Вожодыр (удмурт сям-йылолъёс)

Толсур — (берлогес Ымусьтон, Рошво (Рождество) шуыса нимазы) — удмуртъёслэн тол сям-йылолъёссылы но тол юмшанъёссылы кутскон сётӥсь праздник. Со толалтэ шунды беротскон вакытэ тупа. Ӵапак та дыре музъем вылын адямиос вылэ висён но курадӟон келясь шайтанъёс но пӧртэм убиръёс-вожоос кузёясько, пе. Солы оскыса, та вакытэз Вожодыр шуыса нималлям. Удмуртъёс пӧлын христианство вӧлмемен валче, вожояськон сям Выль ар шулдыръяськонъёсын сураськыса, Толсурысен кутскыса, Йӧвылэсултонозь кыстӥськись юмшанлы пӧрмиз.

Сям сярысь

Вожояськон вакытэ ортчись сям-йылолъёс но юмшанъёс герӟаськемын вужзэ арез келянэн но выльзэ пумитатэн. Вожодыр кутске 7-тӥ толшоре Толсурысен. (Мукет интыосын Ымусьтон шуыса нимало). Кыкез но нимыз нимыз герӟаськемын Сӥзьыл юон бере куд-ог сиён-юонъёслэсь кӧсвоземен. Толсур азь ӝытэ вӧсяськыса, ӵуж мильымен, пельнянен но перепечен кунояло. Быдэс арзэ ванё-буро улонлы оскыса, уйлы жӧк вылэ тӧдьы ӝӧккышет валё но нянь колдӥ, сылал пукто. Куд-ог интыосын мукет нуналаз вазь ӵукна ик табань пыжыса, сое вӧсяло но семьез куноято. Вӧсям табанез вандылытэк, тӥялтыса гинэ веръяло. Корка пырем муртлы вӧсям табанез уг сёто — сое ас семьяын гинэ сиё. Вазенгес табанез юрт вӧзысь куалаын воргорон вӧся вылэм, али дыре, куд-ог семьяосын, кылем сямъёсты утьыны тыршыса, гуртын гинэ, мудор азьын вӧсясько.

Сиськем бере быдэс семьяен уксё лыдъяло. (Куд-ог интыос уксё лыдъян сям Паска нуналэ кутӥське) Анай-атай выль валем тӧдьы ӝӧккышет вылэ уксёзэс пазьго. Семьяысь котькуд адями сое лыдъяны кулэ. Собере ог-огзылэсь, кӧня уксё лыдъяд, шуыса юало. Кинлэн тросгес, солы одно ик пичияк кузьым сёто.

Та уй пӧртмаськон (пенӟаськон, вожояськон, чокморскон) дыр кутске но 19 толшорозь кыстӥське. Убиръёсты пышкылыса, етӥзъёсызгес вылазы лукыр-лакыр дӥсь дӥсяло: мыддоринтэм шуба, дукес но мукет. Нылкышнолы одно ик воргорон дӥсь дӥсяны кулэ, воргоронлы — нылкышно дӥсь. Ӵемысь солдат дӥськутэн дӥсясько. Тодмантэм вылысь ымныръёссэс вато, кусказы е бордазы веник, песьтэр, чингыли думыло. Киязы боды яке гурсуран куто. Вожояськон сям туж матын луэ зучъёслэн пӧртмаськонзылы — колядовать карыса ветлэмзылы. Удмурт смъя, огпол вожояськыны мылкыд карем мурт бӧрсьысь куинь нунал пӧртмаськыса ветлыны кулэ.

Озьы вожояськисьёс ульча кузя, юн куашетыса, вылӥысь улӥе васько, корка сэрегъёсы йыгало. Пумитазы шедемъёсты одно ик лымыын погылляло, сьӧразы басьтэм киренез кужмысь куртчыны косо. Корка пырыку, «сюанчиосты пырыны лэзе», шуыса курисько. Пырыса экто, пукро гуръёсты кырӟало, бодыосынызы выж вылэ йыгало, гур пытсэтъёсын жуго, веник куаръёсын жагкыса кельто. Корка кузёос тодманы туртто, ымныр вылысьтызы басмаоссэс палэнто. Вожояськисьёс мунчокузёосты кышкато, висёнъёсты улляло но шуд ваё шуыса оскыса, котькуд коркан соосты шумпотыса пумитало, пыремъёсты куноятыны тыршо. Сьӧразы салам келяло.

