Вöйдыр

Материалъёс басьтэмын Б.Н. Ельцин нимо библиотекаысь

Та гожтосын Б.Н. Ельцин нимо Президент библиотекалэн фондысьтыз материалъёс кутэмын

Рос-прос учке

Вӧйдыр
Типез	Калык христиан
Мукет сямен	Вӧй арня
Озьы ик	Сыр седмица (черк)
Валатонэз	тол келян
Пусъё	шундыӝужан пал славянъёс
Ортче	Быдӟым визян азьын сӥль сиыны лэзем берпуметӥ арнянунал бере вордӥськон нуналысеныз
Йылпумъяське	Простить карон арнянуналозь
Дырыз	Паска азьысь тямысэтӥ арня
2025	11 тулыспалэ (24 тулыспалэ) — 17 тулыспалэ (2 южтолэзе)
2026	3 тулыспалэ (16 тулыспалэ) — 9 тулыспалэ (22 тулыспалэ)
2027	23 тулыспалэ (8 южтолэзе) — 1 южтолэзе (14 южтолэзе)
Пусъён ужрадъёс	калык юмшан
Сям-йылолъёс	мильым, сырник пыжо, пельнянь куто, куное ветло, дӧдьыен но салазкиен нискылало, тол сульдэрез суто я вато
Герӟаськемын	Быдӟым кӧсутёнэн
Медиафайлъёс РувикиМедиа пушкын

Вӧйдыр («Вӧй» (ӟуч: масло) но «дыр» (ӟуч: время); ӟуч: Масленица) — шундыӝужан пал славян калыкъёслэн тулыс калык праздниксы. Сое Быдӟым визян азьын берпуметӥ арня ӵоже пусъё, черк календарьысь Сыр седмицалы тупа. Католик но протестант кунъёсын пусйиськись Кӧй-вӧй пуксёнэн но карнавалэн огдыре укша. Вӧйдыр йылолъёсын христианство азьвылысь кылдэм куд-ог амалъёс утиськемын.

Вӧйдырлэн нуналыз арлы быдэ вошъяське, Паскаез пусъёнэн герӟаське. 2026-тӥ арын Вӧйдыр арня тупаз 16-тӥ тулыспалысен 22-тӥ тулыспалозь.

Ӟуч калыклэн сяме пырем сиёнъёсыз — мыльым но лепёшкаос, нош белорусъёслэн но украинъёслэн — вареникъёс но сырникъёс. Украин но белорус калык лулчеберетын кузпалъяськымтэ понна озьы ик шудон сямен вӧсь карыны йылол утиськемын — колодка йылол.

Али дыре Вӧйдыр шулдыръяськонлэн тодметъёсыз лыдъясько калык юмшанъёс но тол сульдэрез сутон.

Валатонэз

Сяме пырем ӟуч лулчеберетын Вӧйдыр музъем вылын ужасьёслэсь гырон-кизён ужъёслы дасяськыны кутскемзэс возьматэ. Та вакытысь йылолъёс ог-огенызы герӟаськем кык темаосын полэстӥськемын: удалтонлык (гурт удыслы, оргилы, ӧрсёнлы, кузпалъяськонлы сӥзем тематика) но выжыосты сӥлы карон (улэпъёссэ но кулэмъёссэ).

Вӧйдыр православной черк календарьысь Сыр седмицалы тупа бере, вӧйдыр шулдыръяськонъёсты Быдӟым кӧсутёнлы дасяськонэз сямен пумитало.

Шулдыръяськон арнялэн пумаз золгес ӟырдалляз. Нырысетӥ нуналъёсаз покчиарняысен кутскись сям-йылолъёсы пырем шудонъёслы но маскаръяськонъёслы дасяськылӥзы, ӵапак соку «Паськыт Вӧйдыр» кутскылӥз.

«Вӧйдыр вакытэ Петербургысь Адмиралтейской площадьын калык шулдыръяськонъёс». К. Е. Маковский, 1869.

