Нылкышноослэн калыккуспо нуналзы

Википедиысь материал
Международный женский день
Нылкышноослэн калыккуспо нуналзылы сӥзем немец плакат 8-тӥ южтолэзе 1914-тӥ арын
Нылкышноослэн калыккуспо нуналзылы сӥзем немец плакат
8-тӥ южтолэзе 1914-тӥ арын
Юнматэмын в 1910 году
Пусъё арлы быдэ
Дырыз 8 марта
Логотип РУВИКИ.Медиа Медиафайлъёс РувикиМедиа пушкын

Нылкышноослэн калыккуспо нуналзы (8-тӥ южтолэзь, ӟуч: Международный женский день, англ. International Women’s Day)[1] — дуннеысь трос кунъёсысь праздник. Нырысь-валысь та нунал герӟаськемын нылкышноослэн правооссэс но луонлыкъёссэс паськытатон понна нюръяськонэнызы[2].

Нылкышноослэн равноправизы понна калыккуспо нуналзэс пусъён сярысь малпан кылдӥз ХХ даурлэн кутсконаз[3]. Нылкышноосты огазеянлэн кичӧлтӥсез вал Германиысь социал-демократ партилэн нылкышно группаезлэн азьветлӥсез Клара Цеткин.

18-тӥ толсуре ООН-лэн Генеральной Ассамблеяез A/RES/3010 резолюциез кутӥз, соя 1975-тӥ ар нылкышноослэн калыккуспо аренызы ялэмын вал[1]. 1977-тӥ арын ООН-лэн Генеральной Ассамблеяез A/RES/32/142 резолюциез кутӥз, соя юнматэмын вал Нылкышноослэн правооссы но ООН-лэн кунъёсыз-ёзчиосыз пӧлын тупаса улон понна нюръяськонъя калыккуспо нунал[3][4].

Та нуналэ дуннеысь пӧртэм кунъёсын калыккуспо огазеяськонъёс ортчыто нылкышноослэсь правооссэс но эрикрадъёссэс утёнлы, семьяын йыружъёслы пумитъяськонлы но равноправилы сӥзем протестъёс но митингъёс, куд-ог кунъёсын[2] — Франциын, Индиын, Кыргызстанын, Япониын, Германиын, Великобританиын, Таиландын, Италиын но мукет — соос сӥземын нетрадиционной сексуальной ориентациен адямиослэсь правооссэс утёнлы[5].

Россиын та нуналэ нылкышнолэн пусйымон интыезлы сӥзем сӥё-дано концертъёс но огъяросси акциос ортчыло[6]. Дышем сямъя 8-тӥ южтолэзе воргоронъёс нылкышноослы сяська кузьмало[7].

Историез

Нылкышноослэн калыккуспо нуналзылэн кылдэмез герзаськемын США-ысь нылкышноослэн секыт ужан условиослы пумит протестъёсынызы («Буш кастрюляослэн маршсы», 1857-тӥ ар, «Юртъерез чаклась нылкышноослэн маршсы», 1901-тӥ ар)[8]. 1908-тӥ арын 16-тӥ тулыспалэ Прогрессивной нылкышноослэсь огазеяськонзэс кылдытӥсь американ кышномурт Мод Мэлоун Нью-Йоркын текстиль удысын ужасьёслэсь маршсэс радъяз, нылкышноослэсь правооссэс гажаны но уждунзэс будэтыны курыса[3].

1910-тӥ арын 27-тӥ гудырикошконэ Копенгагенын ортчем ужась нылкышноослэн кыкетӥ калыккуспо социалистической конференциязы Германиысь социал-демократической партилэн нылкышно группаезлэн кивалтӥсез Клара Цеткин дэмлаз кылдытыны ужась нылкышноослэн правооссы понна нюръяськонын огкылысь луонлэсь дунневыл нуналзэ[9]. Солэн ӵектонэзлы дурбасьтӥзы 17 кунъёсысь огмуртъёс[4].

