмын вал, отын кортлэсь орудийной болванкаос поттыны инты дасямын, механической станокъёс заказать каремын, нырысь ӵыжатонлы тигльёс дасяны кутскемын. Заводэ ужаны Златоустысь ӧнерчиосты ваизы.

Завод ужаны кутскиз 1864-тӥ арын 15-тӥ (27) оштолэзе. Министерствоысь огмуртъёслэн чакламзыя заводэз инъясьлэн П. М. Обуховлэн кивалтэмез улсын сӥё-дано кисьтэмын нырысетӥез андан. Кык арня ортчыса, цехе вуиз государь но ачиз чаклаз 96 пудъем корт болванкаез кисьтонэз. Правительственной кредит 1864-тӥ арын сӥзьыл быдтэмын вал, коньывуон толэзе Обухов, Путилов но Кудрявцев Зарезь ведомствоен кивалтӥсьлы ватсаса 460 сюрс манет ссуда сётыны куронэн вазиськизы. Краббе, ужлэсь кулэлыксэ валаса, уксё сётӥз, но дэменлыклэн тыриськонэз 1,5 миллион манетозь будэмен, завод ужъёсты чакланэ ачиз Зарезь ведомство пыриськоно луиз.

Зарезь ведомствое выжон

1865-тӥ арын толшорысен товариществоен кивалтыны юнматэмын вал капитан-лейтенант (берло генерал-лейтенант) А. А. Колокольцев, Обуховлэн «техника люкетъя» юрттӥсез луиз зарезь артиллерилэн полковникез Р. В. Мусселиус. 1865-тӥ арын сӥзьыл товарищество куашказ: Путилов кызьы ке но кредит басьтыны быгатыса, аслэсьтыз ужъюртсэ усьтӥз (вуоно Путиловской завод), нош коммерци ласянь советник С. Г. Кудрявцев чахоткалэсь кулӥз.

1867-тӥ арын нырысетӥ барыш поттэмын вал, 1870-тӥ арын Мануфактурая огъяросси адӟытонын ужбергатон «достойным награждения правом употребления на вывесках и изделиях изображения Государственного герба — за водворение в короткое время производства больших стальных орудий, валовую их выделку и рациональное ведение дела» шуыса пусъемын.

1868-тӥ арозь Павел Обухов заводысь металлургической производствоен кивалтӥз, огдыре андан ӵыжатон выль амалъёс утчаз, эскеронъёс ортчытъяз. Со арын ик инженерлы действительной статской советник титул сётэмын.

Берпум аръёсыз

Обухов заводэз пуктон луонлыкъёс Златоуст заводэн ӵошатыса, туж пӧртэмесь вал. Нырысь-валысь выль заводэз ӝутон планлэсь беромыса азинтӥськиз. Обуховлы ялан уксё куроно луылӥз, берло уксё пумысен секытгес луиз. Заводэз пуктон но пушкаослы корт поттонэз радъян понна Павел Матвеевичлэсь трос кужымзэ но ӟигарзэ быдтӥз. Тазалыкез лябомиз. Соин сэрен, инженерлы отставкае потоно луиз, заводысь кошкиз. 1868-тӥ арын сӥзьыл со тазалыксэ юнматыны кунгож сьӧры кошкиз, но беромеменыз, чахотка юнгес аляз.

Обухов кулӥз 1-тӥ (13) толшоре 1869-тӥ арын Пятра нимо бессараб гуртын. Обуховлэн шӧйыз Санкт-Петербурге ваемын но 4-тӥ тулыспалэ Александро-Невской лавраысь Никольской шайвылэ ватэмын.

Обуховлэн шайгуэз Санкт-Петербургысь федерал инлыкен истори но лулчеберет кельтосъёсын лыдметэ пыртэмын

Металлурглэн духовной завещаниезъя, солэн паезлэн бадӟым люкетэз завод эмъяськонни, пересь ужасьёслы богадельня, школа пуктонлы но мастеровойёслэн техникая вылӥ дышетсконниосы пырем нылпиоссылы стипендия тырыны сӥземын.

Карьераезлэн усемез

1862-тӥ арын, Златоустын ужакуз, корт кисьтонлэн ляб интыосыз шӧдӥськыны кутскизы ни вал: котькуд витьтон пушка пӧлысь огзэ-кыксэ эскерылӥзы, малпамтэ шорысь изъянэз адӟиськыны кутскиз — раковинаяз йӧзам интыосыз. Изъянэз тросгес но тросгес луиз, нокин валэктон шедьтыны ӧз быгаты. Калибрзэ бадӟыматэмен, нырысь ыбемысь ик пушка быдэсак пазьгиськылӥз, артиллеристъёс сӧсырмылӥзы но бырыны шедьылӥзы. Собере Охтаысь полигонъёсын эскеронъёсты гальван амалэн ортчытъязы, эскеронъёсы пыриськем муртъёс блиндажъёсы ватскылӥзы. Император Александр II Обуховен пумиськыса, югдурез тупатон сярысь юанэзлы валэктон шедьтыны ӧз быгаты. Соин сэрен, Россиын пушкаосты поттонэз дугдытоно луиз. Быдэс улонзэ сӥзем ужезлэсь пайдатэм луэмзэ валаса, со ужезлэсь палэнсконо кариськиз. 1866-тӥ Австро-прусской ожмаськон Обуховлэсь гинэ ӧвӧл, тужгес зол конкурентэзлэсь но — Крупплэсь но шекъёссэ возьматӥз. Озьы ке но, Обухов улытозь та юанлы валэктон шедьтэмын ӧй вал. Югдурез тупатыны быгатӥз солэн бӧрысьчиез Д. К. Чернов.