Алонъёс

Вожояськон яке пӧртмаськон сям сопал дуннее кошемъёслэсь лулъёссэс возьматэ. Вашкалаослэн оскемзыя, кулэм муртъёслэн лулъёссы шунды берытскон вакытэ музъем вылэ потало, пе. Соослэсь лексэс поттонтэм вылысь, пересьёс котыр ласянь алонъёсты чакланы тыршылӥзы. Кылсярысь, акшан вакытэ уг яра огнын ульчае кыльыны, выж вылтӥ потаны, куштэм юртъеръёс котыртӥ ветлыны, мунчое пырыны. Малы ке шуоно, вашкалаослэн оскемзыя, вожоос ӵапак таӵе интыосы каръясько. Нош сыӵе интыосы вадьсаськоно луэ ик ке, Инмарлэн утись кужмызлы оскыса, кирос поныны косо: «Осто, Инмаре» шуыса вӧсяськыны. Вожодыре уг яра ужаны: ыжгон котырын вырыны, черсыны, керттӥськыны, уката но мисьтаськыны. Та вакытэ ужан дырез чакланы косо: нуназе яке бер ӝыт гинэ. Нуназе уг лэзё пож вуэз кисьтаны, вожоос медаз адӟе шуыса, пеймыт луыса гинэ, соку но кисьтэм бервылзэс лымыен ватыны тыршо. Озьы ик гурысь пенез октыны, етӥн сэстыны, ӵужъем пӧзьтыны но миськем дӥсез уйлы педло кельтыны уг лэзё, вожоос, пе, лошъялозы, сапталозы. Вожодырлэн берпум нуналаз вазь ӵукна шур дуре, ву дуре ветлонлэсь ало. Та нуналэ вожоос, пе, ву улэ кошко..

Тунаськонъёс

Вожолэн тужгес лек дырыз 13 толшорысен 14 толшоре выжон уе лыдъяське. Озьы ик та нуналысен кутскыса, 19 толшорозь уката кышкыт вакыт шуылӥзы но тунаськыны та дырез бырйылӥзы. Тунаськылӥзы вожослэн яратоно интыосазы: сюрес вожын, куштэм коркан, мунчоын, гулбечын. Та интыосын тунамъёс уката зэмосэсь шуыса оскылӥзы. Азьпал улонзэс тодэмзы потэмен, та ужрадэн тужгес но егитъёс тунсыкъяськизы. Удмурт Элькунысь Зура палъёсын азьвыл аръёсы тужгес вӧлмемын вылэм таӵе тунаськон амалъёс. Гожтэмын пересьёслэн тодэваёнъёссы вылэ пыкиськыса.

Егит ныл мӧля вылаз мильым поныса, ульча кузя мыныны кулэ. Кыӵе вылтусо пиосмуртэн пумиськоз, сыӵе ик вуоно картэз луоз шуо. Кӧлон азьын колодчаосты тунгонэн пытсаллязы, усьтонзэ миндэр улэ ватылӥзы. Кыӵе тусо луоз уйвӧтэ лыктыса, усьтон курись воргорон, сыӵе муртлы ик бызёд, пе.

Тымен тунаськон. Кынем синмын, кенер борды султыса, нокӧня быгатэм, шуккем майыгъёсты ӟыгыртылӥзы. Собере соосты бӧрсьысь-бӧрсьы «кенос — мешок — пуд» шуыса лыдъяллязы. Лыдъяськон «кенос» кыл вылэ ке дугдӥз, туж узырезлы бызёд шуыса оскылӥзы, «мешок» кыл вылэ ке — шоро-куспоезлы, нош «пуд» ке — куанерезлы. Ӟезьы вамен гынсапег зӥръязы. Сапег корка пала нырын выдэ ке — уд бызьы шуо. Уйлы укно вылэ стаканэн ву пуктылӥзы. Стакан вылэ ву вамен аспӧртэмлыко «лэсьтэм выж» тырылӥзы. Кинэ, пе, уйвӧтын адӟод, со ик кузпалыд луоз.