Та праздникез 8-тӥ южтолэзе (вуж сямъя 23-тӥ тулыспалэ) пусъён потӥз 1914-тӥ арын Германиысь, Даниысь, Нидерландыысь, Швейцариысь, Россиысь, США-ысь но мукет кунъёсысь нылкышноос ӵапак та нуналэ митингъёсы потэмысь[10].

1917-тӥ ар бере праздникез тросгес пусйизы социалистической кунъёсын. Кылсярысь, Китайысь коммунистъёс сое 1922-тӥ арысен пусйизы, нош Испаниысь — 1936-тӥ арысен[11].

18-тӥ толсуре ООН-лэн Генеральной Ассамблеяез A/RES/3010 резолюциез кутӥз, соя 1975-тӥ ар нылкышноослэн калыккуспо аренызы ялэмын, нош 1976-тӥ арысен 1985-тӥ арозь вакыт — нылкышноослы сӥзем калыккуспо дас ар (десятилетие)[1]. 1977-тӥ арын ООН-лэн Генеральной Ассамблеяез A/RES/32/142 резолюциез кутӥз, соя юнматэмын вал ООН-лэн ёзчиосыз пӧлын нылкышноослэн правооссы но калыккуспо тупаса улон понна нюръяськонъя калыккуспо нунал[3][4].

1978-тӥ арын 27-тӥ шуркынмонэ Парижын ЮНЕСКО-лэн Генеральной конференциезлэн 20-тӥ сессиез дыръя кутэмын вал 20 C/13.2 резолюция, соя ӵектэмын вал Нылкышноослэсь калыккуспо нуналзэс 8-тӥ южтолэзе пусйыны[4][9].

Россиын но СССР-ын кылдэмез

Петроградысь кышномуртъёслэн демонстрацизы23 тулыспалэ (8 южтолэзе) 1917-тӥ арын

Россиын Нылкышноослэн калыккуспо нуналзы герӟаськемын Петроградысь ужась нылкышноослэн 1917-тӥ арын 23-тӥ тулыспалэ (8-тӥ южтолэзе выль стилья) демонстрациосынызы. Ӵапак со нуналэ нылкышноос, большевик партилэн центральной комитетэзлэн ӧтёнэзъя, равноправие понна, сютэм улонлы но ожлы пумит куронъёсын потӥзы. Та ужрадъёс ортчизы Февраль революцилэсь азьвыл[12].

Кыкетӥез социалистической калыккуспо нылкышно конференция ортчиз Копенгагенын 27-тӥ гудырикошконэ Кыкетӥ интернационаллэн Тямысэтӥ конгрессэз улсын

1921-тӥ арын Кыкетӥ коммунистической нылкышно конференцилэн пуктэтэзъя Нылкышноослэсь калыккуспо нуналзэс 8-тӥ южтолэзе пусйыны малпазы, Петроградысь кышномуртъёслэсь 1917-тӥ арын демонстрацие пыриськемзэс тодэ вайыса[13].

СССР-ын Нылкышноослэн калыккуспо нуналзы огъясоюз праздник луиз, кудӥз данъяз совето кышномуртэз — коммунисткаез, ужасез но анаез. СССР-ысь Вылӥ Кенешлэн президиумезлэн 1965-тӥ арын 8-тӥ куартолэзе поттэм косэтэзъя со нуналэз шутэтскон нуналэн ялӥзы[9].

СССР куашкам бере но 8-тӥ южтолэзь Россиын йӧскалык праздник кылиз но 2001-тӥ арын 30-тӥ толсурлэсь Россиысь Уж кодексъя шутэтскон нунал луэ[4]. Дыр ортчемъя та празднике кутскизы ӟечкыланы вань нылкышноосты но нылъёсты семья пушкын, уж дурын но дышетскон интыосын[14].