Владимир Пропп малпамъя, Вӧйдырлэн валтӥсь темаез луэ музъем узырлык, кудӥз архаичной калык асваланын юн герӟаськемын вашкала ӵыжы-выжыосты сӥлы каронэн, ритуал сиён, адямилэн фертильностез но оглом кузпалъяськон. Вӧйдыр йылолъёс та мотивъёсты герӟало. XXI даур кутсконлы та сямъёс пӧлысь рудимент сямен гинэ на утиськизы, праздникез пусъён но калык лулчеберетлэн нимаз люкетъёсыныз тодматскыны муг луизы ― ар ӵоже кыстӥськись цикллэсь пуштроссэ ыштӥзы. Огшоры улонын возисько на куное ветлон но мыльым сиён йылолъёс, озьы ик Простить карон арнянунал дыръя ог-огедлэсь прощение курон.

Туала фольклорист А. Б. Мороз пусъемъя, Вӧйдыр — язычество выжыысь потэм праздник шуыса вераны мугъёс ӧвӧл. Вӧйдыр сям-йылолъёс черклэсь ӵектонъёссэ выль сямен валаны луонлык сёто. Кылсярысь, сяме пырем культураын визян вакытэ сиён-юонлэсь возиськоно шуыса валатон пыӵамын, озьыен, кӧсутён кутскон азьын тросгес сиськоно. Вӧйдырлэн «языческой» пуштросэз адӟиськись валтӥсь тодмет — тол сульдэрез лэсьтон но сутон. Нош зэмзэ ке, сульдэр шоры ноку но идол шоры сямен ӧз учкылэ, ачиз йылол шудонъёсысь потэмын, лэся.

Йылолъёс

Кулэмъёсты буре ваён

Вӧйдырысь куд-ог ритуалъёс буре ваёнлы укшало. Черк календарьын кулэмъёсты тулыс буре ваён куинь кисьтонъёсты (сӥль сиыны ярась но кык быдӟым кӧс утён) пусъён нуналъёс калык календарья тупало тылскыны, мыльым сиыны, шайвылэ ветлыны, Вӧйдырен ӵош коркась корка вуылыны, вожояськыны но сульдэрез ватыны.

Мыльым но мукет кунояськонъёс

Вашкала дыръя адямиос оскылӥзы, муын кыллись кулэмъёс музъем удалтонлык вылын шудыны быгато шуыса. Мыльым — буре вайыса куяськон сиён вал, соосты шайгуос вылэ нуллӥзы яке кулэмъёслы укно дуре кельтылӥзы, выжыоссылэсь музъем ужын юрттэт курыса. Мыльымез кураськисьёслы сётъязы яке кулэмъёсты буре вайыса сиылӥзы. Вӧйдырлэн берпуметӥ нуналаз — Простить карон арнянуналэ — шайвылэ «прощаться» кариськыны ветлӥзы.

Со дыре ик мильым тужгес архаичной сиён луэ, сое пыжыны но кытчы ке нуыны капчи, со кӧттыро но вӧё. Та куинь мугъёс мыльымез шулдыръяськонысь гастрономияя валтӥсь сиён каро. Со сяна, черк календарь Сыр седмица дыръя сӥль сиыны алэ, юмшан ӝӧк вылын сӥльлэсь лэсьтэм сиёнъёслэсь ӧвӧлтэмзэс та но валэктэ. Сиыны лэземын чорыг, курегпуз но йӧллэсь сиёнъёсты.

Пропплэн малпамезъя, Вӧйдыре кӧттыро сиськон озьы ик герӟаськемын удалтонлыкен, та 1348-тӥ арозь южтолэзе пусйиськись выль арлэн бервылыз но луыны быгатоз. Тулыс кӧттыро шулдыръяськонэз выжтэмен валче тулыс юмшан ӧз ышы. Со сяна, сиён-юон озьы ик бордамы улӥсь ӵыжы-выжыосты утялтонлы пӧрме вал. Огазьын сиськон мерлыко герӟетъёсты юнматъяз но егит семьяосты огазеяны юрттылӥз. Мултэс сиськон но кудӟытозь юон озьы ик пӧртэм арлыдо воргоронъёс но нылкышноос куспысь этикая могӟетъёсты палэнтыны юрттӥз, та нылпи ваён ласянь азинскыны луонлык кылдытъяз.