Пуньые ву лэзьыса, кынтыны кельтылӥзы. Вылыз вольыт кынмиз ке — улонлы, вылыз гопо ке кынмиз — кулонлы шуо. Мукетсэ тунаськон амалэз тужгес сэзьёсыз кутылӥзы. Кылсярысь, партэм кузя люкаськыса, сюрес вожын тӥрен яке мукет корт арбериен котрет гожмаса, выдыса кылзӥськылӥзы: кинлы мар кылӥськоз. Чингыли куара ке — сюанлы, пыдлось шуккем куара — матысь ӵыжы-выжыослэн кулонзылы, кутсаськем куара — ю-нянь удалтонлы. Нимысьтыз молитва лыдӟытэк, нырысь атас чоръямлэсь азьпал котретысь потыны уг лэзё, вожо кутоз шуо.

Яке трос кузя люкаськыса, кинлэн ке корказ «Илею» кырӟанъёс улсын тунаськылӥзы.

Кияса ёросысь Салья гуртысь егитъёс азьло сямен ик, сюресвоже люкаськыса, вал букоосын тунасько. Люкаськемъёс пӧлысь одӧгез тунаськисьёслэсь синзэс кышетъёсын керттэ но одӥген-одӥген бергатэ. Йырзы поромыны кутскем егитъёс буко пыр потыны туртто. Кин буко пыр потэ, со таяз арын бызёз яке кышнояськоз шуо. Нош кудпала бызёнзэс яке кытысь кышно басьтонзэс, гын сапегез гидкуазьысен капка йылтӥ сэрпалтыса тодылӥзы. Кудпала сапеглэн нырыз возьматэ, сопалась ик кузпалыд луоз, пе.

Туала дыре паськыт вӧлмемын пельнянен тунаськон. Пӧрало, кин маин быгатэ: сӥлен, губиен, картофкаен, кубистаен, кузятэмен. Пельнянь пушкы газет юдэс но поныло вылэм. Соя тодыны луэ, кыӵе улон адямиез таяз арын возьма. Озьы ик тырылӥзы чечы пуньы выллем вӧлэм пуэз — сыӵе пельнянь сюриз ке, чечыен улод, пе. Нянь яке пызь сюриз ке — быдэс ар нянё улод шуо, уксё шедиз ке — узыр луод, ыжгон ке — пудоед удалтоз. Нош эгыр шедьтыны — аламалы, таяз арын бадӟым куректонэз чидано луод шуо.

Шудонъёс

Вожодыр пуконъёслы егитъёс нимысьтыз корка быръйылӥзы. Татын котькуд ӝыт пӧртэм шудонъёс, тунаськонъёс ортчытъязы, ог-огенызы кусыпъяськонъёс мытылӥзы. Кылсярысь, «Сяла ыбонэн» шудыку, ӟуслэн пумъёсаз шудӥсьёс пуксё но киязы бадӟым пӧзьы дӥсяса, ог-огзэс ӟус вылысь палэнтыны-куштыны выро. Яке «Юрен шудон». Кузь ӵушконэз позыртыса пумзэ кертто. Шудӥсьёс котырак пуксё, пыдъёссэс бадӟым кышетэн шобырто но со ултӥ ог-огзылы ӟигоям ӵушконэз сёто. Пус чӧлтыса шедемез бӧрсьытӥзы ветлэ но шудӥсьёслэн пельпумазы чабе. Ӵушкон сётӥсьлы чабыны ватсаське ке, соиз, султыса ӵушконэныз чабисез сальылэ, собере шудӥсьёс котыртӥ куинь пол котырско но интыенызы воштӥсько.

Вожодыр вакытэ дӧдьыен нискылаллязы, ю-няньзы мед удалтоз шуыса. Дӧдьые тросгес калык пуктыны тыршылӥзы. Берпум арняяз куазез но мукет тодметъёсты чаклаллязы. Шундыя, толэзья ю-нянлэсь ӟечлыксэ туназы.

Йӧвылэсултонэн валче тунаськонъёс но вожояськонъёс йылпумъяськылӥзы. Толсур азьын сямен ик корка котырзэс чылкытатыны тыршылӥзы, куно пумитаны дасяськылӥзы. Озьы ик та нуналэ ужамлэсь алылӥзы. Ӵукнаысен шур дуре мыныса, тӥрен кирос гожмаса, люкмесъёс коразы, вожоос ву улэ мед кошкозы шуыса. Собере коркась корка ветлыса сиизы-юизы, кырӟанъёсын, вераськонъёсын улон сярысь вераськылӥзы.

Валэктонъёс

Литература

• Кенеш. Толшор, 1-тӥ №, 2024 с.72-74. Семён Вахитов. Ымусьтон.