Дуннеын пусъён

ООН-лэн Генеральной Ассамблеяез 1977-тӥ арын Нылкышноослэн правооссы но ООН-лэн кунъёсыз-ёзчиосыз пӧлын тупаса улон понна нюръяськонъя калыккуспо нунал ялэмез бере[15][4] ООН-ын арысь аре (2000-тӥ арысен) нимысьтыз пусъем тема улсын ужрадъёс ортчо. Кылсярысь, 2021-тӥ арын со вал «Кивалтӥсь нылкышноос: COVID-19 вакытэ огкадь правоен азьланяз вамыштон»[16]; 2022-тӥ арын — «Гендерной огкадьлык туннэ экология удысын ӵуказе азинсконъёс понна»[17]; 2023-тӥ арын — «DigitALL: гендерной огкадьлык понна инновациос но технологиос»[18].

Европаысь феминизмлы пумит 8-тӥ южтолэзьлы сӥзем протестъёс

СССР куашкам бере 8-тӥ южтолэзез пусъён сям кылиз кӧня ке азьвыл совето республикаосын — Армениын, Грузиын, Казахстанын, Киргизиын, Молдавиын, Азербайджанын, Узбекистанын, Украинаын, Абхазиын, Белоруссиын но мукет кунъёсын, отын та нунал шутэтскон нунал луэ (Латвиын, Литваын но Эстониын сяна)[4][19].

Нылкышноослэсь калыккуспо нуналзэс пусъё Вьетнамын, Монголиын, Кубаын но мукет кунъёсын. Озьы ик со пусйиське Китайын — отын 8-тӥ южтолэзе нылкышноослэн ужан нуналзы вакчиятэмын[4][19].

Таджикистан элькунлэн азьмуртэзлэн Эмомали Рахмонлэн косэтэзъя кунын та праздник 2009-тӥ арысен пусйиське нылкышно-анайёсты, егитъёслэсь наставникъёссэс данъяса но Анайлэн нуналыз шуыса нимаське[20].

Туркменистанын Нылкышноослэн калыккуспо нуналзы 2007-тӥ арысен гинэ пусйиське — нылкышно праздниксэс отын 21-тӥ южтолэзьлы выжтӥзы вал (тулыс равноденствие нуналлы) но огазеязы Наврузэн — тулыслэн йӧскалык праздникеныз. Но анаез данъян туркмен калыклэн одӥгез валтӥсь сямыз луэмен, 2008-тӥ арын толшоре Туркменистанлэн президентэз Ужъя кодексэ воштонъёс пыртӥз, соин ик та праздникез пусъён сям нош ик берытскиз[21].

Грузиын 1991-тӥ арысен Нылкышноослэсь калыккуспо нуналзэс воштӥзы Анайлэсь нуналзэ пусъёнэн (3-тӥ южтолэзе). 2002-тӥ арын Кун Кенешсы праздникез выльысь берыктӥз. Табере Грузиын Нылкышноослэсь калыккуспо нуналзэс но, Анайлэсь нуналзэ но пусъё[22].

СССР куашкам бере Латвиын Нылкышноослэн калыккуспо нуналзы шутэтскон нунал луэмысь дугдӥз. 2007-тӥ арын оштолэзе Сейм «Праздникъёс, буре ваён но пусйиськись нуналъёс сярысь» законэ воштонъёс кутӥз, соя Нылкышноослэн калыккуспо нуналзы официально пусйиськись праздник луиз.

Германиын Нылкышноослэн калыккуспо нуналзы 2019-тӥ арозь кун праздник ӧй вал, бӧрысь шутэтскон нуналлы пӧрмиз, но Берлинын гинэ. Та нуналэ нылкышноослы пумит йыружъёслы сӥзем но нылкышноослэсь правооссэс тӥянлы пумит демонстрациос ортчытъяны сям вань[23].

Италиын 8-тӥ южтолэзез (Ужась нылкышноослэн калыккуспо нуналзы) нылкышноослэсь ужзэс но правооссы понна нюръяськемзэс данъян нуналэз сямен пусъё. Соин ик тросаз учыръёсы та нуналэ нылкышноослэн эрикрадъёссылы сӥзем протестъёс, митингъёс ортчыло[24].

Нылкышноослэн калыккуспо нуналзы праздник луэ кӧня ке мукет кунъёсын но: Анголаын, Замбиын, Камбоджаын, Кенияын, Уйпал Кореяын, Мадагаскарын, Монголиын, Угандаын но Эритреяын. Лаосын та нунал нылкышноос понна гинэ ужантэм нунал луэ[4].