Ф. В. Сычков. Тапыртон. 1911

Егит кузпалъёсты сӥлы карон

Вӧйдыр ӟуч сюан йылолын бадӟым инты басьтэ но сюан шудон арлы йылпумъян луэ. Егит кузпалъёслы сӥзем йылолъёс ар ӵоже мукет нуналъёсы но ортчылӥзы (Купанча но Петрол нуналъёсы). Альберт Байбурин лыдъямъя, та практикаослэн огъя пуштроссы герӟаськемын егит кузпалъёслэн улоназы выльдӥськонъёсты калыкен умоен лыдъян, озьы ик со нимаз сюанэз календарь но интыысь сообществолэн улоназ пыртон луэ.

Бакель сётон йылол практикъёс пӧлы пыртыны луэ: уйпал ӟуч вьюни́шник (выль кузпалъяськисьёслы ӟечкыланъёсын кырӟан), целовни́к (егит кузпалъёс доры ветлон, егит кышноез куноосын чупан но куноятон), егит картлэн гурезьысь нискыламез но вармумылэн мильымез — егит кузпалъёсын кышнолэн анай-атаез доры вуылон. Озьы ик кирос анай-атайёссы но вань выжыоссы дӥньын кунояськылӥзы. Таин валче арлыдо ӵыжы-выжыоссы доры вуылонэз вӧйдыр йылолысь выжыосты сӥлы каронэн герӟаны луэ.

Вӧйдыр йылолъёс улсын ритуал луэм сценарийлэсь палэнскем понна шудэм пыр янгыше уськыто. Сыӵе яркыт йылолэз адӟыны луэ пиослы но нылъёслы ортчем арын кузпалъяськымтэзы понна украин но белорус «колодка ошылонысь».

Вожояськон но маскаръяськон

Вӧйдыре пӧртэм турлы дӥсяськон шулдыръяськонлэн валтӥсь тодметэз луэ, со карнавалъёслы матын луэ. Росси но совето этнографъёс ивортэмъя, животъёслы пӧрмытскылӥзы (вал, кеч, ош, гондыр, курег), сьӧд кужымъёслы (шайтай, палэсмурт, кикимора, нечистикъёс), кулэмъёслы (сопал дуннее кошкемъёслэн тодметъёсынызы песятай, песянай) яке мурт адямиослы (калгись, кураськись, пересь, вуко кузё, чиган, турк). Вожояськисьёсын дэмен ортчон йылол мурт адямиослэн парадзылы пӧрмылӥз, со тулыс выльдӥськонлы но дунне кылдонлэсь радлыксэ выль сямен радъянлы кулэ луись хаос выллем луылӥз. Вожояськонлэн апогеез вал Вӧйдырез ватон, со вань вужезлэсь быронзэ возьматылӥз. Та, кылсярысь, Вӧйдыр мунёез вуж но начар дӥсе дӥсян практикаын шӧдӥськылӥз.

Ф. В. Сычков. Шулдыръяськонысь маскаръяськон

Вожояськон сяна, сяме пырем вӧйдыр маскаръяськонъёс герӟаськемын тыллэн но ӝоглыклэн тодметъёсыныз. Отчы пыро тылскемъёс, таосыз, вылды, «кулэмъёсты шунтон» йылолэн пунӥськемын, ӝуась кульчо, валэ кыткем дӧдьыосын нискылан но гурезьёсысь нискылан, ӟечыранъёс, круген эктонъёс (хоровод, коло), нимысьтыз вӧйдыр кырӟанъёсты быдэстон, ӵем дыръя таосыз юрӟым темалы яке гурт удыслы сӥземын (кылсярысь, «етӥн сярысь»). Кар культураын паськыт вӧлмемын вал вӧйдыр балаганъёс, гондыр шулдыръяськонъёс, мыжгаськонъёс но «лымы городокез басьтон» выллем ожгар шудонъёс.

