Васев, Леонард Михайлович

Википедиысь материал
Рувикиын таӵе фамилиен мукет муртъёс сярысь гожтосъёс вань. Учке: Васев.
Леонард Михайлович Васев
Васев, Леонард Михайлович.png
Вордӥськем нуналыз 18-тӥ коньывуонэ 1927(1927-10-18)
Вордӥськем интыез Свердловск улосысь Косой Брод
Кулон нуналыз 1972(1972)
Кулэм интыез Ижкарын
Кун
Ужудысэз оружейник-гравёр
Данъетъёсыз

Удмурт АССР-ысь калык суредась (1971).

Леонард Михайлович Васев (куд-ог источникъёсъя Васёв[1]; 1927-тӥ арын 18-тӥ коньывуонэ Свердловск улосысь Косой Брод — 1972-тӥ арын 8-тӥ южтолэзе Ижкарын) — урал усточи-самородок, куд-ог авторъёслэн малпамзыя — ассэ ачиз дышетэм мурт[2][3], оружейник-гравёр, ювелир, пыӵалтӥрлыкез чебер пужыятонэн выриз, Ижысь пӧртэм буёлъёслэсь, материалъёслэсь кортэз чеберъян школалы инъет сётӥсь луиз. Удмурт АССР-ысь калык суредась.

Улон сюресэз

Леонард Васев 1927-тӥ арын 18-тӥ коньывуонэ Свердловск улосысь Косой Брод черкогуртын крестьян семьяын вордӥськиз. Куать аресказ анай-атайёсыныз ӵож Ижкаре улыны выжиз[4].

1942-тӥ арын 74 номеро заводлэн штампъёс лэсьтонъя мастерскояз (али — Ижмаш завод) гравёрлы дышетскись луыса ужаны кутскиз. 1944-тӥ арын шер пӧйшуран пыӵалъёс лэсьтон бордын тыршиз.

1945-тӥ арын вооружениея наркомлэн воштӥсез ӧтемъя Муское вуиз но, сое 1946-тӥ арын совето оружейникъёслэн группаенызы ӵош Германиысь Зуль карысь «Меркель агайёс» фирмалэн немец пыӵалтӥрлык поттон заводаз тодон-валанзэ муромытыны келязы. Адольф Шаде но Пауль Грейфцу усточиос дорын дышетскиз[5][6][7]. Командировкаысь берытскемез бере Васев гравировкаын аспӧртэм амалъёс малпаз: чибориё дуно кортъёсты но ӵыжатэмъёсты пужыятӥз, зэмос картинаос пӧрмытъяз, «пужмертэм» техникаез уже кутӥз.

1954-тӥ арын сое Ижысь механикая заводэ выжтӥзы[8], татын, кык ар ортчыса, пыӵалтӥрлык чеберъянъя школа усьтӥськиз. Васевез гравёръёслэн группазылы инструкторе юнматӥзы. Огез тодмо луэм дышетскисез — Ижкарлэн дано муртэз Белобородов Валентин Михайлович.

1956-тӥ арын азьвыл ыштэм-вунэтэм дуно кортъёслэсь «ваёбыж» амалъя чуръёс лэсьтон борды басьтӥськиз.

Творчествоез

Пыӵалъёсты чеберъян амалъёсты умоятонлы но выльдонлы трос кужымзэ сётӥз, чибориё дуно кортлэсь но соослэсь ӵыжатэмъёсты чеберъян амалэз улӟытӥз. Нырысьсэ чеберлыко пыӵалзэ 17 аресказ лэсьтӥз, со Быдӟым Атыкай ожын вормонлы сӥзем «ИжБ-36» пӧйшуран пыӵал луиз[9]. 1957-тӥ арын кылдытӥз но практикаын быдэстӥз пужмер тусо пужыез («кынтэм пужы» амалъя лэсьтэм гравировка озьы нимаське). Уно чеберъям пыӵалтӥрлыкъёсыз пӧлысь огез — со «Спорт» нимо ИЖ-54  [ӟуч] (удм. пӧйшуран пыӵал (пыӵалэз бичась усточи — Л. Я. Пахомов), со В. И. Ленинлы но Октябрьлы 50 ар тырмонлы сӥземын, Монреальын ортчем «Экспо-67  [ӟуч] (удм.» дунневыл адӟытонын возьматэмын вал, отӥяз Оружейной палатае  [ӟуч] (удм. сётэмын.

