8-тӥ южтолэзь — Григориан дырпусъя — арлэн 67-тӥ нуналыз (касьян аре — 68-тӥез). Ар пумозь 298 нунал кылемын.
☀️ Ижкарын Шунды 6 час 51 минутэ ӝужа, пуксе 18 час 2 минутэ. Югыт нуналлэн кыстӥськемез 🕒 11 час 11 минут.
🌖 Синӥсь Толэзь (будэмез 19.02 нунал).
Нунал тодметъёс
- Та нуналэз удмуртъёс Кирень арня шуиллям. Ӟуч дырпусъя Иванлэн нуналыз. Туннэ кема кӧлыны уг яра, пе.
- Коӵоос липет улэ ватскизы ке — ӝоген пелляськоз, сике лобизы ке — шунытскоз.
- Дыдыкъёс ӵашето ке — шундыё луоз.
Нимнуналзэс пусъё
- Александр, Алексей, Антиох, Антонин, Дамиан, Зевин, Иван, Михаил, Моисей, Николай, Поликарп, Полихроний, Сергей.
Праздникъёс но буре ваён нуналъёс
Луэм учыръёс
Удмуртиын
- 1928 — Милиционной урамен Бородина нимо пролка сэргын нырысетӥез нылпи-ясли юрт ӝутыны кутскемын.
- 1949 — Ижкарысь урамъёсын нырысьсэ кун такси ветлыны кутскиз (кыӵе числое, пусъемын ӧвӧл).
Россиын но дуннеын
Петроградын демонстрациос, южтолэзь 1917 ар
Королева Анналэн портретэз
Хайрем Максим пулемётэныз. 1884 ар
- 1011 — Фирдоуси «Шахнаме» поэмазэ гожтыса быдтӥз.
- 1669 — Этна вулкан кисьтӥськыны кутскиз (историысь тужгес бадӟымез кисьтӥськон).
- 1702 — Анна Стюарт Англилэн, Шотландилэн но Ирландилэн королеваез луиз.
- 1722 — Пётр I косэтэзъя, Санкт-Петербургын куазез яланлыко эскеронъёс кутскизы.
- 1809 — Крыловлэн басняосын нырысетӥ книгаез потӥз.
- 1888 — полигонной испытаниос мыныку, император Александр III Максим пулемётысь кӧня ке пол ыбыса эскериз, со дырысен росси армииез та ожтӥрлыкен вооружить карыны косэмын.
- 1900 — «Мир искусства» художественной огазеяськонлэн Уставез юнматэмын.
- 1910 — Копенгагенын Социалистической Интернационаллэн Пуктэмезъя, 8-тӥ южтолэзь нылкышноослэн калыккуспо нуналэнызы ялэмын.
- 1914 — «Работница» журналлэн нырысетӥ номерез потӥз.
- 1917 — 23-тӥ тулыспалэ (вуж стилья) 8-тӥ южтолэзе (выль стилья) Петроградын «Хлеба и мира!» лозунгъёсын нылкышно демонстрациос ортчизы. Мукет нуналаз соос борды Путиловской заводысь ужасьёс итӥськизы. Полициен вачевуонъёс кутскизы. Со Февраль революцилэн кутсконэз луиз.
- 1924 — СССР но Греция вискын дипломатической кусыпъёс тупатэмын.
- 1940 — Пермь карлы Молотов ним сётэмын.
- 1941 — кылдытэмын Лётно-исследовательской институт (М. М. Громов нимо ЛИИ). Солэн нырысетӥ кивалтӥсез Совето Союзлэн героез М. М. Громов вал.
- 1950 — СССР атомной бомба кылдытэмез сярысь ялӥз.
- 1952 — Пенсильвания госпитальысь эмчиос Филадельфиын нырысьсэ «искусственной сюлэм» аппаратэз уже кутӥзы.
- 1965 — Нылкышноослэн калыккуспо нуналзы шутэтскон нуналэн ялэмын.
- 2014 — Malaysia Airlines авиакомпанилэн Boeing 777 самолётэз чиптэм-чаптэм ышем.
Вордскизы
Удмуртиысь тодмо муртъёс
- 8-тӥ южтолэзе — Чарушин, Иван Аполлонович — Кам котырысь но Урал азьысь каръёсты ӝутонын шӧдскымон инты басьтэм ӟуч инженер-архитектор. Со азьвыл Ватка губернилэн интывылаз 500-лэсь трос юртъёс но сооружениос малпаз, ог куиньмос люкетэз туала Удмуртилэн музъем вылаз интыяськемын. Чарушин (куддыр мукет архитекторъёсын ӵош) 67 из но 98 пу черкъёс пуктӥз, соос пӧлысь 53-ез — Удмуртиын.
- 1872 — Прокопий Алексеев, Ижысь пыӵал поттон заводысь сӥё-дано ужась.
- 1924 — Василий Таначев, Сарапул ёросысь Быдӟым Атыкай оже пыриськись, Совето Союзысь Герой.
- 1937 — Виктор Сыркин, историк, Глазысь педагогикая кун институтысь дышетӥсь.
- 1955 — Владимир Никешкин, Росси Федерациысь Следственной комитетлэн Удмурт Элькунысь кивалтӥсез.
- 1994 — Ульяна Кайшева, Удмуртиысь биатлонист.
Россиысь но дуннеысь тодмо муртъёс
- 1894 — Вяйнё Валдемар Аалтонен, финн скульптор.
- 1914 — Яков Зельдович, совето физик.
- 1915 — Тапио Раутаваара, финн кырӟась, актёр но спортсмен.
- 1929 — Эбе Камарго, Бразилиысь журналист, актёр но кырӟась.
- 1941 — Алексей Мишин, СССР-ысь но Россиысь фигурной нискыланъёсъя тренер.
Кулӥзы
Удмуртиысь тодмо муртъёс
Россиысь но дуннеысь тодмо муртъёс
ООН — Нылкышноослэн калыккуспо нуналзы.
Малайзия — султанлэн нуналыз.