В. И. Суриков. Лымы городокез басьтон. 1891

Шулдыръяськонлэн емышен герӟаськемзэ адӟыны луэ алэм тема пыр. Йӧнтэм маскаръяськонъёс но кырӟанъёс, выросъёс, юри малпам юрӟым кыл, гольык кылиськонъёс но дӥсез воштонъёс огдыре ик ужазинлыклы кутскон сёто но серекъято, нош таиз традиционной культураын улыны кужым пыртэ. Фольклор вӧйдыр эротика огдыре ик карнавал хаослэсь эффектсэ кужмоятэ, музъемлэн но пудолэн удалтонлыксы вылын паймымон сямен шӧдӥське но фертильной арлыдо егитъёслэн матримониальной кусыпъёссылэн азинлыказы бызён-басьтон азьын шудонын аспӧртэмлыко пуштрос сётэ.

Вӧйдырез ватон

Вӧйдырлэн берпуметӥ нуналаз ӵемысь бадӟым тылскылӥзы. Егитъёс азбаръёстӥ ветлылӥзы, шелеп но хворост октӥзы, культоосты вайылӥзы — ваньзэ тае огинэ люкаллязы но сутылӥзы. Тылскеме ӵемысь куяллязы жуг-жаг но вуж арбериосты (кылсярысь, пыжъёсты яке кудыосты): кулэтэм арбериосты сутон вуж арен люкиськон но выльзэ пумитан кадь луылӥз. Тылскеме одно ик куро тырылӥзы. Музъем ужысь валатонъёсын ю тысен но нянен герӟаськем куролэн йылолъёсын тужгес но бадӟым дунлыкез вал.

А. М. Васнецов. XX даур кутсконын Вӧйдыр мунёез сутон

Вӧйдырез ватон — паськыт вӧлмем йылол луэ, со кулэмъёслэсь темазэс урожайлэн темаеныз огазея. Солэн пуштросэз пӧртэм улосъёсын но гуртъёсын вошъяське, озьы ке но котькуд учыре мунёез яке улэп адямиез Вӧйдыр нимало но сое сӥё-дано пумитало, пародиын выллем «ватон ортчыто» но бератаз, кылсярысь, мунёез, ритуалын сямен кесяло но кылем-мылемзэ бусы кузя пазяло. «Ватӥськонын» сямен ик, кесякузы серекъяса, кесяськыса ветлӥзы. Вӧйдыр пусйымон воргорон яке нылкышно тодметъёсын пиосмурт но, кышномурт но луыны быгатэ вал.

Отӥязгес ни мунёез сутон сям юнмаз. Озьы тылскон но мунёез сутон кык валатонъёсты герӟаз: «ватӥськон» пыр возьматӥзы вуж арез но толэз келянэз, нош тыллэн югытэз но ӟырдытэз пыр — выль улонлэсь вордӥськемзэ, шундыез но матэктӥсь шунытэз.

Сьӧлыкъёсты лэзён

Ог-огдэ простить карыны курон черк йылол Вӧйдырлэн берпуметӥ нуналэзлы ним сётӥз — Прощёной арнянунал. Та нуналэ вань шулдыръяськонъёсты ӝыт вӧсяськонозь йылпумъяны кулэ вал, ӵапак ӝыт сьӧлыкъёсты лэзён радъяськылӥз. Семьяысь ёзчиослэсь прощенизэс коркан курылӥзы, йылол но вал: бызем нылъёс нылпиосынызы ӵош та нуналэ ик атайзы доры берталлязы но кошкон азязы простить карыны курылӥзы. Пичиос бадӟымъёслэсь йыбырттыса простить карыны курылӥзы, отӥяз бадӟымъёсыз — пичиосызлэсь, собере ог-огзэс простить каремзы понна куинь пол чупаськылӥзы.

К. Крыжановский. Простить карон нунал крестьян семьяын. XIX даур

Историысь свидетельствоос

Вӧйдырысь ӟуч йылолъёс сярысь азьвыл пусъемъёсты гожъяллязы Муско быдӟым княжествое вуылэм кунгож сьӧрысь адямиос. Сигизмунд Герберштейн (1526-тӥ ар) ивортэ: Быдӟым визянлэсь нырысетӥ арнязэ «московитъёс» «Syrna нимало, мукет сямен вераса „сырной“ (лат. caseacea), соос йӧллэсь сиёнъёсты сиё». Озьы ик со Вӧйдырез (нем. Faschang) кудӟытӥсь юонъёсты юыны огшоры калыклы лэзем праздникъёс пӧлы пыртэ.