Пыӵалъёсты резина штампъёслэсь чеберъян электроэрозияя амалэз малпаз но улонэ пыӵатӥз.

Леонард Васев дуннеын нырысь ик, вылды, ӵыжатэм дуно кортъёслэсь луонлыксэс адӟыса, кортъёслэсь буёлзэс пыӵалтӥрлык чеберъянын кутыны кутскиз. Композициоссэ быдэстыкуз, со чеберлыкез валаса, тема бырйыса уж борды кутскылӥз, дуно кортъёслэсь но ӵыжатэмъёслэсь луонлыкъёссэс буёл сётонын но вужер кылдытонын кутылӥз[10].

Гравировкаен вырон сяна, кылбуръёс гожъялляз[11], скульптураос лэсьтылӥз, живописен но графикаен выриз, синпель кузьымъёс но медальёс пӧрмытъяз[2]. Ог вакытэ Удмуртиысь книгапоттонниын суредась луыса тыршиз, отӥяз аслаз ӧраз ик берытскиз[5]. Ужъюлтошъёсыз пӧлын со «Милям Леонардомы» кушемнимын тодмо вал.

УАССР-лэн Вылӥ Кенешезлэн Президиумезлэн 1971-тӥ арын 17-тӥ гудырикошконэ юнматэм Указэныз Леонард Васевлы УАССР-ысь дано суредась ним сётэмын. Ар ортчыса, 8-тӥ южтолэзе, со улонысь кошкиз[2].

Буре ваён

Буре ваён мемориал пул
  • Леонард Васевлэсь нимзэ «Ижысь механикая завод» ФГУП бордын ужась 1956-тӥ арын усьтэм пыӵалэз чеберъянъя школа нуллэ[10];
  • Ижысь механикая заводысь усточи оружейникъёслэсь ужан йылолъёссэс утён но егитъёслэсь ужаны мылкыдзэс ӝутон вылысь предприятие арлы быдэ Леонард Васевлы сӥзем творческой ужъёсъя сӥзем «Зарни штихель» конкурс радъя[3];
  • М. Т. Калашников нимо фонд кичӧлтэмъя но коньдонэн юрттэмъя, 2022-тӥ арын Леонард Васевез буре ваён мемориал пул усьтэмын[12].

Тодэ ваёнъёс

Дано совето конструктор-оружейник М. Т. Калашников аслаз мемуаръёсаз Леонард Васев сярысь тазьы тодаз вае:

<…> Пыӵалтӥрлыклэн эстетикаез сярысь малпаськыса, тодам вайисько адӟем карымон урал усточиез, зарни дурись самородокез Леонард Михайлович Васевез. Соин монэ эшлыко кусыпъёс герӟаллязы < … > Тужгес но сюлэмыя Васевлэн аспӧртэм чеберлыко амалъёсын котыр дуннелэсь чеберзэ возьматӥсь сюжетъёсъя лэсьтэм мотивъёсыз но орнамент пужыосыз. Нюлэскы ветлэмез, пӧйшуранын дыръяз адӟем изьверъёс, тылобурдоос, турын-куаръёс сярысь мадемъёссэ кылзыны кылдылӥз. Отӥяз, ваньзэ тае пыӵалысь корт вылын пужыятэм композициосысь синйылтыса, суредасьлэн малпанъёсызлы но фантазиезлы туж паймылӥ. Лудкеч но койык, дукъя но кыр сяла, ӟичы но гондыр — ваньзы таос Леонард Михайловичлэн пужыосаз кыӵе ке бурдъяськем мылкыдъёсын, асьсэ шӧдонъёсын, воксё улэпесь кадь быдэстэмын. <…>

— [13]

Ижысь мукетыз пыӵалтӥрлык лэсьтонъя конструктор Николай Леонтьевич Изметинский егит Леонардэз тазьы буре вае:

Леонард арлыдоос, пересь гравёръёс пӧлын, шуыны луоз (пиналъёсыз фронтын вал), аслаз егитэныз но шара луэменыз висъяськылӥз Солы соку 17 арес гинэ вал ай. Тодам кылиз шаян шулдыр учкемез. Тужгес но син шоры йӧтылӥз озьы учкемез, куке со уж вискын шудыса кадь сьӧд няньлэсь ымныръёс капчиен лякылӥз, отысь тодманы луылӥз Кукрыниксысь суредъёсъя карикатура амалэн быдэстэм куинетӥ рейхысь фюреръёсты: Гитлерез, Геббельсэз, Герингез но мукетъёссэ. Шуылӥз кадь: «Учке, мар мон быгатӥсько, нош тӥ?» Пересьёс Васевез туж шунытэн, юн гажаса но яратыса пумиталлязы шуыса, зол шӧдӥськылӥз. Соос пӧлысь котькудӥз сокем капчиен карикатураысь мунёосты чебер пӧрмытыны ӧз быгатылэ.

— [11]

Валэктонъёс

  1. ↑ Ломаева Л. Школа мастерства [ӟуч] // Калашников : журнал. — 2005. — Май (№ 06). — С. 76.
  2. ↑ 1 2 3 Юлия Стерхова Душа, воспетая в металле [ӟуч] Журнал «Деловой квадрат». Эскеремын 2016-08-22 арын
  3. ↑ 1 2 Школа ружейного мастерства: сохраняя и приумножая традиции [ӟуч] Известия Удмуртской Республики. Эскеремын 2016-08-22 арын
  4. ↑ Евгений Шумилов Легендарный Леонард – ижевский златокузнец, поэт, охотник и бунтарь Удмуртская правда.
  5. ↑ 1 2 Васев Леонард Михайлович (1927—1972) Издательство охотничьей литературы ЭРА. Эскеремын 2024-07-09 арын
  6. ↑ Возрождение (Производство охотничьего оружия в СССР в годы войны) [ӟуч] Магия охотничьего оружия. Эскеремын 2016-08-22 арын
  7. ↑ Л. Г. Ломаева, М. Е. Драгунов. Лирика души и конструктивизм мышления // Калашников. Оружие, боеприпасы, снаряжение. — 2007. — № 11. — С. 42—46.
  8. ↑ Биография Л. М. Васева в разделе «Выдающиеся люди Ижмаша» на сайте концерна «Калашников» Архивная копия от 25 коньывуонэ 2014 на Wayback Machine
  9. ↑ Валеева Г. Мастера оружейного дела [ӟуч] // журнал «Калашников». — 2015. — № 3. — С. 54—58.
  10. ↑ 1 2 Людмила Ломаева, Михаил Драгунов. Неподражаемый [ӟуч] // Калашников : журнал. — 2008. — Южтолэзь. — С. 18—21. Архивировано 25 гудырикошконэ 2016 арын.
  11. ↑ 1 2 Изметинский, Николай Леонтьевич. Леонард Васев: О судьбе выдающегося художника-гравера / Куликов, Кузьма Иванович, д.и.н.. — Ижевск: Удмуртский институт истории, языка и литературы УрО РАН, 2002. — 164 с. — 3000 экз. — ISBN 5-7691-1295-6.
  12. ↑ Открыта мемориальная доска легендарному директору ИМЗ Василию Чугуевскому Концерн «Калашников».
  13. ↑ Калашников М.Т. Записки конструктора-оружейника. — Москва: «Воениздат», 1992.

Литература

  • Шумилов Е.Ф. Искусство ижевских оружейников. Граверы-оружейники, литейщики, ювелиры и медальеры XVIII—XX веков. — Ижевск: Издательство «Удмуртия», 1987. — 172 с. — 5000 экз.
  • Ломаева Л., Драгунов М. Лирика души и конструктивизм мышления [ӟуч] // журнал «Калашников». — 2007. — № 11. — С. 42—46.

Чӧлсконъёс

«https://udm.ruwiki.ru/w/index.php?title=Васев,_Леонард_Михайлович&oldid=507868»-ысь басьтэмын