Буре ваён

1869-тӥ арын Петербургысь андан ӵыжатон завод, кылдытӥсьсэ буре вайыса, Н. И. Путиловлэн дэмламезъя, Обухов завод шуыса нимамын.

1886-тӥ арысен завод Зарезь ведомстволы улсатэмын вал но солы кун инлык сётэмын. Кема аръёс ӵоже завод Россиысь ужъюртъёс пӧлысь валтӥсез лыдъяськылӥз; заводын андан, пушка снарядъёс но пӧртэм тӥрлык поттӥзы. 1871-тӥ арысен Зарезь ведомстволэн Крупплэсь дуно вузъёссэ басьтонлэсь кулэяськемысь дугдӥз — ӟуч корабльёсын вань пушкаос Россиын поттэмын вал.

1872-тӥ арын обуховской пыӵалтӥрлыкъёс Москваысь политехнической адӟытонын возьматэмын вал, 1873-тӥ арын Венаысь дунневыл адӟытонэ поттэмын. 1908-тӥ арын Обухов Зарезь но Ожгар ведомствоослы пӧртэм калибръёсын ожтӥрлык поттӥз, со сяна, радъямын вал башенной установкаосты, минной аппаратъёсты, самодвижущийся минаосты (торпеда), гироскопической приборъёсты, оптической прицелъёсты, бортовой, палубной но башенной броня поттон. Кылдэм дырысеныз 1912-тӥ арын 1-тӥ инвожо толэзёзь завод 13203 артиллери ожтӥрлык поттӥз но заказчиклы сётӥз: 8042 — Ожгар ведомстволы но 5161 — Зарезь ведомстволы.

2020-тӥ арын, Удмуртилэн кунлык басьтон дырысеныз 100 тырмемен валче, Вотка завод каргуртын вордӥськем Павел Матвеевич Обуховлэн, Россиысь сталепушечной производствоез кылдытӥсьлэн вордӥськем нуналыз Удмуртиысь буре ваён нуналъёс пӧлы пыртэмын.

Оружейниклы синпелет чотын Златоустысь машина поттон заводлэн азьвыл Арсенал юртаз пырон азе обузховской пыӵал гумыос пуктэмын. 2020-тӥ арын 9-тӥ коньывуонэ, Павел Обуховлэн вордӥськем дырысеныз 200 ар тырмонэн валче, Санкт-Петербургысь Обухов нимо заводлэн валтӥсь корпусэз азьын быдӟым промышленниклы синпелет усьтэмын. Озьы ик оружейниклэн вордӥськем дырысеныз 200 ар тырмонэн валче, 2020-тӥ арын толсуре солэн улонэзлы но ужъёсызлы сӥзем «Павел Матвеевич Обухов» нимо книга поттэмын.

Данъетъёсыз

Россиысь вылӥ орденъёслэн кавалерзы луэ:

• Вӧсьлыко Анналэн 2-тӥ но 3-т ӥ степенё орденъёсыз;
• Вӧсьлыко Владимирлэн 4-тӥ степенё орденэз;
• Вӧсьлыко Станиславлэн 3-тӥ степенё орденэз.

Семьяез

• Агаез — Степан Матвеевич. Вордӥськиз 1807-тӥ арын, дышетскиз Горной кадетской корпусын (ГКК), собере Уралын ужаз, 1845-тӥ арысен Нижнетуринской заводысь зарни промыселъёсы смотрителе юнматэмын вал.

Валэктонъёс

Литература

• Кавадеров А. Павел Матвеевич Обухов: биографический очерк // Русская старина. — СПб., 1905. — Пӧсьтолэзь (т. 123). — С. 41—88.
• Сорокин Ю. Н. Роль П. М. Обухова в основании сталелитейного производства в России // Труды института истории естествознания и техники. — 1955. — Т. 3.
• Фёдоров А. С. Творцы науки о металле. — М., 1969.

Чӧлсконъёс

• В. В. Данилевский. Русская техника // Глава II (О роли П. М. Обухова в развитии металловедения)
• Обухов Павел Матвеевич.
• Первая русская стальная пушка.
• Обухов Павел Матвеевич на «Кладбища и могилы знаменитостей Санкт-Петербурга и Ленинградской области».
• Обухов Павел Матвеевич.

Металловедения ӧнерчиос

Азьпалчиез (дышетӥсь)		Бӧрысьчиез (дышетскись)
Павел Петрович Аносов	Павел Матвеевич Обухов	Дмитрий Константинович Чернов