Ричард Ченслер (1553-тӥ ар) гожтэ: Быдӟым визян азьын берпуметӥ арняез ӟучъёс «„вӧё“ (англ. Butterweek) нимало, та арняе соос, йӧл но вӧй сяна, номыр уг сиё. Но мон малпасько, одӥг кунын но таӵе кудӟон-шулдыръяськон уг пумиськы».

Жак Маржерет (1606-тӥ ар) та ивортонъёс борды Простить карон арнянунал сярысь йылтэ:

Ог-огзы доры ветло, чупасько, простить карыны куро, кыӵе ке кылын яке выросэн ултӥямзэс вунэто-тупато; пумиськыкузы, — азьвыл ноку но ӧз адӟиськылэ ке но, — ульчаын но ог-огзэс чупало. Вождэ эн вай, простить кар, пожалуйста, шуэ огез; Инмар простить кароз, шуэ мукетыз.

— «Состояние Российской державы и Великого княжества Московского», Маржерет

Адам Олеарий (1647-тӥ ар) Вӧйдыр юмшан сярысь пусъе:

Та кӧсутёнлэсь нырысетӥ арнязэ соос вӧйдыр шуо, та дыр ӵоже сӥль но, чорыг но уг сиё, вӧй, йӧл но курегпуз гинэ сиё, вылаз ик, нуналлы быдэ аракы, чечы но сур юыса, кӧтсэс тыро, асьсэзыс кин шуыны но уг валало ни; та ужлэн бервылъёсыз зол азон-калгон, капчи мылкыдын улон луо, нош азьвыл ӵем дыръя ог-огзы вылэ урдскон но йырвандон учыръёс вал. Вуоноез арня ӵоже соос огсыр улыны кутско, чечы но бакча емыш гинэ сиё, сюкась но ву юо, мунчое ветло, пӧсяло но азьвыл арня ӵоже лэсьтэм сьӧлыкъёссэс гылто.

Вӧйдыр совето вакытэ

Октябрь революция бере религиозной праздникъёсын нюръяськон кутске, соосты религилы пумитъёсыныз воштыны тыршо:

Юмшанэн но юонэн вуж Вӧйдырлы пумит гуртын ортчытэмын луоз Горд Вӧйдыр, со лулчеберетэн но выль улон-вылонэз вӧлмытонэн пачыламын луоз.

— Красная масленица // Известия. 1923-тӥ арын 14-тӥ толсуре.

Но религилы пумит шествиос калыке уг пыӵало, озьы праздник официальной луись календарьысь 1920-тӥ аръёслэн шоразы ыше ни.

Белгородысь Вӧйдыр, 2015-тӥ ар

"Вӧйдыр валатон 1960-тӥ аръёс пумысен выльысь улонын кутӥськыны кутскиз. Вӧйдыр карысь бадӟым шулдыръяськонлы пӧрмиз, сое радъяллязы лулчеберет удысын ужасьёс, дась юнматэм методикая материалъёс вылэ пыкиськыса. Праздник быдэс кунын стандарт выллем пыӵаз, ӵем дыръя со интыысь улӥсьёслэн сям-йылолъёссылы пумит луылӥз, соослы учкисьёслэсь пассивной рользэс висъяллязы, ужрадэ пыриськыны луонлык сётытэк. Соку ик вӧйдыр вакытысь ватӥськон но буре ваён яке фертильной но оргиастической символъёсты но йылолъёсты воштӥзы соляр луись валатонъёсын.

Постсовето Россиын

Азьвыл Вӧйдырез пусъён улӥысен радъяське вал ке но, отчы пыриськисьёс асьсэос ваньзэ лэсьто вал (мунё пӧрмыто, дэмен дасясько но тылско, суто, карнавалын сямен юмшало, шудо), нош XIX даурысь кар контекстын со ӵемгес институционально амалъя радъям, «вылӥысен» косэм форматэн ужрад луэ. Калыко интыосын, нырысь ик, кар паркъёсын, ярмаркаос но ӵошатсконъёс ортчыло, мильымен куноясько но тол сульдэрез суто, берлозэ ӵемысь вӧё арнялэн йылпумъян нуналэныз герӟатэк ортчыто. Та выллем сценарийёс дышетон ужъюртъёсын но радъясько, кытын пиналъёс понна со выллем элементъёсын ик тематической праздникъёс дасяло.

