Выль

Википедиысь материал
Выль, Виль
Выль в Можге.jpg
Дырыз 2-тӥ гудырикошконэ
Герӟаськемын выль урожаен

Выль (озьы ик Виль, Выль ӝук) — выль урожайлы сӥзем удмурт йӧскалык шулдыръяськон. Удмуртъёслэн валтӥсь ужудыссылы - музъем ужъёслы луыса кылдэмын. Удмуртиын сяна, Башкортостанын, Татарстанын но Киров улосын пусйиське.

Историез

Удмурт календарной праздникъёс тулыс-гужем но сӥзьыл-тол вакытъёслы люкисько. Выль шулдыръяськон сӥзьыл праздникъёслэсь радзэс усьтэ. Та вакытэ урожай вуэ ини, соин ик азьвылгес Выль нуналэ йыды кеньырен яке сезьы кеньырен ӝук пӧзьтылӥзы, озьы ик сезьпызь суралтылӥзы. Вуэм бакча сиёнъёслэсь сиён-юонъёс дасяллязы. Нянь но выль пызьлэсь пыжылӥзы. Доразы шепъёс вайылыӥзы, бордаз кӧня ке кубиста куар но кӧжы пуртэс понылӥзы. Озьы ик та нуналэ ӟазег, ӵӧж яке така вандылӥзы. Ваньзэ сое ӝӧк вылэ пуктылыса, куяськон йылол ортчытъязы— кулэм ӵыжы-выжыоссэс буре вайылӥзы[1].

Та нуналэ выжы куалаын  [ӟуч] (удм. пӧртэм пумо шепъёсты бакель карылӥзы, тау карыса, азьланезлы но ӟеч урожай басьтыны юрттэт курылӥзы. Выль урожайлэсь ӝук веръяны ӵыжы-выжыоссэс ӧтьылӥзы, но одно ик шудоен лыдъяськись ӟеч муртэз но доразы пыртазы. Ваньзы ӝӧк сьӧры люкаськыса, семьяысь тужгес арлыдоез, улонысь кошкем ӵыжы-выжыосты буре вайыса, ю-нянь будэтыны юрттэмзы понна тау карыса вӧсяськылӥз но азьланезлы юрттэт курылӥз[2].

Выль нуналэ куд-ог улон интыосын куалаын сяна, лудын но вӧсьёс ортчытъязы, со понна гурт сьӧрын нимысьтыз вӧсяськон инты висъямын вал. Со вӧсяськонэ воргоронъёс гинэ ветлылӥзы. Люкаськемъёс, такапиез вандыса, курбон сётон йылол  [ӟуч] (удм. ортчытъязы, выль картошкаен шыд лым пӧзьтылӥзы но кулэм ӵыжы-выжыоссэс тодазы вайылӥзы. Доразы гырлые шуккыса но вӧсь гур нёжъяса бертылӥзы. Ӝытазе ӵыжы-выжыоссы доры куное ветлылӥзы[3].

Выль бере ӵуказеяз араны потылӥзы. Со азьын йылол ортчытъязы: корка кузё азбарын вӧез бакель карылӥз но соин сюрлоосты зыралляз. Аран удыс борды нырысь ик гуртысь тужгес арлыдоез капчи киё кышномурт басьтӥськылӥз[1].

Удмуртъёслэн Выль праздниксы вашкала дырысен 2-тӥ гудырикошконэ пусйиське. Христианствое пырем бере со православной Илля нуналэн огазеяськиз. Соин валче куд-огъёсаз улон интыосын сое Выль (Виль) интые Ильин день яке Льин день шуыны ниманы кутскизы[4][3].

Туала вакытэ

Удмуртиын

2023-тӥ арын басьтэм тодэтъёсъя, Выль праздникез паськыт пусъё Удмуртиысь кык каръёсын — Ижкарын но Можгаын. Отын декоративно-прикладной искусствоя мастер-классъёс, гурт возёсын поттэм вузъёсын адӟытон-вузкарон радъяське, выль урожайлы сӥзем «Паймымон емышъёс» адӟытон ортче, люкаськем калыкез элькунысь тужгес усто творческой коллективъёс шулдырто, нылпиослы но егитъёслы вожвылъяськонъёс ортчыло. Озьы ик та юмшанын удмурт йӧскалык сиён-юонъёсты веръяны луэ[5][6].

Ижын Выль юмшан арлы быдэ 2-тӥ гудырикошконэ пусйиське, нош Можгаын праздниклэн нуналыз ӵемысь вошъяське, сое гудырикошконлэн нырысетӥ кӧснуналазгес ортчытъяло[5][6].

Россилэн мукет улосъёсаз

Выль ӝук шулдыръяськонлы дасям фотозона. Светозарево, 2018-тӥ ар

Башкортостанын улӥсь удмуртъёслэсь Выль шулдыръяськонзэс Удмуртъёслэн историяя но лулчеберетъя центрзы радъя. Та праздник выльысь улӟытэмын вал 2017-тӥ арын, ортче Татышлы ёросын. Ужрадлэн программаяз ӝук пӧзьтон но бакель карон, выль урожайлы сӥзем ярмарка, йӧскалык шудонъёс но эктонъёс, декоративно-прикладной искусствоосъя мастер-классъёс[7][8].