ООН-лэн юрттэменыз дуннеын нылкышноосын герӟаськем мукет праздникъёс но пусйисько: 11-тӥ тулыспалэ — Нылкышноослэн но нылъёслэн калыккуспо нуналзы наукаын, 15-тӥ коньывуонэ — Гуртысь нылкышноослэн калыккуспо нуналзы, 23-тӥ инвожое — Палкышноослэн калыккуспо нуналзы, 11-тӥ коньывонэ — Нылъёслэн калыккуспо нуналзы, 25-тӥ шуркынмонэ — Нылкышноослы пумит йыружъёсын нюръяськон калыккуспо нунал[7].

Россиын пусъён

Совето Союз куашкам бере но Нылкышноослэн калыккуспо нуналзы Россиын кун праздник но шутэтскон нунал кыле. Дышем сямъя, та нуналэ воргоронъёс нылкышноослы сяськаос но мукет кузьымъёс кузьмало, соослэсь бадӟым инты басьтэмзэс пусйыса[4].

Тол Универсиада-2019

Россиын 8-тӥ южтолэзе нылкышнолэн пусйымон интыезлы сӥзем сӥё-дано концертъёс, огъяросси акциос ортчыло[25]. Кылсярысь, Росси Федерациысь вань каръёсын ортче «Тӥледлы, яратоноосмы!» акция. Волонтёр огазеяськонъёсысь азьветлӥсьёс нылкышноосты праздникен ӟечкылало, ульчаосын, вокзалъёсын, аэропортъёсын, эмъюртъёсын, мерлыко учреждениосын сяськаос кузьмало[26].

8-тӥ южтолэзь понна «Огъя Россия» партия «Мусо нылкышноос понна» огъяросси марафонлы но «Тынад тулысэд» акцилы кутскон сётӥзы[27].

2022-тӥ арын 6-тӥ-8-тӥ южтолэзе Россиын дышем сямъя Нылкышноослэн калыккуспо нуналзылы сӥзем «Лулчеберетъя шутэтскон нуналъёс» (ӟуч: «Культурные выходные») огъяросси акция ортчиз. Со улсын кӧня ке музейёс дунтэк пырыны лэзё, нош 20 циркъёс (Санкт-Петербургысен Владивостокозь) «Шудо анай» акция улсын трос нылпиё семьяослы дунтэк спектакльёс возьмато[28].

Арлы быдэ 8-тӥ южтолэзе Росси Федерацилэн президентэз кун данъетъёсын пусъе Россиысь адӟем карымон нылкышноосыз — экономикалэн пӧртэм удысъёсаз бадӟым азинсконъёс ваем муртъёсыз[29].

Россиысь президентлэн Владимир Путинлэн кичӧлтэмезъя 2022-тӥ арын Россиын «Анай-героиня» дано ним выльысь улӟытэмын вал, со одӥгез вылӥ кун данъет луиз[30].

Нылкышноослэн калыккуспо нуналзы СССР-ысь маркаос вылын

Та праздниклы сӥзьыса, 1949-тӥ арын СССР-ын нимысьтыз почта маркаос поттэмын вал:

  • Маркаос
  • The Soviet Union 1949 CPA 1366 stamp (International Women's Day, March 8. Women in industry).jpg
  • The Soviet Union 1949 CPA 1367 stamp (International Women's Day, March 8. Preschool teaching).jpg
  • Stamp of USSR 1368.jpg
  • The Soviet Union 1949 CPA 1369 stamp (International Women's Day, March 8. School teaching).jpg
  • The Soviet Union 1949 CPA 1370 stamp (International Women's Day, March 8. Farm women).jpg
  • The Soviet Union 1949 CPA 1371 stamp (International Women's Day, March 8. Women sports champions).jpg
  • The Soviet Union 1949 CPA 1372 stamp (International Women's Day, March 8. Political leadership).jpg

Нылкышноослэн калыккуспо нуналзылы сӥзем нимаз маркаос СССР-ын пӧртэм аръёсы потазы (1947—1967 аръёс):

  • 1947-тӥ ар, 15 коп.