Туала улонын тол сульдэрез сутон дыръя ӵемысь нылкышнолы выллем пӧрмытэм мунёез кенжыто, азьвыл йылолъя сяме пыӵам «ватӥськон» выллем ужрадэз воксё но лыдэ басьтытэк. Таӵе дыръя Вӧйдыр калыклэн асваланаз ӵем дыръя ваньмон дырез ортчытон но шулдыръяськон ужрад сямен кыле ке но, символикая кусыпъёс утисько юнмам валатонъёс вылын: куро мунёез сутонэз герӟало толэз «келянэн», нош тылскемлэсь шунытсэ — матэктӥсь шунытэз но тулыс-гужем шундыез возьманэн. Оглом туала юмшанэз вашкала сям-йылолъёсты выльдонъя (оглюкетэз сценической) формаез сямен гожтыны луэ.

Вӧйдырез пусъён ӵемысь ужась коллективъёсын радъяське, куное ветлон вӧлмемын.

«Мыльымъёслэн индекссы»

Вӧйдыр азьын дышем сямъя СМИ-ос иворто «мыльымъёслэсь индекссэс».

2025-тӥ арын тулыспалэ «Бизнес FM» лыдъяз, Россиын одӥг порция мыльым (пуштростэк но ватсэтъёстэк) шорлыдын 150 манет тыр усиз шуыса.

2026-тӥ арын тулыспалэ Росстат лыдъяз, быдэс семьялы мыльым пыжон понна вуз басьтон 208,9 манет тыр усёз шуыса.

Мадёнъёс но тодметъёс

• Ваньмыз коӵышлы Вӧйдыр уз луы, Быдӟым кӧсутён но луоз (ӟуч: Не всё коту Масленица, будет и Великий пост);
• Вань нуналъёсын сюан ӧвӧл, коӵышлы котьку Вӧйдыр ӧвӧл (ӟуч: Не по все дни свадьба, не всегда коту Масленица);
• Вӧй келян дыръя юыса, юмшаса ветлы, нош визян сярысь тодад вай (ӟуч: Пируй и гуляй баба на Масленице, а про пост вспоминай);
• Вӧйдыр кӧттыро, коньдонэз ӝикыт кутон вакыт (ӟуч: Масленица объедуха, деньгам приберуха);
• Вӧйдыр понна сур юим, нош Радуница бере макмырен курадӟим (ӟуч: Выпили пиво об Масленице, а с похмелья ломало после Радуницы);
• Вӧйдыр — выжыосты но инкуазез сӥлы карон (ӟуч: Масленица — семикова племянница).

Мукет калыкъёслэн вӧйдырлы укшась йылолъёссы

• Мясопуст — католик славянъёс;
• Мясопуст, яке Фашанк — чехъёс, словакъёс;
• Запусты, яке Остатки]] — полякъёс;
• Курентованье — словенецъёс;
• Пужымен сюан — словенецъёс;
• Фашник (xoрв. Fašnik) — хорватъёс;
• Звончаръёс — хорватъёс;
• Бушояраш — шокецъёс (Венгриысь хорватъёс);
• Покладе (серб Покладе) — сербъёс;
• Вастлавьи — датчанъёс, норвежецъёс, уйпал немецъёс, эстонецъёс, латышъёс;
• Фастнахт — лымшор немецъёс, австриецъёс, швейцаръёс;
• Марди Гра — франк кыло европеецъёс, американецъёс;
• Ӧпкелён нунал, яке Мильым нунал — англи кыло европеецъёс, американецъёс, австралиецъёс;
• Карнавал — уйпал христианъёс;
• Бун Барекендан — армянъёс;
• Ужгавенес — литовецъёс;
• Метени — латышъёс;
• Апокриес — грекъёс;
• Ласкиайнен — финнъёс.