Киров улосысь Слободской ёросысь Светозарево гуртын 2010-тӥ арын Выль ӝук (озьы ик Выль джук) шулдыръяськонэз улӟытӥзы. Со дырысен Киров улосысь вань удмуртъёс сое арлы быдэ пӧсьтолэзьлэн пумаз яке гудырикошконлэн кутсконаз пусъё. Туала вакытэ ӝук пӧзьтон но бакель карон сяна, серемес ӵошатсконъёс ортчыло: «Батыр Шоу» (кужмо муртъёслэн вожвылъяськонзы), нылъёс понна куасэн но вуэн тырмытэм ведраосын бызьылонъя, бугор бинянъя, тугоко керттонъя вожвылъяськонъёс, сад-бакчаын будэтэм емышъёсын тырмытэм уробоосын парад — «Далтэм бакча сионлы — чебермам дрога» («Доброму урожаю — красивая телега»), йӧскалык сиён-юонъёсын но выль урожайлэсь пӧрам сиён-юонъёсын адӟытон-вузкарон «Ӧтиськом веръяны» но мукет. Ужрад этнодискотекаен йылпумъяське. 2015-тӥ арын сое радъясьёс «Светозаревская вечорка[9]" театральной возьматон дасязы вал, нош 2023-тӥ арын «Гурт парад» но туала этнической дӥськут коллекциослэн возьматонзы ортчиз.

Выль ӝук шулдыръяськонын ӝук пӧзьтон . 2013-тӥ ар

Татарстанысь Кукмор каргуртын  [ӟуч] (удм. но Выль ӝук нимо юмшан ортче, отысь удмуртъёс ӝук пӧзьто но бакель каро. озьы ик ӵошатсконъёс нопӧртэм мастер-классъёс ортчыло. Люкаськем калыкез удмурт коллективъёс шулдырто[10].

Валэктонъёс

  1. ↑ 1 2 Владыкина Т. Г. Календарные обряды и праздники // Удмурты / З. А. Богомолова. — 2005. — С. 94—107.
  2. ↑ Волкова Л. А. Аграрный культ и магические действия // Земледельческая культура удмуртов (вторая половина XIX - начало XX века) / Л. А. Волкова. — Ижевск, 2003. — С. 307—324.
  3. ↑ 1 2 Календарные обряды удмуртов [ӟуч] Воршуд. Национальная библиотека Удмуртской Республики. Эскеремын 12.08.2025 арын
  4. ↑ Удмуртский национальный праздник урожая «Выль» [ӟуч] Официальный сайт Администрации города Ижевска (04.08.2015). Эскеремын 12.08.2025 арын
  5. ↑ 1 2 В Удмуртии пройдет ежегодный праздник урожая – «Выль», Министерство национальной политики УР (1 гудырикошконэ 2023). Эскеремын: 12 гудырикошконэ 2024 арын.
  6. ↑ 1 2 Максим Александров (03.08.2022) Удмуртский праздник «Выль» прошел в Ижевске 2 августа [ӟуч] ИА "Удмуртия". Эскеремын 12.08.2025 арын
  7. ↑ Выль - удмуртский праздник нового урожая, Дом дружбы народов РБ (3 гудырикошконэ 2023). Эскеремын: 12 гудырикошконэ 2025 арын.
  8. ↑ В Республике Башкортостан удмурты отметили праздник Выль [ӟуч] Ресурсный центр в сфере национальных отношений (09.08.2018). Эскеремын 12.08.2025 арын
  9. ↑ Удмуртский праздник «Выль джук» в д. Светозарево Слободского р-на [ӟуч] Кировский областной дом народного творчества. Эскеремын 12.08.2025 арын
  10. ↑ Удмуртский праздник нового урожая «Выль ӝук» отметили в Кукморе [ӟуч] РОО «Национально-культурная автономия удмуртов Республики Татарстан» (04.08.2022). Эскеремын 12.08.2025 арын

Литература

  • Атаманов М. Г. История Удмуртии в географических названиях. — Ижевск: Удмуртия, 1997. — С. 247.
  • В. Е. Владыкин, Л. С. Христолюбова. Календарные обряды и праздники. Этнография удмуртов : учеб. пособие. — Ижевск, 1997.
  • Волкова Л. А. Земледельческая культура удмуртов (вторая половина XIX — начало XX века). — Ижевск, 2003.
  • Христолюбова Л. С. Женщина в удмуртском обществе. XVIII — начало XXI в.. — Ижевск, 2006.
  • Шутова Н. И. Этнотерриториальные группы удмуртов: обряды и верования северных удмуртов: монография.. — Ижевск: УИИЯЛ, 52018. — 288 с.
«https://udm.ruwiki.ru/w/index.php?title=Выль&oldid=507754»-ысь басьтэмын