    1947-тӥ ар, 15 коп.

  • 1947-тӥ ар, 30 коп.

    1947-тӥ ар, 30 коп.

  • 1960-тӥ ар

    1960-тӥ ар

  • 1967-тӥ ар

    1967-тӥ ар

Валэктонъёс

  1. ↑ 1 2 3 Международный женский день ЮНЕСКО.
  2. ↑ 1 2 Козлова Н. Н. Международный женский день 8 Марта как инструмент формирования советской политической культуры // Женщина в российском обществе : журнал. — 2011. — № 1.
  3. ↑ 1 2 3 4 Международный женский день (8 марта) ООН.
  4. ↑ 1 2 3 4 5 6 7 8 9 10 История Международного женского дня ТАСС.
  5. ↑ Копчугова А., Полякова В. Акции на 8 Марта в разных странах РБК.
  6. ↑ Присоединяйтесь к Всероссийской акции «Вам любимые!» Региональный центр патриотического воспитания.
  7. ↑ 1 2 Бобович А. В каких странах 8 Марта – государственный праздник? Аргументы и Факты.
  8. ↑ Шпаковский Ю. Г. Главный праздник весны // Вестник Университета имени О. Е. Кутафина : журнал. — 2022. — № 3.
  9. ↑ 1 2 3 Осипян А. 8 марта: как появился день борьбы за женские права РБК.
  10. ↑ Бондарь В. 8 Марта ежегодно отмечают Международный женский день Владивостокская централизованная библиотечная система.
  11. ↑ Nelson J. International Women's Day: a centenary to celebrate History Workshop Online. Эскеремын 2023-09-04 арын
  12. ↑ Андреева Е. М., Жемальдинова А. Ш. РОССИЯ. ГОД 1917: к 100-летию Великой русской революции: библиографические указатели книг. — М.: ЦУНБ им. Н. А. Некрасова, 2017. — 134 с.
  13. ↑ Сидорчик А. Праздник, которому рады не все. Как 8 Марта отвоевывало право на жизнь Аргументы и Факты.
  14. ↑ Радулова Н. День рождения феминизма // Огонёк. — 2008. — № 10 (5037). — С. 62. Архивировано 11 тулыспалэ 2010 арын.
  15. ↑ Международный женский день (8 марта) ООН.
  16. ↑ Заявление Верховного комиссара ООН по правам человека Мишель Бачелет по случаю Международного женского дня ООН.
  17. ↑ Международный женский день 2022 Гендерное равенство ради устойчивого будущего ООН.
  18. ↑ Инновации и технологии для обеспечения гендерного равенства ООН.
  19. ↑ 1 2 Международный женский день РИА Новости.
  20. ↑ Международный женский день - «День матери» Таджикский государственный медицинский университет.
  21. ↑ Сердар Бердымухамедов поздравил женщин и девушек Туркменистана с 8 марта Turkmenportal.
  22. ↑ Левшиц Н. 8 марта в Грузии официально выходной день Nikolai Levshits.
  23. ↑ 8 марта в Германии Auf Deutsch.
  24. ↑ Международный день трудящихся женщин Клуб любителей Италии "Моя Италия".
  25. ↑ Присоединяйтесь к Всероссийской акции «Вам любимые!» Региональный центр патриотического воспитания.
  26. ↑ Всероссийская акция "Вам, Любимые!" Dobro.ru.
  27. ↑ «Единая Россия» проводит акции к Международному женскому дню по всей стране Единая Россия.
  28. ↑ Около 6 тысяч мероприятий пройдут в рамках акции «Культурные выходные» Минкультуры России.
  29. ↑ Путин вручил женщинам госнаграды Интерфакс.
  30. ↑ Колесников А. Международный женский друг Коммерсант.

Чӧлсконъёс

«https://udm.ruwiki.ru/w/index.php?title=Нылкышноослэн_калыккуспо_нуналзы&oldid=485504»-ысь басьтэмын