Вӧйдыр искусствоын

• «Не всё коту масленица» — Александр Островскийлэн пьесаез (1871);
• «Ишь ты, Масленица!» — Роберт Саакянц режиссёрлэн суредам мультфильмез (1985);
• «Сибирский цирюльник» — Никита Михалков режиссёрлэн художественной фильмез (1998). 1885-тӥ арын Россиын Вӧйдырез пусъёнъя эпизод;
• «Февраль. Масленица» — «Времена года» — П. И. Чайковскийлэн фортепианоен шудонъя циклэз;
• «Проводы Масленицы» — Н. А. Римский-Корсаковлэн «Снегурочка» операысьтыз сцена;
• Народные гулянья на Масленой — И. Ф. Стравинскийлэн «Петрушка» балетысьтыз картина;
• «Масленица» — Борис Кустодиевлэн суредэз (1916);
• «Взятие снежного городка» — Василий Суриковлэн суредэз (1891).

Удмурт йылолъёс

Удмуртъёслэн, ӟуч калыклэн сямен ик, Вӧйдыр шулдыръяськонзы ӵемысь тулыспал толэзь пумын — южтолэзь кутсконын тупа но быдэс арня кыстӥське. Соин ик южтолэзез мукет сямен «вӧйтолэзь» нимало.

Вӧй арнялэн нырысетӥ нуналыз (вордӥськон) — Вӧй пырон (ӟуч: встреча Масленицы) шуыса нимаське. Берпуметӥез арня нуналэ — Вӧй келян (ӟуч: проводы Масленицы). Калык сямъёсъя Вӧй арняе мильым пыжо, куно ӧтьыло но коркась корка юмшаса ветло, сюан шудон нуналэз но нимысьтыз та вакытлы укшато. Егитъёс но пиналъёс пӧртэм шудонъёсы пырисько. Тужгес яратоноез соос пӧлысь ― чеберъям валъёсын кошёвкаен нискылан.

Азьвыл дыръя нылкышноос та вакытэ трос-а етӥн куж черсозы шуыса туналлязы. Етӥнзы мед удалтоз шуыса, кубо вылазы герезьысь нискылаллязы. Вӧй келян шулдыръяськонъёсы быдэс гуртэн пыриськылӥзы. Вожояськон мактал, гондыртон (ӟуч: медвежья пляска) ортчытъяллязы. Куд-ог удмурт гуртъёсын Вӧй пырон нуналэ шулдыръяськылӥзы, куд-огаз ― Вӧй келянэ.

Валэктонъёс

Литература

• Байбурин А. К. Ритуал в традиционной культуре. — СПб.: Наука, 1993. — 237 с. — ISBN  5-02-027354-6.
• Бахтин М. М. Творчество Франсуа Рабле и народная культура Средневековья и Ренессанса. — М.: Худ. лит., 1965. — 527 с.
• Виноградова Л. Н. Зимняя календарная поэзия западных и восточных славян. — М.: Наука, 1982.
• Ивлева Л. М. Ряженье в русской традиционной культуре. — СПб.: Рос. ин-т истории искусств, 1994. — 233 с. — ISBN  5-86845-008-6.
• Пропп В. Я. Проблемы комизма и смеха. — М.: Искусство, 1976. — 183 с.
• Пропп В. Я. Русские аграрные праздники. — Ленинград: Изд-во Ленингр. ун-та, 1963. — 143 с.
• Толстая С. М. Полесский народный календарь. — М.: Индрик, 2005. — 599 с. — ISBN 5-85759-300-X.
• Славянские древности. Этнолингвистический словарь. В 5 т. Т.3.. — М.: Междунар. отношения, 2004. — С. 194―199. — 694 с. — ISBN 5-7133-1207-0.
• Некрылова А. Ф. Русские народные городские праздники, увеселения и зрелища. — Л.: Искусство, 1984. — 191 с.
• Шангина И. И., Некрылова А. Ф. Русские праздники. — СПб.: Азбука, Азбука-Аттикус, 2015. — 461 с. — ISBN  978-5-389-05727-2.