Йӧвылэсултон

Йӧвылэсултон
Мукет сямен	Инмарез Пылатон, Вожо келян, Крешення
Валатонэз	чылкытатскон, сьӧлыкъёслэсь мозмытскон, вожоосты, шайтанъёсты, сопал дуннеысь лыктэм лулъёсты йӧ улэ келян
Пусъё	Россия Россия Удмуртия Удмуртия
Дырыз	19-тӥ толшоре
Сям-йылолъёс	вуэз вӧсяло, люкмесъёсы чукинскыло

Йӧвылэсултон (Инмарез Пылатон) (ӟуч: Крещение) ― черк праздник. Пусйиське 19-тӥ толшоре. Та нуналэ вуэз вӧсяло.

Калыкын

Йӧвылэсултонлэн калык пӧлын мукет нимъёсыз пумиськыло. Кылсярысь, Крешення, Вожо келян. 1918-тӥ арозь со 6-тӥ толшорлы тупа вал, дырпусэз выль стиле выжтэмен, сое 19-тӥ толшоре пусйыны кутскизы. Толсур сямен ик та нунал калыкын бадӟым праздникен лыдъяськылӥз. Нылкышноос Йӧвылэсултон азьын корка котырзэс чылкытатыны тыршылӥзы, куно пумитаны дасяськылӥзы. Колодчаысь ву вайылӥзы, малы ке шуоно, сое вӧсятозь вулы ветлылыны ӧз лэзьылэ.

Йӧвылэсултон праздник уйшор бере кутске. Со дырысен вань вутымъёсын ву дун-чылкыт луэ но висёнъёсты йӧнатыны юрттэ, шуо. Вожоосты ву улэ келян понна, шур дуре мыныса, тӥрен кирос гожмаса, люкмесъёс коралляло, молитва лыдӟо. Кышкасьтэмъёсызгес люкмесъёсын пыласькыло. Та сям али дыре но возиське. Нуназе коркась корка куное ветло, кырӟанъёсын, вераськонъёсын улон сярысь верасько. Та нуналэ ужаны уг лэзё. Черке ветлыны дэмлало. Йӧвылэсултонэн валче тунаськон но вожояськон дыр йылпумъяське.

Черкын

Йӧвылэсултон ― Православной черклэн 7 таинствоосыз пӧлысь нырысетӥез, кудзэ пумита адями. Со быдэс музъемез чылкытатэ но дун-чылкыт каре . Чукынӥськыкуз адями сотоналэсь куинь пол куштӥське но Инмарлы оскемзэ, солэн курон-косонъёсызъя улыны дась луэмзэ возьматэ. Чукынӥськон нырысетӥез ӧс выллем луэ но сьӧлыкъёслэсь мозмытэ, выльдэ.

Йӧвылэсултон азьысь нуналэ кӧс утёнлэн тужгес лек дырыз. Юн оскись калык 18-тӥ толшоре воксё уг сиськы яке пӧзьтэм бакча сиёнъёсын гинэ гусъяське. Преподобной Серафим Саровский дэмла вал:

«Сиськоно сомында, мугорыд лулыдлы ӟеч ужъёс лэсьтыны кужым мед сётоз, мед юрттоз. Нуназе сиськы кӧттыр, нош ӝытазе возиськы. Визяны астэ пичиен дышеты. Кӧсутён - со шер сиськон ӧвӧл, со ӧжыт сиськон».

Ымусьтонысен (Иисус Христослэн Вордӥськонэз) Йӧвылэсултонозь дун-чылкыт нуналъёс кыстӥсько. Та нуналъёсы адямиос уг визяло, ог-огзы доры куное ветло, Инмарез данъяло. Инмарлы оскисьтэмъёс пӧлысь тросэз та вакытэ тунасько. Преподобной Амвросий Оптинский та пумысен тазьы шуиз:

«Вашкала дырысен адямиослэн тодэмзы потылӥз, мар луоз азьланяз. Кызьы гинэ ӧз тунаськылэ соос. Но тунаськон вуонозэ уг возьматы, со Инмарлэсь курон-косонъёссэ тӥя. Тодады возе: тунаськись адямиос шайтанлэн медоосыз луо».

Валэктонъёс