19-тӥ толшор — Григориан дырпусъя — арлэн 19-тӥ нуналыз. Выль арозь 346 нунал кылемын (касьян аре — 347 нунал).
☀️ Ижкарын Шунды 8 час 37 минутэ ӝужа, пуксе 16 час 16 минутэ. Югыт нуналлэн кыстӥськемез 🕒 7 час 38 минут.
🌑 Выль толэзь (будэмез 0.55 нунал).
Нунал тодметъёс
Удмурт калык сямъя туннэ Куинь ошмесысь «улэп» ву ваён, Йӧвылэсултон нунал. Та нуналэ вулэн гинэ ӧвӧл, лымылэн но пайдалыко кужымез шӧдӥське шуо. Ӟечез мед лыктоз но уродэз мед кошкоз шуыса, туннэ укно-ӧсъёсты ӝамдэлы усьяны косо. Та нуналэ бызем-кышнояськем паръёс быдэс улонзэс шудо луозы шуо. Кин, пе, та нуналэ синвуаське, со быдэс арзэ бӧрдоно луоз. Та нуналэ уг яра ужаны.
- Туннэ лымыяз ке — ю-нянь удалтоз.
- Туннэ куазь шундыё ке — гужем пӧсь но кӧс возиськоз.
Нимнуналзэс пусъё
Праздникъёс но буре ваён нуналъёс
- Богоявление (Крещение Господне), Йӧвылэсултон (диал. Толъюон)
Исландия — Кузпаллэн нуналыз.- Белоруссия
Белоруссия — Юрттэт сётон удысчиослэн нуналзы.
Луэм учыръёс
Удмуртиын
- 1917 — Кам вамен Сарапул вӧзын чугун сюрес вамен выж лэсьтэмын.
- 1988 — Можгалан егит художникъёслэн творческой огазеяськонзы кылдытэмын.
- 1989 — Удмурт АССР-ын берпуметӥез калыкез лыдъян-чотан йылпумъяськиз.
Россиын но дуннеын
- 1388 — Ордаысь пегӟыса, куинь ар ӵоже мурт музъемъёсти костаськемез бере, Дмитрий Донскойлэн пиез князь Василий Москвае вуиз.
- 1728 — ӟуч император Пётр II но солэн дворез Москвае выжиз.
- 1817 — Сан-Мартин генерал ас армизэ Анды гурезь пыр выжтыны кутскиз.
- 1853 — Римын Вердилэн «Трубадур» операезлэн премьераез ортчиз.
- 1903 — нырысетӥ велогонка — «Тур де Франс» ортчытон сярысь ялэмын.
- 1919 — Граждан ож вакытэ Горд арми Полтаваез, Славяносербскез но Дебальцевоез киултӥз.
- 1920 — Мускоын МГУ юрт вӧзын Герценлы но Огарёвлы сӥзем синпелетъёсты инъян ужрад ортчиз.
- 1942 — совето армия Можайск, Верея но Кондрово улон интыосты мозмытӥз.
- 1943 — РСФСР-ын Ульяновск улос кылдытэмын.
- 1945 — совето войскоос Лодзьысь геттоез мозмытӥзы.
- 1963 — «The Beatles» группаез нырысьсэ телевидени пыр возьматӥзы.
- 1966 — Индира Ганди Индиысь премьер-министр луиз.
- 1977 — Майами но Багама шормуӵъёсын лымы усиз.
- 1978 — Эмденысь заводлэн конвейерысьтыз берпумез «Фольксваген-Бокро» васькиз.
- 1991 — Саддам Хусейнлэн косэмезъя Персид вукоже 816 сюрс тонна мувӧй кисьтэмын.
- 1995 — росси ожгарчиос Грозныйын президент дворецэз киултӥзы.
- 2000 — Игорь Лебедев — Владимир Жириновскийлэн пиез, атайзэ воштыса, ЛДПР-лэн думской фракциезлэн азьветлӥсез луиз.
Вордӥськизы
- Удмуртиысь тодмо муртъёс
- Россиысь но дуннеысь тодмо муртъёс
- 1736 — Джеймс Уатт, Шотландиысь изобретатель-механик, паровой машинаез кылдытӥсь.
- 1747 — Иоганн Боде, немец астроном, Берлинысь наукаосъя академилэн ёзчиез.
- 1809 — Эдгар По, Америкаысь гожъясьчи, кылбурчи, литературной критик но редактор.
- 1839 — Поль Сезанн, Франциысь художник-постимпрессионист.
- 1863 — Александр Серафимович, ӟуч но совето гожъясьчи («Железный поток»).
- 1865 — Валентин Серов, ӟуч живописец но график.
- 1897 — Пааво Талвела, финн ожгар ужась, пехоталэн генералэз, «Лапуа» движенилэн йырыз.
- 1900 — Михаил Исаковский, совето кылбурчи («Катюша»).
- 1912 — Леонид Канторович, совето математик, экономист, Нобель премилэн лауреатэз.
- 1925 — Азат Аббасов, бигер оперной кырӟась, СССР-ысь калык артист.
- 1943 — Дженис Джоплин, Америкаысь рок кырӟась.
- 1972 — Сергей Михалок, белорус кырӟась но композитор, «Ляпис Трубецкой» группаез кылдытӥсь.
- 1974 — Влад Сташевский, Росси эстрадаысь поп кырӟась.
- 1979 — Светлана Хоркина, Россиысь гимнастка, кык полъем олимпи чемпионка.
Кулӥзы
- Удмуртиысь тодмо муртъёс
- Россиысь но дуннеысь тодмо муртъёс
- 1865 — Пьер Прудон, Франциысь публицист, экономист но социолог, анархизмлэн инъясьёсыз пӧлысь одӥгез.
- 1968 — Владимир Серов, совето живописец но график.
- 1971 — Николай Рубцов, ӟуч совето кылбурчи.
- 2007 — Мурат Насыров, совето но казах кырӟась но крезьгурчи.
- 2009
- Станислав Маркелов, Россиысь адвокат, правоез утись но антифашист.
- Анастасия Бабурова, Россиысь журналист но антифашист.
